ETERNET djó kʉ ná Watchtower LIBRARY
Dzamu dhi Munara
ETERNET DJÓ KɄ NÁ LIBRARY
Baledha
  • BIBLIA
  • VICHAPO
  • NJUDHA
  • es24 paje 98-108
  • Bi 10

I sehema nǎ, tayari kʉ ná video ro nga

Dzodzo dhé, video ni telesharje ro ddikpa kosa banga.

  • Bi 10
  • Ddo ró le zø ná Andiko—2024
  • Rere lo djǒ
  • Ronji dyi, Bi 10 ddo 1
  • Gbonji dyi, Bi 10 ddo 2
  • Thonji dyi, Bi 10 ddo 3
  • Mbʉnji dyi, Bi 10 ddo 4
  • Zanji dyi, Bi 10 ddo 5
  • Yenga dyi, Bi 10 ddo 6
  • Wanzia dyi, Bi 10 ddo 7
  • Ronji dyi, Bi 10 ddo 8
  • Gbonji dyi, Bi 10 ddo 9
  • Thonji dyi, Bi 10 ddo 10
  • Mbʉnji dyi, Bi 10 ddo 11
  • Zanji dyi, Bi 10 ddo 12
  • Yenga dyi, Bi 10 ddo 13
  • Wanzia dyi, Bi 10 ddo 14
  • Ronji dyi, Bi 10 ddo 15
  • Gbonji dyi, Bi 10 ddo 16
  • Thonji dyi, Bi 10 ddo 17
  • Mbʉnji dyi, Bi 10 ddo 18
  • Zanji dyi, Bi 10 ddo 19
  • Yenga dyi, Bi 10 ddo 20
  • Wanzia dyi, Bi 10 ddo 21
  • Ronji dyi, Bi 10 ddo 22
  • Gbonji dyi, Bi 10 ddo 23
  • Thonji dyi, Bi 10 ddo 24
  • Mbʉnji dyi, Bi 10 ddo 25
  • Zanji dyi, Bi 10 ddo 26
  • Yenga dyi, Bi 10 ddo 27
  • Wanzia dyi, Bi 10 ddo 28
  • Ronji dyi, Bi 10 ddo 29
  • Gbonji dyi, Bi 10 ddo 30
  • Thonji dyi, Bi 10 ddo 31
Ddo ró le zø ná Andiko—2024
es24 paje 98-108

Bi 10

Ronji dyi, Bi 10 ddo 1

Nju tso njuni ná ndrŭ kana ma si madha bbʉ ni dho.​—Zb. 22:22.

Ko ka ko gba ko tso njudha dhi ngana ko bbʉ ná madha na ddinga ko dyi ngo nari chulu ndirigoti bblo ko tayarisha ná komatere ko bbʉ nari chulu. Nja ndrŭ dho dyi le ngo inga komatere le bbʉ njudha dhi ngana nari e kpakpa. Nde, nidho ma ká føri e kpakpa ddi? Rie fø ró, anja nja ndrŭ njingʉe ná lo ndiro ndima sisi ndima nǎ do djolu d’e. Dyi le ngo ná saa na, nja ndrŭ ra rinja ri kʉ bblo le di dyi ngo le thí nǎ ro krʉ. Pidhinga dzá dyi ko ngo ná saa na, bbo nǎ mana kʉ ná lo kʉ ko ngo dyi njudha dhi ngana nja ko bbʉ na madha Yova dho d’e. Føri dho, adi dyi tayarisha nja njudha ni adi tayarisha nari bbai ndirigoti adi dyi nǎ kʉ ná lo ronga ká nju ngbaribbai ma njudha dhi ngana le si loti djo ná lo na nari ne ni chu ddi. Godhé, adi ni thí li bbo dyi nǎ kʉ ná lo djo, nga ngbaribbai ma ni ngoni nari djo ri.” Komatere le bbʉ njudha dhi ngana nari ka ndi si kpakpa nja ndrŭ dho. Nde fø ndrŭ tsotso ká addu ka ndi kó? Bí ina adi ngano nari kʉ, ringani nidhó jibu é dʉ, dhʉdhʉ ndirigoti ndi nǎ mana na. Yova nanga adi jini bbo ko rivʉ ko bbʉ madha ndi dho njudha dhi ngana nari dho. w22.04 7-8 §12-15

Gbonji dyi, Bi 10 ddo 2

Yova kʉ ma tsotso kó ná ke; ma ro nzɨ do nji ri.​—Ebr. 13:6.

Biblia nǎ referase pori, fø verse nǎ le ripo le “tsotso kó ná ke” ná føri na mana kʉ lele rine ndi kó le tsotso ná ke. Addinga Yova rine lele ndi si nzanzani ná le tsotso ko nari djo. Ni ka ni uri u nari kʉ fø lo ridho Yova e tayari ndi kó ko tsotso. Yova dhó ngatsotsokodha chulu, ko ka ko ve ko bani na ná mbudha tso hwè na. Ri ká kʉ ngbá chu nǎ, Yova adi ko tsotso kó ri? Ndiro ko ngʉ fø logoti d’e, akozø Isaya dzá buku nǎ bani ná lo. Ká addudho? Dhonalo Isaya chulu Yova dhongʉe ná unabi lø njʉ njínji ke dho ná ndrŭ ronga maddi. Godhé, Isaya dho ngbà lú ko ka ko famu Yova bblo ná lo bí ina. Akonja fø loroji ro Isaya sura 30 nǎ. Fø sura nǎ, Isaya dho bblo kʉ ná loroji ndiri na ndi dhǒ ngbaribbai ma Yova adi ndidzá ndrŭ tsotso kó nari d’e. Ke ndingʉeri, Yova adi ko tsotso kó (1) kodhó sala ndi rr ndirigoti ri goti ndi ngʉ nari chulu, (2) chutso ndi ddá ko dho nari chulu, ndirigoti (3) njʉ ndi ledhá bbʉ ko dho ndirigoti gosi ná saa na ndi si ri bbʉ ko dho nari chulu. w22.11 8 §2-3

Thonji dyi, Bi 10 ddo 3

Nzɨ nji karrnga goti ni si bani na ná kpakpalo do. . .  . Atøni chi kpø dhe djo, ndirigoti ma si shinga dhi taji bbʉ ni dho.—Ufu. 2:10.

Yesu chongʉe Smirna ma, Filadelfia nǎ kutaniko ma na dho ná imba nǎ ke pongʉeri fø kutaniko nǎ Wakristo dho nari kʉ, nzɨ kpa njí do ndima nzani nari djotsina dhonalo Yova si kpa kobe bbʉ nì njati kpa tøni chi ngbà ndi dho ró. (Ufu. 3:10) Ringani ko chu nari kʉ ndrŭ si ko nzanza ndirigoti akodi tayari ri tso vedha dho. (Mt. 24:9, 13; 2 Ko. 12:10) Ufunuo dzá buku ridho nari kʉ Mungu dzá ndrŭ, ndrŭ ka ndima nzanza “Bboke dzá ddo dyi” nǎ. (Ufu. 1:10) Ufunuo sura 12 ridho nari kʉ Yesu ngʉngʉe Pi ná saa na, ddikpa bbo vita tangʉe ra na. Yesu Kristo, Mikaeli le ndi nzǐ ro ndirigoti kedhó malaiká ma na njingʉe là Shetani ma, ndidhó gó ma na tso ró. (Ufu. 12:7, 8) Føro Mungu dhó fø mbubai djó là singʉe si ndirigoti le bungʉe kpa dz’ djo, føri dho kpa adi ndrŭ nzá bbo dz’ djó.​—Ufu. 12:9, 12. w22.05 5 §12-13

Mbʉnji dyi, Bi 10 ddo 4

Kodhi Mungu Yova ro nga e nga kʉ chø ná ke ri.​—2 Ny. 19:7.

Yova dhó lod’idha e krʉ ddo ró d’ʉ ndirigoti chi. Ke nzɨ adi ndrŭ nanga ro krø sese maddi ri. Yova nzɨ adi ddikpa ke zø nji, ke d’ani bbo inga ke kʉ mbø dhi ke inga ke na mana kʉ bbo inga ke chu lo bbo nari djotsina maddi ri. (1 Sa. 16:7; Yak. 2:1-4) Ddikpa le ro ma nzá ddi ka ndi cho Yova inga ndi bbʉ kanyaga ro ke dho ri. Krʉ ddo ró ke adi longavʉ bblo. (Kut. 34:7) Yova kʉ bblo lod’i ná ke dhonalo ke adi kodhó krʉ kʉ ná lo famu ndirigoti kodhó hali ma na. (Kum. 32:4) Kiebrania nǎ buku ndi ná kpa d’ingʉe ri utso nari kʉ, Yova bbai ndrŭ zø nji ná le ro nga kʉ ri. Nja chu nǎ, “kpa njíngʉe njí Kiebrania nǎ, na ná longa le tú ró, ri na mana kʉ Yova dhé adi chenga nji ná ndrŭ zø nji. Kpa nzá tingʉe lo ndrŭ ka ndima njí ndima zø ndima kana nari djo ri dhonalo ndrŭ dhó zølo e ndi dhi mipaka na.” Yova ddiro dhé kʉ kpakpanga na nja ndi njí chenga nji ná le leni ná ke zø d’e. w22.06 4 §10-11

Zanji dyi, Bi 10 ddo 5

Adho jadda ke dho ringani ke dyø ná chu; ngó ma ke ngʉ ró ke nzɨ si ri bbari.​—Mez. 22:6.

Njati rie ni nidzá nzø ngu ddiro inga ni bbá ke nga kʉ Yova dzá Dimu ri ró, achuri nari kʉ nidhó udha adi ni kuso lu kʉ ná ndrŭ li kpakpa ndirigoti ri adi kpa ronga chocho. Nde, ri ká ka ndi é ngbǎ njati rie nzɨ nidzá ngba ndidhó lo thika lé nì mai ni kpakpanga nji ro ró? Anonga nari kʉ, ngba le zoeza ná føri ka ndi dzi saa. Njati ni zʉ nyokpa ró, nja saa djo ni ka ni di ridhu ni tso nari kʉ, ri ká ka ndi dhi ndirigoti ndi bbʉ tsukpa ndi djo bbʉbbʉ. Nì mai ri kʉ føro, ni nzá ka ni chu ngbaribbai ma ri si ndi kpa o nari ro ri, ro ni ka ni di dda dhé ddo ri djo ndiro ri si ndi kpa o ngbà ka ná saa na d’e. (Mk. 4:26-29) Føri bbai, isɨle ka ndi dhuri ndi tso nari kʉ, ndi ká kpakpa nji nì ndiro ndi kó ndidzá nzø tsotso nja nzø ji Yova ndirigoti kpa njinjí ke dho d’e. Ri nzá ka ndi ka ni chu nidzá nzø nanga vʉ ná lo krʉ ri. Ro, ni di krʉ kpakpanga nji ni ddi longa kpa dho ró, ni rili kpa dhidhi kiroho nǎ. w22.04 19-20 §16-17

Yenga dyi, Bi 10 ddo 6

Bʉ le bʉni nari njí e nodha, ndirigoti che chu na le tsu nari njí e ngbe le le ngbe nari.​—Mez. 16:18.

Go Sulemani ngʉ tøni chi Yova dho ro ke ngʉe bblo kʉ ná nganjadha na ndi djo. Jadda ke ngʉe ná saa na, ke chungʉe nari kʉ ndi dho nzá ritsi ka ndi njini krʉ ri. Ná føri dho ke nzingʉeri Yova ddá chutso ndi dho. (1 Fa. 3:7-9) Pinyodha tso Sulemani ngangʉe ná saa na, ke chungʉe nodha nǎ ro ka ndi si ná hatari chu. Njedha dhi lo kʉ, Sulemani nganga tso nga ma ndidhó fø shauri na ndi njínji nari gʉngʉe ddi luti. Pi ke nyo nari kana ke vengʉe ngʉ nodha ndirigoti ke bbangʉe Mungu ja ná lo dho ndi ngarr nari tso bba. Loroji na, ddikpa sheria pongʉeri ɨ: Waebrania bbá pi dho nzá ringani ndi “kø dhɨ bí ri, ndiro nzɨ ndi thí shani ró.” (Kum. 17:17) Sulemani nzá rrngʉe nga fø sheria dho 700 ndi kø dhɨ ndirigoti 300 ndibbá bbai djó dhɨ ngʉe nari na ri! (1 Fa. 11:1-3) Njaro Sulemani thí ngʉ riddi nari kʉ, fø lo ro nga kʉ hatari ndi dho ri. Luti Sulemani vengʉe Yova dho le ngarr nzɨ nari nǎ ro si ná matokeo ba ba.—1 Fa. 11:9-13. w22.05 23 §12

Wanzia dyi, Bi 10 ddo 7

“Madzá chi tøni ná ke si di shi udha dzá lo dho” ndirigoti “njati ke ngʉ aluti ró, kedzá lo nzɨ tho ma nyǒ ri.”​—Ebr. 10:38.

Njʉ ringani ndrŭ vʉ ddikpa bbo na mana kʉ ná lo nanga. Kpa ká ka ndima gba ndima tso Yova Mungu dhó dz’ djo lu gble si Pi nyo ná pidhinga na, inga ndima gba ndima tso kedhó che pli kʉ ná mbuba shetani Ibilisi na? Ndrŭ dho ringani ndima vʉ ndima ká sie ie laidjó ma nari. Le ká si shinga ba inga nzɨ ma nari si dhoni le vʉe nanga ná lo ró. (Mt. 25:31-33, 46) Le ká si gøgø inga nzɨ ma nari si dhoni dho “bbò mbudha dhi saa na. (Ufu. 7:14; 14:9-11; Eze. 9:4, 6) Njati ni vʉri ni gba ni tso Yova dhó Pidhinga na ró, føri kʉ nyodyu na ni vʉ lo nanga ri. Yova dhó Pidhinga na ndima tso gba chi ndima tøni ro ná ndrŭ si ledha ba. Ringani ko chu lo fø bbo na mana kʉ ná bbʉbbʉlo djo. Fø ko vʉri nari si rili Yova dho ko vʉrieri ko njinjí nari li kpakpa. Føri goti, ko ka ko kó nja ndrŭ tsotso ko chu ná lo na ndiro kpa vʉ lo nanga bblo ndirigoti kpa rá anzi Yova dho ndima njínji nari na d’e. w22.05 15 §1-2

Ronji dyi, Bi 10 ddo 8

Ni kʉ hwè na kʉ ná ndrŭ njati rie . . . krʉ kʉ ná chelo ndrŭ ti ni djo ri ró.​—Mt. 5:11.

Ringani ko di ngarr Yova dho, nga kodhó mbubai dho ri. Yobu ngʉ adi Yova rr li ndi li ndi dyu ro, Yova ngʉ loti ndi dho ná saa na. Mungu ngʉ loti Yobu na ro, ke pongʉeri ɨ: ‘Ma chu ni ró njini ná lo krʉ. Ni ká riddi nzá ma nja ni ró njini ná lo ri?’ Yobu ngʉngʉe fø logoti nyenyenga na ndirigoti bbo ndi nanga jini Yova dzá bblonga dho ro. Ke pongʉeri “ma bɨ ngʉ lo rr nì ni djo, ro kpadjo ma nja ni ma nyǒ na.” (Yob. 42:5) Fø lo Yobu pongʉe ná saa na, ke ngʉ di hu nǎ, ndi ndí ró krʉ kʉ ná ngalu kilonda kʉ ro. Nì mai ri kʉ føro, Yova dhongʉe jidha Yobu dho ndirigoti ke pongʉeri Yobu tso uni u ndi na. (Yob. 42:7, 8) Njʉ maddi, ndrŭ ka ndima dhu ko dhu ndirigoti ndrŭ ka ndima nja ko nga na mana kʉ ri. Kpa ka ndima mburi ndima sa kodhó sifa inga kodhó tengenezo dhó sifa. Yobu dhó lo nǎ ro ko chu nari kʉ, Yova urieri u ko ka ko tøni chi njonjo kʉ ná kpakpalo lú ko da ná saa djo. w22.06 24 §15-16

Gbonji dyi, Bi 10 ddo 9

Chembø dzá ngba dhó ndoa si b’lo.​—Ufu. 19:7.

Bbò Babiloni ba sadha nari dho ra nǎ sie bbò hwè dhi makelele. Bbo pli si hwè bbʉ ná nja lo ki ma sie ddi. (Ufu. 19:1-3) Føri kʉ Ufunuo dzá buku nǎ le tilo djo ná “Chembø dzá ngba dhó ndoa,” bbo ndi nǎ mana kʉ ro. Armagedoni dhi lɨ tso ngani nari njí 144 000 kʉ ná kpa krʉ sie b’lo ndima ra ra nǎ ro. Nì mai ri kʉ føro, føri nga sie Chembø dzá ngba dhó ndoa si da ná saa ri. (Ufu. 21:1, 2) Chembø dzá ngba dhó ndoa si da Armagedoni dhi lɨ goti b’lo Mungu d’ø ndidhó mbubai tso ro. (Zb. 45:3, 4, 13-17) Chembø dzá ngba dhó ndoa dhi saa na ká ngbá lo si njini? Ndoa na kpetsi ke ma adi ndima tso gba isɨle ma na nari bbai, i loroji dhi ndoa nǎ Pi Yesu ma si ndima tso gba ndibbá “ndoa-i” 144 000 kʉ ná kpa ma na. Fø lo si rili ø kʉ ná pidhinga nyó pi dz’ djo cho 1 000 kana.​—Ufu. 20:6. w22.05 17 §11-13

Thonji dyi, Bi 10 ddo 10

Hwè na kʉ ná noke kʉ njati kedhó boke si . . . ke ro nì ndi ri nji fø ro ró!​—Mt. 24:46.

Yesu pongʉeri nari kʉ, ngasini ná saa na ndi si “chi njí dhi noke” li ndiro ndi di kiroho nǎ nyo bbʉ ndrŭ dho d’e. (Mt. 24:45) Føri dzá lo dho ko ka ko uri u nari kʉ, fø noke njínji kpakpanga na njʉ. Føri kʉ bbʉbbʉlo. Kodhi bbonga Yesu adi njínji ché na le d’ri ná sese kikundi na ndiro ndi di Mungu dzá ndrŭ dho “nyo bbʉ ngbà thonga ná saa na d’e.” Fø kpetsi kpa nzɨ adi ndima nja, nja ndrŭ dhó udha djó bbobbonga bbai ri. (2 Ko. 1:24) Føri rɨngana kpa churi nari kʉ, Yesu Kristo i kʉ “chutso ddá” ndidzá ndrŭ dho ná ke. (Isa. 55:4) Cho 1919 djó ro, chi njí dhi noke adi njonjo kʉ ná vichapo bbʉ, ná føri adi ko tsotso kó ko chú bbʉbbʉlo Mungu dzá lo nǎ ro. Ndirigoti cho 1921 na, chi njí dhi noke tayarishangʉe Buku La Harpe de Dieu nja ndi kó ndrŭ tsotso ndima chu Biblia nǎ mafundisho ya musingi d’e. Lo thika øni nari bbai, kpa bbʉngʉe nja vichapo maddi. Ni tsotso ká ngbá vichapo kongʉe nja ni ji kodhi ra nǎ Baba d’e? w22.07 10 §9-10

Mbʉnji dyi, Bi 10 ddo 11

Ni si kʉ ma li ni nji theinga dho.​—Zb. 41:12.

Yova kʉ bbo pli adi ritsi bbʉ ndrŭ dho ná ke. Njati rie addu ma ni bbʉ ke dho ri ró, ke si ri bbʉ ni dho fø nga djolu dhé. (Mk. 10:29, 30) Ke si bblo pli ndirigoti bí nǎ ledha kʉ ná maisha bbʉ ni dho che kʉ ná i dz’ djó. Ndirigoti føri kʉ nga dhé ritso ngani go ri. Ni ka ni rá anzi nidzá ji dhi Baba dho ni njínji nari na choro nŭnŭ. Ni kana kʉ nidzá Baba na ná jidha ka ndi ra anzi dhi ndi dhi nari na ndirigoti ni si di shi theinga dho ke bbai. Njati ni bbʉ nidhó maisha Mungu dho batiso chulu ró, ni ba pendeleo ni bbʉ bbo na mana kʉ ná ritsi nidzá Baba dho. Ke bbʉ bblo pli kʉ ná ritsi ma, hwè dhi saa ma na ni dho nzá ni d’erie ri ro ba nari bbai. Ná føri dho ni ka ni bbʉ ra ma, dz’ ma na no ná ke dho nga kʉ kedhó ná ritsi, føri i kʉ ni njinjí ke dho chi ni tøni ro nari. (Yob. 1:8; 41:11; Mez. 27:11) Føri i kʉ bblo ni njínji nidhó maisha na ri. w23.03 6 §16-17

Zanji dyi, Bi 10 ddo 12

Jadda ke ká ka ndi b’o ndidhó chu ronga ndi é tse ndi tse ro ngbaribbai? Ke ndi ronga b’o nidzá lo kana nari chulu.​—Zb. 119:9.

Go ni kʉ jadda ro ngono dyu ka ndi é ni nǎ bbo ndirigoti nja ndrŭ ka ndima cho ni, ni njí uasherati. Føri i kʉ, Shetani adi ji ni njí ná lo nganga. Nde, addui ká ka ndi kó ni tsotso nja ni tøni chi fø di ná mbudha tso ró d’e? (1 Te. 4:3, 4) Ddiro ni nji ná sala nǎ, ad’ra ngbaribbai ma ni ni mbu nari Yova dho. Ad’ra ngbaribbai ma ni ni mbu nari nganga ndirigoti anziri ke tso ke bbʉ kpakpanga ni dho. (Mt. 6:13) Anonga nari kʉ, Yova adi riji ndi kó ni tsotso ko, ro nga ndi bbʉ malipizi ni dho ri. (Zb. 103:13, 14) Nzɨ di rine ni si nidhó kpakpalo ni ddi ro. Ad’ra ni hwini na ná lo nidzá gø dhi ndrŭ dho. Fø di ná lo le d’ra ndrŭ dho nari ngae sʉsʉ ri, ro ri kʉ bbo na mana kʉ ná lo le njí ri fø. Biblia ni zø ndirigoti ni di ngaddi ri nǎ ro ni ba ná kanuni djo ró, ri ka ndi é sʉsʉ ni dho ni vʉ hwè ka ndi bbʉ Yova dho ná lo nanga. Ni si ri famu nari kʉ, nidhó lo nzá u sheria krʉ kʉ ná lo kana ri dhonalo ni si Yova dhó ngaddinga famu bí kʉ ná lo djo. w22.08 5 §10-12

Yenga dyi, Bi 10 ddo 13

Njati ddikpa ke di ndibbá ndrŭ dhó mahitaji tso gba nzá ró, . . . ke gʉ udha gʉ.​—1 Ti. 5:8.

Mukristo kʉ ná dzaba dho ringani ndi gba ndidhó familia dhó lo tso. Njati ni é dzaba ró, njaro ni do adi nji nidhó familia ni ngu ndirigoti dza tso ni dzi kpa dho nari dho. Njaro ni e do na dho ná lo kʉ, njati ni vi nidhó njí ró ni nzá ka ni ba d’i njí ki ro ri. Inga njaro ni riddi sese kʉ ná mbø nzá ka ndi gba nidhó lo tso ri. Afø di ná lo chulu Shetani liri bí kʉ ná ndrŭ bbá Yova dho ndima njínji nari tso bba. Shetani adi riji ko uri nari kʉ, Yova nzá ji ko ri ndirigoti ke nzá ka ndi kó ko tsotso ko gba kodhó familia dhó lo tso ri. Føri dho, ko ka ko di riddi nari kʉ, ringani ko njí krʉ kʉ ná lo ndiro nzɨ kodhó njí bba ko ró. Ko ka ko di rine ko njí krʉ kʉ ná njí ri é sa ma ri ka ndi sa ko kana kau Mungu na ri ró. w22.06 15 §5-6

Wanzia dyi, Bi 10 ddo 14

Nde, fø ngab’odha kʉ ko dho, ddiddi kodhi shinga dho Nanga bbai, ri kʉ bbʉbbʉ ndirigoti kpakpa ndi kʉ ro.​—Ebr. 6:19.

Ko churi nari kʉ, kodhi Mungu e “Zølo na ndirigoti ndrŭ dhi ri zø adi nji ná ke, nzɨ nanga adi kani lele ná ke ndirigoti bbo adi chi kʉ ná jidha ma, bbʉbbʉlo ma na dhǒ ná ke.” (Kut. 34:6) Yova jirie chø kʉ ná lo. (Isa. 61:8) Ko nzani ná føri ke nja, nari nzɨ adi hwè bbʉ ke dho ri, ke kʉ tayari ndirigoti ke jirieri ji ndi si ko nzani nari tso d’ød’ø gosi ná saa djo. (Yer. 29:11) Ko maddi li ko thí bblo pli sie ná fø saa djó! Føri i kʉ Yova ko jirie dho ná ddikpa sababu ro! Ko jirie bbʉbbʉlo dho ná njari ká kʉ ngbá sababu? Bbʉbbʉlo adi faida bbʉ ko dho bbo. Anja ddikpa loroji. Biblia nǎ bbʉbbʉlo tsu ndi nǎ kodhó ngab’odha gosi ná saa djo. Ddiddi Nanga adi rili nzɨ bbú ra nzá le le ndi tso ná thá djo nari bbai, kodhó Biblia ró dyʉ ndi ná ngab’odha ka ndi kó ko tsotso kpakpalo na ko hwini ná saa djo. Njʉnga dhi andiko nǎ Paulo ngʉ loti ra nǎ si ra ná ché na le d’ri ná Wakristo kʉ na ná ngab’odha djo. Ro, fø lo njínji i dz’ djo si choro nŭnŭ shinga ba ná Wakristo djo maddi. (Yoh. 3:16) Bbʉbbʉ dhé, choro nŭnŭ shinga djo le lochu ná føri adi mana bbʉ kodhó maisha dho. w22.08 14-15 §3-5

Ronji dyi, Bi 10 ddo 15

Nzɨ ni bba dyi tsu go ni kʉ ni nanga kani ro.​—Efe. 4:26.

Le thí le li ndrŭ djo nari adi ndi dyʉ jidha ro. 1 Wakorinto sura 13 ti jidha djo ná lo ka ndi kó ko tsotso bbo nja ko li ko thí nja ndrŭ djo d’e, inga ko li ko thí ki vi kpa djo njati rie bʉ ma kpa bʉe ko thí ri ró. (1 Ko. 13:4-8) Loroji na, verse 4 ripo “jidha e ngatsovedha na ndirigoti zølo na.” Yova adi ko tsoveve nì mai ko adi chenga nji ke laidjo ro. Bbʉbbʉ dhé, ko ka ko ve ko djoi tso ve nja saa na kpa njí inga kpa po ná lo vó ko thí ronga vo ma ró. Verse 5 ri ki ndri: “[Jidha] nanga nzɨ adi kani ka ri. Ndirigoti ri nzɨ adi ndi thí ronga voe ná lo nanga zøri.” Ko nzá ka ko jiri ko di ko djoi taeni nari ronga b’o ko djǒ nǎ nja ko si ri ngano gosi ná saa djo d’e ri. Muhubiri 7:9 ripo nari kʉ, ri nzá ngani ko “nanga di kani tse ri.” Adi ni djoi ma, ni vei ma na nja Yova adi kpa nja nari bbai. Mungu jirie kpa ji ndirigoti ke nzɨ ni kpadhó chenga ronga b’o ndi djǒ nǎ ri. Kodho maddi nzá ringani ko njiri fø ri. (Zb. 130:3) Kpadhó kosa djo ko lie ko thí nari rɨngana ko di kpadhó bblo kʉ ná sifa nja.​—Mt. 7:1-5. w22.09 3-4 §6-7

Gbonji dyi, Bi 10 ddo 16

Føri goti mbudha dhi saa si ngaba.​—Da. 12:1.

Danieli dzá buku d’ra ngbaribbai ma, bbo si hwè bbʉ ná fø lo si njini utaratibu na ngatso d’ø ná saa na nari. Loroji na, Danieli 12:1 pori Yesu Kristo, Mikaeli le ndi nzǐ ro “tøni [Mungu] dzá ndrŭ dhi lo dho.” Fø unabi ró sehemu ngangʉe ndi njini nari tso 1914 na Yesu le lingʉe Mungu dhó ra nǎ Pidhinga nǎ Pi ná saa na. Nì mai ri kʉ føro, Danieli pongʉeri ki nari kʉ, Yesu ka si “tøni” “nzá d’e rie nga ro ba ndrŭ tsɨ tso ngangʉeni ná nga djó ro kpø fø saa djo ná nzadha” dhi saa na. Fø “nzadha dhi saa” le nzǐ Matayo 24:21 nǎ “bbò mbudha.” Yesu si kʉ tøni Mungu dzá ndrŭ dhi lo dho, nzadha dhi saa dzá mwisho na ná føri kʉ Armagedoni dhi saa. Ufunuo dzá buku nzi fø ndrŭ “birobiro kʉ ná ndrŭ bbo mbudha nǎ ro ndima si ro.”​—Ufu. 7:9, 14. w22.09 3-4 §6-7

Thonji dyi, Bi 10 ddo 17

Ri kʉ chenga nji ma laidjo ná ke ró dho i ma si kʉ sasa madzá buku nǎ ro ri.​—Kut. 32:33.

Nì kʉ shinga dhi buku nǎ kpadjo ná dho ka ndi sani sa maddi ri nǎ ro. Ri kʉ kreyo na Yova ko ró dho ndi ya kwanza nari bbai. (Ufu. 3:5, maelezo ya chini) Ringani ko njí kpakpanga ko ró dho má fø buku na kpø ri si ndini bike na ná nga djo. Nì ró dho kʉ shinga dhi buku nǎ ná ndrŭ kʉ, ra nǎ nga dho le vʉ ndima si ra pinyo Yesu ma na ná kpa. Mutume Paulo pongʉeri “ndi lai njí dhi kpa” Filipi nǎ Wakristo dho nari bbai, ché na le d’ri ndima rá pinyo Yesu ma na ná fø kpa ró dho kʉ njʉ nì shinga dhi buku nǎ. (Flp. 4:3) Ro, nja kpa ró dho má ma fø buku na d’e, ringani kpa tøni chi. Ya mwisho alama le si li kpa ro b’lo ró, kpa ró dho si ndini theinga dho shinga dhi buku na. Føri ka ndi njini dhe kpa dhe nari njí inga bbò mbudha tso si ngani nari njí.​—ufu. 7:3. w22.09 14 §3; 15 §5-6

Mbʉnji dyi, Bi 10 ddo 18

Hwè na kʉ nari kʉ Mungu dzá lo rr ndirigoti njínji ri na ná ndrŭ!​—Lu. 11:28.

Loroji na, i di ná lo ká barie ni ro b’lo? Ddikpa ke rɨ bbo ni jirie ná nyo. Ro, njaro ni dho saa kʉ sese inga ni ngaddi nja lo djo nari dho ni nyo ri lele, ro ni nzá mbu ri ká o ngbǎ ma nari bblo ri. B’lo ni dya nganyodha tso nari goti, ni ra ri famu nari kʉ ni nyoe nga lele, ro ni ra ri utso d’i ni ka ni nyoe nga dzodzo ndiro ni mbue nyo ká o ngbǎ ma nari bblo d’e. Biblia ko zø ná saa na ma ri kʉ fø i. Njati ko di Biblia zø lele ró ko nzá ka ko ba hwè Yova ddi ko dho ná lo nǎ ro ri. Aba saa ndiro ni nanga jini ji Mungu dzá lo ni zø nari dho; athɨ zø ni zø ná loroji ni djǒ na, addinga lo le ti djo ná ndrŭ dhó sauti djo ndirigoti addinga zø ni zø ná lo djo. Ni di rinji fø nari si rili ni é hwè na. Yesu lingʉe “nyodyu dhi chi njí dhi noke” nja ndi bbʉ kiroho nǎ nyo ngbà thonga ná saa na d’e, føri dho ko adi nguni bblo kiroho nǎ. (Mt. 24:45) Chi njí dhi noke bbʉ ko dho ná kiroho nǎ nyo krʉ adi ndi dyʉ Biblia nǎ kʉ ná lo ro.​—1 Te. 2:13. w22.10 7-8 §6-8

Zanji dyi, Bi 10 ddo 19

Ngbe ndima ngbé na ndrŭ gbo ko kaka ná ngatsi.​—Zb. 123:4.

Biblia pongʉeri ngasini ná saa na, bí kʉ ná ndrŭ sie pá lo be ná ndrŭ. (2 Pe. 3:3, 4) Kpa adi rinji fø dhonalo kpa “adi ndima dhó tamaa ne nzɨ ndima ngarr Mungu dho nari chulu.” (Yud. 7, 17, 18) Ko ká ka ko b’o ko ronga ngbaribbai ndiro nzɨ ko ngʉ pá lo be ná ndrŭ ró? Fø ko ka ko njiri ná ddikpa chu kʉ, nzɨ ko gba ko tso ro fø dhó nyi di ná ndrŭ na. (Zb. 1:1) Føri na mana kʉ, ri nzá ngani ko rr inga ko zø waasi dhó ro si ná lo ri. Njati ko é krr nga ró, ko ka ko gba ko tso ngadhó nyi kʉ bblo ná ndrŭ na, ko nanga ka ndi di rɨni rɨ Yova djo ndirigoti kedhó tengenezo chulu ko ba ná chutsoddadha djo. Føri dho, ringani ko dhuri ko tsó: ‘Ko ká e che kʉ ná ngaddidha na njati ko ba ddikpa ø chutsoddadha inga ddikpa mwangaza ró? Ko ká adi chutso ddá ná kpa dhó kosa ne?’ Njati ko njiri lele ko thɨ kodhó lo thika ró, Yova nanga si jini bbo kodhi lo dho.—Mez. 3:34, 35. w22.10 20 §9-10

Yenga dyi, Bi 10 ddo 20

Izraeli dzá dza nzɨ ni ro rr ri. —Eze. 3:7.

Mungu dhó roho lingʉe Ezekieli kpakpa ndiro ndi d’ralo “kpakpa djǒ dyu ndirigoti kpakpa thí kʉ ná ndrŭ dho d’e.” (Eze. 3:7) Yova pongʉeri ke dho: “Ma liri ni nyǒ djó nga é kpakpa ddiddi kpa nyǒ djó nga bbai ndirigoti ni nyitso é kpakpa ddiddi kpa nyitso bbai. Ma liri ni nyitso é ddiddi diama bbai, kpakpa pli bbo dju djolu. Nzɨ nji kpa do inga ni ronga tátá kpa nyǒ djó nga do dho.” (Eze. 3:8, 9) Ri ngʉ njini i Yova ripo ke ni nari bbai: ‘Nzɨ bbari ni thí bʉni ndrŭ nidhó lo rr nzɨ nari dho. Ma si ni li kpakpa.’ Føri goti Mungu dhó roho lingʉe Ezekieli kpakpa ndi d’ralo d’e. Ezekieli ndingʉeri “Yova thó ngʉ njínji ma djo kpakpanga na.” Ri ungʉeri yenga da ddi ndiro fø nabi famu ndi dho le d’rangʉe ná fø lo bblo d’e. (Eze. 3:14, 15) Føri goti Yova pongʉeri ke rá kpere kʉ ná djǎ na, fø lu “roho tsungʉe [ke] na.” (Eze. 3:23, 24) Ezekieli ngʉe tayari ndi d’ralo. w22.11 4-5 §8-9

Wanzia dyi, Bi 10 ddo 21

Ee Yova ni ká ma ka ma nzi ma tsotsokodha dho kpø ngbá nga djo nzɨ ni ma rr ro? . . . Ni ká bbanga nza le nzani nari dho addudho?​—Hab. 1:2, 3.

Nabi Habakuki ngʉ adi hwini bí kʉ ná kpakpalo tso ró. Ddikpa saa na ke nanga rɨngʉeni rɨ Yova ká ngaddi nì ndi djo nari djo. Føri dho, ke d’rangʉe ndi thí nǎ kʉ ná lo Yova dho sala chulu. Yova ngʉngʉe chi ngʉ tøni ná fø ke nzingʉe ndi thí nǎ ro krʉ ná sala goti ngʉ. (Hab. 2:2, 3) Luti Habakuki ddingʉe nga ngbaribbai ma Yova adi ndidzá ndrŭ gø nari djo na saa na ke nanga lingʉe li hwè na. Ke ungʉeri u nari kʉ Yova ngaddi nì ndi djo ndirigoti ke ka ndi kó ndi tsotso ko ndi ve krʉ kʉ ná mbudha tso. (Hab. 3:17-19) Ko ká ba ngbá somo? Kpakpalo na ni hwini ná saa na, anzinga Yova tsó ndirigoti ad’ra ngbaribbai ma ni ni mbu nari ke dho. Føri goti ali ni thí kedhó le tsotsokodha djo. Njati ni njiri fø ró, ni ka ni uri u Yova si nidhó lo ji ná kpakpanga bbʉbbʉ ni dho ndiro ni ve ngatso d’e. Ndirigoti ni di kedhó le tsotsokodha nja ná saa na, nidhó udha ka ndi ngʉ kpakpa bbo. Njati ni di kiroho nǎ lo nji krʉ ddoro ró, ni nzá ka ni bbá ri ro kpakpalo inga rɨ ni nanga rɨni nari ndo ni kana nga ro Yova na ri.​—1 Ti. 6:6-8. w22.11 15 §6-7

Ronji dyi, Bi 10 ddo 22

Bbʉbbʉ dhé ma ripo ni dho njʉ, ni sie ma na Paradiso nǎ.​—Lu. 23:43.

Yesu ma, ndi kuso aro kʉ ná bbabandi ma na nzani nza ndima si cheni nari ndima b’o ro. (Lu. 23:32, 33) Fø bbabandi aro ro krʉ ngʉ chelo ti Yesu djo. (Mt. 27:44; Mk. 15:32) Ro, luti kpa kana ddi ke lengʉe ndidhó ngaddidha thika le. Ke pongʉeri: “Yesu, ano ma nga nidhó Pidhinga na ni si si ná saa na.” Yesu ngʉngʉe kedhó logoti njʉnga dhi andiko nǎ kʉ ná lo na. (Lu. 23:39-43) Yesu pongʉe fø bandi dho ná lo ka ndi cho ko, ko ddinga ngbaribbai ma maisha sie Paradiso nǎ nari djo. Bbʉbbʉ dhé, Pi Sulemani dhó pidhinga tsena ngʉe ná ngoi ka ndi kó ko tsotso ko chu nja lo Paradiso djo. Ndirigoti Biblia ripo nari kʉ, Yesu kʉ bbonga na Sulemani djolu nari dho, ke ma, ndi lai ndi si pinyo na ná kpa ma na si rili i dz’ djó nga é bblo pli. (Mt. 12:42) Bbʉbbʉ dhé, “nja chembø” nyǒ ndima chu ndima dhó lo ká u addu ndiro ndima tsu Paradiso na d’e ná fø lo adi tho bbo.​—Yoh 10:16. w22.12 8 §1; 9 §4

Gbonji dyi, Bi 10 ddo 23

Bbʉbbʉ dhé, ke si zølo dho ni dho ni tsotsokodha dho ni hø ná saa na.​—Isa. 30:19.

Isaya ko li kpakpa ko churi nari kʉ Yova si ko rr ndi ró ko hø ná saa na ndirigoti ke si kodhó sala goti ngʉ lele. Isaya pori ki: “Ke si kodhó logoti ngʉ thei ri ndi rr ná saa na.” Fø lo ko li kpakpa ko nonga nari kʉ, kodhi Baba kʉ ji ndi jiri ndi kó ndi tsó nganzi ná ndrŭ tsotso ro. Fø lo ko chu nari ko tsotso kó ko ve ngatso hwè na. Yova adi ko krʉ dhó sala rrrr. Fø ká ko ka ko pori addudho? Isaya 30 dzá sehemu ya 1 nǎ, le ripo “ni” ná fø lo na le bí kʉ ná ndrŭ dhǒ; dhonalo føga Yova loti birobiro kʉ ná ndrŭ dho. Ni mai ri kʉ føro, verse 19 nǎ le ripo “ni” ná føga kʉ ná lo le ti ddiddi ro kʉ ná ndrŭ dho. Isaya ndiri: “Ni ki ro nzɨ si kʉ dzz ri”; “bbbʉbbʉ dhé, ke si kʉ zølo dho ni dho”; “ke si nidhó logoti ngʉngʉ.” Yova kʉ Jidha dhi Baba nari dho, ke adi ko krʉ nja nì ndirigoti ke adi kodhó sala rrrr.​—Zb. 116:1; Isa. 57:15. w22.11 9 §5-6

Thonji dyi, Bi 10 ddo 24

Anidi krr su bbai ndirigoti nga nǎ kosa kʉ ri bbana bbai.​—Mt. 10:16.

Nzɨ bbari Shetani ma, ndidhó dz’ ma na tá do ni na. Le lod’ra ndirigoti le longaddi nì mai upinzani kʉ ro nari adi hwè ma, ngoi ma na bbʉ ko dho. Karne ya kwanza na Wayaudi djó bbobbonga jangʉeri mitume bbá lod’radha tso ná saa na, chi ngʉ tøni ná fø kpetsi kpa vʉngʉeri ndima rrnga Mungu dho. Kpa rangʉe anzi dhé lo ndima d’ra nari na ndirigoti fø njí lingʉeri kpa é hwè na. (Mdo. 5:27-29, 41, 42) Bbʉbbʉ dhé kodhó njí le gʉgʉ ná saa na, ringani ko d’ralo krr ko kʉ ro. Ro, njati ko njí krʉ kʉ ná kpakpanga ngbà ró, ko si kʉ Mungu ji ná lo le nji nari ma, ndrŭ dhó shinga gø ná lo le d’ra nari ma na nǎ ro adi si ná ngoi ba. Auri u njati ko bani bbo kʉ ná kpakpalo na ma ró, ri ka ndi kaka dhé ko ba ngoi. Fø di ná saa na ringani ko nonga nari kʉ, kodhó lo ji Mungu dhó ro si ná ngoi, føri kʉ Yova dhé adi bbʉ ná ngoi. Ali ni thí ke djo nya ndi nanga nyá ná dhe ma, chʉ adi ngaba ná lo ma, ndrŭ le nza nari ma na tso ró ni hwini ná saa na. Adi chøchø kedzá tengenezo ró. Ali ni nyǒ ni njí kʉ ná bbo thonga ná saa djo, ni njiri fø ró, “ngoi dhi Mungu sie ni na nì.”​—Flp. 4:9. w22.12 21 §17-18

Mbʉnji dyi, Bi 10 ddo 25

Anitho ø le dha ni ro.​—Efe. 4:24.

Ringani ko njí kpakpanga bbo fø lo njidha dho. Nja lo ki kʉ, ringani ko njí kpakpanga bbo ndiro ko si che kʉ ná nyi djolu d’e. Loroji na, chelo le nji nari ma, bbo thø kʉ le nǎ nari ma, bbo le nanga kani nari ma na. (Efe. 4:31, 32) Nde, fø lo njidha kae kpakpa addudho? Dhonalo che kʉ ná nja nyi thika le ø nari e kpakpa. Loroji na, Biblia pori nari kʉ, njari kʉ “tse lu lo kani” ná kpa ndirigoti “bbo lu lo kani” ná kpa. (Mez. 29:22) Fø di ná nyi na kʉ ná kpa dho ringani ndima njí kpakpanga bbo nja ndima le fø nyi thika njati rie b’lo ma ndima ba batiso ri ró. (Ro. 7:21-23) Anzinga Yova tso, kpakpa thika ødha kʉ ni dho ná nyi djo, auri u ke ni rr nì ndirigoti ke ni tsotso koko. (1 Yo. 5:14,15) Yova nzɨ si fø nyi si ddù chulu ri, ro ke kpakpanga bbʉ ni dho ndiro ni sisi fø nyi djolu d’e. (1 Pe. 5:10) Ndirigoti anjiri nidhó sala nǎ ni nziri nari bbai, nzɨ nji drrdrr ni dha ka ndi ngʉ ni ro dho ná lo ki. Ndirigoti nzɨ bbari nidhó ngaddidha má muchafu kʉ ná tamaa djo.​—Flp. 4:8; Kol. 3:2. w23.01 10 §7, 9-10

Zanji dyi, Bi 10 ddo 26

Mungu ji ná ke dho ringani ndi ji adjondi maddi.​—1 Yo. 4:21.

Ko adi jidha dhǒ nǎ ná ddikpa chu kʉ kpakpanga na ko lod’ra nari chulu. Ko adi lod’ra ko nju na ná ndrŭ krʉ dho. Ko nzɨ adi ndrŭ nanga krø ndrŭ dhó rangi ma, ndrŭ dhó bbʉ ma, ndrŭ dhó mbø ma inga ndrŭ si nanga ma na djotsina ri. Njati ko njiri fø ró, ko sie Yova jirie nari bbai ko rinji ro, føri i kʉ, “ndrŭ krʉ dho ringani ndima ba gødha ndirigoti ndima é d’ʉ kʉ ná lochudha na nari.” (1 Ti. 2:4) Føri kina ko adi jidha dhǒ Yova ma dho Yesu ma na njati ko di jidha dhǒ ko djoi ma, ko vei ma na dho ró. Ko adi ko dyu lili kpa ro ndirigoti ko adi kpa tsotso kó kpakpalo na kpa bani ná saa na. Ko adi kpa iso pɨ rie kpa ró ji kpa jie ná le dhedhe ró, dhe kpa nji ró ndirigoti ko adi ko dho ka ná lo nji krʉ ndiro ko li kpa kpakpa d’e rie bʉ kpa thí bʉni ri ró. (2 Ko. 1:3-7; 1 Te. 5:11, 14) Ko adi sala nji kpa dho nì ko richu ná ri kʉ, “chølo dhi ke dhó sala e kpakpanga na bbo ro.”​—Yak. 5:16. w23.01 28-29 §7-8

Yenga dyi, Bi 10 ddo 27

Anipɨ ni iso ni kana ndirigoti anili ni kpakpa ni kana.​—1 Te. 5:11.

Dza chi ná ke dhó ufundi adi dhidhi ke di ra anzi njí na nari bbai, ko maddi ko ka ko ngʉ ufundi na njati ko di ko li kpakpa ko kana ró. Ko maddi ko ka ko kó nja ndrŭ tsotso ndima ngʉ kpakpa nja ndima ve kpakpalo tso d’e, b’lo vengʉe kpakpalo tso ná ndrŭ dhó loroji ko dhǒ kpa dho nari chulu. (Ebr. 11:32-35; 12:1) Ko ka ko b’o ngoi ronga nja ndrŭ dhó bblo lo djo ko loti nari na, ndirigoti akodi ngoi ronga b’o sa ri ji ndi sani ná saa na, ndirigoti lo tá ko kana ró akonji ngoi. (Efe. 4:3) Ndirigoti ko ka ko li ko djoi ma, ko vei ma na dhó udha kpakpa Biblia nǎ bbo na mana kʉ ná bbʉbbʉlo ko d’ra kpa dho nari na, kimwili nǎ ko kpa tsotso kó nari na, ndirigoti djø dhó udha djø ná ndrŭ tsotso ko kó nari na. Ko si hwè ba bbo njati ko di ko djoi ma, ko vei ma na dhó udha li kpakpa ró. Dza ka ndi sani sa, ro kpakpa ko ndrŭ li nari dhi matokeo ka ndi di choro nŭnŭ! w22.08 22 §6; 25 §17-18

Wanzia dyi, Bi 10 ddo 28

Yova adi nyodyu bbʉ; ke tso nǎ ro lochudha ma, lo utsod’idha ma na adi si.​—Mez. 2:6.

Yesu dhongʉe kodhó lo u ná ddikpa sifa njati ko jiri ko famu ko zø ná lo bblo ró, fø sifa kʉ lo utsod’idha. (Mt. 24:15) Nde, lo utsod’idha ká kʉ addu? Føri kʉ ddikpa lo ma ká gba ndima tso nja lo na ngbaribbai inga ri ká kʉ njonjo nja ri ró ro ngbá chu nǎ ndirigoti ri nǎ nzá le po pʉlʉpʉlʉ nari ká kʉ ngbá lo nari le adi famu na ná kpakpanga. Føri kina Yesu pongʉeri nari bbai kodhó lo u lo utsod’idha ndiro ko nja Biblia nǎ b’lo njini nari ká kʉ ngbá unabi nari d’e. Kodhó lo u fø sifa ndiro ko ba faida bbo Biblia nǎ ro ko zø ná lo krʉ nǎ ro d’e. Yova adi lo utsod’idha bbʉ ndidzá njí dhi ndrŭ dho. Føri dzá lo dho anziri ke tso ke kó ni tsotso ni é fø sifa na d’e. Nde, ni ká ka ni njí nidhó sala nǎ ni nzie ná lo ró njí ngbaribbai? Zø ni zø ná lo nanga ane li ni li ni dyu ro ndirigoti ane ngbaribbai ma ni zøe ná lo ma tso nju b’lo ni churie ná lo na nari. Aneri ni famu ni zø ná lo na mana ndirigoti ni chu ngbaribbai ma ni ka ni njinjí ri na nidhó maisha nǎ nari. (Ebr. 5:14) Njati ni di ngazø lo utsod’idha na ró, ni si Maandiko famu bblo pli. w23.02 10 §7-8

Ronji dyi, Bi 10 ddo 29

Ke chulu ko kʉ shi, ko ko ronga já ndirigoti ko kʉ nì.​—Mdo. 17:28.

Addinga nidzá kau bbʉ ni dho ná drrdrr bblo le thɨ ji djó ná ddikpa tablo djo. Ri djó rangi nga kʉ bblo ri ndirigoti ri nanga thani tha. Nzá mai ri d’ani ro, ri ró dzi i kʉ bbo dhé. Bbʉbbʉ dhé, ni ka ni ji fø tablo ji ndirigoti ni ka ni b’o ri ronga b’o. Føri bbai Yova bbʉrie bbo na mana kʉ ná kado ko dho ná føri kʉ shinga. Bbʉbbʉ dhé, Yova dho ndi adi kodhó shinga nja mana na nari ndidhi Dduna ndi bbʉ le ødha dhi be ko dho nari chulu. (Yoh. 3:16) Yova kʉ shinga tø ná nga. (Zb. 36:9) Mutume Paulo ungʉe fø bbʉbbʉlo u ndirigoti ke pongʉeri ɨ: “Ke chulu ko kʉ shi, ko ko ronga já ndirigoti ko kʉ nì.” (Mdo. 17:25, 28) Føri dho, ko ka ko pori nari kʉ, kodhó shinga kʉ Mungu dhó ro si ná kado. Jidha na ke adi kodhó lo u nja ko di shi d’e ná ritsi bbʉ ko dho. (Mdo. 14:15-17) Ro, Yova nzɨ adi kodhó shinga ronga b’o ddù chulu ri. Ro, føri rɨngana ke adi riji ko njí ko dho ka ná lo krʉ ndiro ko b’o kodhó afya ma, ko kana e ke ma na ná kau ma na ronga d’e.​—2 Ko. 7:1. w23.02 20 §1-2

Gbonji dyi, Bi 10 ddo 30

Andi ni dho má po ná lo krʉ ddikpa kitabu na.​—Yer. 30:2.

Ko adi mbai po bbo Yova dho Biblia dzá lo dho. Biblia adi bbʉ ko dho ná nyodyu dhi shauri ka ndi kó ko tsotso ko hwini njʉ ko bani na ná kpakpalo tso ró d’e. Føri kina ri adi bblo pli kʉ ná ngab’odha bbʉ ko dho gosi ná saa djo. Bbo pli na mana kʉ nari kʉ Biblia chulu Yova adi ndidhó bblo kʉ ná sifa dhǒ ko dho nari. Njati ko di ngaddi kedhó bblo pli kʉ ná sifa djo ró, fø lo adi ko thí ronga lø bbo ndirigoti ri adi ko ronga cho ko ngʉ chøchø kodhi Mungu ro ndirigoti ko ngʉ kedzá kau. (Zb. 25:14) Yova jirieri ndrŭ chu ndi chu. Drrdrr ke ngʉ adi ndi dhǒ ndrŭ dho nyo ma, malaiká ma, maono ma na chulu. (Hes. 12:6; Mdo. 10:3, 4) Fø nyo ma, maono ma, malaiká ma na pongʉe ná fø lo ndieni nzá ró, ko nzá ka ko chue fø lo ro ri. Føri dzá lo dho i, chu Yova jingʉe ko chu ná lo dho ke lingʉe kpetsi kpa ndiro kpa “ndí ri ddikpa kitabu na” d’e. “Bbʉbbʉ Mungu lo nji ná chu e ka ndi ka ro,” føri dzá lo dho ko ka ko uri u nari kʉ, ke adi loti ko dho lu nari e bblo pli kʉ ná chu ndirigoti faida ndi kʉ ko dho ro.​—Zb. 18:30. w23.02 2 §1-2

Thonji dyi, Bi 10 ddo 31

Ritsi le bbʉ nari adi hwè bbʉ bbo ritsi le bǎ nari djolu.​—Mdo. 20:35.

Ali faida dhi muradi ni nji. Avʉ kpakpa ka ndi li nidhó udha ndirigoti ni tsotso ka ndi kó ni dhidhi kiroho nǎ ná muradi. (Efe. 3:16) Loroji na, ni ka ni vʉri ni di Biblia zø ndirigoti ni di ri nǎ longa ne krʉ ddo ró. (Zb. 1:2, 3) Føri kina ni ka ni vʉri ni di sala nji krʉ saa ró ndirigoti ni thí nǎ ro. Njaro ringani ni vʉ ni adi ni nyǒ dje na ná ritsi bblo inga ngbaribbai ma ni njínji nidhó saa na nari. (Efe. 5:15, 16) Ni ka ni ngʉ dhidhi kiroho nǎ ná Mukristo njati ni di nja ndrŭ tsotso kó ró. Loroji na, ni ka ni li muradi ro ni di ngó ndrŭ ma, tsútsu ná ndrŭ ma na tsotso kó nidhó kutaniko nǎ. Njaro ni ka ni rá nga ro mai dzi kpa dho inga ni kó kpa tsotso kpa chú njínjidha elektronike dhi ritsi na mai. Nga kʉ kutaniko nǎ ná ndrŭ dho maddi ni ka ni dhǒ jidha Pidhinga dzá hwè lo-i ni d’ra kpa dho nari chulu. (Mt. 9:36, 37) Rie ngbà ri ka ró, ali muradi ni nji ni njínji Yova dho krʉ saa ró. w22.08 6 §16-17

    Bbaledha nǎ Vichapo (2015-2025)
    Avʉvʉ
    Atsu
    • Baledha
    • Ando ri
    • Ji le ji nari
    • Copyright © 2025 Watch Tower Bible and Tract Society of Pennsylvania
    • Njí le nji na nalo
    • Ruruni nalo ronga le b'o nari
    • Paramètres de confidentialité
    • JW.ORG
    • Atsu
    Ando ri