Aba faida bbo nidhó Biblia zødha nǎ ro

1. Maandiko nǎ mana ngʉe bbo Yesu dho nari ká addu dhǒ?

ANZI ngaddi Yesu longaddi nari le rr nari dho ká le ka le mbue le ngbaribbai ma nari djo di. Bí ina ke ngʉ adi loti takatifu Maandiko djo ná fø Maandiko krʉ ke løngʉe ndi djǒ nǎ. Bbʉbbʉ dhé, kedhó batiso ma, kedhó dhe njí ya mwisho ke pongʉe ná nja lo ma na singʉe Maandiko nǎ ro.b (Kum. 8:3; Zb. 31:5; Lu. 4:4; 23:46) Ndirigoti cho gbo na nusu ndi d’ra lo nari kana Yesu ngʉ adi Maandiko zø ndrŭ kpari njí, ke ngʉ adi Maandiko po ndirigoti ke ngʉ adi ri nanga tútu.​—Mt. 5:17, 18, 21, 22, 27, 28; Lu. 4:16-20.

2. Dhi Yesu ngʉ dhi ná saa djo ká addu kongʉe Yesu tsotso nja ke chu Maandiko bblo d’e? (Anja ri chuti ji.)

² Ndidhó lod’radha dhi njí tso ndi nga nari njí cho bí kana, Yesu rrngʉe ndirigoti ke zøngʉe Mungu dzá lo bí ina. Ke ma bbá familia nǎ, Maria ma, Yosefu ma na loti ná saa djo kpa ngʉ adi lo ro ti Maandiko djo nì dhé.c (Kum. 6:6, 7) Ko ka ko uri u nari kʉ, Yesu ma, ndima bbá familia ma na ngʉ adi ra krʉ sabato ddo ró sinagogi na. (Lu. 4:16) Ná følu ke ngʉ adi Maandiko zøni nari rr li ndi li ndi dyu ro. Nja saa na Yesu ngʉ adi takatifu ndi ndini ná fø lo zø ndi ndiro. Ná føri nzá lingʉeri Yesu chu Maandiko bblo pli dhé ri, ro ke jingʉe ri ji ndirigoti ke ngʉ adi ribba ri i cho ndi nji ná lo ronga. Loroji na, ano 12 Yesu dhó cho ngʉe ro njingʉeni hekalu nǎ ná longa di. Bblo chungʉe Musa dhó sheria ná walimu nanga ngʉ “keni ke [Yesu] lo famu ná chu ma, kedhó jibu ma na dho.”​—Lu. 2:46, 47, 52.

3. I lo nǎ ká ko si loti ngbá lo djo?

³ Ko maddi ko ka ko chu ndirigoti ko ji Mungu dzá lo ji njati ko di ri zø krʉ ddo ró ro. Nde, ko ká ka ko ba faiba Biblia zødha nǎ ro ngbaribbai? Ko ka ko ba faida bbo chungʉe sheria ná kpa dho Yesu pongʉe ná lo nǎ ro, fø kpa kana ngʉe waandishi ma, wafarisayo ma, wasadukayo ma na. Fø dini djó bbobbonga ngʉ adi Biblia zø bí ina, ro kpa nzɨ ngʉ adi faida ro ba ndima zø ná lo nǎ ro ri. Yesu pongʉe fø kpa ka ndima njie nja ndima ba faida Maandiko nǎ ro d’e ná gbo kʉ ná lo. Ke pongʉe kpa dho ná lo ka ndi kó ko tsotso ko thɨ kodhó lo thika nja (1) ko famu ko zø ná lo bblo, (2) ko ba kiroho nǎ mali (3) ndirigoti ko bbari Mungu dzá lo ø kodhó maisha thika ø.

AZØ BIBLIA NI FAMU BBLO D’E

4. Luka. 10:25-29 ká addu ddi ko dho Mungu dzá lo le zø nari djo?

⁴ Ko adi riji ko famu Mungu dzá lo nǎ ro ko zø ná lo na mana bblo. Ro nja saa djo nzá ko ka ko ba faida ko zø ná lo nǎ ro ri. Loroji na, addinga Yesu ma tingʉe “ddikpa bbo chu sheria ná ke na ná lo djo di.” (Azø Luka 10:25-29.) Ke dhungʉeri ndi ká ka ndi njí addu nja ndi ba choro nŭnŭ di ná shinga ná saa djo Yesu ddangʉe chutso ke dho Mungu dzá lo na, ɨ ndi dhuri ke tso nari na: “Sheria nǎ ká ri ndini ngbaribbai? Ni ká zøri ngbǎ?” Fø kpetsi ke ngʉngʉe bblo kʉ ná jibu ni ji Mungu ma, ni lai ma na pori ná andiko djo ndi tilo nari na. (Law. 19:18; Kum. 6:5) Ro, anja luti ke pongʉe ná lo di: “Ma lai ká kʉ ie?” Fø lo na ke dhongʉeri nari kʉ, ndi nzá famungʉe ndi nganga ngʉ zø ná lo na mana ro ri. Føri djotsina ke nzá chungʉe ngbaribbai ma ndi ka ndi njie njí ndi zø ná lo na ndidhó maisha nǎ nari ro ri.

5. Sala le nji nari ma, dzodzo le ngazø nari ma na ká adi rili le famu le zø ná lo bblo pli ngbaribbai?

⁵ Ko ka ko famu Mungu dzá lo bblo pli njati ko di ri zø bblo kʉ ná chu nǎ ró. Kodhó lo u Yova nja ko famu maandiko bblo d’e. Føri dzá lo dho ko ka ko nziri Mungu bbʉ ndidhó roho takatifu ko dho ndiro ko li ko thí li ko zø ná lo djo d’e. Føri goti azønga dzodzo. Føri ka ndi liri ni famu ni zø ná lo bblo. Njaro ni ka ni njari ndiro ni ba faida d’e ni zønga bbobbo ni chu na inga Biblia chu le lø nari ni dyø ro. Njati ni di lø le lø ná lo rr ndirigoti ni di ri njanja nidhó Biblia nǎ ro ró, føri ka ndi kó ni tsotso ni famu fø lo ndirigoti ni nó ri nga bblo. Ná føri kina ni ka ni chu lo bbo Mungu dzá lo ni zø nari nǎ ro. (Yos. 1:8) B’lo ni dyá ngazødha tso ró anji sala ki vi ni po mbai Yova dho ke bbʉ ndidzá lo ko dho ná fø kado dho ndirigoti ni nziri ke kó ni tsotso ndiro ni njínji ni zø ná fø lo na nidhó maisha na d’e.

6. Nga ni dhu ni tso nga ni zø ro ndirigoti bbo na mana kʉ ná lo ni ndindi ná føri ká ka ndi kó ni tsotso ngbaribbai? (Anja ji.)

⁶ Iga kʉ, nja ni famu Biblia bblo d’e ka ndi kó ni tsotso ná aro kʉ ná lo. Adhunga ni tsó ni zø ná lo djo. Njati ni zø ddikpa lo ró adhuri ni tso: ‘I lo nǎ le loti djo nari ká kʉ ie ma? Lo ká ie ti? Lo ká le ti ie ma dho ndirigoti addudho? I lo ká njini ngbaga ndirigoti ngbá saa djo?’ Fø di ná ngadhudha ka ndi kó ni tsotso ni ddinga ni zø ná lo djo ndirigoti ni dyø fø lo nǎ bbo na mana kʉ ná lo. Føri kina nga ni zø ná saa djo, andi ri nǎ bbo na mana kʉ ná lo ndi. Ni ndi ni zø ná lo ndi ró, føri si rili ni di ngaddi ri djo bbo ndirigoti ri si ni tsotso ko ndiro ni famu fø lo bblo pli d’e. Føri kina, ndi ni ndie ná lo si ni tsotso ko ndiro ni nó zø ni zøe ná longa d’e. Ni ka ni ndi ddikpa ngadhudha, ndirigoti ni ndi utafiti ni njie nari nǎ ro ni bae ná lo, angʉ bbo na mana e ná lo djolu. Andi ngbaribbai ma ni ka ni njinjí ni zøe ná fø lo na inga ngbaribbai ma ni ni mbu ri djo nari ndi. Fø ni rinji nari ka ndi kó ni tsotso ni nja Mungu dzá lo ni dho le ndie nari bbai.

7. Biblia ko zø ná saa na ká kodhó lo u ngbá sifa ndirigoti addudho? (Matayo 24:15)

⁷ Yesu dhongʉe kodhó lo u ná ddikpa sifa njati ko jiri ko famu ko zø ná lo bblo ró, fø sifa kʉ lo utsod’idha. (Azø Matayo 24:15.) Nde, lo utsod’idha ká kʉ addu? Føri kʉ ddikpa lo ma ká gba ndima tso nja lo na ngbaribbai inga ri ká kʉ njonjo nja ri ró ro ngbá chu nǎ ndirigoti ri nǎ nzá le po pʉlʉpʉlʉ nari ká kʉ ngbá lo nari le adi famu na ná kpakpanga. Føri kina Yesu pongʉeri nari bbai kodhó lo u lo utsod’idha ndiro ko nja Biblia nǎ b’lo njini nari ká kʉ ngbá unabi nari d’e. Kodhó lo u fø sifa ndiro ko ba faida bbo Biblia nǎ ro ko zø ná lo krʉ nǎ ro d’e.

8. Ko ká ka ko zønga lo utsod’idha na ngbaribbai?

⁸ Yova adi lo utsod’idha bbʉ ndidzá njí dhí ndrŭ dho. Føri dzá lo dho anziri ke tso ke kó ni tsotso ni é fø sifa na d’e. (Mez. 2:6) Nde, ni ká ka ni njí nidhó sala nǎ ni nzie ná lo ró njí ngbaribbai? Zø ni zø ná lo nanga ane li ni li ni dyu ro ndirigoti ane ngbaribbai ma ni zøe ná lo ma tso nju b’lo ni churie ná lo na nari. Nja ni tsotso koni d’e, anjinjí Biblia zødha dho adi le tsotso kó ná ritsi na, loroji na anji utafiti Musaada wa kutafuta habari kwa ajili ya Mashaidi wa Yehova dhi buku nǎ ro. Fø vichapo ka ndi kó ni tsotso ni famu ni zø ná lo na mana ndirigoti ni chu ngbaribbai ma ni ka ni njinjí ri na nidhó maisha nǎ nari d’e. (Ebr. 5:14) Njati ni di ngazø lo utsod’idha na ró, ni si Maandiko famu bblo pli.

AZØNGA NI BA KIROHO NǍ MALI D’E

9. Wasadukayo ká ngʉ adi Maandiko nǎ bbo na mana kʉ ná ngbá bbʉbbʉ lo be pá?

⁹ Wasadukayo chungʉe anziro mbʉ (5) ngʉe Kiebrania nǎ ná buku bblo pli, ro kpa nzɨ ngʉ adi fø buku nǎ bbo na mana kʉ ná lo ro u ri. Loroji na, anja ngbaribbai ma Yesu ngʉngʉe kpadhó logoti gadha djo kpa dhungʉe nga ndi tso ro nari di. Ke dhungʉeri kpa tso: “Ni ká nzá zøri Musa dhó buku nǎ, kazz ngʉ rø ró nzɨ ndi gbi ro ná tsó nǎ ro Mungu pongʉeri ke dho ɨ: ‘Ma kʉ Abrahamu dzá Mungu, Isaka dzá Mungu ndirigoti Yakobo dzá Mungu nari ri?” (Mk. 12:18, 26) Nì mai Wasadukayo ngʉ adi fø andiko zø bí ina ro, Yesu dhó ngadhudha dhongʉeri nari kʉ, kpa ngʉ adi bbo na mana kʉ ná fø bbʉbbʉlo be pá, ná føri i kʉ gadha djo Maandiko d’ra ná lo.​—Mk. 12:27; Lu. 20:38.d

10. Biblia ko zø ná saa djo ká ringani ko di krr addudho?

¹⁰ Fø lo nǎ ro ká ko ka ko ba ngbá somo? Nga ko zø ná saa djo ringani ko é krr ndiro ko nja ko zø ná verse ka ndi ddinga ko dho ná lo d’e. Ri nzá ngani ko di Biblia nǎ mafundisho dherr dhé famu ri, ro ri nǎ nja bbʉbbʉlo ma, ri nǎ ruruni ná kanuni ma na maddi.

11. 2 Timoteo 3:16, 17 ripo nari bbai, ni ká ka ni ba kiroho nǎ mali ngbaribbai Biblia zødha nǎ ro?

¹¹ Biblia ni zø ná saa djo ká ni ka ni ba kiroho nǎ mali ngbaribbai? Anja 2 Timoteo 3:16, 17 po ná i lo (Azø.) Ri pori “krʉ kʉ ná Andiko kʉ . . . faida” na (1) longaddidha dho, (2) lo ronga podha dho, (3) le thɨ na lo thika ndirigoti (4) le ngʉ na ndrŭ chølo le nji ná chu na d’e. Tho kʉ ná fø faida ni ka ni ba Biblia nǎ nzɨ ni adi zø bí ina ná buku nǎ ro maddi. Ane ni zø ná andiko nanga ndiro ni nja addu ma ri ddi ni dho Yova ma, kedhó kusudi ma na djo inga Biblia nǎ kanuni djo nari d’e. Anja ngbaribbai ma ri ka ndi kó ngatsotso lo ronga podha kana nari. Anja ngbaribbai ma fø verse ka ndi kó ni tsotso ni nja ndirigoti ni pʉ ni ró ro che kʉ ná nyi ndiro ni tøni chi Yova dho d’e nari. Anja ngbaribbai ma ri ka ndi kó ngatsotso le thɨ na lo thika d’e nari inga ngbaribbai ma ri ka ndi thɨ mahubiri na ni nju na ná ndrŭ dhó nganjadha thika nari. Ndirigoti anja fø verse nǎ ká kʉ nizamu ro ddi ndiri kó ni tsotso ni di ngaddi Yova bbai d’e nari. Njati ni b’o tho (4) kʉ ná fø lo ronga ni djǒ nǎ ró føri si ni tsotso ko ni ba kiroho nǎ mali nidhó Biblia zødha nǎ ro.

ABBARI NIDHÓ NGAZØDHA LÉ NIDHÓ MAISHA THIKA LE

12. Yesu ká dhungʉeri Wafarisayo tsó “Ni ká nzá d’erie ri zø ri” addudho?

¹² Yesu dhungʉe i ngadhudha “Ni ká nzá d’erie ri zø ri?” nja ndi dhǒ na Wafarisayo ngʉe che kʉ ná nganjadha na Maandiko djo nari d’e. (Mt. 12:1-7)e Fø saa na Wafarisayo pongʉeri Yesu dhó wanafunzi ta Sabato dhi sheria. Nja ndi ngʉ kpadhó logoti d’e Yesu tingʉe lo Maandiko nǎ aro kʉ ná loroji djo ndirigoti ke pongʉe Hosea nǎ ddikpa verse ndiro ndi dhǒ Wafarisayo nzá famungʉe Sabato dhi sheria ká le lingʉe addudho ma nari d’e ndirigoti ndi dhǒ kpa nǎ ngangʉe zø ro ri nari d’e. Fø kpadhó maisha thika ká Mungu dzá lo ndima zø nari lengʉe nzá addudho? Dhonalo kpa ngʉ ri zø ndima d’i na lo nja ndrŭ djo ndirigoti nodha na. Kpadhó fø nganjadha ngʉ rili nzɨ kpa famu ndima zø ná lo.​—Mt. 23:23; Yoh. 5:39, 40.

13. Ri ká ngani ko zø Biblia ngbá nganjadha na, ndirigoti addudho?

¹³ Yesu dhó lo nǎ ro ko ba ná somo kʉ, ringani ko di Biblia zø bblo nganjadha na. Njonjo Wafarisayo ró ro ringani ko é nyenyenga na ndirigoti ngbà ko jiri ko chu lo ro. Ringani “nyenyenga na ko bbari fø lo zʉ ndi ko thí na.” (Yak. 1:21) Njati ko é nyenyenga na ró, ko si ribba Mungu dzá lo ø ko thika ø. Njati ko pʉ ndrŭ djo le lod’i nari ma, nodha ma na pʉ ko ró ro ró dhé, Biblia nǎ zølo ma, jidha ma na djo tilo ná lo si ko thika ø.

14. Ko ribba Biblia ø ko thika nì nari ká ko ka ko chu ngbaribbai? (Anja ji.)

¹⁴ Nja ndrŭ na ko njini ná chu ka ndi dhori ko ká ribba Mungu dzá lo lé ko thika nì ma nari. Wafarisayo nzɨ ngʉ adi ribba Mungu dzá lo lø ndima thí ronga ri, ná føri djotsina kpa ngʉ adi “lod’i nga na kosa kʉ ná ndrŭ djo.” (Mt. 12:7) Ngbaribbai ma ko njini nja ndrŭ na, nari adi ko ká ribba Mungu dzá lo lø ko thí ronga nì inga nzɨ ma nari dhǒ. Loroji na, ko ká adi loti bí ina nja ndrŭ dhó chelo djo inga kpadhó bblo lo djo? Ko ká é zølo na ndirigoti tayari ndrŭ zø njidha dho i nì inga ko adi lo d’i ndrŭ djo ndirigoti ko di rine ko ø ko be? Fø di ná ngadhudha na ko di ko nanga ne nari ka ndi kó ko tsotso ko nja kodhó ngazødha ká ke kodhó ngaddidha ma, ko ko mbu nari ma, ko nji ná lo ma na thika ø nì nari.​—1 Ti. 4:12, 15; Ebr. 4:12.

MUNGU DZÁ LO ZØDHA ADI HWÈ BBɄ

15. Yesu ká ngʉ adi ndi mbu Maandiko Takatifu djo ngbaribbai?

¹⁵ Yesu jingʉe Maandiko Takatifu ji, ndirigoti ngbaribbai ma ke ngʉ adi ndi mbu ri djo nari d’rangʉeni unabi chulu Zaburi 40:8 nǎ: Ri d’rari “Ee madzá Mungu ni ji ná lo njidha kʉ madzá hwè ndirigoti nidzá sheria kʉ ma nǎ.” Ná føri lingʉeri ke é hwè na ndirigoti ke njinjí Yova dho bblo pli. Ko maddi ko ka ko é hwè na ndirigoti kodhó lo ka ndi bbi bblo pli njati ko nji kpakpanga Munga dzá lo é ko thí nǎ ró.​—Zb. 1:1-3.

16. Ni ká ka ni nji addu ndiro ni ba faida bbo nidhó Biblia zødha nǎ ro d’e? (Anja i lo nǎ ɨ djǒ ripo ná kisanduku “Yesu pongʉe ná lo ka ndi kó ni tsotso ni famu ni zø ná lo.”)

¹⁶ Yesu dhó lo ma, kedhó loroji ma na ró ro akothɨ Biblia ko zø ná chu thika. Ko ka ko famu Biblia bblo pli njati ko di sala nji, ko di ri zø dzodzo, ko di ngadhu ko tso ndirigoti ko di bbo nǎ mana kʉ ná lo ndindi ró. Ko ka ko njínji lo utsod’idha na njati ko di Biblia ró dyʉ ndi ná vichapo nǎ ro ko zø ná lo nanga ne li ko li ko dyu ro ró. Ko ka ko chu Biblia na njínjidha bblo pli, nzá ko churie bblo ná andiko ma krʉ njati ko di kiroho nǎ mali ne nga bbo churieni ná lo dhé ri ró. Ndirigoti ko ka ko bbari Mungu dzá lo lé ko thika njati ko é bblo kʉ ná nganjadha na ko zø ná lo djo ró. Njati ko di kpakpanga nji ko njínji fø lo na ró, ko si faida ba kodhó Biblia zødha nǎ ro ndirigoti ko kana nga si ngʉ chøchø bbo Yova na.​—Zb. 119:17, 18; Yak. 4:8.