Bi 9

Njati ko di njínji bblo kodhó lotidha dhi kado na ró, føri ridho ko kʉ Yova dho njínji ná ndrŭ. Ko adi ko kuso lu kʉ ná ndrŭ tsotso kó, ndiro ndrŭ nja njonjonga pʉlʉpulʉ “nzɨ njínji Mungu dho ná ndrŭ ma kana nì njínji Mungu dho ná ndrŭ na d’e.” (Mal. 3:18) Akonja ngbaribbai ma Kimberly ró dho kʉ ná kodhi vena dhongʉe fø lo dzá d’ʉnga nari. Fø le-ve ma, le vʉngʉe ndi lai darasa nǎ ngba ma na darasa nǎ ddikpa njí njidha dho. B’lo ndima njinjí ddinga nari goti, fø ngba d’ingʉe ri utso nari kʉ, Kimberly kʉ njonjo nja kʉ ná wanafunzi ró ro. Ngba nzɨ ngʉ adi chelo ro ti nja ndrŭ djo ri, ngba ngʉ adi loti ndrŭ na bblo, ndirigoti ngba nzɨ ngʉ adi che kʉ ná bbadha ro ma ti ddi ri. Kimberly lai ngba thí ronga fø lo løngʉe bbo ndirigoti ngba ma ngangʉe Biblia nǎ longanedha tso Kimberly ma na. Yova nanga adi jini bbo njati ko ti ná lo di rili ndrŭ jiri ndima chu lo ndi djo ró. Ko krʉ adi riji ko tilo ngbà ka ndi bbʉ madha Yova dho ná chu nǎ. w22.04 5-6 §5-7

Maria Magdalene nǎ ro Yesu pʉngʉe saba kʉ ná gó! Le nanga jingʉeni nari chongʉe le ronga ndi ngʉ Yesu unakpa ro ndirigoti ndi kó lod’radha dhi njí tsotso. (Lu. 8:1-3) Ngbà mai Maria nanga jingʉeni bbo Yesu nji ndi dho ná lo dho ro, le nzá chungʉe ndi si bbo pli kʉ ná kado ba gosi ná saa na nari ro ri. Ke singʉe ndidhó shinga bbʉ ndiro “ngbà u ndi ná ndrŭ krʉ” ba choro nŭnŭ shinga d’e. (Yoh. 3:16) Nì mai ri kʉ føro, Maria dhongʉe ndi po mbai ngbà Yesu dho nari chi ndi tøni ke dho nari na. Tsu ba djó Yesu ngʉ nzani ná saa djo Maria ngʉe føga nja ndrŭ iso ndi pɨ ro. (Yoh. 19:25) Yesu dhe nari goti, Maria ma, nja aro ngʉe ná isɨ ndrŭ ma na d’ungʉe ke d’ødha dhi ritsi kabbuli djo. (Mk. 16:1, 2) Maria bangʉe hwè ndima nju ndirigoti ndima tilo Yesu na ke ga nari goti nari dho ndirigoti fø pendeleo ro nzá bí kʉ ná wanafunzi bangʉeri.​—Yoh. 20:11-18. w23.01 27 §4

Ri nzá ngani ko di riddi nari kʉ ko njie njí Yova dho bbo anziro nari dzá lo dho kpadjo nzá ko ka ko njinjí bbo ke dho ri. Kodhó klø é anziro ri e nari bbai nga ma ró, ringani ko é bbo ko njínji ro “Bboke dzá njí” kana, ni ko di kere kpø mwisho djo ro. (1 Ko. 15:58; Mt. 24:13; Mk. 13:33) Ringani ko é bidii na ndirigoti ko bbʉ madha ko thí nǎ ro krʉ Yova dho. Yesu chongʉe Laodikia nǎ kutaniko dho ná imba (ujumbe) ridho fø kpa ma ngʉ bani nja kʉ ná kpakpalo na maddi. Kpa nga ngʉe “lili inga sʉsʉ” ndima bbʉ ná madha kana ri. Kpa ngʉe fø nari dzá lo dho Yesu pongʉeri kpa dho kpa kʉ “njedha na kʉ ná kpa ndirigoti zø le ka le be djo na kpa.” Kpa dho riengani ndima é bidii na bbo Yova dho ndima bbʉ ná madha kana. (Ufu. 3:16, 17, 19) Ko ká ba ngbá somo fø lo nǎ ro? Njati ko ví anziro ko e na ná bidii vi ró, ringani ko di mbai po bbo Yova ma, kedzá tengenezo ma na nji ko dho ná bblo lo dho. (Ufu. 3:18) Ri nzá ngani bblo kʉ ná maisha ko ne kpakpanga na kpadjo nari liri ko nja Yova dho ko bbʉ ná madha nga na mana kʉ nari bbai ri. w22.05 3-4 §7-8

Cho maelfu kana, Yova adi ngandi ddikpa pekee kʉ ná buku na. Fø buku nǎ kʉ ndrŭ ró dho, ritso ngani chi tøngʉeni ná Dimu Abeli djó ro. (Lu. 11:50, 51) Fø nga djó ro Yova adi ndrŭ ró dho ndi ndidhó buku na ndirigoti njʉ ri nǎ kʉ mamilioni kʉ ná ndrŭ ró dho kpari. Biblia nǎ fø buku nzini “longanodha dhi buku,” “shinga dhi buku” inga “shinga dhi kú nanga le ku ná kitabu.” (Mal. 3:16; Ufu. 3:5; 17:8) Fø pekee kʉ ná buku nǎ kʉ, heshima ngʉ bbʉ Yova dho ndirigoti ji jingʉe ke ró dho ná ndrŭ ró dho. Kpa kʉ choro nŭnŭ di ná shinga si kʉ ba ná ndrŭ kana. Njʉ, ko ró dho ka ndi ndini fø buku na njati ko liri ko kana nga é chøchø Yova na ndirigoti ko di udha dhǒ ke Ddù Yesu Kristo bbʉngʉe ndi le ødha dhi be nari nǎ ró. (Yoh. 3:16, 36) Ko krʉ adi riji ko ró dho bani fø buku na njati rie ko kʉ ngab’odha na ko si kʉ di dz’ djó inga ra nǎ ma ri ró. w22.09 14 §1-2

Ufunuo dzá buku loti “kazz dhó rangi na kʉ ná ddikpa bbo dragoni” djo. (Ufu. 12:3) Fø dragoni hwini Yesu ma, ndidhó malaiká ma na tso ró. (Ufu. 12:7-9) Ri Mungu dzá ndrŭ nzá ndirigoti kpakpanga bbʉ ndrŭ dhó guvernema dho. (Ufu. 12:17; 13:4) Fø dragoni ká kʉ ie? Føri kʉ “drrdrr su, Ibilisi ndirigoti Shetani” le ndi nzǐ ro. (Ufu. 12:9; 20:2) Ke adi chutso ddá Yova dhó mbubai krʉ dho. Dragoni ká ngbá lo ba? Ufunuo 20:1-3 ripo ddikpa malaika si Shetani bu abiso na, føri sie prizo bbai ke dho. Føri si rili, nzɨ Shetani “sha ndrŭ ki ro kpø cho 1 000 tso dyani ná ngadjo.” Føri goti Shetani ma, ndi una gó ma na le si bu “jʉdda bbai di ná kazz na.” Føri na mana kʉ kpa si sadha ba theinga dho. Addinga ngbaribbai ma dz’ djó nga sie nga Shetani ma é ndi una gó ma na ró nari djo. Ri sie bblo pli kʉ ná saa! w22.05 14 §19-20

Yesu ngʉe kpakpanga na ngʉ adi njinjí ná ke. Ke ngʉe jadda ná saa na ke ngʉ adi mbawa dhi njínji. (Mk. 6:3) Kedzá gø dhi ndrŭ nanga ngʉ adi jini bbo ke ndima tsotso kó ndima nji ná kpakpa njí kana ndiro ndima dhó familia dhó mahitaji tso gbani d’e nari dho. Yesu ngʉe kaka ná ke nari dho, ke ka ndi njie kaka ná njí ndirigoti ndrŭ nanga ka ndi jieni ji ke e nji ná njí dho! Yesu maddi ngʉ adi hwè ba ndidhó njí dho. Nì mai ke ngʉ adi kimwili nǎ njínji kpakpanga na ro, Yesu ngʉ adi saa ba ndiro ndi njí Yova dzá njí d’e. (Yoh. 7:15) Luti, lod’radha dhi njí ke ngʉ nji ná saa na, ke bbʉngʉe ɨ shauri ndi rr ná ndrŭ dho: “Nzɨ ni njinjí sa ka ndi sani ná nyo dho, ro aninjinjí nŭnŭ di ná shinga dho di ná nyo dho.” (Yoh. 6:27) Ndirigoti Ngø tsɨ djó ke njingʉe ná Mahubiri nǎ, ke pongʉeri: “Anili nidhó mali ra na.” (Mt. 6:20) Mungu dhó ro si ná nyodyu adi ko tsotso kó ndiro ko é bblo kʉ ná nganjadha na kimwili nǎ njí djo d’e. Ko kʉ Wakristo nari dho, ko dho longaddieni ko njinjí “kpakpanga na . . . , ndirigoti bblo njí.” w22.05 22 §9-10

Eunike dhongʉe bblo kʉ ná loroji Timoteo dho. Ke ka ndi njaeri nari kʉ ndidzá mama ji Yova ji nari le dhǒ ndi nji ná lo chulu ndirigoti le njínji Yova dho nari rili le é hwè na. Føri bbai, njʉ bí kʉ ná isɨ ndrŭ adi ndima dhó familia nǎ ndrŭ thí ronga lø “nzá ndima tilo ro” ndiro kpa njinjí Yova dho d’e. (1 Pe. 3:1, 2) Ni maddi ka ni njiri fø. Ká ngbaribbai? Ni kana kʉ Yova na ná kau ali anziro. (Kum. 6:5, 6) Bí kʉ ná isɨ ndrŭ bbai, ni ngatsotso kó bí kʉ ná chu nǎ. Ni nidhó saa ma, nidhó mbø ma, ni ni tso jʉ ddo ró ma, ndirigoti ni njonjo kʉ ná ritsi vi ndiro ni gba nidzá nzø dhó mahitaji tso d’e. Ri nzá ngani ni li lo ni djǒ ro bbo, kpø ni kosa ni kana kau ni li Yova na kpakpa ná saa ná ngatsi ri. Bí ina, adi saa ba sala njidha dho ma, Biblia zødha dho ma ndirigoti njudha dhi ngana ni si nari dho. Fø ni njí ri ró, ni kana nga si ngʉ chøchø Yova na ndirigoti ni sie bblo kʉ ná loroji nidhó familia dho ndirigoti nja ndrŭ dho maddi. w22.04 16 §1; 19 §12-13

Ngbaribbai ma lo ka ndi d’ini ndrŭ djo ná longavʉdha nga kʉ kodhó ri, ná føri ko chu nari adi ngoi bbʉ ko dho! Yova kʉ Lod’i ná Bboke nari dho, ke i adi bbo na mana kʉ ná fø njí nji. (Ro. 14:10-12) Ko ka ko uri nari kʉ ke adi lod’i krʉ ddo ró, gbà tso gbani ndidhó yadha na nari bbai. (Mwa. 18:25) Ke nzá ka ndi njí nga kʉ chø ná lo ro ri! Ko adi Yova si kʉ ndrŭ kaka nzá nari ma, chenga adi li ndrŭ njí ná chelo krʉ ma na tso d’ød’ø ná saa b’o. Fø saa na, ko ndí ró ndirigoti ko thí ró, ko ronga voe ná føri krʉ si gøgø. (Zb. 72:12-14; Ufu. 21:3, 4) Ri nga ki ro nzɨ ko ka si no ri. Fø bblo kʉ ná lo si njini ná ddo ko b’o ná saa djo, ko adi mbai po dhonalo Yova bbʉ ko dho ná uwezo kʉ ko dyø ndi ndrŭ zø njidha na. w22.06 13 §18-19

Bblo lod’i ná ke dho ri adi ngani ndi chu sheria bblo pli. Ke dho ri adi ngani ndi chu bblo lo ma kana njonjonga chelo na bblo. Bblo lod’i ná ke dho ká ri adi ngani ndi chu ngbá lo ki? Lo ndi d’i nari njí ke dho ri adi ngani ndi chu ngbaribbai ma lo e nari krʉ vi. Ko ka ko pori Yova kʉ bblo lod’i ná Ke dhonalo krʉ ddo ró ke adi krʉ lo chu. Dz’ djó adi lod’i ná kpa ró ro njonjo, krʉ ddo ró Yova adi lo chu krʉ. (Mwa. 18:20, 21; Zb. 90:8) Ke tso nzɨ adi d’ø nja ndrŭ nja inga rr ndrŭ rr ná lo djo dhé ri. Ke adi lo famu krʉ, ke churie ngbà di ná ndrŭ ko kʉ nari ma, ngbà di ná nyi ma ko bae kodhi gø dhi ndrŭ ró ro nari ma, ngbà di ná longaddidha ma ko bangʉe nari ma, ko di ná nga ma, ndirigoti kodhó afya ká kʉ ngbǎ ma nari ma na. Ndirigoti Yova adi le thí nǎ lo ma chu ddi. Ke adi ni ká njie ddikpa lo addudho ma nari krʉ famu nì. Ddikpa ritsi ro ma nzá ddi ka ndi runi Yova ró ri. (Ebr. 4:13) Føri dzá lo dho, njati rie ddikpa le zø Yova nji ró, ke adi fø le zø nji ndi chu lo krʉ nari djotsina. w22.06 4 §8-9

Kodho maddi ringani ko chu Shetani njingʉe ná lo ndiri na ndi vi Yobu dhó ngab’odha dhonalo njʉ maddi ke adi rinji fø. Shetani pongʉeri ko nzá ji Yova Mungu ro ko thí nǎ ro krʉ ri ndirigoti ko ka ko tsatsa ke ro ndiro ko gø kodhó shinga d’e. Shetani pongʉeri ki, Mungu nzá jirie ko ro ri ndirigoti ke nanga nzá ka ndi jini ko nji ná bblo lo dho maddi ri. Ko chu ngbá lo ma Shetani adi ji ndi njí nari chu, ná føri dho ko nzɨ adi kedhó kali uri. Mbudha ka ndi kó ko tsotso ko chu ko ká kʉ ngbà di ná ndrŭ ma nari. Yobu bangʉe ná mbudha kongʉe ke tsotso ndiro ke d’i ndidhó uzaifu utso ndirigoti ke thɨ ndidhó lo thika d’e. Ke jifunzangʉe nari kʉ ndidho riengani ndi é nyenyenga na bbo. (Yob. 42:3) Mbudha ka ndi liri ko maddi chu ko ká kʉ ngbà di ná ndrŭ ma nari bblo. Njati ko chu kodhó uzaifu chu ró, ko ka ko njí kpakpanga ko thɨ ri thika. w22.06 23 §13-14

Yova tsoni nari kʉ ndi si ko tsotso ko ko. Loroji na Yova pongʉeri: “Ni kʉ madzá dimu nari njí,” ke pongʉeri: “Dda lú ni da ná saa na ma sie ni na nì ndirigoti bbo dda lú ni da ná saa na ma sie ni na nì dhé, ni tso ro nzɨ ri si ti ri. Kazz lú ni bbi ná saa na, ni ro nzɨ si gbɨ ri, kazz dà ma nzɨ ddi si ni ronga ro lø ri.” (Isa. 43:2) Lo ko d’ra ná saa na ko ka ko njú njonjo kʉ ná kpakpalo na, føri ko ka ko ddi chuchu ná dda na ndirigoti kazz na. Nì mai ri kʉ føro, Yova dhó le tsotsokodha chulu ko adi ra anzi dhé lod’radha na. (Isa. 41:13) Njʉ bí ku ná ndrŭ adi lo gʉgʉ. Ro kpa nzɨ adi lo gʉ ko lod’ra bblo nzɨ nari dho ri. Ko adi kpakpanga ba dhonalo ko churi nari kʉ Yova adi hwè ba, ko di ndidzá hwè lo-i d’ra chi ko tøni ro ró. Mutume Paulo pongʉeri: “Nja ke ddiro si ndi kobe ba ndi nganga njingʉe ná njí ró.”​—1 Ko. 3:8; 4:1, 2. w22.11 4 §5-6

Njʉ, ko Biblia nǎ unabi njini nari njanja. Krʉ “luga dhi ndrŭ” ndirigoti krʉ ndrŭ tsɨ, Biblia nǎ bbʉbbʉlo dhi “tsetse ná luga” chú. (Zek. 8:23; Sef. 3:9) Njʉ, 240 kʉ ná ngø nǎ ro 8 000 000 djolu da ná ndrŭ gba ndima tso Yova dhó tengenezo na, ndirigoti krʉ cho ró makumi ya maelfu kʉ ná ndrŭ adi batiso ba! Ro, bbo na mana kʉ nari nga kʉ fø ndrŭ dhó hesabu ri, ro ri kʉ Mukristo dhó sifa, “ø le dha” fø ø wanafunzi ke ndi thó ro. (Kol. 3:8-10) Bí kʉ ná kpa bba chelo ndima nji nari tso ma, lɨ ndima nji nari tso ma, ndima dhó ngø ndima jie bbo nari tso ma na. Isaya 2:4 nǎ ndingʉeni ná unabi njini nji, ɨ ndi ripo ro, kpa ‘nzɨ jifunza lɨ ki ro ri.’ Ko adi kpakpanga nji ko thó ø le dha ndirigoti ko kó nja ndrŭ tsotso ndima sí Mungu dzá tengenezo na, fø ko rinji nari na ko ko djó nga adi nja ná ke Kristo Yesu dyø. (Yoh. 13:35) Fø lo ká njini addudho? Dhonalo Yesu ko tsotso kó kodhó lo u ná ritsi ndi bbʉ ko dho nari na. w22.07 9 §7-8

“Yova tsó ko nganzi ná saa na, ringani ko bbʉ heshima bbo ke dho.” Addinga Isaya ma, Ezekieli ma, Danieli ma, Yohana ma na njangʉe ná maono djo. Ri krʉ nǎ le dhongʉe Yova bbo pli dho le ka le bbʉ heshima ná Pi bbai. Isaya “njangʉe Yova bbo pli ngbeni ná pi dhi kiti djó ndi di ro.” (Isa. 6:1-3) Ezekieli njangʉe Yova ra nǎ shar djó ndi di ro, “ngøkpakpa bbai di ná kadha d’e ndi ronga tso ro.” (Eze. 1:26-28) Danieli njangʉe “ddo kpari dhi muzee” sawø ru ndi tho ro ndirigoti rørø ná kazz si ndidhó pi dhi kiti djó ro ro. (Da. 7:9, 10) Yohana njangʉe Yova pi dhi kiti djó ndirigoti kiti ronga tso d’e nari dingʉe ngøkpakpa bbai di ná tsódde Emerodi dhi bbo ró dzi kʉ ná dju bbai. (Ufu. 4:2-4) Yova dzá bbo pli kʉ ná kadha djo ko ngaddi nari chulu ko bari nari kʉ, Yova uri tso u ko di nganzi ndi tso, ná fø lo dho ringani ko di mbai po bbo. w22.07 20 §3

Jaddakpa, Shetani si riji nzɨ ni nji maendeleo kiroho nǎ. Føri ke si nji lú na ddi chu ro kʉ, ke si rili ni nanga di rɨni rɨ Biblia ddi ná nja lo djo. Loroji na, nja ndrŭ si rimbu ndima liri ni uri nari kʉ, Mungu nzá norie ko ro ri, ro ko sirie mageuzi nǎ ro. Go ni ngʉe sese ro, ni nzɨ ngʉ adi nga ro ddi fø lo djo ri, ro njaro kpadjo le riddi ni dho darasa nǎ. Njaro nidhó mwalimu ddi mageuzi djo ná lo ka ndi di njani bbʉbbʉlo bbai. Nì mai ri kʉ fø ro, kpa nzá d’erie ri ro mbu ndima ne ngano ná Ke kʉ nì nari dhǒ ná lo ro ri. Ano Mezali 18:17 nǎ kʉ ná kanuni nga: “Ya kwanza si ndidhó lo na ná ke dhó lo adi njani bbʉbbʉ kʉ nari bbai, kpø ke tso ró ke si ná saa na, ke si lo dzá bbʉbbʉnga dhǒ ná lo dhu ke tso ná nga djo.” Darasa nǎ le ddi ná lo ni úe krʉ nari rɨngana, aneri ni chu Mungu dzá lo ma, kodhó vichapo ma na ká po ngbá lo ri djo nari. w22.08 2 §2; 4 §8

Ko adi riji ko famu Mungu dzá lo nǎ ro ko zø ná lo na mana bblo. Ro, nja saa djo nzá ko ka ko ba faida ko zø ná lo nǎ ro ri. Loroji na, addinga Yesu ma tingʉe “ddikpa bbo chu sheria ná ke” na ná lo djo di. (Lu. 10:25-29) Ke dhungʉeri ndi ká ka ndi njí addu nja ndi ba choro nŭnŭ di ná shinga ná saa djo, Yesu ddangʉe chutso ke dho Mungu dzá lo na, ɨ ndi dhuri ke tso nari na: “Sheria nǎ ká ri ndini ngbaribbai? Ni ká zø addu?” Fø kpetsi ke ngʉngʉe bblo kʉ ná jibu, ni ji Mungu ma, ni lai ma na pori ná andiko djo ndi tilo nari na. (Law. 19:18; Kum. 6:5) Ro, anja luti ke pongʉe ná lo di: “Ma lai ká kʉ ie?” Fø lo na ke dhongʉeri nari kʉ, ndi nzá famungʉe ndi nganga ngʉ zø ná lo na mana ro ri. Føri djotsina ke nzá chungʉe ngbaribbai ma ndi ka ndi njie njí ndi zø ná lo na ndidhó maisha nǎ nari ro ri. Kodhó lo u Yova dhó ngatsotsokodha nja ko famu maandiko bblo d’e. Føri dzá lo dho ko ka ko nziri Mungu bbʉ ndidhó roho takatifu ko dho ndiro ko li ko thí li ko zø ná lo djo, føri goti anziri ke kó ni tsotso ndiro ni njínji ni zø na fø lo na d’e. w23.02 9 §4-5

“Ni ká chungʉe bbʉbbʉlo ngbaribbai?” Bbʉbbʉ dhé, fø di ngadhudha goti ni ngʉ bí ina b’lo. Føri kʉ ko djoi ma, ko vei ma na tsó ko adi dhu ná lo njati ko ji ko chú kpa bblo pli ró. Ko djoi ma, ko vei ma na ká chungʉe bbʉbbʉlo ngbaribbai nari ko rr nari ko jirie ji. Ndirigoti ko adi hwè ba ko d’ra kpa dho Yova dzá Dimu kana ddike ro ko kʉ nari ká adi hwè bbʉ ko dho addudho ma nari. (Ro. 1:11) Fø lo adi ko tsotso kó ko di ngaddi Yova dzá Dimu kana ddike ro ko kʉ ná føri ká ko jirie ngbá ngatsi ma nari djo. Fø lo adi ko tsotso kó ko vʉri ko rá anzi “bbʉbbʉlo kana,” føri na mana kʉ ko di ngbà dho Yova ka ndi bbʉ ledha ko djo ndirigoti ngbà dho ke ka ndi u ko tso ná lo nji. Bbʉbbʉlo ko jirie dhonalo e bí. Ro, bbo na mana kʉ nari kʉ, ko jirie Yova Mungu bbʉbbʉlo si dhó ro ná ke. Kedzá lo Biblia rid’ra ko dho nari kʉ, ke nga kʉ ra ma, dz’ ma na no ná bbo pli kʉ ná kpakpanga na kʉ ná ke dhé ri, ro kodhi ji dhi ra nǎ li adi ndi dyu li ko ro ná Baba maddi.​—1 Pe. 5:7. w22.08 14 §1, 3

Mutume Paulo ngʉ adi ndi djoi ma, ndi vei ma na li kpakpa nja ndima dhǒ jidha “bblo kʉ ná njí” chulu d’e. (Ebr. 10:24) Ke ngʉ adi ndi djoi ma, ndi vei ma na tsotso kó nga ndi ti ná lo chulu dhé ri, ro ndi nji ná lo chulu maddi. Loroji na, Yudea na ù (njala) chingʉe ná saa na, Paulo bbʉngʉe fø Wakristo dhó lo ungʉe ná ritsi ro kpa dho. (Mdo. 11:27-30) Bbʉbbʉ dhé, nì mai Paulo ngʉ adi lod’radha ma, longaddidha ma na dhi njí nji bbo ro, ke ngʉ adi kimwili nǎ ritsi dhi mahitaji na kʉ ná ndrŭ tsotso ndi ko ná chu ne krʉ saa ró. Fø ndi rinji nari na ke ngʉ adi ndi lai Wakristo tsotso kó, kpa uri nari kʉ Yova si ndima ronga b’ob’o. Njʉ maddi, njati ko di njínji kodhó saa na ma, kodhó kpakpanga na ma, kodhó ufundi na ma, nja ko kó na chʉ ngaba ná lo na bani ná le-djoi ma, le-vei ma na tsotso ró, føri na ko ka ko li kpadhó udha kpakpa. Ko ka ko njiri ki fø, dz’ djolu gble njini ná njí tsotso ko kó kodhó muchango na nari chulu. Fø chulu ndirigoti nja chu nǎ maddi ko adi ko djoi ma, ko vei ma na tsotso kó kpa uri nari kʉ, Yova nzɨ bba ndima ro ri. w22.08 24 §14

Biblia nǎ kʉ b’lo njini ná unabi bí. Ri kana nja ri njini b’lo cho da mamia ri le ndi nari goti ro. Historia ridho fø unabi krʉ njieni nji. Føri nzá ka ndi ké ko nanga ri dhonalo Biblia si Yova dhó ro. Addinga Babiloni dhi bba ka ndi sie sadha ba nari d’rangʉe ná unabi djo. Karne ya 8 na Yesu gøni nari njí, nabi Isaya dho roho ddangʉe chutso ro ke d’rangʉeri kpakpa ngʉe ná Babiloni le si lølø. Ke pongʉeri fø bba Koreshi si lø ndirigoti ngbaribbai ma ke ka ndi løe ri nari. (Isa. 44:27–45:2) Isaya d’rangʉeri ki nari kʉ, Babiloni ka ndi saeni sa ndirigoti ri nǎ nzá ndrŭ ki ro ka ndima dieri. (Isa. 13:19, 20) Umedi ma Uajemi ma na løngʉe Babiloni cho 539 na Y.G.N. ndirigoti fø bbo ngʉe ná bba ma rie kpadjo nga nǎ ndrŭ ro. w23.01 4 §10

Yova vʉ ko nja ko é ndi má dz’ djolu gble ná familia kana d’e. Føri kʉ bblo pli kʉ ná pendeleo ndirigoti ri nǎ ro ko adi faida ba bbo! (Mk. 10:29, 30) Dz’ djolu gble, ko kʉ ko bbai ji Yova ná ko djoi ma, ko vei ma na na ndirigoti kpa adi kpakpanga nji nja ndima njinjí Yova dhó yadha na ndima dhó maisha nǎ d’e. Kodhó luga ma, kodhó desturi ma, ko thó ná ru ma na ka ndi é njonjo kpa ró ro, ro ko adi jidha dhé dhǒ kpa dho njati rie ya kwanza ma ko nju kpa na ri ró. Bbo ko jirie nari kʉ, madha ko bbʉ ddinga kodhi ra nǎ ji dhi Baba dho nari, ndirigoti njʉ kodhó lo uri ko di ddi ko tso gbani ro. (Zb. 133:1) Nja saa na, kpa adi ko tsotso kó ko djó li o ná no d’udha na. (Ro. 15:1; Gal. 6:2) Føri kina, kpa adi ko tsotso kó nja ko njinjí Yova dho klø na ndirigoti ko má Yova dzá kau d’e. (Ebr. 10:23-25) Addinga ngbaribbai ma ko ka ko mbue ko njati kutaniko ée nga ndi b’o ko ronga, ko tøni kpakpa ko krʉ dhó mbubai Shetani ma, kedhó che kʉ ná i dz’ ma na tso ró ró nari djo. w22.09 2-3 §3-4

Njaro ko ronga tso ko cho nari ka ndi si kpakpa eternete na ko njínji ná saa djo. Njati ko é krr nga ró, ko ka ko d’ra siri dhi lo bí kʉ ná ndrŭ dho nzá ko ji ro. Ndirigoti b’lo ko pli longa ró, ko nzá ka ko chu ngbaribbai ma ndrŭ ka ndima njinjí fø lo na nari ndirigoti ngbá lo ma ka ndi si fø lo nǎ ro nari ro ri. Ko ronga tso ko cho nari ka ndi kó ko tsotso ki njati wapinzani di rimbu ndima liri ko d’ra hatari na ka ndi li ko djoi ma, ko vei ma na ná lo ró. Fø di ná lo ka ndi banga njati polise di ngadhu ko tso gʉ kodhó njí gʉni ná ngø nǎ ná saa djo. Ko ka ko njínji Biblia nǎ ɨ ripo ná yadha na, “akob’o [ko] tso ronga le tso ronga tso chodha dhi ritsi na” fø lo kana ndirigoti nja lo kana maddi. (Zb. 39:1) Njati rie ko di kodhó familia na ma, kodhó bbakau na ma, ko djoi ma, ko vei na ma inga nja d’i ndrŭ na ma ró, ringani ko é ngbà djo ndrŭ ka ndima li ndima thí ná ndrŭ. Nja ko é ngbà djo ndrŭ ka ndima li ndima thí ná ndrŭ d’e, ringani ko di ko ronga tso chocho. w22.09 13 §16

Nja ko é bbʉbbʉ kʉ ná hwè na d’e, ringani ko di kiroho nǎ nyo nyǒ. Ndirigoti kodhó lo uri ko njiri fø. Fø lo dho Yesu pongʉeri ɨ: “Ndrŭ dho nzá ringani ndima di shi mukati dho dhé ri, ro Yova tso nǎ ro si ná krʉ kʉ ná lo dho.” (Mt. 4:4) Føri dho, ri nzá ngani ko bbá ddo ro da ddikpa maddi nzá ko zø Mungu dzá lo ro ri. Yova ji ko ji ná lo dho, ke d’ra ko ka ko njí ná lo Biblia chulu ndiro ko é bbʉbbʉ kʉ ná hwè na kodhó maisha nǎ d’e. Ko adi ke pɨ kodhó maisha djo nari ká kʉ addu ma nari djo lo chu. Ko adi lo chu ngbaribbai ma ko kana nga ka ndi é chøchø ke na ndirigoti addu ma ko ka ko njí ndiro ke njí kodhó chenga zø d’e nari djo. Ndirigoti ko chu lo gosi ná saa na ke tsoni djo ko dho ná bblo kʉ ná ngab’odha djo maddi. (Yer. 29:11) Fø bbʉbbʉlo ko chu Biblia nǎ ro nari liri ko é hwè na bbo! Njati rie bʉ ka ndi bʉ ni thí ná ngbǎ di ná lo na ma ni bani maisha nǎ ri ró, aba saa bbo ni zø Mungu dzá lo ndirigoti ni ddinga ri djo. w22.10 7 §4-6

Føri dho, Biblia ko li kpakpa, ndiro nzɨ ko di nzá chu lo ná ndrŭ ró. “Ko adi nyodyu ba” Biblia nǎ kanuni na ko njínji kodhó maisha nǎ nari chulu. Njati ko njiri fø ró, ko si ngbaribbai ma Biblia ka ndi kó ko tsotso ko nyi kpakpalo tso ndirigoti ko vʉ lo nanga nyodyu na d’e nari nja. Ri kʉ bblo ko di ngaddi ko nanga vʉ ná lo djo. Njati rie b’lo ko nga Biblia ko zø nari tso ndirigoti njudha dhi ngana ko si nari tso ri ró, ringani ko di ngaddi ko ka ko njí ná lo djo ndiro ko bbʉ ko Yova dho ndirigoti ko ba batiso d’e. Njati rie b’lo ko ba batiso ri ró, ko ká rine ko ngʉ nì lod’ra bblo inga nì longaddi bblo ná mwalimu i nì? Ko vʉ nanga ná lo ká ridho ko njínji nì Biblia nǎ ro ko jifunza ná lo na? Ko ká adi Wakristo e na ná sifa dhǒ nì nja ndrŭ dho? Njati ko rá ri utso d’i ringani ko thɨ kodhó nja lo thika thɨ ri ró, ringani ko di ngaddi bbo Yova dhó lojadha djo, føri ka ndi liri ‘nzá chu lo ná ke ngʉ nyodyu dhi ke.’​—Zb. 19:7. w22.10 20 §8

Ezekieli njangʉe ngbaribbai ma, Mungu dhó roho kʉ kpakpanga na nari. Ke njangʉe maono nǎ ná lo lingʉeri ke chu ngbaribbai ma roho takatifu ngʉ kpakpanga na kʉ ná malaiká tsotso kó ndirigoti ra nǎ shar tsotso kó nja ndi rá krʉ kʉ ná ngalu nari. (Eze. 1:21) Ezekieli ká njingʉeri ngbǎ? Ke ndingʉe njinjieni ná lo ndi. “Ma njangʉe fø lo ná saa na, ma bʉngʉeni gbrugbru gʉna.” Bbo ndi nanga keni nari dho Ezekieli bʉngʉeni gʉna. (Eze. 1:28) Luti Ezekieli ddingʉe nga ké dho le nanga keni ná fø maono djo ná saa na, ri lingʉe ke kpakpa ke uri nari kʉ, Yova dhó roho ka ndi kó ndi tsotso ko ndiro ndi d’ralo d’e. Yova jangʉeri Ezekieli dho: “Ndrŭ Ddù, adani røna ni kó djo ndiro ma tilo ni na d’e.” Yova pongʉe ná fø lo ma, kedhó roho takatifu ma na kongʉe Ezekieli tsotso ndiro ndi dani røna d’e. (Ezek. 2:1, 2) Luti lo ndi ngʉ d’ra ná saa na, Mungu “thó” inga kedhó roho takatifu ddangʉe chutso Ezekieli dho.​—Eze. 3:22; 8:1; 33:22; 37:1; 40:1. w22.11 4 §7-8

Isaya d’ra Yova adi longaddi ko dho ná ya pili chu maddi, ke pori: “Ni bɨ si ddikpa lo rr ni goti ro.” Iga nabi ddi Yova krr di ná mwalimu na ndidhó wanafunzi goti lú ndi bbí ndirigoti kpa ka ndima bbí lú ná chu ndi dho kpa dho ro. Njʉ ma ko adi Yova chu rr ddi ko goti ro. Ká ngbaribbai? Mungu dzá lo dho roho ddangʉe chutso nari goti ddo si bí b’lo. Føri dho, Biblia ko zø ná saa na, ri adi njini Mungu chu ko rr ko goti ro nari bbai. (Isa. 51:4) Ko ká ka ko ba faida ngbaribbai Yova chutso ddá ko dho nari nǎ ro? Anja Isaya d’rangʉe ná aro kʉ ná lo. Ya kwanza ke pongʉeri, “i ri kʉ chu.” Ya pili, “abbi ri lú.” “Chu” le chu ná føri nzá kaka ri. Kodho ringani ko di “bbí ri lú.” Yova dzá lo ma, kedhó tengenezo ma na chulu ko adi Yova ji ko njí ná lo chu. Ko adi ngbaribbai ma ko ka ko njinjí ko chu ná lo na nari ma chu ddi. Ndiro ko ve ngatso hwè na Yova dho ko njínji nari kana d’e, kodho ringani ko njínji aro kʉ ná fø lo na. Njati ko njínji ko chu ná lo na ró, ko ka ko uri u nari kʉ Yova si ko kobe bbʉ nì. w22.11 11 §10-11

Yesu dhó wanafunzi cheni nari goti tse, kali dhi Wakristo ngangʉe tsudha tso kutaniko na. (Mt. 13:24-27, 37-39) Kpa ngangʉe “kali dhi lo ddidha tso nja ndima drr na ndrŭ ndima una d’e.” (Mdo. 20:30) Kpa ngangʉe ddidha tso ná “kali dhi lo” kana ddi ri ro ngʉe nari kʉ, Yesu nzá bbʉngʉe ndi “ddikpa ina ndiri na ndi sa ndrŭ krʉ dhi chenga” ddiddi Biblia adi riddi nari bbai ri, ro fø bbʉdha dho ringani ke di ndi bbʉ krʉ saa ró. (Ebr. 9:27, 28) Njʉ bí kʉ ná ndrŭ urie fø kali dhi mafundisho u. Kpa adi ndima tso gba ndima dhó kanisa na krʉ ddo ró nja ndima nji “Bbʉdha dhi Misa” ndima nzǐ nari d’e. Nja kpa nzɨ adi Yesu dzá dhe nga ro no bí ina maddi ri, ro kpadhó dini nǎ bí kʉ ná ndrŭ dhé nzá famurie Yesu bbʉngʉe ná fø bbʉdha na mana ká kʉ addu ma nari ro ri. w23.01 21 §5

Cho løfu ddi Yesu si pinyo nari kana che cherieni ná ndrŭ si gaga, ndirigoti nì ngarr Mungu dho ná ndrŭ si ngʉ kaka ná ndrŭ. Ya mwisho mbudha goti chølo dhi ri Yova nja ná ndrŭ dho “dz’ si che, ndirigoti kpa si di ri djó theinga dho.” (Zb. 37:10, 11, 29) Hwè dhi lo kʉ, “ya mwisho tso le si d’ø ná mbuba kʉ dhe.” (1 Ko. 15:26) Ko njari nari bbai ko si di theinga dho ná føri dyʉ ndi Mungu dzá lo ró. Fø ngab’odha ka ndi kó ko tsotso ko tøni chi kpakpa lo tso o ná ngasini ná i saa na. Ro, nja ko bbʉ hwè Yova thí dho d’e, nzá riji ko si di shi ná føri dhé cho ko ronga ri. Yova ma, Yesu ma na dho ko adi tøni chi dho ná bbo na mana kʉ ná sababu kʉ ko jirie kpa bbo nari. (2 Ko. 5:14, 15) Fø jidha adi ko cho ko dyø kpa ndirigoti ko d’ralo nja ndrŭ dho kodhó ngab’odha djo. (Ro. 10:13-15) Njati ko é nzɨ ko dya nji ro ndirigoti hwè na ko kodhó ritsi bbʉ ndrŭ dho ro ró, Yova si riji ndi é kodhó kau theinga dho. w22.12 6-7 §15-16

Ndrŭ di ko nzanza ná saa na ko ka ko kosa ngoi adi bbʉ ko dho ná bí kʉ ná ritsi. Ko nanga ri ka ndi di d’od’o ndirigoti gosi ná lo do ka ndi di ko njinji. Fø le le mbu nari kʉ kawaida kʉ ná lo. Ro, ringani ko é krr. Yesu pongʉeri fø di ná nzadha ka ndi lieri ndi unakpa thí bʉni bʉ. (Yoh. 16:1, 2) Ko ndrŭ si nzanza nari Yesu pongʉe ná saa na, ke pongʉeri ri ka ndi kaka ko tøni chi maddi. (Yoh. 15:20; 16:33) Njati le gʉ kodhó njí gʉ ró, ko ka ko ba lojadha tawi nǎ ro ma, wazee dhó ro ma. Føri ka ndi liri ko ronga b’oni b’o ndirigoti ko rá anzi kiroho nǎ nyo ko ba nari na ndirigoti ko rá anzi lod’radha na ngbà ri ka ndi ka ná ngatsi. Anji krʉ kʉ ná kpakpanga ni rrnga lojadha dho. (Yak. 3:17) Nzɨ tu siri kʉ ná longa le-djoi ma, le-vei ma na djo, nga kʉ haki na ndima chu ri ná kpa dho.​—Muh. 3:7. w22.12 20-21 §14-16

Njʉ maddi Yesu adi chutso ddá ndi unakpa dho Mungu dzá Pidhinga kpa d’ra dz’ djolu gble nari kana. Ke ma adi ndi ka ndi njí nari nji ddi. Yova dhó tengenezo chulu, Yesu mazoezi bbʉ ko dho ndirigoti ke kodhó lo u ná ritsi bbʉ ko dho ndiro ko d’ra hwè dhi lo-i d’e. (Mt. 28:18-20) Ko adi Yesu pongʉe ná fø lo nji kpakpanga na ko lod’ra nari ma, longa ko ddi nja ndrŭ dho nari ma na chulu nì ko di kere Yova si i dz’ tso d’ø nari ko b’o ro. Waebrania 6:11, 12 nǎ kʉ ná shauri na ko njínji nari na ko si rili kodhó ngab’odha tso kaka “kpø mwisho si ná nga djo.” Yova li ngbá saa na ma, inga ngbá ddo na ma ndi si Shetani dhó i dz’ sa nari b’lo. Fø ddo sisi ná dyi Yova si ndidzá lo nǎ kʉ ná unabi krʉ njinji. Nì mai ri kʉ føro, fø ddo ka ndi njani nzɨ si tse nari bbai, ro Yova dhó ddo “nzɨ si rɨni rɨ ri!” (Hab. 2:3) Føri dzá lo dho “akora anzi Yova ko b’o ro,” nì ko kʉ “bblo kʉ ná nganjadha na [kodhi] gødha dhi Mungu djo ro.”​—Mik. 7:7. w23.02 19 §15-16

Ddikpa ke di riji ndi dji glʉ djo ró, kedhó muradi e ndi dji kpø ri djǒ djo. Nì mai ri kʉ føro, chu lú ka ndi é tø ke ka ndi tøni ná nga bí ndirigoti ndi ba hwè ndi nja ná bblo kʉ ná ritsi dho. Føri bbai adi saa ba ni tøni ndirigoti ni ddinga ngbaribbai ma Yova lieri nidhó lo bbi bblo nari djo, rie kpakpalo kana ma ni e ri ró. Krʉ ngasdjó adi ridhu ni tso ɨ: ‘Njʉ ká ma njae Yova dhó ledha ro ngbá chu nǎ? Ní mai madhó kpakpa lo kʉ go ro, Yova ká ma tsotso kó nja ma ve ngatso ngbaribbai?’ Anja Yova njie nja ndi kó ni tsotso d’e ná sese lo ro mai. Bbʉbbʉ dhé, ni ka ni nzinga ngbà ndiro nidhó kpakpalo tso dyani dya d’e. (Flp. 4:6) Ro, ringani ko di ngaddi kpadjo Yova bbʉ ko dho ná ledha djo maddi. Dhonalo Yova tsoni ndi si ko li kpakpa ndirigoti ndi si ko tsotso ko nja ko ve ngatso d’e. Føri dho adi mbai po krʉ ddo ró Yova ni tsotso kó nari dho. Føro ni si ngbaribbai ma ke ni tsotso kó nari nja, ndiro nidhó lo bbi bblo, rie kpakpalo kana ma ni kʉ ri ró.​—Mwa. 41:51, 52. w23.01 19 §17-18

Adhuri ni tso ɨ: ‘Ngbaribbai ma ma ishi nari ká ridho ma famu i dz’ tso si d’ø karrnga goti nari bbʉbbʉ? Darasa zødha ma, njínjidha ma na djo ma nanga vʉ ná lo ká ridho ma nja Yova dho ma njínji nari bbo na mana kʉ ná lo madhó maisha nǎ bbʉbbʉ? Ma ká urieri ngbà nari kʉ, Yova ka ndi gba ma ma, madhó familia ma na dhó lo tso ngbà?’ Yova nanga adi jini bbo ke di rinja ko rine ko njí ndi ji ná lo krʉ ko nji ná lo kana ró. (Mt. 6:25-27, 33; Flp. 4:12, 13) Ringani ko di kodhó ngaddidha nanga ne bí ina ndiro ko thɨ kodho ringani ko thɨ thika ná lo d’e. Paulo pongʉeri Korinto nǎ Wakristo dho ɨ: “Animbu ni ni niro ndiro ni chu ni ká kʉ udha kana ní nari d’e, anine ni chu ni ká kʉ ngbaribbai ma nari.” (2 Ko. 13:5) Føri dho ko ka ko ngʉ kodhó ngaddidha ø Mungu dzá lo ko zø, ko ngaddi ke adi ngaddi nari bbai ndirigoti ko njí kodhó lo u ná lo ndiro ko njí Yova nyǒ tho ná lo d’e.​—1 Ko. 2:14-16. w23.01 9 §5-6