Bi 8
Thonji dyi, Bi 8 ddo 1
Longanodha dhi buku ndingʉeni ke njí Yova do nji ná ndrŭ dho ndirigoti bbo ngaddi ke ró dho djo ná ndrŭ dho.—Mal. 3:16.
Yova ndingʉe ró dho ndidhó “longanodha dhi buku nǎ” nari ngʉe, nì ndi do nji ndirigoti nì ngaddi ndi ró dho djo ndima dhó lotidha chulu ná ndrŭ. Nde, ni ká ngaddi Yova njingʉeri fø dho ná ddikpa lo djo ddi? Ko tso nǎ lo adi ko thí nǎ kʉ ná lo dhǒ. Yesu pongʉeri ɨ: “Le tso adi le thí nǎ lɨ ná lo d’ra.” (Mt. 12:34) Yova jiri ngbà ji ndi ná ndrŭ ká si choro nŭnŭ di ná shinga ba ø dz’ djó. Ngbaribbai ma ko loti nari ka ndi dhǒ Yova ká ka ndi u kodhó madha tso u inga nzá ma nari. (Yak. 1:26) Nzá ji Mungu ná nja ndrŭ adi loti thø na, nga nǎ zølo ro, ndirigoti nodha na. (2 Ti. 3:1-5) Ko nzá jiri ro ko njini fø ndrŭ bbai ri. Ko jirie ri bbo ko bbʉ hwè Yova thí dho kodhó lotidha chulu. Nde, Yova nyǒ ká kodhi lo ka ndi tho bbʉbbʉ, njati ko di loti hwè na kodhó njudha dhi ngana inga lo ko d’ra ná ngana, ro ko di loti nga nǎ zø ro ndirigoti nga nǎ jidha ro kodhó familia nǎ nzɨ nja ndrŭ ko nja ná saa na ro?—1 Pe. 3:7. w22.04 5 §4-5
Mbʉnji dyi, Bi 8 ddo 2
Ri si fø ndumba ndrondro ndirigoti kpa si le bba nga dhó ritsi ro ndirigoti ngaro ndirigoti kpa si le ró nyó à ǎ ndirigoti kpa si le bɨ lú kazz na.—Ufu. 17:16.
Mungu li fø ngaddidha kumi d’yø kʉ ná zǎ ma, tsó nǎ zǎ ma na thí nǎ ndiro kpa sa Bbò babiloni d’e. Bbʉbbʉ dhé, Yova si dz’ djó ndrŭ tsɨ cho ndiro ndima njinjí bbo pli dzá kakanga kʉ ná tso nǎ zǎ na, ná føri i kʉ ONU ndiro ndima leni kali dhi dini ro ndirigoti ndima sa ri sa d’e. (Ufu. 18:21-24) Fø lo na mana ká kʉ addu ko dho? Ringani ko b’o kodhó “madha ronga ndi é tse ndi tse ro ndirigoti ngadhi nzidha ro Mungu nyǒ njí.” (Yak. 1:27) Ko nzá ka ko bbari che kʉ ná mafundisho ma, wapagani dhó fete ma, nga kʉ bblo ná nyi ma, Bbò Babiloni nǎ ndrŭ loti gó na nari ma na sa Mungu dho ko bbʉ ná madha ri! Ndirigoti ringani ko d’rari ndrŭ “tuni ri nǎ ro” ndiro nzɨ Mungu si kpa nja Bbò Babiloni dhó kosa na gba ndima tso ná ndrŭ ró.—Ufu. 18:4. w22.05 11 §17; 14 §18
Zanji dyi, Bi 8 ddo 3
Ma si loti Yova dhó chi kʉ ná jidha dhi njí djo.—Isa. 63:7.
Gø dhi ndrŭ, anine njonjo kʉ ná chu ndiro ni ddi longa nidhi nzø dho Yova djo ndirigoti ke nji ni dho ná njonjo kʉ ná bblo ritsi djo d’e. (Kum. 6:6, 7) Fø ni rinji nari kʉ bbo na mana kʉ ná lo njati rie njonjo nidhó dini kʉ nari dho nzɨ ri ka ni tilo bí ina abba nidhi nzø na ri ró. Christine ró dho kʉ ná le-ve pori ɨ: “Ma nzɨ adi Yova djo ma ka ma tilo ná chu ro ba bí ri, nì mai ri kʉ føro ma adi rine ma tilo ngodhé ngbà ma ba ná saa na ke djo.” Føri kina, adi bblo loti Yova dhó tengenezo djo ndirigoti ni djoi ma, ni vei ma na djo. Nzɨ di che loti wazee djo. Wazee djo ni ti ná lo ka ndi kó nidhi nzø tsotso ndiro kpa tilo wazee na ndima dhó lo ji le tsotsokodha ná saa na. Aliri ni bbá dza nǎ é ngoi. Krʉ saa ró adi ridho ni bbá ke dho ndirigoti nidzá nzø dho ni ji kpa ji. Adi loti ni bbá ke dho hwè na ndirigoti heshima na, avu nidzá nzø ndiro kpa maddi di rinji fø d’e. Fø ni rinji nari na, ni rili ni bbá dza nǎ é ngoi ndirigoti nzø chu lo bbo Yova djo.—Yak. 3:18. w22.04 18 §10-11
Yenga dyi, Bi 8 ddo 4
Ma chu ni nji ná lo chu.—Ufu. 3:1.
Yesu chongʉe Efeso nǎ kutaniko dho ná imba (ujumbe) ridho nari kʉ kpa ngʉe ngatsovedha na ndirigoti kpa ngʉ ra anzi Yova dho ndima njínji nari na, nì mai kpa ngʉ bani njonjo kʉ ná kpakpalo na ro. Nì mai ri kʉ føro, kpa vingʉe ya kwanza ndima ngʉe na ná jidha vi. Riengani kpa njí kpakpanga fø jidha ki ngʉ vi, ro kpa njieri fø nzá ró Yova nzá ka ndi ue kpadhó madha tso ri. Føri bbai njʉ ngatsovedha kina, ringani ko njí nja lo maddi. Ringani ko ve ngatso bblo kʉ ná lo dho. Kodhi Mungu nyǒ adi tho nari nga kʉ addu ma ko nji nari dhé ri, ro ri kʉ addudho ma ko rinji nari. Ko ronga adi cho ná lo kʉ mana na bbo ke dho dhonalo ke adi riji ko bbʉ madha ndi dho jidha dzá lo dho ndirigoti mbai ko po ndi dho nari dzá lo dho. (Mez. 16:2; Mk. 12:29, 30) Ringani ko di kere. Sardi nǎ ngʉe ná kutaniko nǎ ndrŭ ngʉ bani njonjo kʉ ná kpakpalo na. Ngbà mai kpa njingʉe njí bbo Yova dho anziro ro, luti kpa djøngʉe djø. Yesu pongʉeri kpa di “kere.” (Ufu. 3:1-3) Bbʉbbʉ dhé, Yova nzá ka ndi vi kodhó njí nga ro ri.—Ebr. 6:10. w22.05 3 §6-7
Wanzia dyi, Bi 8 ddo 5
Kpakpa njí krʉ e ndidhi faida na.—Mez. 14:23.
Kodhó kpakpa njí nǎ ro ko adi ba ná hwè Sulemani nzingʉe “Mungu dhó ro si ná kado.” (Muh. 5:18, 19) Sulemani chungʉe ndi ká ngʉ loti addu djo ma nari chu. Ke ngʉe kpakpanga na njínji ná ke! Ke chingʉe dza kpari ma, ke zʉngʉe mizabibu kpari ma, ke bbá ngʉe bblo kʉ ná í kpari ndidhi dda dho le bbɨ ná bbù kpari ma na. Ndirigoti ke chingʉe vile kpari maddi. (1 Fa. 9:19; Muh. 2:4-6) Nì mai, føri ngʉe kpakpa njí ro, ri ngʉ adi hwè bbʉ ke dho. Ro, ndiro ndi é hwè na d’e Sulemani nzɨ ngʉ adi ndi thí li fø njí djo dhé ri. Ke ngʉ adi njínji bbo Yova dho maddi. Loroji na, ke ddangʉe chutso hekalu chidha dhi njí dho cho saba kana! (1 Fa. 6:38; 9:1) B’lo ndi nji njonjo kʉ ná njí kimwili nǎ ndirigoti kiroho nǎ nari goti Sulemani rangʉe ri famu nari kʉ, kiroho nǎ njí kʉ mana na pli kimwili nǎ njí djolu. Ke ndingʉeri: “Lo tso dyadha dho, krʉ kʉ ná lo rr e ni b’lo nari kʉ: Anji bbʉbbʉ Mungu do ndirigoti arrnga kedzá yadha dho.”—Muh. 12:13. w22.05 22 §8
Ronji dyi, Bi 8 ddo 6
Mungu njingʉe . . . ni zø pá Kristo chulu.—Efe. 4:32.
Yova njingʉe zø ná ndrŭ dhó loroji kʉ bí Biblia nǎ. Føro ká ni no ie nga ro mai? Njaro ni no Pi Manase nga. Fø kpetsi ke njingʉe chenga Yova njí che bbo kʉ ná chu nǎ. Ke ngʉ adi kali dhi miungu má ndirigoti ke ngʉ nja ndrŭ ma cho ddi nja ndima njiri fø d’e. Ke ngʉ adi ndidzá nzø che ndiro ndi bbʉ kpa bbʉdha kali dhi miungu dho d’e. Ke rangʉe anzi chenga njidha na kpø ke rangʉe ndidhó kali dhi mungu ró ji li Yova dhó takatifu kʉ ná hekalu na. Ke djo Biblia pori: “Ke njingʉe chenga bbo Yova nyǒ njí, nja ndi bbʉ na njedha Yova thí dho d’e.” (2 Ny. 33:2-7) Nì mai ri kʉ føro, Manase dhongʉeri ndi leni le ndi thí nǎ ro krʉ ná saa na, Yova njingʉe ke zø nji. (2 Ny. 33:12, 13) Njaro ni no Pi Daudi nga maddi bbobbo chenga ndi njingʉe Yova njí ro, ke njingʉe uzinifu ndirigoti ke hwingʉe ndrŭ. Ro, Daudi lengʉeni ndi thí nǎ ro krʉ ná saa na, Yova njingʉe ke zø nji. (2 Sa. 12:9, 10, 13, 14) Bbʉbbʉ dhé, ko ka ko uri u nari kʉ, Yova jiri ji ndi njí ndrŭ zø. w22.06 3 §7
Gbonji dyi, Bi 8 ddo 7
Anidi ngatsovedha na; aniliri ni thí é kpakpa.—Yak. 5:8.
Krʉ ddo ró ri nga e sʉsʉ ko li kodhó ngab’odha kpakpa ri. Ringani Mungu tsoni djo ná tsodha si njini nari ko b’o bbo ù na. Nì mai ri kʉ føro, Yova kʉ theinga dho di ná ke, ndirigoti kedhó nganjadha kʉ njonjo saa djo kodhó ri ró ro. (2 Pe. 3:8, 9) Ke si ndi tsoni djo ná lo nji ngbà thonga ná saa na, ro nga ko jiri ná saa na ri. Ko tsotso ká addu ka ndi kó nja ko li kodhó ngab’odha kpakpa ndirigoti ko é ngatsovedha na Mungu tsoni djo ná lo si njini nari ko b’o ro d’e? (Yak. 5:7) Aliri ni kana nga é chøchø Yova na, dhonalo ke i si rili ko b’o ná lo njini njí. Ndiro ko é ngab’odha na d’e ringani ko é udha na Yova kʉ nì ndirigoti ke adi nì “ndi ne bidii na ná ndrŭ ronga lele nari djo.” (Ebr. 11:1, 6) Njati ko é bbʉbbʉ kʉ ná udha na Yova kʉ nì nari djo ró, ko ka ko uri ke si ndi tsoni djo ná lo njinji. Kodhó ngab’odha ngʉ kpakpa d’e akodi nganzi Yova tso ndirigoti akozø ke dzá lo. Nzɨ mai ko adi Yova nja ro, ko kana nga ka ndi é chøchø nì ke na. Ko ka ko tilo ke na sala chulu ɨ ko uri u ro, ke ka ndi rr kodhó sala ngbà.—Yer. 29:11, 12. w22.10 26-27 §11-13
Thonji dyi, Bi 8 ddo 8
Yobu ngangʉe lotidha tso ndirigoti ke wangʉe ndi gøni ná ddo wa.—Yob. 3:1.
ddinga i lo djo. Hu nǎ ndi di ro, Yobu ronga ngʉ ndí che sani. (Yob. 2:8) Kedhó kau ngʉ ripo godhé, ke nga kʉ bblo kʉ ná ke ri ndirigoti ke nzá d’erie bblo ritsi ro nji ddikpa maddi ri. Ke ngʉ da lu ná kpakpalo ngʉe bbo tutu o ná dju bbai ndirigoti kedzá nzø ke vingʉe ná føri ngʉ njini ke thí nanga le tha nari bbai. Anziro Yobu ngʉ di nzɨ ndi loti ro. (Yob. 2:13) Njati rie kedhó bbakau ngʉ ndima nzǐ ná kpa ngʉ riddi Yobu ka ndi bbá Yova bbá ri ró, føri na kpa ngʉ ndima shasha. Lotidha tso ke ngangʉe ná saa na, ke pongʉeri ndidhó fø kali dhi bbakau dho: “Kpø madzá dhe djo ma nzɨ bba chi ma tøni nari tso ro ri!” (Yob. 27:5) Addui ká kongʉe Yobu tsotso ndi é nga na do ro ndirigoti ndi tøni kpakpa ndidhó nzadha kana? Ngbà mai Yobu thí bʉngʉeni bʉ ro, ke nzá vingʉe ndidhó ngab’odha ro ndidzá ji dhi Mungu si ndi tsotso ko ko ndidhó nzadha nǎ ro nari djo ri. Ke chungʉeri nari kʉ ndi dhedhe ma ró, Yova si ndi gaga.—Yob. 14:13-15. w22.06 22 §9
Mbʉnji dyi, Bi 8 ddo 9
Føri dho nidho ringani ni nzinga iri bbai: “Kodhi Baba ni kʉ ra nǎ, aliri ni ró dho tsetse. Aliri ni dhó Pidhinga si. Aliri ni ji nari njini.”—Mt. 6:9, 10.
Ra ma, dz’ ma na No ná ke bbʉ bbo na mana kʉ ná kado ko dho. Ke u ritso u ko di nganzi ndi tsó. Addinga i lo djo: Ko ka ko d’ra ko thí nǎ kʉ ná lo Yova dho krʉ saa ró, ndirigoti krʉ kʉ ná luga nǎ. Ko ka ko nzinga ke tsó hopitale nǎ ra djó ma, prizo nǎ le sʉ ko ná ngana ro ma, ɨ ko churi ro kodhi ji dhi Baba ka ndi rr ko ngbà. Ko adi mbai po bbo fø kado dho. Pi Daudi njangʉe pendeleo ndi ba ndi di sala nji ná føri bbo na mana kʉ ná lo. Ke ngongʉe ri ɨ Yova dho: “Abbari madhó sala é ni njí le thɨ ná uvumba bbai.” (Zb. 141:1, 2) Daudi dhó saa na, bbakuhani ngʉ adi njínji na bbʉbbʉ ibada kana ná uvumba le ngʉ adi tayarisha bblo pli. (Kut. 30:34, 35) Daudi ngʉ adi riji ndi ddinga bbo sala ndi nji ná saa na ndi ka ndi po Yova dho ná lo djo, ddiddi uvumba ngʉ adi tayarisha ná kpa ngʉ adi rinji nari bbai. Ko maddi, ko adi riji ko njiri fø. Ko adi riji kodhó sala bbʉ hwè Yova dho. w22.07 20 §1-2; 21 §4
Zanji dyi, Bi 8 ddo 10
“Le be wødha kʉ madzá ri; Ma i si ndrŭ be wø,” Yova pori.—Ro. 12:19.
Le be le wø nari kʉ Yova dzá ri. Yova nzá u ritso ro ko bbʉ malipizi chelo nji ko ró ná ke dho ri. (Ro. 12:20, 21) Ko tso vʉeni vʉ ndirigoti ko e nzá kaka ná nganjadha na nari dho, ri nzá ka ndi ka ko d’ilo d’ʉ Mungu bbai ri. (Ebr. 4:13) Ndirigoti nja saa na, ko ko mbu nari adi rili nzɨ ko d’ilo bblo. Yova lingʉeri Yakobo ndiri ɨ: “Ndrŭ nanga kani nari nzɨ adi rili Mungu dzá chølo njini ri.” (Yak. 1:20) Ko ka ko uri u nari kʉ, Yova si rili d’ʉ kʉ ná lo njini ndirigoti ke si rili chølo njini ko laidjo. Ndrŭ zø ko nji nari na ko adi ridho ko u Yova dzá chølo. Yova thó thi na ko lo bba nari na, ko ridho ko uri u nari kʉ, ke si chenga bbʉ ná matokeo krʉ sisi. Ke tsoni djo ná ø dz’ djó, vó ka ndi vó le thí ronga ná lo ki “nga ro nzɨ le si no ri inga ndi ki sí le thí na ri.”—Isa. 65:17. w22.06 10-11 §11-12
Yenga dyi, Bi 8 ddo 11
Ndrŭ tsɨ krʉ si ni ndrondro ma ró dho djotsina.—Mt. 24:9.
Ko ndrŭ ndrondro ná føri ridho nari kʉ, ko tso uni u Yova na. (Mt. 5:11, 12) Fø upinzani dho ndrŭ cho nari kʉ Ibilisi. Ro, Yesu dada kpakpanga na Shetani djolu! Yesu dhó ngatsotsokodha chulu hwè dhi lo-i d’rani ndrŭ tsɨ krʉ dho. Akonja fø lo dhǒ ná lo. Pidhinga dzá hwè lo-i d’ra ná kpa hwini tso ró ná nja kpakpalo kʉ luga. Mutume Yohana dho Yesu dhongʉe ná lo nǎ ke pongʉeri hwè lo-i si kʉ sisi fø kpakpalo djolu. (Ufu. 14:6, 7) Ká ngbaribbai? Ko adi riddi bí kʉ ná ndrŭ dho kpa rr Pidhinga dzá hwè lo-i. Njʉ dz’ djolu gble kʉ ná ndrŭ ka ndima zø Biblia ró dyʉ ndi ná vichapo kodhó site jw.org djó, dhonalo ri kʉ dada 1 000 djolu ná luga nǎ! Ndirigoti Lo dho chutso ddá ná Baraza u ritso nari kʉ, kodhó buku Anji Maisha hwè theinga dho! nanga tuni 700 djolu da ná luga nǎ. w22.07 9 §6-7
Wanzia dyi, Bi 8 ddo 12
Shauri bbʉ ná ndrŭ é bí ró lo adi njini nji.—Mez. 11:14.
Yesu ngʉ adi zølo dhǒ ndrŭ dho. Mutume Matayo ndiri: “Ke njangʉe ndrŭ kpari ro, ke ndrŭ dhiri zø njingʉe dhonalo ndrŭ njengʉeni nje ndirigoti ndrŭ nanga plingʉeni nga bai kʉ ná chembø bbai.” (Mt. 9:36) Nde, Yova ká adi ndi mbu ngbaribbai? Yesu pongʉeri: “Madzá ra nǎ Baba nzá jiri fø rere nzø kana ddikpa le ma ba sadha ro ddi ri.” (Mt. 18:14) Fø lo adi hwè bbʉ ko dho dhonalo ri ridho nari kʉ, Yova jirie ko bbo. Njati ko chu Yesu bblo pli ró, kodhó jidha maddi ka ndi dhidhi Yova laidjo. Ni ka ni njí maendeleo kiroho nǎ njati ni di saa ba ndirigoti ni di jidha dhǒ bbo ndirigoti ni di rine ni chu kutaniko nǎ dhidhi kiroho nǎ ná le-djoi ma, le-vei ma na ró. Aneri ni chu ngbaribbai ma kpa e hwè na nari. Kpa nanga ro nzɨ ndima vʉngʉeri ndima njinjí Yova dho nari adi d’o ri. Apori kpa tilo ni dho Yova dhó njí kana ndima dangʉe lú ná lo djo. Njati rie bbo na mana kʉ ná longa ni ji ni vʉ ri ró, ako shauri kpa tso. Dhonalo “shauri bbʉ ná ndrŭ é bí ró, krʉ kʉ ná lo adi njini nji.” w22.08 3 §6-7
Ronji dyi, Bi 8 ddo 13
Yova nyo kʉ chølo dhi ndrŭ djó.—1 Pe. 3:12.
Ko kana nja le ddiro ka ndi si bani ddikpa kpakpalo na ngbà dhé. Nì mai ri kʉ føro, ko nzɨ si kpakpalo tso ve ko koro dhé ri. Yova adi ko ronga b’o krʉ ddo ró jidha dhi Baba bbai. Ke kʉ ko kuso chøchø, tayari kodhó sala rrdha dho nja ndi kó ko tsotso d’e, ndirigoti ke jirie ri ji ndi kó ko tsotso. (Isa. 43:2) Ko uri u nari kʉ, ri ka ndi kaka ko ve kpakpalo tso dhonalo ke adi kodhó lo u nja ko ve ngatso d’e ná ritsi krʉ bbʉ ko dho ji ndi nanga jini ro. Ke bbʉ ko dho ná kado kʉ sala ma, Biblia ma, kiroho nǎ nyo kpari ma, jiji ko ná ko djoi ma, ko vei ma na nja ndima kó ko tsotso uhitaji dhi saa na d’e. Ko adi mbai po bbo ko dhi ra nǎ Baba ko ronga b’o nì nari dho! “Ko thí adi hwè nji ke nǎ.” (Zb. 33:21) Ko ka ko dhǒ ko mbai po nì Yova dhó jidha dhi lerongab’odha dho nari, ke bbʉ ko tsotsokodha dho ná ritsi krʉ nǎ ro ko rine ko ba faida nari chulu. Føri kina, ringani ko maddi njí kodho ngani ná lo nja ke b’o ko ronga d’e. Njati ko rá anzi Yova dho ko ngarr nari na ndirigoti ko di ke nyǒ tho ná lo nji ró, ke si ko ronga b’o theinga dho! w22.08 13 §15-16
Gbonji dyi, Bi 8 ddo 14
Nidzá lo si ná nga kʉ bbʉbbʉ.—Zb. 119:160.
Njʉ nzá bí kʉ ná ndrŭ churie ie djo ma ndima ka ndima li ndima thí nari ro ri. Kpa churi nari kʉ, krʉ ddo ró politiki dhi kpa ma, nga zø ná kpa ma, turusa dhi kpa ma na nzá ka ndima njí bblo lo ro ndima dho ri. Føri kina, kpa nzɨ heshima ro bbʉ Wakristo ndima nzǐ ná dini djó bbobbonga dho ri. Ri nzá ka ndi ké le nanga ri dhonalo kpa nzɨ adi ndima thí li Biblia djo ri. Dini djó bbobbonga adi ndima nzǐ Biblia dho ngarr ri. Ko kʉ Yova dzá njí dhi ndrŭ nari dho, ko uri u nari kʉ, ke kʉ “bbʉbbʉlo dhi Mungu” ndirigoti krʉ ddo ró ke adi bblo kʉ ná lo ji ko dho. (Zb. 31:5; Isa. 48:17) Ko uri u nari kʉ, ko ka ko li ko thí Biblia nǎ ko zø ná lo djo. Ko gba ko tso Biblia nǎ lo nanga ngʉ ne ná ddikpa ke ndingʉe ná i lo na: “Mungu po ná lo ro nga e kali ri inga ke po ná lo ro nzɨ adi má nzá ndi njini ro ri. Mungu dzá ndrŭ adi ndima thí li ke po ná lo djo dhonalo kpa adi ndima thí li fø lo po ná Mungu djo.” w23.01 2 §1-2
Thonji dyi, Bi 8 ddo 15
Anidi ngaddi ni djo ni kana.—Ebr. 10:24.
Ko adi ko djoi ma, ko vei ma na li kpakpa njati ko di kpadhó udha li kpakpa Yova djo ró. Nja kpa ndima lai nzá u bbʉbbʉlo ná ndrŭ adi be bá. Nja kpa hwini afya dhi kpakpalo tso ró, inga che ndima ndima mbu nari tso ró. Nja kpa adi i dz’ dzá mwisho si nari b’o drrdrr nga djó ro. Fø lo krʉ ka ndi tsu Wakristo dhó udha mbudha kana njʉ. Karne ya kwanza nǎ Wakristo maddi ngʉ adi hwini fø di ná kpakpalo na. Mutume Paulo ngʉ adi njínji maandiko na nja ndi li ndi djoi ma, ndi vei ma na kpakpa d’e. Loroji na, kpadhó nga kʉ Wakristo ná familia ngʉ adi ripo Wayaudi dhó dini kʉ bblo pli Wakristo dhó dini djolu ná saa na, Wakristo kʉ ná Wayaudi nzá ka ndima bae ngbaribbai ma ndima ngʉ fø kpadhó logoti nari ro ri. Bbʉbbʉ dhé, Paulo ndingʉe Waebrania dho ná barua lingʉe fø Wakristo kpakpa. (Ebr. 1:5, 6; 2:2, 3; 9:24, 25) Kpa ka ndima njie njí kedhó kpakpa ngʉe ná fø ngaddidha na, nja ndima ngʉ na fø wapinzani dhó logoti d’e. w22.08 23-24 §12-14
Mbʉnji dyi, Bi 8 ddo 16
Yova djo ndi thí li ná ke ronga leni le.—Yer. 17:7.
Shetani dhó i dz’ djó ndrŭ nzá chu ndima ká ka ndima li ndima thí ie djo ma nari ro ri. Dhonalo turusa nji ná ndrŭ ma, politiki nǎ kpa ma, dini nǎ bbobbonga ma na dhó nyi adi ndrŭ thí bʉ krʉ saa ró. Bí kʉ ná ndrŭ adi riddi nari kʉ, ndima nzá ka ndima li ndima thí ro ndima dhó bbakau ma, ndima lai ndrŭ ma, ndima dhó familia nǎ ndrŭ ma na djo ri. Fø lo nzá ka ndi ke ko nanga ro ri. Dhonalo Biblia d’rangʉeri b’lo nari kʉ: “Nga sini ná saa na . . . , ndrŭ sie . . . nga kʉ chi ná ndrŭ, . . . ndrŭ djǒ tso gbá ná ndrŭ, . . . dzi ndima lai ndrŭ nanga dzi ná ndrŭ.” Føri na mana kʉ, ndrŭ ka sie nzá djo le ka le li le thí ro ná ndrŭ Shetani bbai, i dz’ djó mungu ndi e ro. (2 Ti. 3:1-4; 2 Ko. 4:4) Nì mai ri kʉ føro, Wakristo ko kʉ ro ko churieri chu nari kʉ, ko ka ko li ko thí li lú Yova djo. Ko urieri u nari kʉ, ke jirie ko ji ndirigoti ke “nzɨ bba” kʉ ndidzá bbakau ro ri. (Zb. 9:10) Ko ka ko li ko thí Yesu Kristo djo maddi dhonalo ke bbʉngʉe ndidzá shinga ko djotsina. (1 Pe. 3:18) Ndirigoti ko nganga nja ná lo nǎ ro ko urieri u nari kʉ, Biblia adi bblo kʉ ná chutsoddadha bbʉ ko dho.—2 Ti. 3:16, 17. w22.09 2 §1-2
Zanji dyi, Bi 8 ddo 17
Hwè na kʉ nari kʉ, nì Yova do nji ná ndrŭ krʉ, nì bbi kedzá chu lu ná ndrŭ.—Zb. 128:1.
Bbʉbbʉ kʉ ná hwè nga kʉ hwè na kʉ nari bbai, le le mbu sese ddo dho nari dhé ri. Ro, ri na le ka le é ledhó maisha lu kana. Ká ngbaribbai? Ngø tsɨ djó Yesu njingʉe ná mahubiri nǎ ke pongʉeri: “Hwè na kʉ nari kʉ ngbà chu ndima dhó kiroho nǎ mahitaji ná ndrŭ.” (Mt. 5:3) Yesu chungʉeri chu nari kʉ, ndrŭ kʉ na ná ù kʉ ndima chu ngano ná ke Yova Mungu ndirigoti ndima bbʉ madha ke dho. Føri kʉ kodhó “kiroho nǎ mahitaji.” Ndirigoti Yova kʉ “hwè dhi Mungu” nari dho, ke dho madha bbʉ ná ndrŭ dho maddi ringani ndima é hwè na. (1 Ti. 1:11) Njati rie nzɨ ko bani kpakpalo na ró dhé ká ko ka ko é hwè na? Nga. Yesu d’rangʉe ndidhó Ngø tsɨ djó mahubiri nǎ nari kʉ, “Dzz dzz ná ndrŭ” ma ka ndima é hwè na ddi. Yesu pongʉeri ki “chølo djó nzani ná ndrŭ” maddi ka ndima é hwè na.” (Mt. 5:4, 10, 11) Yesu ddingʉeri nari kʉ, hwè na ko ka ko é dho nari nga kʉ maisha nǎ ko ba ná bblo lo ri, ro ko ka ko é hwè na njati ko gba kodhó kiroho nǎ mahitaji tso ndirigoti ko kana nga é chøchø Mungu na ró.—Yak. 4:8. w22.10 6 §1-3
Yenga dyi, Bi 8 ddo 18
Bbʉbbʉ lo utsod’idha na kʉ ná ke adi go ddi.—Mez. 11:12.
Lo utsod’idha (utambuzi) ka ndi kó Mukristo tsotso ko ndiro ndi chu “ngbá saa djo ká ndi ka ndi tilo nzá ndirigoti ngbá saa djo ká ndi ka ndi tilo ti” nari d’e. (Muh. 3:7) Nja desturi nǎ le adi ripo, “lo le ti nari kʉ mbø (feza) ro ddi le go nari kʉ or.” Nja lo nǎ le ka le pori nja saa djo rie bblo le go ddi lo le ti nari djolu. Akonja ddikpa loroji, bí nji ddo kutaniko nǎ ná ddikpa muzee le ngʉ adi cho ndi rá nja kutaniko nǎ kʉ ná kpakpalo tsotso ko. Ke djo ke lai ddikpa muzee pori ɨ, “Ke adi krr ndiro nzɨ ndi d’ra nja kutaniko nǎ siri nja kutaniko nǎ ró.” Fø muzee ngʉe nyodyu na bbo nari dho, kedhó kutaniko nǎ nja wazee ngʉ adi heshima bbʉ ke dho. Kpa chungʉeri chu ke nzɨ ra ndima dhó siri dhi lo ro d’ra nja ndrŭ dho ri. Chi le kʉ nari kʉ nja ndrŭ adi ndima thí li le djo dho ná nja chu ro. Ko adi ko thí li bbʉbbʉlo d’ra ná ke djo, dhonalo ko churi krʉ ddo ró ke adi bbʉbbʉlo po.—Efe. 4:25; Ebr. 13:18. w22.09 12 §14-15
Wanzia dyi, Bi 8 ddo 19
Nyodyu ma, lo utsod’idha ma, shauri ro ma nga ddi kʉ, njati le di ddani Yova na ró ri.—Mez. 21:30.
Bí kʉ ná ndrŭ adi riji nzɨ ndima rr bbʉbbʉ kʉ ná nyodyu “bbobbo ndi chu na ri ndi nanga jø chu lú” ná saa na. (Mez. 1:20) Biblia ripo gʉ nyodyu dhi lo gʉ ná ndrŭ dhó aina kʉ gbo, føri kʉ: “nzá chu lo ná ndrŭ ma, pá lo be ná ndrŭ ma, ndirigoti rr chu ná ndrŭ ma na. (Mez. 1:22-25) “Nzá chu lo ná ndrŭ” kʉ, krʉ ndima rr ná lo u ná ndrŭ inga tse ribba ndima shani ná ndrŭ. (Mez. 14:15, maelezo ya chini) Loroji na, achuri nari kʉ dini nǎ bbobbonga ma, politiki nǎ bbobbonga ma na sharie mamilioni kʉ ná ndrŭ b’lo. Njati nja kʉ ná ndrŭ rá ri utso d’i fø kpa sharie ndima sha ró, ndrŭ nanga adi kani bbo. Ro, Mezali 1:22 dzá buku tilo djo ná fø ndrŭ vʉri nari kʉ ndima di nzá chu lo ná ndrŭ dhonalo kpa jiri rie fø. (Yer. 5:31) Kpa adi riji nzɨ ndima chu Biblia po ná lo inga nzɨ ndima rrnga Biblia nǎ yadha dho. Ko nzɨ adi rine ko dyø ji nanga jini ndima di nzá ndima chu lo ro ná ndrŭ bbai ri!—Mez. 1:32; 27:12. w22.10 19 §5-7
Ronji dyi, Bi 8 ddo 20
Anidjøni ndrŭ nji ná ritsi krʉ dho.—1 Pe. 2:13.
Mungu dhó tengenezo adi rija ko dho ko b’o ko ronga. Bí ina le adi rija ko bbʉ kodhó kpadjo kʉ ná adresi wazee dhona ndiro kpa si ko ba tsé lelenga riu ná saa na d’e. Ni ká njiri fø b’lo? Føri goti njaro le ka le ja lo ko di ko kʉ ná nga na inga ko rárá ndirigoti ko tsotso ka ndi kó ná ritsi djo inga nja ndrŭ tsotso ká ko ka ko kó ngbaribbai inga ngbá saa na ma nari djo. Njati ri e nzɨ ko ngarr fø lo dhó ró ko ka ko li kodhó shinga ndirigoti ko ronga adi b’o ná wazee dhó shinga hatari na. (Ebr. 13:17) Chʉ adi ngaba ná lo ma, la ma, ngbʉngbʉ dhi nja lo ma na rili bí kʉ ná le-djoi ma, le-vei ma na rárá ndima adi di ná nga nǎ ro, ro kpa kpakpanga nji bbo ndiro ndima chuni ndima dhó ø hali na d’e. Ndirigoti kpa njínji bbo Yova dzá njí kana. Kpa ra anzi “hwè dhi lo-i ndima d’ra” nari na, anziro ngʉe ná Wakristo nyingʉe nga njonjo kʉ ná nga lu ndrŭ ndima nzá nari dho ná saa na kpa njingʉeri nari bbai. (Mdo. 8:4) Lo kpa d’ra nari adi kpa tsotso kó ndima li ndima thí Pidhinga djo ndima dhó hali djo ndima lié ndima thí nari rɨngana. Føri dho kpa adi ndima dhó hwè ma, ngoi ma na ronga b’o bblo. w22.12 19 §12-13
Gbonji dyi, Bi 8 ddo 21
Yova kʉ ma laidjó; ma nzɨ do ro nji ri.—Zb. 118:6.
Yova adi ko nja ddiddiro mana na. Lod’radha dho ndi ndi unakpa cho nari njí Yesu kongʉe kpa tsotso nzɨ kpa nji ndima dhó lo si gʉ ná ndrŭ do. (Mt. 10:29-31) Ke njingʉeri fø ddikpa bbo chungʉeni Izraeli nǎ ná re djo ndi tilo nari chulu, føri kʉ: Wanyoi. Yesu dhó saa na nga fø re na mana ngʉe bbo ri. Ro, ke pongʉeri ndi unakpa dho: “Ri kana ddikpa ri ro ma nzɨ ddi adi d’e gʉna nzá nidhi Baba chu ndi ro ri.” Ke ndringʉeri ki: “Ni na mana kʉ bbo bí kʉ ná wanyoi djolu.” Fø chu nǎ Yesu dhongʉeri ndi unakpa dho nari kʉ, Yova adi ko ddiddiro nja mana na, føri dzá lo dho nzadha do kpa nji dho ná sababu ro nga ngʉeri. Lo ndima ngʉ d’ra njonjo kʉ ná bbagʉ lu ná saa djo, wanyoi ndima nja ró kpa ka ndima é ngʉe no ndima ngʉ adi Yesu dhó fø lo ngano ro. Ni nja nini re ná saa djo, adi ngano nari kʉ Yova adi ni nja mana na dhonalo “ni na mana maddi dada bí kʉ ná wanyoi djolu.” Kedhó nga tsotsokodha na ni ka ni sisi upinzani djolu. w23.03 18 §12
Thonji dyi, Bi 8 ddo 22
Ni liri Farao ma nanga kani ka ko djo ndidhó njí dhi kpa ma na, ni bbʉ sà kpa thó thí nja kpa ché ko d’e.—Kut. 5:21.
Nja saa na ko adi bani na ná kpakpalo kʉ, upinzani ko ba kodhó familia dhó ro nari inga kodhó njí ko vi nari. Njati ko di bani na ná kpakpalo di sini nzá ró, ko ka ko di ko mbu ngadhi ngab’odha ro kʉ nari bbai inga bʉ thí bʉni nari bbai. Shetani adi riji fø di ná saa na ko di riddi nari kʉ Yova nzá ji ko ro ri. Diabolo adi riji ko ddiri nari kʉ ko dho nzadha bbʉ nari kʉ, Yova ma ndidhó tengenezo ma na. Fø di lo ro njingʉeni Misri nǎ ngʉe ná nja Waizraeli ró maddi. Ya kwanza kpa ungʉeri nari kʉ Yova i li Musa ma, Haruni ma na ndiro kpa tu ndima no tsena ro d’e. (Kut. 4:29-31) Ro, luti Farao ngʉ Waizraeli nzánza ná saa na, kpa ngangʉe che lo tidha tso Musa ma, Haruni ma na djo. (Kut. 5:19, 20) Kpa tingʉe chelo Mungu dzá chi njí dhi kpa djo. Føri ngʉe njedha dhi lo! Njati rie ni bani na ná kpakpalo di sini nzá ró, ara anzi Yova dho ni ni thí nǎ lo d’ra sala chulu nari na ndirigoti ane ni tsotsokodha kedhó ro. w22.11 15 §5-6
Mbʉnji dyi, Bi 8 ddo 23
Bbʉbbʉ dhé ma ripo ni dho, saa si nì, føri i kʉ kpadjo, checheni ná ndrŭ si Mungu dzá ngba chu rr ndirigoti ngbà rrngʉe ke chu ná ndrŭ si di shi.—Yoh. 5:25.
Yova kʉ shinga adi bbʉ ná ke ndirigoti ke kʉ kpakpanga na ndiro ndi ngʉ checheni ná ndrŭ ki shi d’e. Ke bbʉngʉe kpakpanga nabi Eliya dho nja ndi ga Sarefati nǎ ddikpa bbangbai dzá ddikpa kpetsi ngba d’e. (1 Fa. 17:21-23) Ndirigoti luti Mungu dhó kpakpanga na nabi Elisha gangʉe Shunemu nǎ ddikpa le dzá kpetsi ngba. (2 Fa. 4:18-20, 34-37) Fø gadha ma, nja gadha ma na ridho Yova kʉ kpakpanga na ndi ngʉ checheni ná ndrŭ ki shi. Go ndi ngʉe dz’ djó ro Yesu dhongʉe ndidzá Baba bbʉngʉe fø kpakpanga ndi dho nari dhǒ. (Yoh. 11:23-25, 43, 44) Njʉ Yesu e ra nǎ ndirigoti “krʉ bbonga . . . bbʉrieni kedhó ra nǎ ndirigoti dz’ djó.” Føri dzá lo dho ke kʉ tayari ndi njí i pongʉeri ná tsodha; “Nonganoni ná kabbuli nǎ kʉ ná ndrŭ” si kʉ gaga nja ndima si di shi theinga dho d’e.—Mt. 28:18; Yoh. 5: 26-29. w22.12 5 §10
Zanji dyi, Bi 8 ddo 24
Izraeli dzá dza nzɨ ni rr ri, dhonalo kpa nzá jiri ndima rr ma maddi ri.—Eze. 3:7.
Ezekieli dhó lo kpa ngʉ gʉ nari na, kpa ngʉ Yova ma gʉgʉ ddi. Ngbà mai ndrŭ gʉngʉe Ezekieli dhó lo gʉ ro, ke njangʉeri ndi nji ndidhó unabi dhi njí bblo ngbà. Yova pongʉeri ki Ezekieli dho nari kʉ, fø lod’idha vé si dhoni bbʉbbʉ kʉ ri ná saa na, ndrŭ si “richu nari kʉ ndima kana ngʉe ddikpa nabi ro thé.” (Eze. 2:5; 33:33) Bbʉbbʉ dhé fø lo bbʉngʉe kpakpanga Ezekieli dho ndiro ndi njí ndi dhó bbʉni ná njí kaka nari bbai d’e. Ko churi ko Yova cho nari dho ko adi lod’ra ngana do ro. Ke nzi ko ndidzá “dimu” nari chulu ke adi heshima bbʉ ko dho. (Isa. 43:10) Føri kʉ bbo pli kʉ ná pendeleo! Yova pongʉeri Ezekieli dho: “Nzɨ nji do,” ná føri bbai Yova ripo ko dho: “Nzɨ di do na.” (Eze. 2:6) Nde, ri ká ngani nzɨ ko nji kodhó wapinzani do addudho? Dhonalo Ezekieli bbai ko Yova cho ndirigoti ke adi ko tsotso kó ko.—Isa. 44:8. w22.11 3-4 §4-5
Yenga dyi, Bi 8 ddo 25
Ngbà djo le ka le li le thí ná ke adi siri ronga b’ob’o.—Mez. 11:13.
Njʉ ko nanga adi jini bbo, kodhó ngbà djo le ka le li le thí ná wazee ma, watumishi wa huduma ma na dhi lo dho. Chi tøni ná le-djoi krʉ adi ko ronga b’o bblo ndirigoti ko adi mbai po Yova dho kpa dhi lo dho! Nde, ko ká ka ko dhori ko kʉ ngbà djo le ka le li le thí ná ndrŭ nari ngbá chu na? Ko jirie ko djoi ma, ko vei ma na ji ndirigoti ko adi riji ko chu kpadhó lo ká di ngbǎ ma nari. Nì mai ri kʉ føro, ringani ko é kiasi na ndirigoti ko b’o kpadhó nzá le ka le po ndrŭ kana ná lo ronga b’o. Karne ya kwanza nǎ kutaniko nǎ nja ndrŭ “ngʉ adi ndrŭ loti, kpa ngʉ adi ndima tso tsu nja ndrŭ dhó lo na, kpa ngʉ adi nzá djo ringani ndima tilo ná loti.” (1 Ti. 5:13) Bbʉbbʉ dhé, ko nzá jiri ko é kpa bbai ri. Nde, addinga i lo djo, ddikpa le d’ra siri dhi lo ko dho ndirigoti le pori nzɨ ko ra fø lo d’ra nja ndrŭ dho. Loroji na, ddikpa le-ve ka ndi d’ra ndi da lu ná afya dhi kpakpalo ko dho inga ndi da lu ná nja kpakpalo ndirigoti le nziri ko tsó nzɨ ko d’ra fø lo ro ndrŭ dho ró, ringani ko njiri fø. w22.09 10 §7-8
Wanzia dyi, Bi 8 ddo 26
Anile ni thí ø nì nidhó ngaddidha ngʉ nari chulu.—Ro. 12:2.
Kigiriki nǎ le ripo ni ngʉ “nidhó ngaddidha ø” nari na mana kʉ “ni thɨ nidhó ngaddidha thika.” Føri dho, ri nga kʉ ko njí sese kʉ ná bblo lo dhé kodhó maisha nǎ ri. Ro, ringani ko ddinga ngbaribbai ma ko kʉ nari djo ndirigoti ko ø kodho ringani ko ø thika ná lo ndiro ko rrnga Yova dhó kanuni dho ngbà ka ndi ka nari bbai d’e. Ri nzá ngani ko njí fø lo ddikpa ina dhé ri, ro ko rá anzi fø ko rinji nari na. Ko sí ngʉ kaka ná ndrŭ ná saa na, ko si Yova nyǒ tho ná lo nji krʉ ko nji ná lo kana. Ro, go fø saa si ná nga kana, ringani ko njí kpakpanga bbo ndiro ko njí Yova nyǒ tho ná lo d’e. Anja ngbaribbai ma, Paulo dhongʉe ø le ledhó ngaddidha ngʉ nari ma ronga nju Mungu ji ná lo utso le d’i nari na nari Waroma 12:2 nǎ. Ko ka ko bbari che kʉ ná i dz’ lé kodhó ngaddidha thika nari rɨngana, ringani ko né Mungu dhó ngaddidha ká adi kodhó muradi ma, kodhó longavʉdha ma na ronga lø ngbá ngatsi ma nari nanga, ro nga dz’ dzá ngaddidha ri. w23.01 8-9 §3-4
Ronji dyi, Bi 8 ddo 27
Abu ni djó no Yova djo, ndirigoti ke si ni tsotso koko. Ke nzɨ bbari chølo dhi ke ro bʉni ri.—Zb. 55:22.
Yova ká adi ko tsotso kó ko adi bani na ná krʉ kʉ ná lo kana ddi? Ke thó ka e kodhó maisha nǎ njini ná krʉ kʉ ná lo kana, ndiro che kʉ ná lo krʉ di njini ddikpa bblo kʉ ná sababu dho d’e? Nga, Biblia nzá gba ndi tso ro fø lo na ri. (Muh. 8:9; 9:11) Ro, ngbà ko chu nari kʉ i lo: Kpakpalo na ko bani ró Yova chu fø lo chu, ndirigoti ke adi ko ko tsotsokodha ne nari rrrr. (Zb. 34:15; Isa. 59:1) Føri djolu pli Yova ka ndi kó ko tsotso nja ko ve kpakpalo tso ngbà thonga nari bbai d’e. Ká ngbaribbai. Yova adi ko tsotso kó na ná ddikpa chu kʉ, le isopɨdha ma, kpakpanga ma na ke adi bbʉ ko dho nari. Bí ina ke adi føri nji ngbà thonga ná saa na. (2 Ko. 1:3, 4) Ni ká no nidhó maisha nǎ Yova kongʉe ni tsotso, ke bbʉngʉe le isopɨdha ma, kpakpanga ma na ni dho, nidhó lo ungʉe ri ná saa nganga na nari nga ddi? Bí ina ko nzɨ adi ngbaribbai ma Yova koe ko tsotso ko ve kpakpalo tso d’e nari ro famu ri, ro ko ve adi ri famu b’lo ri da nari goti. w23.01 17-18 §13-15
Gbonji dyi, Bi 8 ddo 28
Tsó nǎ ngʉe ná zǎ ro nga . . . ri ra sadha dhi ngana.—Ufu. 17:11.
Føri goti ko nja tso nǎ nja zǎ ki. Fø zǎ maddi di sabba djǒ e ná tso nǎ zǎ bbai, ro ri dzá njonjonga kʉ ri kʉ bbo pli ndidzá kakanga kʉ ro. Ri le nzǐ “tso nǎ zǎ ró ji” ndirigoti ri le nzǐ “ya munani pi.” (Ufu. 13:14, 15; 17:3, 8) Fø “pi” djo le pori ri si ndirigoti ri tsŭ nu, ro luti ri ki si. Føri ke Ndrŭ tsɨ Gba ndima tso nari inga ONU nganga dhǒ, dz’ djolu gble kʉ ná politiki nă ndrŭ dho ndi faida nji ro! Anziro le ngʉ ri nzǐ Muungano wa Mataifa SDN. Ndirigoti Dz’ djolu Gble dangʉe ná Vita ya pili nǎ ri singʉe tsu nu. Luti ri ki si ro le nzi ri Ndrŭ tsɨ Gba ndima tso nari, kpø njʉ ngadjo le ri nzǐ fø dhé. Tso nǎ zǎ inga Guvernema nji ná propagande rili ndrŭ di tsatsa Yova ro ndirigoti kedzá ndrŭ ro. Yohana pongʉeri ri kʉ ddiddi kpa “dz’ lu djó di ná ndrŭ djo pinyo ná pikpa tso njú” Armagedoni dhi vita dho nari bbai. Føri kʉ “ritsi Ddi na ka ná Mungu” dhó bbo ddo.”—Ufu. 16:13, 14, 16. w22.05 10 §10-11
Thonji dyi, Bi 8 ddo 29
Ni ká zø addu?—Lu. 10:26.
Yesu ngʉ adi takatifu ndi ndini ná lo zø ndi ndiro, ke nzá chungʉe Maandiko bblo pli dhé ri, ro ke jingʉe ri ji ndirigoti ke ngʉ adi ribba ri i cho ndi nji ná lo ronga. Loroji na, ano 12 Yesu dhó cho ngʉe ro njingʉeni hekalu nǎ ná longa di. Bblo chungʉe Musa dhó sheria ná walimu nanga ngʉ “keni ke [Yesu] lo famu ná chu ma, kedhó jibu ma na dho.” (Lu. 2:46, 47, 52) Ko maddi ko ka ko chu ndirigoti ko ji Mungu dzá lo ji njati ko di ri zø krʉ ddo ró ró. Ko ka ko ba faida bbo chungʉe sheria ná kpa dho Yesu pongʉe ná lo nǎ ro, fø kpa kana ngʉe waandishi ma, wafarisayo ma, wasadukayo ma na. Fø dini djó bbobbonga ngʉ adi Biblia zø bí ina, ro kpa nzɨ ngʉ adi faida ro ba ndima zø ná lo nǎ ro ri. Yesu pongʉe fø kpa ka ndima njie nja ndima ba faida Maandiko nǎ ro d’e ná gbo kʉ ná lo. Ke pongʉe kpa dho ná lo ka ndi kó ko tsotso ko thɨ kodhó lo thika nja (1) ko famu ko zø ná lo bblo, (2) ko ba kiroho nǎ mali (3) ndirigoti ko bbari Mungu dzá lo ø kodhó maisha thika ø. w23.02 8-9 §2-3
Mbʉnji dyi, Bi 8 ddo 30
Nyodyu na kʉ ná ke nja hatari ró, ke adi runi ru ndi dho.—Mez. 22:3.
Ko ka ko pʉ ko ró ro ná nja lo kʉ, ndrŭ dhó hisia na le kpa nari ma, bbo le wa jø nari ma, bbo le nganyo nari ma, che kʉ ná lo le ti nari ma, jeuri dhi kpà le kpa nari ma, pornografia ma, føri bbai di ná nja lo ma na. (Zb. 101:3) Ibilisi adi ko kana kau ndi ka ndi sa Yova na ná chu ne krʉ ddo ró. (1 Pe. 5:8) Njati rie nzɨ ko ko ronga b’o ri ró Shetani ka ndi zʉ ko thí na ná lo kʉ tamaa ma, kali le sha nari ma, ndro le ndrŭ ndro nari ma, nodha ma, lo le li le thí na nja ndrŭ dho nari ma na. (Gal. 5:19-21) Njati ko pʉ fø lo ko ró ro théi nzá ró, ri sie ko dho sumu bbai ndirigoti ri si ko thí nza bbo. (Yak. 1:14, 15) Ko ró ro ringani ko pʉ ná ddikpa hatari kʉ, che kʉ ná bbakau. Ringani ko di ngano nari kʉ bí ina ko di na ná ndrŭ adi kodhó nyi thika lele. (1 Ko. 15:33) Njati rie nì ko ko ronga b’o ró, ko si nga kʉ lazima ná kau ko nji nzɨ njínji Yova dhó yadha na ná ndrŭ na ná ritso bbabba. (Lu. 21:34; 2 Ko. 6:15) Ko si hatari nja ndirigoti ko si ritso nyinyi. w23.02 16 §7; 17 §10-11
Zanji dyi, Bi 8 ddo 31
Mungu ko ji nari na mana kʉ, ko rrnga kedzá yadha dho.—1 Yo. 5:3.
Yova djo ni lochu ná ngatsi i nidhó jidha ma adi dhi ke djo. Bbʉbbʉ dhé, ni jiri ni kana nga é chøchø ke na kpadjo ndirigoti choro nŭnŭ. Ndirigoti ni ka ni njí føri njí. Yova rinzi ni tsó ni bbʉ hwè ndi thí dho. (Mez. 23:15, 16) Ni nzá ka ni njiri fø ni tso nǎ lo chulu dhé ri, ro ni nji ná lo chulu maddi. Nidhó maisha nǎ ni nji ná lo si ridho nari kʉ, ni ji Yova bbʉbbʉ. Føri kʉ nidhó maisha nǎ ni ka ni li ni nji ná bblo pli kʉ ná muradi. Ni ká ka ni dhǒ ni ji Yova nari ngbaribbai? Ya kwanza ni ka ni bbʉ ni ddikpa dhé kʉ ná bbʉbbʉ Mungu dho pekee kʉ ná sala chulu. (Zb. 40:8) Ndirigoti ni ka ni dhǒ ni bbʉe ni Mungu dho nari krʉ kʉ ná ndrŭ nyǒ njí batiso ni ba ná saa djo. Føri e hwè dhi maisha ndirigoti bblo pli kʉ ná maisha tso le nga ri. Batiso ni ba ná saa na, ni adi ø maisha tso nga ndiro ni njí Yova ji ná lo, nga ni ji ná lo ri. (Ro. 14:8; 1 Pe. 4:1, 2) Føri adi njani kpakpa kʉ ná longavʉdha bbai ndirigoti bbʉbbʉ dhé rie kpakpa. Ro, føri adi rili ni é bblo pli kʉ ná maisha na. w23.03 5-6 §14-15