Ni ká churi ngbà?

Karne ya kwanza na ká bbakuhani ngʉ adi ngbá njínji hekalu nǎ bbʉdha le ngʉ adi bbʉ ná zǎ ju na?

KRɄ CHO ró, Israeli nǎ bbakuhani ngʉ adi zǎ bbʉ bí bbʉdha mazabahu djó hekalu nǎ. Karne ya kwanza nǎ historia chu ná ddikpa muyahudi, Joseph ndingʉeri nari kʉ, 250 000 djolu da ná chembø dzá nzø le ngʉ adi ji Pasaka ddo dyi. Føri dho, ju ngʉ adi d’røni bbo mazabahu djo. (Law. 1:10, 11; Hes. 28:16, 19) Fø ju krʉ ká ngʉ adi ra ngbaga?

Dz’ nǎ e ná drrdrr ritsi adi ne ná kpa rangʉe bbo pli ngʉe ná ddikpa terase utso d’i Herode chingʉe ná hekalu na, føri ngʉe cho 70 na Y.G.G. sangʉeni ná hekalu. Fø terase lu ju ngʉ adi ra hekalu nǎ ro.

Akonja ndiro mazabahu di tse ndi tse ro d’e le njingʉe ná aro kʉ ná lo di:

• Mazabahu tsena ngʉe bbù: Wayahudi bbá desturi ma, yadha ma na djo le ndingʉe karne ya tatu na Y.G.G. ná ddikpa buku tilo dz’ nǎ ngʉe ná fø terase djo, ɨ ndi pori ro: “Mazabahu kó-b’ɨ ddikpa ri djó ngʉe bbù aro . . . fø bbù lu zǎ ju ma, mazabahu djó nga le ngʉ adi ʉ na ná dda ma na ngʉ adi ra ndirigoti terase lu ri ngʉ adi kø kpø Kidroni dhi djǎ na.”

  Dz’ nǎ e ná drrdrr ritsi adi ne ná kpa gba ndima tso fø drrdrr buku nǎ ndingʉeni ná fø lo na. Wayahudi dhó historia djo tilo ná ddikpa buku turinanga nari kʉ, dz’ nǎ e ná drrdrr ritsi adi ne ná kpa bangʉe terase hekalu kuso. Ri njani nari kʉ, fø terase lu dda ma, bbʉdha le ngʉ adi bbʉ ná zǎ ju ma na ngʉ adi ra hekalu nǎ ro.

• Dda ngʉe bbo: Bbakuhani dhó lo ngʉ adi dda u bbo mazabahu djó nga ʉdha dho ndirigoti fø dda ngʉ adi rili ju kø bblo terase lu. Ndiro kpa njí bbo na mana ngʉe ná fø njí d’e, bbakuhani ngʉ adi dda ba vile nǎ ro. Vile nǎ ro dda ngʉ si hekalu na terase lu ndirigoti fø dda ronga le ngʉ adi b’o dda dho le bbɨngʉe ná bbù nǎ. Dz’ nǎ e ná drrdrr ritsi adi ne ná ke, Joseph Patrich pori nari kʉ: “Fø saa na ngʉe ná nja hekalu nzá le chingʉe fø hekalu bbai ri dhonalo dda ngʉ si bbaidjo ro ri na ndirigoti nzá tsetse ná dda ngʉ adi ra ri nǎ ro arugu.”