ETERNET djó kʉ ná Watchtower LIBRARY
Dzamu dhi Munara
ETERNET DJÓ KɄ NÁ LIBRARY
Baledha
  • BIBLIA
  • VICHAPO
  • NJUDHA
  • es24 paje 118-128
  • Bi 12

I sehema nǎ, tayari kʉ ná video ro nga

Dzodzo dhé, video ni telesharje ro ddikpa kosa banga.

  • Bi 12
  • Ddo ró le zø ná Andiko—2024
  • Rere lo djǒ
  • Yenga dyi, Bi 12 ddo 1
  • Wanzia dyi, Bi 12 ddo 2
  • Ronji dyi, Bi 12 ddo 3
  • Gbonji dyi, Bi 12 ddo 4
  • Thonji dyi, Bi 12 ddo 5
  • Mbʉnji dyi, Bi 12 ddo 6
  • Zanji dyi, Bi 12 ddo 7
  • Yenga dyi, Bi 12 ddo 8
  • Wanzia dyi, Bi 12 ddo 9
  • Ronji dyi, Bi 12 ddo 10
  • Gbonji dyi, Bi 12 ddo 11
  • Thonji dyi, Bi 12 ddo 12
  • Mbʉnji dyi, Bi 12 ddo 13
  • Zanji dyi, Bi 12 ddo 14
  • Yenga dyi, Bi 12 ddo 15
  • Wanzia dyi, Bi 12 ddo 16
  • Ronji dyi, Bi 12 ddo 17
  • Gbonji dyi, Bi 12 ddo 18
  • Thonji dyi, Bi 12 ddo 19
  • Mbʉnji dyi, Bi 12 ddo 20
  • Zanji dyi, Bi 12 ddo 21
  • Yenga dyi, Bi 12 ddo 22
  • Wanzia dyi, Bi 12 ddo 23
  • Ronji dyi, Bi 12 ddo 24
  • Gbonji dyi, Bi 12 ddo 25
  • Thonji dyi, Bi 12 ddo 26
  • Mbʉnji dyi, Bi 12 ddo 27
  • Zanji dyi, Bi 12 ddo 28
  • Yenga dyi, Bi 12 ddo 29
  • Wanzia dyi, Bi 12 ddo 30
  • Ronji dyi, Bi 12 ddo 31
Ddo ró le zø ná Andiko—2024
es24 paje 118-128

Bi 12

Yenga dyi, Bi 12 ddo 1

Ma ronga tso ká addu cho batiso ma ba nari ró?​—Mdo. 8:36.

Etiopia nǎ pi bbá ngʉ njínji ná ke ká ngʉe tayari i nì batiso badha dho? Addinga i lo djo: Etiopia nǎ fø ke “rangʉe Yerusalemu na madha bbʉ Mungu dho.” (Mdo. 8:27) Føri dzá lo dho ke nga ka ndi é ngʉe Muyaudi ri; ro ke ngʉ adi nga i nzǐ Wayaudi bbá dini nǎ. Bbʉbbʉ dhé, ke chungʉe lo Yova djo Kiebrania nǎ takatifu Maandiko nǎ ro. Nì mai ri kʉ føro, ke jingʉeri ndi chu lo bbo fø lo djo. Chu nǎ Filipo singʉe ke ro nabi Isaya ndingʉe ná kú nanga le ku ná kitabu ndi zø ro. (Mdo. 8:28) Ke jingʉeri ndi rá anzi lo ndi chu nari na. Ke tungʉeni Etiopia nǎ ro nja ndi rá Yova ma hekalu na Yerusalemu na d’e. Mwetiopia chungʉe Filipo dhó ro ná nja bbʉbbʉlo kʉ Yesu kʉ Masiya nari mai. (Mdo. 8:34, 35) Kedhó jidha dhingʉe dhi Yova ma, ndidhi Dduna ma na laidjo. Ke vʉngʉe bbo na mana kʉ ná lo nanga, ke bangʉe batiso ndirigoti ke ngʉngʉe Yesu Kristo unake. Filipo njangʉeri nari kʉ fø kpetsi ke kʉ tayari, føri dzá lo dho ke bbʉngʉe batiso ke dho. w23.03 8-9 §3-6

Wanzia dyi, Bi 12 ddo 2

Abbari ni tso nǎ lo é krʉ ddo ró ngbà thonga nari bbai.​—Kol. 4:6.

Kodhi lo nzá ka ndi tho Yova nyǒ ro ri njati ko di kali sha ró. (Mez. 6:16, 17) Nì mai bí kʉ ná ndrŭ rinja i ddo ró kali le sha nari kʉ kawaida kʉ ná lo ro, ko nzɨ adi rinji fø ri dhonalo Yova pori kali le sha nari kʉ che. (Zb. 15:1, 2) Bbʉbbʉ dhé, ko nzɨ adi kali le sha nari dhé pʉ ko ró ro ri, ro ko adi che kʉ ná ngaddidha ka ndi tsu ndrŭ djo na dho ná lo ma pʉ ddi ko ró ro. Godhé, ringani ko pʉ chelo ko ti nja ndrŭ djo nari ko ró ro. (Mez. 25:23; 2 Te. 3:11) Njati ni njari nari kʉ ni e ti ná lo si ndi thika le porojo ró, aneri ni tilo ngbà ka ndi li ndrŭ kpakpa ná lo djo. Ddiddi ko di djó ná dz’ djó bí kʉ ná ndrŭ adi nzá tsetse ná lo ti nari bbai, ringani ko njí kpakpanga bbo, ndiro ko ti ná lo bbʉ hwè Yova dho d’e. Ke si ko ronga lele njati ko di rimbu ko tilo ngbà ka ndi bbʉ madha ke dho ná chu nǎ ró. Føri kʉ lo ko d’ra ná saa na, kodhó njudha dhi saa na, ndirigoti krʉ ddo ró ko loti ndrŭ na nari kana. Shetani dhó i dz’ tso ká ve si d’ø ndi nǎ kʉ ná lo ma na krʉ ná saa na, ri ka sie sʉsʉ ko dho ko bbʉ madha Yova dho kodhó lotidha chulu.​—Yud 15. w22.04 9 §18-20

Ronji dyi, Bi 12 ddo 3

Ko adi jidha dhǒ, ke i jingʉe ko nji nari djotsina.​—1 Yo. 4:19.

Ngbá ngatsi ma Yova ma, Yesu ma na ji ko nari djo ko di ngaddi ró, føri adi ko cho ko ma ji kpa ddi. (1 Yo. 4:10) Yesu dhengʉe ko djotsina ddiddiro nari djo ko di ngaddi ró, kodhó jidha adi ndrini kpa laidjo ndri. Mutume Paulo chungʉe fø lo chu ndirigoti ke dhongʉe ndi nanga adi jini fø lo dho nì nari i ndi ndingʉeri Galatia nǎ Wakristo dho ná saa djo: “Mungu Ddù jingʉe ma ndirigoti ke bbʉngʉe ndi ma djotsina.” (Gal. 2:20) Yesu dhengʉe kodhi lo dho nari dho Yova ka ndi drr ni chøchø ndi kuso ndiro ni é ndidzá kau d’e. (Yoh. 6:44) Yova njae bbo ro dzi kʉ ná ritsi ni nǎ ndirigoti ke dzi ni bbò dzi na ndiro ni é ndidzá kau d’e, ná føri ni chu nari ká adi hwè bbʉ ni dho nzɨ? Føri ká adi Yova ma, Yesu ma na laidjo ni kʉ na ná jidha li kpakpa nzɨ? Ringani ko di ridhu ko tso, ‘Fø jidha ká ma cho ma njí addu?’ Ko kʉ na Mungu ma, Yesu ma na laidjo ná jidha adi ko cho ko ji nja ndrŭ.​—2 Ko. 5:14, 15; 6:1, 2. w23.01 28 §6-7

Gbonji dyi, Bi 12 ddo 4

Ndrŭ dhó luga thika ma si ø tsetse ná luga na.​—Sef. 3:9.

Biblia kʉ Yova adi njínji na ndi kó na ndidzá ndrŭ tsotso “ndima njinjí ndi dho ddi ndima tso gbani ro d’e” ná bbo na mana kʉ ná ritsi.” Yova liri Maandiko nǎ nja kʉ ná sehemu nyenyenga na ri zø ná ndrŭ dhé famu. (Lu. 10:21) Krʉ ngalu kʉ ná ndrŭ adi Biblia zø nì. Ro, nyenyenga dhi ndrŭ dhé adi ri famu ndirigoti njínji ri po ná lo na. (2 Ko. 3:15, 16) Biblia nǎ ro ko adi lochu Yova dhó nyodyu djo. Yova nzɨ adi njínji Biblia na nja ndi ddi longa ko dho biro ko kʉ ná saa na dhé ri, ro ndi ddi longa ndirigoti ndi pi ko iso ddiddi ro maddi. Ko di Yova dzá lo zø ró ko ka ko njari nari kʉ, Yova adi ndi dyu li nì ko kana nja le ddiro ro. (Isa. 30:21) Ni ká barie ni dho le ndie nari bbai di ná andiko ro b’lo? Bbʉbbʉ dhe, Biblia ndingʉeni bí kʉ ná ndrŭ famu ri d’e. Nde, Biblia na ká nidhó lo nganga u ná lo rangʉe bani ngbaribbai? Fø lo ka ndi kaka dhonalo Biblia si dhó ro ná ke dhó nyodyu na ka ná d’i nyodyu ro nga kʉ ri.​—2 Ti. 3:16, 17. w23.02 4-5 §8-10

Thonji dyi, Bi 12 ddo 5

Addinga bbo fø lo djo; abbʉ ni lú ri dho ndiro nidhó maendeleo njani krʉ ndrŭ dho pʉlʉpʉlʉ d’e.​—1 Ti. 4:15.

Ko kʉ bbʉbbʉ Wakristo nari dho ko jirie Yova bbo. Ko jirie ri ko njinjí ke dho ko thí nǎ ro krʉ. Ro, ndiro ko njí krʉ ngbà ko ka ko njí ná lo Yova dho d’e, ringani ko li kiroho nǎ muradi ko nji. Loroji na, ko neri ko é Wakristo e na ná sifa na, ko ne ko ka ko njinjí na ná ufundi ndirigoti ko ne nja ndrŭ tsotso ko ka ko kó ná chu. Ri ká ngani ko é hwè na kiroho nǎ ko maendeleo nji nari dho addudho? Ya kwanza, ko jiri ko bbʉ hwè kodhi jidha dhi ra nǎ Baba dho. Yova adi hwè ba ko di njínji ko chu ná lo na bbo ndidzá njí kana ná saa na. Føri kina ringani ko njí maendeleo kiroho nǎ ndiro ko kó le-djoi ma, le-vei ma na tsotso d’e. (1 Te. 4:9, 10) Rie ngbabø ma ko nji cho bbʉbbʉlo kana ri ró, ko krʉ dho ringani ko njí maendeleo kiroho nǎ. w22.04 22 §1-2

Mbʉnji dyi, Bi 12 ddo 6

Kpa si le ró nyó à ǎ ndirigoti kpa si le gʉ bɨ lú kazz na.​—Ufu. 17:16.

Politiki dhi kpa si ndima nanga le Bbò Babiloni ro, føri kʉ kali dhi dini. Føri si bbò mbudha tso ngani nari dho. Ro, føri ká si bí kʉ ná ndrŭ ronga cho ndima nga njínjidha tso Yova dho? Nzɨ. Fø lo ró ro njonjo, Ufunuo sura 6 ridho nari kʉ, fø saa na nzɨ njínji Yova dho ná ndrŭ si ndima ronga b’odha ne politiki bai ma, turusa nji ná kpa ma na dhó ro, ná fø kpa le ddi bbobbo ngø na. Fø ndrŭ nzɨ si ndima tso gba Yova dhó Pidhinga na ri nari dho, ke si kpa nja ndidhó mbubai. (Lu. 11:23; Ufu. 6:15-17) Bbʉbbʉ dhé, Yova dho njínji chi ndima tøni ro ná ndrŭ si ndima dho njonjo nja ndrŭ ró ro bbò mbudha dhi saa na. Kpa dhé sie fø saa na dz’ djó njínji Yova Mungu dho ná ndrŭ ndirigoti gʉ ndima gʉ ndima tso ndima gba “tso nǎ zǎ” na ro ná ndrŭ.”​—Ufu. 13:14-17. w22.05 16-17 §8-9

Zanji dyi, Bi 12 ddo 7

Kedhó ngʉe choro nŭnŭ di ná hwè lo-i ndi d’ra dz’ djó di ná ndrŭ dho, krʉ ndrŭ tsɨ ma, krʉ ndrŭ bbu ma, krʉ luga ma, krʉ ndrŭ ma na dho.​—Ufu. 14:6.

Mungu dzá ndrŭ nzɨ adi “Pidhinga dzá hwè lo-i” dhé d’ra ri. (Mt. 24:14) Kpa dho ringani ndima kó Ufunuo sura 8 djó ro sura 10 djo le tilo djo ná malaiká nji ná njí tsotso maddi. Fø malaiká gʉ Mungu dhó Pidhinga gʉ ná ndrŭ si ba ná chadha d’ra. Føri dho, Yova dzá Dimu d’ra ná hukumu dhi lo le ddi “thokpa na ndirigoti kazz na.” Føri na le Mungu si bbʉ Shetani dhó che kʉ ná i dz’ djo ná njonjo kʉ ná hukumu dhǒ. (Ufu. 8:7, 13) Ringani ndrŭ chu nari kʉ mwisho kʉ chøchø ndirigoti ndrŭ lé ndima dhó lo thika ndiro ndima si gøgø Yova dhó thø dhi ddo dyi d’e. (Sef. 2:2, 3) Ro, fø lo nzɨ ndrŭ adi ji ndima rr ri. Føri dho, fø lo ko d’ra ná saa na ringani ko é nga nǎ do ro. Bbò mbudha dhi saa na, ya mwisho ko si d’ra ná hukumu dho ndrŭ nanga si kani bbo.​—Ufu. 16:21. w22.05 7 §18-19

Yenga dyi, Bi 12 ddo 8

Nidho ringani ni ji Yova nidzá Mungu ni thí nǎ ro krʉ, nidhó nafsi na krʉ ndirigoti nidhó ngaddidha na krʉ.​—Mt. 22:37.

Addinga Wakristo kʉ ná dza dhi ndrŭ ra ngʉ gø dhi ndrŭ nari djo. Loroji na, njaro cho bí kana kpa rr rie hotuba ro b’lo ngbaribbai ma le ka le ngu nzø nari djo. Ro, kpadjo fø hotuba nǎ kʉ ná lo ka ndi si kpa dho ø, dhonalo kpadjo kpa ka ndima ddi longa ndima dhi ngba nganga dho. Føri kʉ bbo pli kʉ ná njí! Føri dho, kodhó maisha nǎ lo thika ro øni ná saa na, nja kʉ ná maandiko na mana ko adi famu bblo pli. Ri kʉ fø lo dho i Yova dhó njí dhi kpa adi Biblia zø ndirigoti kpa adi ngaddi ri djo “krʉ ddo ró” ndima dhó maisha nǎ ddiddi Waizraeli bbá pikpa dho le d’rangʉeri nari bbai ri. (Kum. 17:19) Gø dhi ndrŭ, nidhi nzø dho ni longaddi Yova djo nari kʉ bbo pli kʉ ná pendeleo. Ro, ni adi riji ni njí nja lo maddi Yova djo ni longaddi kpa dho nari djolu. Ni adi riji ni kó nzø tsotso ndima ji ke bbo d’e. w22.05 26 §2-3

Wanzia dyi, Bi 12 ddo 9

Atho ø le dha ni ro.​—Kol. 3:10.

Ri nzá kaka le thí ba njedha dhé b’lo le njingʉe ná chenga dho ri. Ringani ko é tayari ko leni le. Le le leni ná føri Yova adi nja mana na bbo ndi di rivʉ ndi njí le zø ná saa na. Le le leni nari na mana kʉ “le ki ro nzá ngʉ le e nji ná chelo djo ri.” Nja chu nǎ le ka le pori, le bba le e nji ná chelo tso bba ndirigoti le Yova jirie ná lo nji nari. (Isa. 55:7) Fø ke dho ringani ndi ø ndidhó ngaddidha thika ndirigoti ndi bbá Yova dhó ngaddidha ddá chutso ndi dho. (Ro. 12:2; Efe. 4:23) Kedho ringani ndi bbá ndidhó che kʉ ná ngaddidha tso ndirigoti ndi e nji ná lo tso. (Kol. 3:7-9) Bbʉbbʉ dhé, ri kʉ ko kʉ udha na Kristo bbʉngʉe ndi bbʉdha nari nǎ nari i adi rili Yova njí kodhó chenga zø ndirigoti ke sa ri sa ri. Kristo bbʉngʉe ndi bbʉdha ná føri dho, Yova si kʉ ko zø njinji njati ko di kpakpanga nji ko thí nǎ ro krʉ ko ø kodhó nyi thika ró.​—1 Yo. 1:7. w22.06 6 §16-17

Ronji dyi, Bi 12 ddo 10

Nzɨ nji karrnga goti ni si bani na ná nzadha do.​—Ufu. 2:10.

Adamu ma, Eva ma na tsangʉe Yova ro ná nga djó ro, ndrŭ adi che kʉ ná lo nji ndima lai ndrŭ ró. (Muh. 8:9) Loroji na, bbobbonga na kʉ ná kpa adi njini d’idhé ndrŭ na, jeuri dhi kpa adi che kʉ ná lo nji ndrŭ ró, darasa nǎ fudjo dhi nzø adi ndima lai nzø dhudhu ma, nzø adi njini ndima lai nzø na d’idhé ma, ndirigoti nja ndrŭ adi ndima dhó familia nǎ ndrŭ nzá bbo. Føri dho ndrŭ ndima lai ndrŭ do nji ná føri nzá ka ndi ke le nanga ri! Ndrŭ do ko nji ná saa na, ká Shetani adi rine ndi ba ngbá faida ko nǎ ro? Shetani adi rili ko njí ndrŭ do ndiro ko bbá lod’radha dhi njí tso d’e. Shetani adi guvernema cho ndiro kpa gʉ kodhó njí gʉ ndirigoti kpa nzá ko nza d’e. (Lu. 21:12) Shetani dhó dz’ djó, bí kʉ ná ndrŭ che kʉ ná loti ndirigoti kali sha Yova dzá Dimu djo. Fø kali dhi lo u ná ndrŭ adi ko bé pá ndirigoti kpa adi chelo nji ko ró kimwili nǎ. (Mt. 10:36) Ko nanga ká ka ndi keni ke Shetani njínji na ná fø ufundi dho? Nzá nganga. Dhonalo fø di ná ufundi na ke njingʉe njí ro karne ya kwanza na maddi.​—Mdo. 5:27, 28, 40. w22.06 16 §10-11

Gbonji dyi, Bi 12 ddo 11

Chølo dhi ngana bí kʉ ná ndrŭ mba ná ndrŭ si ndrindri dyødyø bbai theinga dho.​—Da. 12:3.

Chølo dhi ngana le si mba ná “bí kʉ ná” ndrŭ kana ká si ie ma? Fø ndrŭ kana sie gaga ná ndrŭ ma, Armagedoni dhi vita lu da ná ndrŭ ma, ø dz’ djó ka ndi si gøni ná nzø ma na. Cho 1 000 tso si kʉ dyani ná saa na dz’ djó shi di ná ndrŭ krʉ sie ka ndima ka ro. Ringani ko nonga nari kʉ, kaka ná ndrŭ le ngʉ na føri na mana nga kʉ le si choro nŭnŭ shinga ba théi ri. Addinga Adamu ma, Eva ma na djo. Nì mai kpa ngʉe kaka ná ndrŭ ro, ringangʉeni kpa dhǒ ndima ngarr nì Yova dho nari choro nŭnŭ shinga le bbʉ kpa dho nari njí. Ro, njedha dhi lo kʉ, kpa nzá rrngʉe nga ke dho ri. (Ro. 5:12) Cho 1 000 tso si dyani nari goti ko krʉ si ngʉ kaka ná ndrŭ, nde fø kaka ná ndrŭ ká si ndima tso gba Yova dhó Pidhinga na theinga dho i nì? Nde, kpa kana nja ndrŭ ká sie Adamu ma, Eva ma na bbai, nì mai ndima ngʉe kaka ná ndrŭ ro nzá ndima tøngʉeni chi Yova dho ro? Fø ngadhudha dho ri si ngani ndi ba jibu. w22.09 22-23 §12-14

Thonji dyi, Bi 12 ddo 12

Dz’ djó pidhinga ngʉ kodhi Bboke ndirigoti kedzá Kristo dhó Pidhinga.​—Ufu. 11:15.

Dz’ djó kʉ ná kpakpalo ni nja ná saa djo, ká ni adi rinja ri kʉ kpakpa ni uri nari kʉ gosi ná saa djo lo krʉ si ngʉ bblo? Familia nǎ ndrŭ ro nzɨ jini ndima kana drrdrr ringʉe nari bbai ri. Ndrŭ kana bí kʉ ná ndrŭ ngʉ lɨ nji ná ndrŭ, dya nji ná ndrŭ ndirigoti bbo tsɨ sani ná ndrŭ. Bí kʉ ná ndrŭ rinja nari kʉ, ri kʉ kpakpa le li le thí bbobbonga na kʉ ná kpa djo. Ro, bbo sani ná fø hali ka ndi liri ni uri nari kʉ, krʉ kʉ ná lo si ngʉ bblo pli. Ká addudho? Dhonalo ndrŭ njini Biblia d’rangʉe “siku za mwisho” djo ná unabi pongʉeri nari nganga bbai. (2 Ti. 3:1-5) Fø unabi njini nari rili nì thí kʉ bblo ná ndrŭ uri u nari kʉ, Kristo Yesu nga pinyodha tso b’lo Mungu dhó Pidhinga nǎ. Føri kʉ, Pidhinga djo tilo ná bí kʉ ná unabi kana ddikpa ri ro dhé. Krʉ kʉ ná fø unabi tso le gbá ddi ngana ró, ri di ddiddi puzzle dhi kpà (muchezo) nǎ ritsi tso le gba ddikpa ngana nari bbai. Ri ka ndi kó ko tsotso ko famu Yova pɨngʉe lo njidha dho ná saa ndirigoti ko ká di ngbá saa nǎ ma nari. w22.07 2 §1-2

Mbʉnji dyi, Bi 12 ddo 13

Nyodyu adi njani chø kʉ ri ndidzá njí chulu.​—Mt. 11:19.

Coronavirus dhi saa djo ko bae pʉlʉpʉlʉ kʉ ná chutsoddadha, ngbaribbai ma ko ka ko njí njudha ma, lod’radha dhi njí ma na nari djo. Tsé ko ngae njudha ma, asamble ma na njidha tso video chulu. Føri kina ko ngae lod’radha tso barua chulu ndirigoti telefone chulu. Yova le e kodhó njí ronga le. Bí kʉ ná Tawi nǎ kpa poeri nari kʉ, wahubiri dhó hesabu ndrieni ndri. Bbʉbbʉ dhé, bí kʉ ná ndrŭ Coronavirus dhi saa na ko njie ná lo lie kpakpa. Nja ke ka ndi pori nari kʉ, tengenezo chue fø dhe si nari b’lo. Ro, krʉ saa ró ko e rinja nari kʉ, ko ba ná chutsoddadha e nyodyu dhi ri dhé. Yesu chutso ddá jidha na ndidzá ndrŭ dho, nari djo ko di ngaddi nari ka ndi liri ko uri u nari kʉ Yova ma, ndi Ddù ma na sie ko na nì dhé, njati ngbá lo ma si nga ba gosi ná saa na ró.​—Ebr. 13:5, 6. w22.07 13 §15-16

Zanji dyi, Bi 12 ddo 14

Anidi nganzi krʉ saa ró. Anidi mbai po krʉ kʉ ná lo dho. Føri i kʉ Mungu ji ni dho ná lo Yesu Kristo nǎ. ​—1 Te. 5:17, 18.

Godhé, nga ko nzǐ Yova tso ná saa na, ringani ko po mbai ke dho ke nji ko dho ná bblo ritsi dho. Loroji na, ko ka ko po mbai ke dho ke no bbo d’ani ná maua ma, djuu o ná njonjo kʉ ná nyo ma, ndirigoti kau ko nji nja ndrŭ na nari nǎ ro ko adi ba ná hwè ma na dho. Kodhi ji dhi Baba bbʉ fø ritsi ko dho ndirigoti nja ritsi maddi nja ko é hwè na d’e. (Zb. 104:12-15, 24) Nì mai ri kʉ føro, bbo na mana kʉ ná lo kʉ, ko adi mbai po Yova dho ke kiroho nǎ nyo bbʉ ko dho ndiro kodhó udha ngʉ kpakpa d’e nari dho, ndirigoti ke bbʉ bblo kʉ ná ngab’odha ko dho gosi ná ddo djo nari dho. Ko nanga adi jini bbo njati nja ndrŭ po mbai ko dho ró. Føri bbai njati ko di mbai po Yova ngʉ kodhó sala goti nari dho ró, ke nanga adi jini bbo. Mungu dho ko ka ko po mbai dho ná bbo na mana kʉ ná nja ri ká kʉ ngbá lo.​—Kol. 3:15. w22.07 22 §8-9

Yenga dyi, Bi 12 ddo 15

Kedhó hwè kʉ Yova dzá yadha nǎ, ndirigoti ke kedzá Yadha zø ndi chu rere ri na dyina ma, kuna ma. ​—Zb. 1:2.

Ko churi nari kʉ bbʉbbʉlo le zø ná føri dhé nzá kaka ri. Nja ko ba faida ko zø ná lo nǎ ro d’e, ringani ko njinjí ko zø ná lo na kodhó maisha nǎ. Føri dhé ka ndi liri ko ba hwè bbʉbbʉlo nǎ ro. (Yak. 1:25) Ko njínji bbʉbbʉlo na nì nari ká ko ka ko chú ngbaribbai? Ddikpa le-djo pori ringani ko nja ko ká njínji nì ko chu ná lo na ndirigoti ko nja kodhó lo ká uri ko njí maendeleo ki bbo ngbá lo nǎ nari. Mutume Paulo pongʉeri ɨ: “Rie ngbá ngatsi ma ko nji maendeleo ri ró akora anzi dhé fø chu lú ko bbi utaratibu na nari na.” (Flp. 3:16) Addinga “bbʉbbʉlo kana ko di nari” nǎ ro ko adi ba ná faida djo! Bbʉbbʉlo kana ko di nari adi rili kodhó maisha é bblo, ko bbʉ hwè Yova thí dho ndirigoti ko lai Wakristo dho. (Mez. 27:11; 3 Yo. 4) Bbʉbbʉ dhé, føri dzá lo dho i ko jirie bbʉbbʉlo ndirigoti ko adi njínji ri na kodhó maisha nǎ. w22.08 18-19 §16-18

Wanzia dyi, Bi 12 ddo 16

Anirø Mungu dzá miya ró.​—1 Pe. 5:2.

Wazee ká ka ndima dhǒ ndima ji Yova ma, Yesu ma na ji nari ngbaribbai? Ddikpa bbo ná mana kʉ nari kʉ, Yesu dzá chembø dhó lo u ná ritsi kpa ne ndima chu nari chulu. (1 Pe. 5:1, 2) Yesu tungʉe fø lo nanga pʉlʉpʉlʉ Mutume Petro dho. B’lo ndi gʉ Yesu gbo ina nari goti, Petro ngʉe ù na bbo ndi dhori nari kʉ ndi ji Yesu ji. B’lo ndi ga nari goti Yesu dhungʉeri Petro tso: “Simoni, Yohana ddù ni ká ji ma ji?” Ko churi nari kʉ, Petro njingʉe ndi dho ka ná lo krʉ ndiro ndi dhǒ ndi ji ndidzá Bboke ji nari d’e. Yesu pongʉeri Petro dho: “Ab’o madzá rere chembø ronga.” (Yoh. 21:15-17) Ndirigoti Petro b’ongʉe Yesu dzá chembø ronga li ndi li ndi dyu ro ndidhó maisha nǎ nja ndi dhǒ ndi ji Yesu ngbà nari d’e. Wazee, Petro dho Yesu pongʉe ná lo kʉ ni dho mana nari ká nì ka ni dhǒ ngbaribbai? Ni ka ni dhǒ nì ji Yova ma, Yesu ma na bbo nari krʉ ddo ró ni ni dhona le bbʉ ná njí nji nari chulu ndirigoti kpakpanga nì nji ni kó djødjø ná ndrŭ tsotso nja ndima ngʉ Yova ro nari chulu.​—Eze. 34:11, 12. w23.01 29 §10-11

Ronji dyi, Bi 12 ddo 17

Mungu kʉ chi tøni ná ke, ndirigoti ke nzɨ ri ro bba ni mbuni dada nidhó kpakpanga djolu ná ngatsi ri. ​—1 Ko. 10:13.

Nzɨ di riddi ni bani na ná kpakpalo ka ndi famu ná ndrŭ ro nga kʉ ddikpa maddi ri. Føri bbai ni di ngaddi nari ka ndi liri ni é ngadhi ngab’odha ro, ndirigoti ni di ni nja nga kʉ kpakpanga na ndiro ni hwini che kʉ ná tamaa tso ró d’e nari bbai. Ro, Biblia i nzá pori føri. Ri pori ɨ: “Mbudha banga ná saa djo ke si ri tso vedha dhi kpakpanga ma, ri nǎ ro ni ka ni vʉ lú ná chu ma na bbʉ ni dho.” Føri dho njati che kʉ ná tamaa ngʉ kpakpa bbo ma ró, ko ka ko si ngbà dhé ri djolu. Yova dhó le tsotsokodha chulu ko ka ko b’o ko ronga b’o che kʉ ná lo ko nji nari ró. Krʉ ddo ró adi i lo ngano: Ko kʉ nzá kaka ná ndrŭ nari dho, ko nzá ka ko cho che kʉ ná tamaa si ko na nari tso ro ri. Ro, ri si ko na ró, ri ka ndi kaka ko pʉ ri ko nǎ ro théi, ddiddi Yosefu njingʉeri nari bbai, lele ndi nyingʉe nga Potifa bbá le kuso ro ro. (Mwa. 39:12) Ri nzá ngani ni njí che kʉ ná tamaa ró njí ri! w23.01 12-13 §16-17

Gbonji dyi, Bi 12 ddo 18

Mungu nzɨ adi ndrŭ nanga ro krø ri.​—Ro. 2:11.

Chølo kʉ Yova dhó sifa. (Kum. 32:4) Chølo tso njunju nzɨ le ndrŭ nanga krø nari na ndirigoti Yova nzɨ adi ndrŭ nanga ro krø ri. (Mdo. 10:34, 35) Yova nzɨ adi ndrŭ nanga ro krø ri nari njangʉeni Biblia le ndingʉe nǎ ná luga ró. Yova tsongʉeni, ngasini ná saa na, Biblia nǎ kʉ ná “bbʉbbʉ lochudha” si “lili.” Bí kʉ ná ndrŭ ka ndima famu fø lo ngbà. (Da. 12:4) Fø lochudha ka ndi sie lili ná ddikpa chu kʉ, ri thika le lé lú ná luga ma, ri le ndi nari ma ndirigoti ri ró dyʉ ndi ná vichapo le ndo bí kʉ ná ndrŭ dho nari ma na. Yova dzá ndrŭ le Biblia thika dada 240 djolu ná luga nǎ, lú inga ndi lai ró ndirigoti ndrŭ krʉ ka ndima ba Biblia ba nga ró dzi ro. Føri adi rili krʉ kʉ ná ndrŭ u “Pidhinga dzá hwè lo-i” mwisho si nari njí. (Mt. 24:14) Kodhó chølo dhi Mungu adi riji bí kʉ ná ndrŭ chu ndi ndidzá lo ndima zø nari chulu. Føri kʉ ko ke jirie bbo nari dho. w23.02 5 §11-12

Thonji dyi, Bi 12 ddo 19

Anibba i dz’ dzá ndrŭ dha ni dyø nari tso, ro aningʉ nidhó ngaddidha ø.​—Ro. 12:2.

Ni ká jirie chølo ngbà? Bbʉbbʉ dhé, ngbao. Ro, ko krʉ e nzá kaka ná ndrŭ nari dho, njati ko é krr nga ró ri ka ndi é sʉsʉ dz’ dzá ngaddidha ø kodhó nganjadha thika chølo djo. (Isa. 5:20) Føri dho ko si chølo ká kʉ addu nari nja, ndirigoti ri ko ji nari nǎ ro ká ko ka ko ba faida ngbaribbai ma nari nja. Chølo djo ndrŭ di ngaddi ná saa na, bí kʉ ná ndrŭ ka ndima ddinga nodha dhi ke djo, chelo adi ti nja ndrŭ djo ná ke djo, ndirigoti chølo dhi ke ndi nja ndi ndiro ná ke djo. Ro, Mungu nzá jirie fø sifa krʉ ro ri. Dz’ djó Yesu ngʉe ná saa na, ke ongʉe dini djó bbobbonga na bbo kpa ngʉ chølo dhi sheria li ndima dho ndima ro nari dho. (Muh. 7:16; Lu. 16:15) Yova po chø kʉ ri ná lo nji ná ke nzɨ adi ndi nja mana na pli nja ndrŭ djolu ri. Chølo kʉ bbo thonga ná sifa. Sese lo na, ri nǎ mana kʉ, Yova Mungu nyǒ djó kʉ chø ná lo le nji nari. Bibllia nǎ “chølo” ma tso nju na ná ngaddidha kʉ, Yova dhó bbo gbeni ná sheria na le njínji nari. w22.08 27 §3-5

Mbʉnji dyi, Bi 12 ddo 20

Ma nzi ni madzá bbakau.​—Yoh. 15:15.

Yesu ngʉ adi ndi thí li ndi unakpa djo nì mai kpa ngʉ adi kosa nji ro. (Yoh. 15:16) Yakobo ma, Yohana ma na nzingʉeri Yesu tso ke si ndima li pekee kʉ ná ngana Pidhinga nǎ, ro Yesu nzá dhungʉe ri ro ndi tsó i kpa ronga ká addu cho nja ndima njínji Yova dho inga ndi pori nzɨ kpa di mitume ri. (Mk. 10:35-40) Luti, Yesu kpa lø ná kuna ke unakpa krʉ bbangʉe ke bba. (Mt. 26:56) Fø lo ma nzá ddi lingʉeri Yesu bbá kpa djo ndi ndi thí li nari tso ro ri. Ke chungʉe kpa kaka nzá nari chu, nì mai ri kʉ føro ke “jingʉe kpa kpø ndidzá dhe djo.” (Yoh. 13:1) B’lo ndi ga nari goti Yesu bbʉngʉe ndi una chi tøni ná 11 kʉ ná mitume dhona bbo na mana kʉ ná daraka, fø daraka ngʉe kpa njí ndrŭ wanafunzi ndirigoti kpa b’o ndidhó bbo na mana kʉ ná chembø ronga. (Mt. 28:19, 20; Yoh. 21:15-17) Ke ngʉe bblo kʉ ná sababu na ndi li ndi thí nzá kaka ná fø kpetsi kpa djo. Kpa krʉ njingʉe njí chi ndima tøni ro kpø ndima dhó dhe djo. Bbʉbbʉ dhé, Yesu bba bblo kʉ ná loroji nzá kaka ná ndrŭ djo le le thí li nari kana. w22.09 6 §12

Zanji dyi, Bi 12 ddo 21

Yova kʉ nì ma laidjó; ma nzɨ do ro nji ri.​—Zb. 118:6.

Njati ko uri nari kʉ, Yova ji ko ji ndirigoti ke kʉ nì ko laidjó ró, ko ka ko sisi Shetani do tá ko na nari djolu. Loroji na, Zaburi 118 ndi ná ke ngʉ hwini kpakpa kʉ ná lo tso ró. Ke ró mbubai ngʉe bí, fø kpa kana ngʉe bbo chungʉeni ná kpa maddi (verse 9, 10). Nja saa na, ndrŭ ngʉ adi ke cho chelo njidha dho (verse 13). Ndirigoti ke bangʉe kpakpa kʉ ná malipizi Yova dhó ro (verse 18). Nì mai ri kʉ føro, ke ngongʉeni ɨ: “Ma nzɨ do ro nji ri.” Ke chungʉeri nari kʉ, ngbà mai Yova bbʉ malipizi ndi dho ro, ndidzá ra nǎ Baba ji ndi ji. Zaburi ndi ná ke ungʉeri u nari kʉ, krʉ kpakpalo kana ndidzá ji dhi Mungu kʉ krʉ ddo ró tayari ndi tsotsokodha dho. (Zb. 118:29) Ringani ko uri u nari kʉ, Yova ji ko ddiddi ro krʉ. Njati ko u fø lo u ró, ri si rili ko sisi bí ina ndrŭ adi do nji ná gbo kʉ ná i lo djolu: (1) kodhó familia dhó lo tso ko gba nari do ko nji nari, (2) ndrŭ do le nji nari ndirigoti (3) dhe do le nji nari. w22.06 15 §3-4

Yenga dyi, Bi 12 ddo 22

Hwè na kʉ nari kʉ, anzi ra ngatsovedha na ná ke dhonalo føri goti ke sie u tso uni ná ke ndirigoti ke si shinga dhi taji ba.​—Yak. 1:12.

Ko adi Yova ko má nari li anziro kodhó maisha nǎ. Ko no ná Ke kʉ Yova nari dho, ke kaka ko bbʉ madha ndi dho. (Ufu. 4:11; 14:6, 7) Føri dho, bbo na mana kʉ kodhó maisha nǎ nari kʉ, ko bbʉ madha ke dho ngbà tso ke u ná chu lú, føri na mana kʉ ko má ke “roho na ndirigoti bbʉbbʉlo na.” (Yoh. 4:23, 24) Ko jirieri Mungu dhó roho takatifu ddá chutso ko dho ndiro ke dho ko bbʉ ná madha tso gbani gba kedzá lo nǎ kʉ ná bbʉbbʉlo na d’e. Ringani ko li ke ko má nari anziro njati rie ko di nǎ ná ngø nǎ kodhó njí gʉni gʉ ma ró. 100 djolu da ná ko djoi ma, ko vei ma na le sʉ prizo nǎ Yova dzá Dimu ndima kʉ nari djó dhé. Nì mai ri kʉ føro, kpa kʉ hwè na ndima krʉ ndima ka ndima njí ná lo nji nari dho. Kpa nji ná fø lo tsu ndi nǎ, sala ma, lonanganedha ma, ndirigoti nja ndrŭ dho ndima lo d’ra Mungu dhó Pidhinga djo nari ma na. Ko di bani upinzani na ma ró, ko ka ko é hwè na, ko churi chu Yova kʉ ko na nì ndirigoti ke si ko ronga lele nari dho.​—1 Pe. 4:14. w22.10 9 §13

Wanzia dyi, Bi 12 ddo 23

Nyodyu adi le ronga b’ob’o. ​—Muh. 7:12.

Mezali dzá buku nǎ, Yova bbʉ krʉ ddo ró ko ka ko njínji na ná shauri. Akonja nyodyu dhi fø shauri ro aro di. Ya kwanza adi hwè ba nidhó bani ná ritsi dho. Mazali bbʉ i shauri: “Nzɨ di ni njé mali nedha na . . . dhonalo ri ndi hú nji ndi dho bbu bbai ndirigoti ri si ta ndi dho rakpa ro.” (Mez. 23:4, 5) Ro, mali dhi kpa ma, njedha dhi ndrŭ ma na krʉ adi rine ndima ba mbø dhé. Ri kʉ føri dzá lo dho i kpa adi sa ka ndi sa ndima dhó sifa ma, ndima kana kau ma, ndirigoti ndima dhó afya ma na ná lo nji ri. (Mez. 28:20; 1 Ti. 6:9, 10) Ya pili addinga lo ni ti nari njí. Njati ko é krr nga ró, ko tso nǎ lo ka ndi vó nja ndrŭ thí ronga vó. Mezali 12:18 pori: “Nzá le ddinga ro le po ná lo adi nga krr ddiddi sà bbai, ro nyodyu dhi ke dà adi le gøgø.” Nja ko kana nga é chøchø nja ndrŭ na d’e, ringani ko bbá kpadhó kosa djo dhé ko loti nari tso.​—Mez. 20:19. w22.10 21 §14; 22 §16-17

Ronji dyi, Bi 12 ddo 24

Anyo kú nanga le ku ná kitabu, ndirigoti ara loti Israeli dzá dza dho.​—Eze. 3:1.

Ezekieli dho ringʉngani ndi famu ndi si ra d’ra ná lo bblo pli. Ke chungʉeri nari kʉ Mungu dzá lo ka ndi choe ndi ronga ndiro ndi d’ra lo d’e. Føri goti, ké dho le nanga ka ndi keni ná lo njingʉeni. Ezekieli rangʉe ri utso d’i nari kʉ, kú nanga le ku ná fø kitabu “ngʉ o mbø tiidda bbai.” (Eze. 3:3) Ká addudho? Dhonalo Ezekieli njangʉeri nari kʉ, Yova djo ndi ra loti ná føri kʉ mbø o ná lo inga ngbà thonga ná lo. (Zb. 19:8-11) Ke pongʉe mbai bbo Yova dho Yova ungʉe ndi tso ndi é nabi nari dho. Luti, Yova pongʉeri ki Ezekieli dho: “Ali ri ni thí na ndirigoti arr ma po ni dho ná lo krʉ.” (Eze. 3:10) Fø lojadha chulu, Yova pongʉeri Ezekieli nó fø kitabu nǎ ndini ná lo nga ndirigoti ke ddinga bbo ri djo. Fø lo Ezekieli njingʉe ná saa na, kedhó udha ngʉngʉe kpakpa. Godhé, ri kongʉe ke tsotso ke chú ndrŭ dho ndi si ra d’ra ná lo d’e. (Eze. 3:11) Ezekieli ungʉe Mungu dzá lo ná saa na, ke ngʉe tayari ndi ngá lod’radha tso ndirigoti ke rangʉe anzi kpø ndi d’ya fø njí tso ná nga djo. w22.11 6 §12-14

Gbonji dyi, Bi 12 ddo 25

Nga le rr nari dada bbʉdha djolu.​—1 Sa. 15:22.

Njati tengenezo ø thika ná lo di chi ni tøni nari tsu mbudha kana ró ká ringani ni njí addu? Agba ni thó tso tengenezo ø thika ná fø lo na ni thí nǎ ro krʉ. Ngødja na ndima ngʉ bbi ná saa na Wakohati ngʉ adi sanduku la agano d’ú ndrŭ njí ndima ra ro. (Hes. 3:29, 31; 10:33; Yos. 3:2-4) Føri ngʉe bbo kʉ ná pendeleo! Ro, Ko ddo koni ná Ngø na Waizraeli tsungʉe ná saa na, lo thika øngʉeni ø. Sanduku na nzá ringangʉeni le bbí krʉ saa ró ri. Føri dho, Wakohati dhona le bbʉngʉe nja njí. (1 Ny. 6:31-33; 26:1, 24) Ddikpa lo ro ma nzá ddi dhori nari kʉ Wakohati ngʉ rinzi le bbʉ bbo na mana kʉ ná njí ndima dho ndima ngʉ pekee kʉ ná njínji anziro nari dho nari ro ri. Fø lo nǎ ro ká ko ka ko ba ngbá somo? Ni thí nǎ ro krʉ agba ni tso Yova dhó tengenezo nǎ lo thika øni nari na, njati nidhó njí thika øni ø ma ró. Anonga nari kʉ, ri nga kʉ ni nji ná njí i rili ni é mana na bbo Yova nyǒ njí ri. Yova ni ngarr ndi dho nari nja mana na pli ni nji ná njí djolu. w22.11 23 §10-11

Thonji dyi, Bi 12 ddo 26

Prizo nǎ ma ngʉe tsó ná sheni nzá pangʉe do ke djo ri.​—2 Ti. 1:16.

Onesiforo nengʉe Paulo ne ndirigoti ke singʉe ke ro ná saa na, ke kongʉe Paulo tsotso ke ba ndidhó lo ji ná ritsi d’e. Fø ndi njiri nari na, Onesiforo tsungʉe ndidhó shinga hatari na. Ko ká ba ngbá somo? Ri nzá ngani ko bbari do nji ko, ndrŭ do tá ko na nari dho ri inga ko cho ko tso ko djoi nza ndrŭ nzá ná kpa tsotso ko kó nari ró ri. Fønga rɨngana akonji krʉ ko ka ko njí ná lo ndiro ko kó kpa tsotso d’e. (Mez. 17:17) Kpadhó lo jiri ko dhǒ jidha ndima dho ndirigoti ko kó ndima tsotso ko. Akonja ngbaribbai ma Russie nǎ kʉ ná ko djoi ma, ko vei ma na adi ndima lai prizo nǎ kʉ ná Wakristo tsotso kó nari. Kpa kana nja kpa adi si tribinale na le-djoi ma, le-vei ma na soni ná saa na nja ndima kó kpa tsotso d’e. Fø lo nǎ ro ká ko ba ngbá somo? Njati chutso ddá ná le-djoi ndrŭ bbøbbø inga ndrŭ sʉ kpa prizo na inga ndrŭ di kpa nzanzá ná saa na, nzɨ bbari do pá ni djo. Anji sala kpa dhi lo dho, ako kpadhó familia tsotso ndirigoti ane ngbaribbai ma ni ka ni kó kpa tsotso ná nja chu.​—Mdo. 12:5; 2 Ko. 1:10, 11. w22.11 17 §11-12

Mbʉnji dyi, Bi 12 ddo 27

Kpa ngʉ bbo kʉ ná le isopɨdha si ná nga ma dho.​—Kol. 4:11.

Wazee dhó bbʉni ná njí kʉ ndima li le-djoi ma, le-vei ma na kpakpa Biblia nǎ lo na ndirigoti ndima kó bʉ thí bʉni ná ndrŭ tsotso. (1 Pe. 5:2) Chʉ adi ngaba ná lo njíni ná saa na, ringani wazee neri ndima chu nari kʉ, krʉ kʉ ná le-djoi ma, le-vei ma na ronga ká b’oni ngbà ndirigoti kpadhó ká nyo ma, ru ma, dza ma na kʉ nì nari. Ro, ddo dá bí ma ró, kpadhó lo si riu godhé le li ndima kpakpa kiroho nǎ. (Yoh. 21:15) Chʉ adi ngaba ná lo na bangʉeni ná bí kʉ ná le-djoi ma, le-vei ma na njungʉe tawi nǎ adi njínji ná le-djo Harold na, ke pori: “Ri adi ddo dzi ndiro le ngʉ ledhó drrdrr hali na d’e.” “Kpadhó maisha ka ndi ngʉ bblo maddi, ro kpa nzá ka ndima vi ndima dhí ji ndima jie ná dhedhe ná le nga ro ri, ndirigoti ndima dhó sasaeni ná ritsi nga inga ndima dae lú ná hatari nga ro ri. Fø lo nga le no nari ka ndi di rili le di le mbu che. Føri nga kʉ, nga le kʉ udha nari, ro fø ndrŭ krʉ ka ndima mbu ndima ngbà dhé.” Wazee adi njínji i shauri na “dzz dzz ná ndrŭ na anidzz dzz.”​—Ro. 12:15. w22.12 22 §1; 24-25 §10-11

Zanji dyi, Bi 12 ddo 28

Anira anzi roho chulu ni bbi nari na ndirigoti ni nzɨ si le ndí dzá ngbá tamaa ro ma nji ddi ri.​—Gal. 5:16.

Ndiro ko di sisi chølo ko njie nari tso ró ko hwini nari djolu d’e, Yova adi ndidhó roho takatifu bbʉ ko dho. Mungu dzá lo ko di zø na saa na, ko ribba Mungu dzá roho njinjí ko djo. Ko adi roho takatifu ba njudha dhi ngana ko é ná saa na maddi. Wakristo nju ndima tso ná fø saa na, ko ka ko ba saa ko di ko bbai kpakpanga nji nja ndima njí bblo lo d’e ná ko djoi ma, ko vei ma na, ná føri kʉ kpakpa ka ndi li ko ná lo. (Ebr. 10:24, 25; 13:7) Føri goti ko di ko thí nǎ ro si ná sala nji Yova dho ndirigoti ko di rinzi ke kó ko tsotso nja kʉ ná uzaifu na ná saa na, ke adi ndidhó roho takatifu bbʉ ko dho nari adi ko li kpakpa fø la njidha dho. Njaro nzɨ fø lo che kʉ ná tamaa sisi ri, ro ri ko tsotso ko ko hwini fø tamaa ko njie nari tso ró. B’lo ko kpe kodhó kiroho nǎ programu bblo nari goti, ri kʉ bbo na mana kʉ ná lo ko rá anzi fø lo ko nji nari na ndirigoti ko liri bblo kʉ ná tamaa dhi ko na. w23.01 11 §13-14

Yenga dyi, Bi 12 ddo 29

Ma nzɨ bba ddikpa ritsi ro ma nyopi ma djo ddi ri.​—1 Ko. 6:12.

Nga mai Biblia kʉ afya dhi lo djo tilo inga nyo dhi lo djo tilo ná buku ro, ri adi Mungu dhó ngaddidha dhodho fø lo djo. Loroji na, ke ripo ko “pʉ sa ka ndi sa ko ndí ná ritsi pʉ” ko ró ro. (Muh. 11:10) Bbo le nganyo nari ma, bbo le wa jø nari ma na krʉ kʉ che kodhó shinga dho. Biblia ripo ri nzá ngani ko nyonga ndirigoti ko jø wa nga djolu ri dhonalo fø ritsi ka ndi é che kodhó afya dho ndirigoti ri ka ndi hwi ko hwi maddi. (Mez. 23:20) Yova adi riji ko cho ko tso cho njati rie addu ma ko ji ko nyó inga ko jø ndirigoti ngbá ngatsi ma nari nanga ko vʉ ná saa na. (1 Ko. 9:25) Ko ka ko dhǒ ko nja Mungu bbʉ ko dho ná shinga dhi kado mana na nari kodhó ngaddidha dhi kpakpanga na ko njínji bblo nari chulu. (Zb. 119:99, 100; Mez. 2:11) Loroji na, ringani ko vʉ lonanga bblo nyodha dhi ritsi djo. Njati rie ji ma ko jirie ddikpa nyo, ro ko churi nari kʉ ri adi ko nji che ró ko adi ri nyodha tso bbabba. Ko adi ko ngaddi bblo nari dhǒ, ngbà ka ná ngatsi ko ddo, mazoezi ko nji, safi ko kʉ ndirigoti ko bbá dza nanga é tse ndi tse ro nari na. w23.02 21 §6-7

Wanzia dyi, Bi 12 ddo 30

Ni ká zø addu?​—Lu. 10:26.

Biblia ni zø ná saa djo ká ni ka ni ba kiroho nǎ mali ngbaribbai? Anja 2 Timoteo 3:16, 17 po ná i lo: “Krʉ kʉ ná Andiko kʉ . . . faida” na (1) longaddidha dho, (2) lo ronga podha dho, (3) lo thika thɨdha dho ndirigoti (4) le ngʉ na ndrŭ chølo le nji ná chu na d’e. Tho kʉ ná fø faida ni ka ni ba Biblia nǎ nzɨ ni adi zø bí ina ná buku nǎ ro maddi. Ane ni zø ná andiko nanga ndiro ni nja addu ma ri ddi ni dho Yova ma, kedhó kusudi ma na djo inga Biblia nǎ kanuni djo nari d’e. Anja ngbaribbai ma ri ka ndi kó ngatsotso lo ronga podha kana nari. Anja ngbaribbai ma fø verse ka ndi kó ni tsotso ni nja ndirigoti ni pʉ ni ró ro che kʉ ná nyi ndiro ni tøni chi Yova dho d’e nari. Anja ngbaribbai ma ri ka ndi kó ngatsotso lo thika thɨdha dho nari inga ngbaribbai ma ri ka ndi thɨ mahubiri nǎ ni nju na ná ndrŭ dhó nganjadha thika nari. Ndirigoti anja fø verse nǎ ká kʉ nizamu ro ddi ndiri kó ni tsotso ni di ngaddi Yova bbai d’e nari. Njati ni b’o 4 kʉ ná fø lo ronga ni djǒ nǎ ró føri si ni tsotso ko ni ba kiroho nǎ mali nidhó Biblia zødha nǎ ro. w23.02 11 §11

Ronji dyi, Bi 12 ddo 31

Kedhó pidhinga ro nzɨ si sani ri.​—Da. 7:14.

Danieli dzá buku nǎ ddikpa unabi pongʉeri nari kʉ, Yesu ka ndi bae fø Pidhinga nyakati saba le nzi unabi nǎ ná saa dzá mwisho na. Ri ká ka ndi kaka le chú ngbá saa djo ma Yesu ngʉngʉe Pi nari? (Da. 4:10-17) “Nyakati sabba” cho 2 520 dhǒ. Fø saa tso ngangʉeni 607 na Y.G.N. Wababiloni tungʉe Yova dhó pi dhi kiti djó ngʉ di Yerusalemu nǎ ná ya mwisho pi ná saa djo. Ndirigoti ri tso dyangʉeni 1914 na Y.G.G. Yova ngʉngʉe Yesu “kaka pinyodha dho ná ke” ndidhó Pidhinga nǎ ná saa djo. (Eze. 21:25-27) Fø unabi nǎ ro ká ko ka ko ba faida ngbaribbai? “Nyakati sabba” djo ko chulo nari rili ko uri nari kʉ, Yova si ndidhó tsodha krʉ nji bblo thonga ná saa na. Yova vʉngʉeri nari kʉ ndi sie Yesu li Pi ddikpa saa djo. Ndirigoti fø saa singʉe ro, ke njingʉe føri nji. Føri dzá lo dho, ko churi nari kʉ ke si nja unabi krʉ njinji, ndi vʉri ndi nji ri ná saa djo. Bbʉbbʉ dhé, Yova dzá ddo ro “nga sie retar ri!”​—Hab. 2:3. w22.07 3 §3-5

    Bbaledha nǎ Vichapo (2015-2025)
    Avʉvʉ
    Atsu
    • Baledha
    • Ando ri
    • Ji le ji nari
    • Copyright © 2025 Watch Tower Bible and Tract Society of Pennsylvania
    • Njí le nji na nalo
    • Ruruni nalo ronga le b'o nari
    • Paramètres de confidentialité
    • JW.ORG
    • Atsu
    Ando ri