Bi 11

Mukristo dho nzá ringani ndi ti nzá tsetse ná lo ri. Nzá utso le ka le d’i dhʉdhʉ ná che ka ndi njiri ndrŭ ró ná lo ro kʉ thé, nari ró maddi ringani ko b’o ko ronga b’o. Loroji na, ri nzá ngani ko di che kʉ ná loti d’i desturi dhi ndrŭ ma, d’i bbu nǎ ndrŭ ma, inga d’i ngø nǎ ndrŭ ma na djo ri. Føri goti ri nzá ngani ko bʉ nja ndrŭ thí dhu ko kpa dhu nari chulu ri. Adi loti kpakpa ka ndi li nja ndrŭ nari bbai. Adi nja ndrŭ má ma, chelo ni ti kpa djo nari djolu. Waizraeli ka ndima poe mbai dho ná lo ngʉe bí, ro nì mai ringʉe føro kpa nanga ngʉ adi nŭnŭ bí ina. Ko nanga di nŭnŭ ró, føri ka ndi liri nja ndrŭ maddi nanga di nŭnŭ. Anonga nari kʉ kumi kʉ ná wapelelezi bbʉngʉe ná che kʉ ná rapor lingʉeri “Waizraeli krʉ . . . nanga nunu Musa djo.” (Hes. 13:31–14:4) Ro, ko di nja ndrŭ má ma ró, føri ka ndi liri krʉ ndrŭ é hwè na. Føri dho, ane ngbà ni ka ni má ni djoi ma, ni vei ma na ro ná chu. w22.04 8 §16-17

Drrdrr nga djó ro, Yova ko bí kʉ ná jadda kpa tsotso ndiro kpa ngʉ ndidzá kau d’e. Ke si nidzá nzø tsotso ma ko ddi ndiro kpa dhi kiroho nǎ d’e, njati rie ngbà kpa jiri ri ró. (1 Ko. 3:6, 7) Njati nidzá nzø di njani nzá ji Yova ndima thí nǎ ro krʉ nari bbai ma ró, ke ka ndi ra anzi dhé jidha ndi dhǒ kpa dho nari na. (Zb. 11:4) Njati rie nì nzø kpakpanga ro nji sese ma ndima njí Yova nyǒ tho ná lo ri ró, ke ka ndi kó kpa tsotso nja kpa ngʉ ndidzá kau d’e. (Mdo. 13:48; 2 Ny. 16:9) Ke ka ndi kó ni tsotso ndiro ni ti bblo lo nidzá nzø dho kpadhó lo jiri ndima rr lo bbo ná saa na. (Mez. 15:23) Inga ke ka ndi cho jidha na kʉ ná le-ve inga le-djo ronga ndiro ndi di ndi dyu li kpa ro bbo d’e. Rie b’lo ma nidzá nzø dhi ri ró, Yova ka ndi liri kpa no go kpa ngʉe sese ro ni ddingʉe nga kpa dho ná lo nga ngodhé. (Yoh. 14:26) Ni di kpakpanga nji ni zoeza nidzá nzø nidhó lotidha chulu ndirigoti ni nji ná lo chulu ró, Yova si nidhó kpakpanga ronga lele. w22.04 21 §18

Shetani ki nzá ka ndi sie ra na ri nari dho ke tangʉe la Mungu dzá ché na le d’ri ná kpa tso ro, Mungu dzá Pidhinga ndima dhǒ dz’ djó ndirigoti “Yesu Kristo djo ndima lod’ra ro.” (2 Ko. 5:20; Efe. 6:19, 20) Cho 1918 na fø le-djoi kana 8 kʉ ná kpa le sʉngʉe prizo na, kali dhi lo na ndrŭ bbøngʉe ndima nari djotsina. Ri ngʉ njani nari kʉ, ché na le d’ri ná fø le-djoi ngʉ nji ná fø njí tso “d’ød’ø” nari bbai. (Ufu. 11:3, 7-11) Ro, cho 1919 tso ngani ro ché na le d’ri ná fø le-djoi le klongʉe klo prizo nǎ ro, ndirigoti luti kpa mangʉe huru. Føro thei le-djoi ngangʉe lod’radha dhi njí ma, longaddidha dhi njí ma na dho ndima chutso ddá nari tso ki vi. Nì mai ri kʉ føro, Shetani nzá dhé bbangʉe Mungu dzá ndrŭ tso ró ndi la nji nari tso ro ri. Fø nga djó ro Shetani “bbo dda” bbai di ná nzadha bbʉ Mungu dzá ndrŭ djo. (Ufu. 12:15) Bbʉbbʉ dhé, ko krʉ dho “ringani ko é ngatsovedha na ndirigoti udha na.”​—Ufu. 13:10. w22.05 5-6 §14-16

Maono nǎ, Yohana nja aro kʉ ná kikundi Mungu dhó Pidhinga na ndima gba ndima tso ro ndirigoti nŭnŭ di ná shinga dhi ledha ndima ba ro. Ya kwanza kikundi dhó hesabu kʉ 144 000. Kpa le vʉ dz’ djó ro ndiro ndima nyopi Yesu ma na ra nǎ d’e. Kpa si pinyo ddinga ke ma na dz’ djo. (Ufu. 5:9, 10; 14:3, 4) Maono nǎ Yohana njangʉe Yesu ma, 144 000 kʉ ná kpa ma na Sayuni dhi Ngø tsi djó ra nǎ. (Ufu. 14:1) Mitume dhó saa djó ro kpø njʉnga djo, maelfu kʉ ná ndrŭ le vʉ ndima é 144 000 kana d’e. (Lu. 12:32; Ro. 8:17) Nì mai ri kʉ føro, Yohana pongʉeri fø kpa kana sese dhó hesabu kʉ ná kpa sie godhé i dz’ djó, ngasini ná saa na. (Ufu. 12:17) Bbò mbudha dhi saa na, mǎ gʉ ma ná 144 000 kʉ ná kpa si ndima tso gba b’lo rae ra nǎ ná chi tøeni ná nja kpa ma na. Kpa si pinyo ddinga Yesu ma na Mungu dhó Pidhinga nǎ.​—Mt. 24:31; Ufu. 5:9, 10. w22.05 16 §4-5

Yesu ngʉ adi riddi ndi unakpa dho kpa é bblo kʉ ná nganjadha na ndima djo. Ke d’rangʉeri kpa dho: “Ni djǒ ró djoka nanga krʉ zørieni zø.” (Mt. 10:30) Føri kʉ kpakpa ka ndi li ko ná lo, njati rie che kʉ ná nganjadha na ko kʉ ko djo ri ró. Føri na mana kʉ kodhi ra nǎ Baba adi ndi dyu li bbo ko ro ndirigoti ko na mana kʉ bbo ke nyǒ djó. Njati rie Yova ribba ko má ndi ndirigoti ke riddi ko kaka ko si di ndidzá ø dz’ djó ri ró, ko nzá ka ko nja ko nzá ka føri dho nari bbai ri. Cho da 15 b’lo, Dzamu dhi Munara pongʉeri ɨ bblo nganjadha na ko ka ko é ko djo ná nga djó ro: “Ri nzá ngani ko di ngaddi bbo ko djo ri ndiro nzɨ ko ngʉ nodha ró. Ndirigoti ri nzá ngani ko di ngaddi sese ko djo ri ndiro nzɨ ko thí bʉni ró. Føri rɨngana ringani ko njí kpakpanga ndiro ko é bblo kʉ ná nganjadha na ko djo d’e, føri na mana kʉ, ko famu kodhó bblo kʉ ná sifa ndirigoti kodhó uzaifu maddi.” w22.05 24-25 §14-16

Ko kana nja le ddiro ká ka ndi njí addu ndiro ndi b’o kutaniko nǎ ddi le tso gbani ná føri ronga d’e? Ko ka ko é ngoi nji ná ndrŭ. (Mt. 5:9; Ro. 12:18) Krʉ saa ró ko adi kpakpanga nji ndiro ko di ngoi nji kutaniko nǎ nja ndrŭ na d’e, føri adi rili kiroho nǎ paradiso d’ani bbo. Ko churi nari kʉ Yova drr kiroho nǎ paradiso nǎ krʉ kʉ ná ndrŭ ndiro kpa bbʉ tsetse ná madha d’e. (Yoh. 6:44) Addinga ngbaribbai ma, Yova ka ndi é hwè na njati ndi nja ko kpakpanga nji ndiro ko njí ngoi ndirigoti ko é ddi ko tso gbani ro ndi dho njínji ná bbo na mana kʉ ná ndrŭ ma na nari djo! (Isa. 26:3; Hag. 2:7) Yova bbʉ bí kʉ ná bblo ritsi ndi dho njínji ná ndrŭ dho. Nde, ko ká ka ko ba faida bbo ngbaribbai fø ritsi nǎ ro? Ko ka ko ddinga bbo Mungu dzá lo nǎ ro ko zø ná lo djo. Fø lo ko zø ndirigoti ri djo ko ngaddi nari ka ndi kó ko tsotso ko é Wakristo e na ná sifa na, føri ka ndi cho ko ronga ko dhǒ “ddi yi dzá nzø adi dhǒ ndima kana ná jidha” ndirigoti “bbo kʉ ná jidha ko kana” kutaniko nǎ.​—Ro. 12:10. w22.11 12-13 §16-18

Njati ko u Yova adi ko zø nji nari ró, ko sie hwè na “le ronga chʉdha dhi saa na,” føri tsu ndi nǎ nari kʉ, ko sie ngoi dhi ngaddidha na ndirigoti tsetse ná zamiri na. Fø di ná zølo nzá ka ndi si ndrŭ dhó ro ri, ro “Yova ddiro dhó ro dhé.” (Mdo. 3:19) Yova njí ko zø ró, ke adi ritso ki u ko ngʉ ndidzá kau nzá ko d’e rie chenga ro nji nari bbai. B’lo Yova njí ko zø ró, ke nzɨ adi lod’i inga malipizi ki ro bbʉ ko dho ko njie ná fø chenga djó ri. (Isa. 43:25) Yova adi kodhi chenga tu da “ddiddi dyi si ná nga e da dyi tsu nanga ró ro nari bbai.” (Zb. 103:12) Ro, njati ko di ngaddi Yova dhó zølo djo ró, ko nanga adi lili mbai podha na ndirigoti ke do ko nji nari na. (Zb. 130:4) Yova nzɨ ddikpa ke zø nji kedhó chenga kʉ bbo inga sese nari dho ri. Yova kʉ ko no ná Ke, Sheria bbʉ ná Ke ndirigoti lod’i ná Ke, fø lo adi rili ke njinjí ndidhó lochudha na ndiro ndi vʉ ddikpa ke zø ká ndi njinjí ma nari d’e. w22.06 5 §12-14

Yova bbʉ bblo kʉ ná ngab’odha jiji ndi ná ndrŭ krʉ dho. Karrnga goti ke si kʉ dhe le nji nari ma, le nga rid’o nari ma, che ndrŭ cheni nari ma na tso dyadya. (Ufu. 21:3, 4) Ke si kʉ “nyenyenga” dhi nì ndima thí li ndi djo ná ndrŭ tsotso koko, nja ndima ngʉ dz’ djó nga paradiso d’e. (Zb. 37:9-11) Ndirigoti ke si rili ko kana nga ngʉ chøchø ndi na kpadjo ri kʉ ná nga djolu. Føri kʉ bblo kʉ ná ngab’odha! Krʉ ddo ró Yova adi ndi tsoni djo ná lo njinji. Føri dzá lo dho, ko kʉ bblo kʉ sababu na ko li kodhó “ngab’odha Yova djo.” (Zb. 27:14) Føri ko adi nji hwè na ndirigoti ngatsovedha na, ko kodhi Mungu si kʉ ndidhó tsodha nji nari ko b’o nari na. (Isa. 55:10, 11) Akotøni chi Yova dho, ɨ ko uri u ro ke si kʉ “ndima thí nǎ ro krʉ ndi ne” ná ndrŭ ronga lele. w22.06 20 §1; 25 §18

Yova kʉ familia djǒ nari dho ko ka ko uri u nari kʉ, ke ka ndi njí dzabai dho ndi po 1 Timoteo 5:8 nǎ ná lo nganga. Njati ko uri u Yova ji ko ji ndirigoti ke ji kodhó familia maddi ró, ko ka uri u nari kʉ ko ka ko ba kodhó lo ji ná ritsi ngbà. (Mt. 6:31-33) Yova kʉ jidha na ndirigoti ritsi adi bbʉ ná ke nari dho, ke jiri ji ndi gba kodhó lo tso! Loroji na, dz’ ke nongʉe ná saa na ke nzá bbʉngʉe shi ko ka ko di dho ná ritsi dhé ri, jidha djotsina ke nongʉe hwè ka ndi bbʉ ko dho ná bí kʉ ná ritsi. (Mwa. 2:9) Njati nja saa na, kodhó ritsi é bbo nga ma ró ringani ko nonga nari kʉ kodhó kʉ ná ritsi ko ba dho nari kʉ Yova i liri ko ba ri. (Mt. 6:11) Ringani ko nonga nari kʉ, Yova si bbʉ ko dho ná ritsi si dada bba ko bba ná ritsi djolu. Ndirigoti gosi ná saa na Mungu si choro nŭnŭ di ná shinga bbʉ ko dho.​—Isa. 65:21, 22. w22.06 15 §7-8

Njʉ maddi ndrŭ dhó lo uri ndima chu lo bbo Yova djo ndirigoti Biblia djo. Ko krʉ adi rinji fø. Mutume Paulo ndingʉeri, Biblia nǎ ro ko zø ná lo na ko njínji nari ka ndi kó ko tsotso ko ndó “che kʉ ná lo ma kana nga bblo lo na.” Njʉ ri ka ndi é kpakpa ko njinjí Yova dhó ro si ná yadha na dhonalo, bí kʉ ná ndrŭ kʉ che bbo. Ro, Yesu adi rili ko chú kodhó lo ji ná ritsi nja kodhó udha é kpakpa d’e. Ko adi fø lojadha ba Biblia chulu. Yesu bbai ko nzini Mungu ró dho na ná føri kʉ bbo kʉ ná pendeleo ko bari. (Yoh. 17:6, 26) Loroji na, 1931 nǎ ko lingʉe Biblia nǎ ro si ná dho ko ro, føri kʉ Yova dzá Dimu ndirigoti ri ridho ko nja Mungu ró dho mana na bbo. ((Isa. 43:10-12) Føri kina, Biblia​—Tafsiri ya Ulimwengu Mupya ngʉ Mungu ró dho ri le ndingʉe drrdrr ná nga lu krʉ. w22.07 11 §11-12

Biblia nǎ bbʉbbʉlo tsu ndi nǎ nari ki kʉ, Pidhinga dzá hwè lo-i. Yesu ddingʉe Pidhinga dzá bbʉbbʉlo rú runi ná mali na. Matayo 13:44 nǎ ri ndini nari bbai Yesu pongʉeri: “Ra nǎ Pidhinga kʉ ddiddi nza nǎ runi ná ddikpa mali bbai, nari ddikpa kpetsi ke ba ndirigoti ke ru ri ki vi, hwè djotsina ke ra ndirigoti ke dzi ndidhó ritsi nanga krʉ ndirigoti ke dzi fø nza.” Anonga nari kʉ fø kpetsi ke nzɨ ngʉ mali neri. Ro, ri ke ba ná saa djo ke bba nja ritsi krʉ nja ndi dzi ri d’e. Bbʉbbʉ dhé, ke dzi ndidhó ngʉe ná ritsi nanga krʉ. Ká addudho? Ke chue fø mali ká kʉ mana na ngbá ngatsi ma nari chu nari dho. Ko churieri chu nari kʉ, i dz’ djó ddikpa ritsi ro ma nzá ddi le ka le ddi Yova dho le njínji kpadjo ndirigoti ko kʉ ngab’odha na ko si di gosi ná saa djo choro nŭnŭ kedhó Pidhinga tsena nari bbʉ ná hwè na ri. Ko ba pendeleo ko kana nga é chøchø Yova na, ná føri dada jʉ ko jʉ ko tso ró ná ritsi krʉ djolu. Ko dho adi hwè bbʉ bbo nari kʉ, “Yova ji ná lo ko nji krʉ ddo ró nari.”​—Kol. 1:10. w22.08 15 §8-9; 17 §12

Yosefu ká chungʉe ndidzá Mungu ka ndi njae uzinifu “bbo kʉ ná chelo” nari ngbaribbai? Musa dhó Sheria pongʉeri wazi “nidho nzá ringani ni njí uzinifu ri,” ná fø yadha le vengʉe ndi cho mia aro goti. (Kut. 20:14) Yosefu chungʉe Yova bblo nari dho ke chungʉeri chu nari kʉ, Yova nzá ka ndi ue uzinifu tso ro ri. Loroji na, Yosefu chungʉeri nari kʉ, Yova pongʉeri ndoa ddikpa kpetsi ke ma chi ddikpa isɨle na. Ndirigoti ke ka ndi é ngʉe ngbà ndi rrngʉe ngbaribbai ma Yova b’ongʉe ndidzá mamai Sara ronga aro ina, ndiro le má chi ndibbá ke dho ndrŭ ngʉ rine ndima ddo le na kpakpanga na ná saa na ro. (Mwa. 2:24; 12:14-20; 20:2-7) Fø lo djo Yosefu di ngaddi ná saa na, ke ka ndi chue Yova dhó nganjadha, bblo lo ma, chelo ma na djo. Yosefu jingʉe ndidzá Mungu ji nari dho, ke jingʉe Yova dhó chølo dhi sheria maddi ndirigoti ke vʉngʉeri ndi rrnga ri dho. w22.08 26 §1-2

Anziro ko ngʉ riddi Danieli 12:2 loti ra nǎ si ra ná ndrŭ dhó gadha djo inga 1918 nǎ wapinzani tøngʉe lod’radha dhi njí tso nari goti njingʉeni ná maendeleo djo. Ro, kpadjo ko ra ri famu nari kʉ, iga le loti ø dz’ djó si ngaba ná gadha djo. Fø ká ko ripo addudho? “Dz’ hø” le po ná fø lo bani Yobu 17:16 nǎ maddi, fø lo na mana kʉ “kabbuli.” Dz’ hø na mana kʉ ddiddi kabbuli na nari dho Danieli 12:2 loti djo nari kʉ, ngasini nari goti, ndirigoti Armagedoni dhi vita da nari goti si ngaba ná gadha nganga. Danieli 12:2 pori, nja ndrŭ si ga “choro nŭnŭ di ná shinga” badha dho ná fø lo na mana ká kʉ addu? Fø lo na mana kʉ, ndrŭ si ga ná saa na, ngbà si lochu inga ngbà si ra anzi lo ndima chu Yova ma, Yesu ma na djo nari na ndirigoti ngbà rrnga kpa dho cho 1 000 kana ná ndrŭ si choro nŭnŭ di ná shinga ba.​—Yoh. 17:3. w22.09 21 §6-7

Føri na mana nga kʉ Yova adi riji ko li ko thí nja ndrŭ djo ngadhi bblo kʉ ná sababu dho ri, føri rɨngana ke adi riji ko li ko thí kpa djo kpa dhori ndima djo le ka le li le thí ngbà nari dho. Le thí le li ndrŭ djo nari ma, heshima ma na adi si, ndrŭ nji ná lo le nja nari nǎ ro, ro fø lo adi saa dzi. Nde, ni ká ka ni rá anzi ni djoi djo ni ni thí li nari na ngbaribbai? Anjiri ni chu kpa bblo. Adi loti kpa na njudha dhi ngana. Akperi ni di lod’ra kpa ma na. Adi kpa tsoveve, ndirigoti abba kpa dhǒ ndima djo le ka le li le thí ngbà nari. Ya kwanza, njaro ni nzá ka ni d’ra nidhó ngaddidha ma, ni ni mbu nari ma na krʉ go chudha tso ni nga ná ke dho ri. Ro, ni kana kau di dhidhi ró, njaro ni ka ni jiri ni d’ra ngbaribbai ma ni ni mbu nari gʉ bbo ke dho. (Lu. 16:10) Njati ddikpa le-djo rá ni tie ná lo djonga nyanya ró ká ni ka ni njí addu? Nzɨ si ni kana kau tse, føri rɨngana abba saa ro da vi. Ndirigoti nzɨ bbari sese kʉ ná ndrŭ nji ná lo bʉ ni thí ndiro nzɨ ni li ni thí nja le-djoi djo ró. w22.09 4 §7-8

Miqueas ró dho kʉ ná ddikpa muzee no madaraka na ngʉe ná le-djoi njingʉeni ndi na d’idhé nari dho ndi mbungʉe ndi che nari nga. Ro, ke b’ongʉe ndidhó akili ronga b’o ndirigoti ke ngʉ rine ndi thɨ ndidhó ngaddidha thika thɨ. Ke ngʉ rinzi Yova bbʉ roho takatifu ndi dho ndirigoti kpakpanga ndiro ndi ve fø lo tso d’e. Ke nengʉe ndi tsotso ka ndi kó ná nja lo kodhó vichapo nǎ ro. Ko ká ba ngbá somo? Njati ddikpa le-djo inga le-ve njí chelo ni ró ro, adi ko ni jotso ko ro ndirigoti adi nidhó che kʉ ná ngaddidha nanga ne bblo. Ni nzá ka ni chu addui ká lieri fø le ti che kʉ ná lo inga le njí che kʉ ná lo ni ró nari ro ri. Føri dho, atilo Yova na sala chulu, ndirigoti anziri ke kó ni tsotso ni di lo nja ke adi lo nja nari bbai. Achuri nari kʉ, nidhi djona inga nidhi vena nzá jieri ndi njiri fø ni ró ri ndirigoti ni njí ke inga le zø njí. (Mez. 19:11) Anonga nari kʉ, Yova ni ró njini ná fø lo nja nì ndirigoti ke si kpakpanga bbʉ nja ni ve ri tso d’e.​—Mhu. 5:8. w22.11 21 §5

Avʉ ngbà ji Yova ná bbakau. Ni vʉ bbakau ná kpa ka ndima liri ni ngʉ dhidhi kiroho nǎ ná Mukristo inga nzá maddi. (Mez. 13:20) Julien, muzee ndi kʉ kpadjo ro pori ɨ: “Go ma ngʉe jadda ro, ma bangʉe bblo kʉ ná bbakau lo ko ngʉ adi d’ra le-djoi ma, le-vei ma na ná saa na. Føri ngʉe kpakpanga na ngʉ adi lod’ra ná bbakau ndirigoti kpa kongʉe ma tsotso ndiro ma ba hwè lod’radha dhi njí nǎ ro d’e. Ma rangʉe ri famu nari kʉ, ma nga ngʉe bblo kʉ ná bbakau na bí ri dhonalo ma ngʉ bbakau ne ddiddi na madhó cho kʉ ná jadda kpa kalu dhé.” Njati ni rá riba nidhó kutaniko nǎ ddikpa ke nga kʉ bblo kʉ ná kau ni dho ri ró, ká ringani ni njiri ngbǎ? Paulo chungʉeri nari kʉ, kutaniko nǎ nja ndrŭ nzɨ ngʉ njini Wakristo ka ndima njini nari bbai ri, føri dzá lo dho ke pongʉeri Timoteo dho ke di da fø di ná ndrŭ ró ro. (2 Ti. 2:20-22) Ko kana kau Yova na kʉ bbo na mana kʉ ná lo. Ko adi kpakpanga nji bbo nja ko kana kau é Yova na d’e, føri dho ko nzá ka ko gba ko tso ro sa ka ndi sa ko kana kau kodhi ra nǎ Baba na ná kau na ri. w22.08 5-6 §13-15

Ko ngae ndrondro Mungu dhó shauri ná ndrŭ bbai ri. Føri rɨngana ko adi riji ko ji Mungu dhó ngaddidha, føri tsu ndi nǎ ke dhó yadha krʉ. Ko ka ko li kodhó jidha kpakpa ke dho ngarr ná ndrŭ ma, nzɨ ngarr ná ndrŭ ma na ba ná matokeo djo ko ngaddi nari chulu. Addinga Yova dhó kanuni na ndima njínji nzɨ nari dho ndrŭ adi bani na ná kpakpalo djo. Føri goti anja ngbaribbai ma nidhó maisha kʉ bblo ni ngarr Mungu dho nari dho nari. (Zb. 32:8, 10) Yova bbʉ nyodyu krʉ kʉ ná ndrŭ dho, ro ke nzɨ adi ddikpa le ro ma cho ddi nja ndi dyø ri kpakpanga na d’e ri. Nì mai ri kʉ føro, ke d’ra nzɨ ngarr ri dho ná ndrŭ adi ba ná matokeo maddi. (Mez. 1:29-32) Kpa si “ndima nji ná lo kobe baba.” Luti kpa si kpakpalo ba bbo ndirigoti kpa si nzani nza ndima vʉ ná maisha dzá lo dho ndirigoti Yova si kpa gʉ sa theinga dho. Føri ró ro njonjo, Yova dhó nyodyu dhi shauri dho ngarr ndirigoti nì njínji ri na ná ndrŭ dho ke tsoni ɨ: “Nì ngarr ma dho ná ke sie b’odidha kana ndirigoti ke ro nzɨ kpakpalo do si nji ri.”​—Mez. 1:33. w22.10 21 §11-13

Yova do ko nji nari na mana kʉ, ko bbʉ heshima bbo ke dho ndirigoti ko pʉ ndro ke ndro ná lo pʉ ko ró ro. (Mez. 16:6) Føri dho ko adi kpakpanga nji ko rrnga Yova dhó kanuni po bblo lo ma, chelo ma na djo ná lo dho ddiddi Biblia rid’ra nari bbai. (2 Ko. 7:1) Ko sie hwè na njati ko njí ji Yova ji ná lo ndirigoti ko pʉ ndro ke ndro ná lo ko ró ro ró. (Zb. 37:27; 97:10; Ro. 12:9) Njati ddikpa le chu Yova kʉ bbonga na ndi vʉ lonanga bblo lo ma, chelo ma na djo nari ngbà ró, ledho ringani ndi rrnga Mungu dhó kanuni dho. (Ro. 12:2) Ko adi Yova dhó kanuni dho ko ngarr nari kʉ mana na bbo kodhó maisha nǎ nari dhǒ kodhó nyi chulu. (Mez. 12:28) Daudi ma mbungʉe ndi fø i nari dho ke pongʉeri Yova dho ɨ: “Ni rili ma chu shinga dhi chu. Ni njí hwè kʉ bbo ndirigoti ni thó thá djó ri laidjó hwè kʉ theinga dho.”​—Zb. 16:11. w22.10 8 §9-10

Yesu ngʉe bblo kʉ ná nganjadha na ndi djo ndirigoti nyenyenga na. Dz’ djo Yesu si nari njí, ke njingʉe bbo pli kʉ ná njí Yova dzá njí kana. “Nononi, dz’ djó ma, ra nǎ ma ná ritsi krʉ nongʉeni” Yesu chulu. (Kol. 1:16) Batiso ndi ba ná dyi, Yesu nongʉe ndidzá Baba na ndima ngʉe ná saa na ndima ngʉ nji ná ritsi nga. (Mt. 3:16; Yoh. 17:5) Føri ma nzá ddi lingʉeri Yesu ngʉ nodha ri. Føri rɨngana, ddikpa cha ma nzá ddi ke ngbengʉe ndi ro nja ndrŭ djo ri. Ke pongʉeri ndi unakpa dho nari kʉ, ndi si dz’ djo “nga ndrŭ njinjí ndi dho d’e ri, ro ndi njinjí ndrŭ dho ndirigoti ndi bbʉ ndidhó shinga le ødha dhi be bí kʉ ná ndrŭ djotsina.” (Mt. 20:28) Ke pongʉeri ki, ndi nzá ka ndi njí ddikpa lo ro maddi ndi djǒ nga ri. Yesu ngʉe nyenyenga dhi ke! Ke bbangʉe bblo pli kʉ ná loroji ko dho. w22.05 24 §13

Ndiro ndi vʉ ndi ká chenga nji ná le zø nji nì ma nari d’e, Yova adi nja nari kʉ, chenga nji ná ke ká chu ndi nji ná chelo nyi ngbà nari. Yesu dhongʉe fø lo pʉlʉpʉlʉ Luka 12:47, 48 nǎ. Njati ddikpa ke di ripɨ ndi njí che kʉ ná lo ndirigoti chu ndi churi fø lo nzɨ tho Yova nyǒ ro ri, ro ke njí ri ngo ró, fø ke kʉ na ná hatari kʉ ke zø nzá Yova ka ndi njí ri. (Mk. 3:29; Yoh. 9:41) Njati rie fø ró, ká ko e ngab’odha na Yova nji ko zø nì? Nio! Yova adi chenga nji ná ke ká leni ndi thí nǎ ro krʉ i ngbà nari ma nja ddi. Le le leni nari na mana kʉ “le ø ledhó ngaddidha ndirigoti ledhó nyi thika.” Føri tsu ndi nǎ, ddikpa ke nanga ndi njie ná chelo d’od’o ndirigoti ke ba njedha bbo ndi njie ná chelo dho inga ndi nzá nji ndi ka ndi njie ná bblo lo ri nari dho. Le leni ná ke nzɨ adi njedha ba ndi njie ná chelo dho dhé ri, ro ke thí adi njedha ba ndi bbae ndima kana kau ngʉ zaifu Yova na nari dho. w22.06 5-6 §15-17

Kodhó mbubai adi kali dhi lo nanga nyá Yova dhó tengenezo nǎ chutso ddá ko dho ná le-djoi djo. (Zb. 31:13) Nja kʉ ná le-djoi le sʉ prizo nǎ ndirigoti kpa ndrŭ bbø che kʉ ná lo na. Karne ya kwanza na ma Wakristo ngʉ hwini fø di ná lo na ddi mutume Paulo ndrŭ bbøngʉe kali dhi lo na ndirigoti prizo na kpa sʉngʉe ke ná saa na. Nja Wakristo bbangʉe mutume Paulo tsotso ndima kó nari tso bba ke le sʉngʉe Roma nǎ prizo na ná saa na. (2 Ti. 1:8, 15; 2:8, 9) Addinga ngbaribbai ma Paulo ngʉ ndi mbu nari djo. Ke vengʉe bí kʉ ná kpakpalo tso ndirigoti ke tsungʉe ndidhó shinga hatari na kpa djotsina. (Mdo. 20:18-21; 2 Ko. 1:8) Ri nzá ngani ko é Paulo dhó lo jingʉe le tsotsokodha ná saa na bbangʉe ke ná kpa bbai ri! Føri dho, Shetani chu lø ndi nzá ko dho chutso ddá ná le-djoi nari dho nzá ringani ko nanga keni ri. Ke riji nzɨ fø le-djoi tøni chi Yova dho ndirigoti ke do tá ko na. (1 Pe. 5:8) Ara anzi le-djoi tsotso ni kó nari na ndirigoti adi heshima bbʉ kpa dho chi ni tøni ro.​—2 Ti. 1:16-18. w22.11 16-17 §8-11

Ri njani nari kʉ tsu ba djó le tingʉe Yesu kuso ro ná le lengʉeni ná bandi ngʉe Muyaudi nari bbai. Wayaudi ngʉ adi ddikpa Mungu má, ro kpa kuso lú ngʉe ná ndrŭ tsɨ ngʉ adi bí kʉ ná miungu má. (Kut. 20:2, 3; 1 Ko. 8:5, 6) Njati fø bandi ée nga Muyaudi ró ke ka ndi dhue njʉnga dhi andiko nǎ kʉ ná fø lo iri bbai: “Ni ká adi miungu do ro nji karrnø ma nzɨ ddi?” Føri kina Yesu le chongʉe “Izraeli bbá dza nǎ vivi ná chembø dho” nga nja ngʉe ná ndrŭ tsɨ dho ri. (Mt. 15:24) Waizraeli chungʉeri chu nari kʉ Mungu si dhedhe ná ndrŭ gaga. Le lengʉeni ná bandi ka ndi ée chu ndi chungʉe fø lo ro dhonalo ke tso nǎ lo ridho nari kʉ, Yova si Yesu gaga nja ndi é Mungu dhó Pidhinga nǎ Pi d’e. Føri kina, ke nganga ngʉe na ná ngab’odha kʉ, Mungu si ndi gaga. Muyaudi ndi ngʉe nari dho, le lengʉeni ná bandi ka ndi ée chu ndi chungʉe lo ro Adamu ma, Eva ma na djo ro. Føri dzá lo dho fø bandi ka ndi ée bblo ndi famungʉe lo ro Yesu ngʉ loti Luka 23:43 nǎ ndi dho djo ná paradiso djo ro, nari kʉ ri sie i dz’ djó bblo kʉ ná í.​—Mwa. 2:15. w22.12 8-9 §2-3

Ko ka ko d’ralo ke ko tsotso kó ndidzá roho chulu nari dho dhé. Ká addudho? Dhonalo Shetani adi là nji ko tso ró ndiro ko bbá lod’radha dhi njí tso d’e. (Ufu. 12:17) Bí kʉ ná ndrŭ adi riddi Shetani kʉ kpakpanga na nari dho, ko nzá ka ko si ke djo lú ri. Ro, lo ko d’ra nari chulu ko adi sisi ke djolu! (Ufu. 12:9-11) Ká ngbaribbai? Lo ko d’ra ná saa na ko ridho pʉlʉpʉlʉ nari kʉ ke kʉ kali dhi ke, fø chu lú ko ridho nari kʉ ke nzá ka ndi tá do ro ko na ri. Krʉ saa ró ko lod’ra ná saa na ko ridho nari kʉ, Shetani ro nzá ka ndi si ko djolu ri. Ko ka ko churi nari kʉ, ko kpakpanga ba roho takatifu chulu ndirigoti Yova u ko tso nì. (Mt. 5:10-12; 1 Pe. 4:14) Mungu dhó roho chulu ko ka ko ba kpakpanga ndiro ko sisi lod’radha dhi njí kana ko bani na ná kpakpalo djolu d’e. (2 Ko. 4:7-9) Nde, ko ká ka ko njí addu ndiro ko ba Mungu dhó roho takatifu d’e? Ringani ko di ri nzǐ nzá ko d’i ji ro, u ko uri Yova si kodhó sala rr nì ro. w22.11 5 §10-11

Føri kina ko adi jidha dhǒ ko djoi ma, ko vei ma na dho kpakpanga ko nji ko kana é ngoi kpa na nari chulu. Ko adi Yova dyø nja ndrŭ zø ko nji nari chulu. Njati rie Yova bbangʉe le Ddù ndi si dhe kodhi chenga djotsina ri ró, ká ko ka ko é tayari nga ko djoi ma, ko vei ma na zø njidha dho kosa kpa njí ko laidjo ró? Ko nzɨ adi riji ko di Yesu dhó loroji nǎ ke tingʉe lo djo ná njí dhi ke bbai ri. Ngbà mai kedzá bboke njingʉe ke nǎ ngʉe ná bbo kʉ ná ddeni zø ro, fø njí dhi ke nzá njingʉe ndidhó sese ddeni kʉ nǎ ná ke zø ro ri. (Mt. 18:23-35) Njati rie nzɨ djó ni rrni ná lo ro kʉ ni kana kutaniko nǎ ddikpa le na ri ró, ni ká ka ni njí kpakpanga ngbà, ni i dani ya kwanza ndiro ni rá ngoi nji fø le na Ukumbusho njí d’e? (Mt. 5:23, 24) Fø ni njiri ró ni ka ni dhori ni jirie Yova ma, Yesu ma na bbo. w23.01 29 §8-9

Ni ka ni chu ngbaribbai ma ni ka ni kó ni djoi ma, ni vei ma na tsotso ná ddikpa chu kʉ, ni di nzá dho kpa ka ndima mbu ndima che ná ngadhudha ro dhu kpa tso. (Mez. 20:5) Nyo ma, dawa ma, lazima dhi nja ritsi ma na ká kʉ kpadhó ngbà ka ná ngatsi i nì? Kpa ká vi ndima dhó njí inga kpadhó ká kʉ dza tso ndima dzi na ná mbø nga? Nde, kpadhó lo ká uri ko kó ndima tsotso ndiro ndima ba le tsotsokodha guvernema dhó ro njati rie ngbà ri ka ri ró? Yova jiri ko krʉ di nja ndrŭ li kpakpa ndirigoti kpa tsotso koko. (Gal. 6:10) Njati ko njí sese kʉ ná ritsi ma dhe nji ná le dho ró, ri ka ndi li le kpakpa. Loroji na, ngba ka ndi chó ddikpa karte inga thɨ ndi thɨ ná ji ddikpa le-djo dho nja ndi li na le-djo kpakpa d’e. Jadda ke ka ndi dzinga ddikpa le-ve dho inga ndi kó le tsotso nja d’i njí na maddi. Kutaniko nǎ nja ndrŭ ka ndima rɨ nyo dhe nji ná le dho. Nja kʉ ná Yova dzá Dimu cho mbai podha dhi barua wazee dho nya ndi nanga nyá ná dhe dhi saa na kpa bbʉ ndima le-djoi ma, le-vei ma na tsotsokodha dho nari dho. Ri kʉ bbo thonga ná lo njati ko “di ko isopɨ ndirigoti ko di ko li kpakpa ko kana ró”!​—1 Te. 5:11. w22.12 22 §2; 23 §5, 6

Wasadukayo chungʉe anziro 5 ngʉe Kiebrania nǎ ná buku bblo pli, ro kpa nzɨ ngʉ adi fø buku nǎ bbo na mana kʉ ná lo ro u ri. Loroji na, anja ngbaribbai ma Yesu ngʉngʉe kpadhó logoti gadha djo kpa dhungʉe nga ndi tso ro nari di. Ke dhungʉeri kpa tso: “Ni ká nzá zøri Musa dhó buku nǎ, kazz ngʉ rø ró nzɨ ndi gbɨ ro ná tsó nǎ ro, Mungu pongʉeri ke dho ɨ: ‘Ma kʉ Abrahamu dzá Mungu, Isaka dzá Mungu ndirigoti Yakobo dzá Mungu nari ri?” (Mk. 12:18, 26) Nì mai Wasadukayo ngʉ adi fø andiko zø bí ina ro, Yesu dhó ngadhudha dhongʉeri nari kʉ, kpa ngʉ adi bbo na mana kʉ ná fø bbʉbbʉlo be pá, ná føri i kʉ gadha djo Maandiko d’ra ná lo. (Lu. 20:38) Fø lo nǎ ro ká ko ka ko ba ngbá somo? Nga ko zø ná saa djo ringani ko é krr ndiro ko nja ko zø ná verse ka ndi ddinga ko dho ná lo d’e. Ri nzá ngani ko di Biblia nǎ mafundisho dherr dhé famu ri, ro ri nǎ nja bbʉbbʉlo ma, ri nǎ ruruni ná kanuni maddi. w23.02 11 §9-10

Njʉnga dhi andiko nǎ le tilo djo ná dimu krʉ dangʉe li tso o ná kpakpalo lú, ro kpadhó maisha krʉ nǎ kpa tøngʉeni chi Yova dho. (Ebr. 11:36-40) Kpadhó ngatsovedha ndirigoti kpadhó kpakpa njí ká ngʉe pá? Ri nga kʉ fø ri! Nzá mai kpa njangʉe Mungu dhó tsodha kana nja ri njini nari ro, kpa rangʉe anzi dhé Yova djo ndima ndima dhó ngab’odha li nari na. Ndirigoti kpa chungʉeri chu nari kʉ Yova u ndima tso u nari dho, ndima si fø tsodha si njini nari njanja. (Ebr. 11:4, 5) Kpadhó loroji ka ndi bbʉ kpakpanga ko dho ndiro ko tøni kpakpa Yova djo ko kodhó ngab’odha li nari na d’e. Njʉ ko di djó ná dz’ ra anzi che pli kʉ ná lo na. (2 Ti. 3:13) Shetani nzá bba Mungu dzá ndrŭ ndi mbu nari tso ro ri. Ko di ngaddi ko njí kʉ ná kpakpalo djo ró, ko ka ko njinjí Yova dho kpakpanga na, u ko uri ro “ko li kodhó ngab’odha shi di ná Mungu djó.”​—1 Ti. 4:10. w22.06 25 §17-18

Ringani ko njí kpakpanga ko é bblo afya na ndiro ko njinjí Yova dho bblo d’e. (Mk. 12:30) Føri dho, ko adi che ka ndi njí ko ná ritsi pʉpʉ ko ró ro. (Ro. 12:1) Bbʉbbʉ dhé, addu ma ko njí ró, ko nzá ka ko cho dhe ka ndi lø ko ná chu tso ro krʉ ri. Ro, ko adi ko dho ka ná lo nji dhonalo ko riji ko dhori kodhi ra nǎ Baba dho nari kʉ, ko nja shinga dhi kado mana na ngbà. Dhe le nji nari ma, ngó le ngʉ nari ma na ka ndi liri nzɨ ko njinjí anziro ko e rinji nari bbai. Ná føri ka ndi di rili ko di ko mbu cho tso choni nari bbai ndirigoti ko é njedha na ri. Ro, ri nzá ngani ko di kodhó afya ronga ko b’oé nari nja pá ri. Ká addudho? Dhonalo rie ngbá ngatsi ma ko kʉ dhe na ndirigoti thɨ ma kodhó cho kʉ ri ró, ko ka ko má Yova ngbà dhé Pi Daudi bbai. Ko iso adi pɨni pɨ dhonalo ko churi nari kʉ, njati rie dhe ma ko nji inga ngó ma ko ngʉ ri ró kodhi Mungu adi ko nja mana na dhé. (Mt. 10:29-31) Njati ko dhedhe ma ró, ke si kʉ ko gaga dhé. (Yob. 14:14, 15) Go ko kʉ shi ro, ko adi riji ko njí kpakpanga ndiro ko b’o kodhó shinga ma, kodhó afya ma na ronga d’e. w23.02 20-21 §3-5

Birobiro kʉ ná nja chembø ró dho ká sie nì shinga dhi buku nǎ b’lo ndima da Armagedoni lu nari goti? Nìo. (Ufu. 7:14) Yesu pongʉeri chembø na le ddi ná fø ndrŭ maddi si kʉ “choro nŭnŭ di ná shinga ba.” (Mt. 25:46) Ro, Armagedoni lu da ná ndrŭ nzɨ si choro nŭnŭ di ná shinga ba théi ri. Cho løfu ddi (1 000) Yesu si pinyo nari kana, “ke si rø kpa ró ndirigoti ke si chutso dda kpa dho shinga dhi dda tø ná ngana.” Ngbà rrnga Yesu dhó chutsoddadha dho ndirigoti ngbà tøni Yova dho chi luti ná kpa ró dho si ndini theinga dho shinga dhi buku na. (Ufu. 7:16, 17) Ro, ndrr (mbuzi) na le ddi ná ndrŭ le si sasa Armagedoni dhi saa na. Yesu pongʉeri kpa “si kʉ sadha ba theinga dho.” (Mt. 25:46) Roho takatifu dda chutso ndi dho ro mutume Paulo pongʉeri, “fø kpa si ba ná lod’idha kʉ theinga dho kʉ ná sadha.”​—2 Te. 1:9; 2 Pe. 2:9. w22.09 16 §7-8

Yova no ná ritsi adi rili familia ba hwè bbo ndirigoti kpa kana nga ngʉ chøchø. Yova no ná ritsi chulu, ke bbʉ bblo pli ko ka ko di ná nga ko dho ndiro ko njí tho thonga ná ritsi d’e. Bí kʉ ná familia adi riji ndima ba saa ndima ra bbi ddinga tsó nǎ nga laidjo, ngøtsi djo inga dda tso ro. Mungu dhó ø dz’ djó gø dhi ndrŭ ma, nzø ma na si hwè ba Yova no ná ritsi nǎ ro nzá ndima d’e rie ri ro ba anziro nari bbai. Njonjo njʉnga ró ro, fø saa djo zǎ ko do nji inga ko zǎ do nji dho ná sababu ro nga sie ri. (Isa. 11:6-9) Ko si hwè ba Yova no ná ritsi nǎ ro theinga dho. (Zb. 22:26) Ro, gø dhi ndrŭ, nzɨ ni b’o fø saa ndiro ni ve longaddidha tso nga Yova no ná ritsi djo nidhi nzø dho d’e. Njati ni di njínji nononi ná ritsi na ni ddi na longa Yova djo nidhi nzø dho ró, kpa si Pi Daudi pongʉe ná i lo uu: “Ee Yova nidzá njí bbai di nari ro kʉ nga.”​—Zb. 86:8. w23.03 25 §16-17