Nsheenga Mwaciita Kwaamba ayi Muyumye Bushicibusa Bwanu a Yehova Alimwi

MWAAKA amwaaka, bamakwesu abenankashi baanji balabooshekwa mulibungano lya Bwineklistu. Amuyeeyebo lusangalalo ndobabaalo kwiculu na muntu wabooshekwa! (Luka 15:7, 10) Na mwakabooshekwa, inga mwashoma cakutatoonsha kwaamba ayi Yesu, baanjelo alimwi a Yehova mwiine, balisangalete abuumbi kwaamba ayi mwaba lubasu lwalibungano alimwi. Nacibi boobo, ndyemutoyumya bushicibusa bwanu a Yehova alimwi, inga mweenda mumapensho. Ino ngamapensho nshi amwi ngeenga mweendaamo alimwi ino nshiinshi sheenga shamucafwa?

INO NGAMAPENSHO NSHI NGEENGA MWEENDAAMO?

Bamakwesu abenankashi baanji balatolelela kulinyumfwa cibiibi nabi pesule lyakubooshekwa mulibungano. Mpashi mulanyumfwisha Mwaami Defedi mbwaakalinyumfwa. Nabibo pesule lyakwaamba ayi walekelelwa shibiibi nshaakacita, wakaamba ayi: “Shibiibi shangu shafulisha abuumbi.” (Kulu. 40:12; 65:3) Muntu na wabooshekwa mulibungano inga watolelela kulinyumfwa anga taana kulekelelwa. Ba Isabelle bakalinga kunsengwe kwamyaaka 20.a Bakaamba ayi: “Cakalinga ciyumu abuumbi kushoma ayi Yehova wandekelela.” Na mwalefuka inga mwaboolela pesule lwakumushimu. (Tus. 24:10) Amweeleshe kutanoolinyumfwa boobo.

Bamwi balalisukama kwaamba ayi inga tabacikonshi kucita shoonse shiyandika kwaamba ayi babe abushicibusa buyumu a Yehova alimwi. Pesule lyakwaamba ayi ba Antoine babooshekwa, bakaamba ayi, “Ndakalinga ndaluba shintu shoonse nshendakeeya alimwi anshendakalinga kucita kaancili Kamboni.” Ceebo cakwaamba ayi bamwi balalinyumfwa boobo, tabaciti shoonse nsheenga bacikonsha kwaamba ayi basebensele Yehova.

Kucakubonenaako, na muntu wanyonyookelwa ŋanda kumfula yacipuupu, inga walisukama abuumbi na wayeeya paciindi alimwi anciito kukomena njaaelete kusebensa kwaamba ayi ayake ŋanda iyo alimwi. Mbocibete akulindimwe na bushicibusa bwanu a Yehova bwakalinga bwanyonyooka ceebo cakwaamba ayi mwakacita cilubo cinene. Inga mwalinyumfwa ayi mulaakuyandika kusebensa cankusu abuumbi kwaamba ayi mubooshe bushicibusa bwanu a Yehova. Nacibi boobo, kuli sheenga shamucafwa.

Yehova alatulwiita ayi: “Kamwisa ono twikale panshi.” (Isa. 1:18) Mwacita kale shiinji kwaamba ayi muyumye bushicibusa bwanu a Yehova. Yehova alimusuni ceebo cakucita boobo. Amuyeeye paceeci: Mukwiinga mwakaboolela kuli Yehova, inga wasebensesha cakubonenaako canu kutondesha ayi Satana ngumubeshi!—Tus. 27:11.

Mukwiinga mwakasena pafwiifwi a Yehova, alakwe wakashomesha ayi alaakusena pafwiifwi andimwe. (Jemu. 4:8) Nacibi boobo, kuli shiinji nshomweelete kucita kuteshi kushibikwabo ayi mwakabooshekwa mulibungano. Mulyeelete kutolelela kumusuna abuumbi Ishiwanu alimwi Shicibusa wanu, Yehova. Ino inga mwacita buyani ubo?

AMUSALE SHAKUCITA NSHEENGA MWACIKONSHA KUKUMANISHA

Amusale shakucita nsheenga mwacikonsha kukumanisha. Mulyeelete muciibaluka njiisho shakutaanguna nshomwakeeya pali Yehova alimwi acishomesho cakwaamba ayi cishi cilaakuba Paladaiso. Sombi mulyeelete kuba abubaambo bubotu bwakucita shintu shakumushimu. Kucakubonenaako, kushimikila lyoonse, kucanika kumabungano lyoonse alimwi akucanika pomwi abamakwesu abenankashi. Amuyeeye pa shitokonkelaawo nsheenga mwasala kucita.

Kupaila kuli Yehova lyoonse. Ishiwanu alanyumfwishisha kwaamba ayi na mwatolelela kulinyumfwa ayi tamuna kulekelelwa pacilubo ncemwakacita, inga caba ciyumu kupaila kuli nguwe. (Loma. 8:26) Nacibi boobo, “munoopaila lyoonse” akunoolwiita Yehova mbomusunishishi kuba abushicibusa anguwe alimwi. (Loma. 12:12) Ba Andrej bakaamba ayi: “Ndakalinga kunyumfwa nsoni alimwi akulinyumfwa cibiibi abuumbi. Sombi lyoonse na ndapaila, ndakalinga kulinyumfwako kabotu. Ndakalinga kulinyumfwa kuba aluumuno.” Na tamucishiwo shakupaililaawo inga mwabona mipailo Defedi njaakapaila ndyaakaana njetucana mu Kulumbaisha 51 alimwi a 65.

Amwiiye Baibo lyoonse. Kucita boobo kulaakumucafwa kuyumya lushomo lwanu, alimwi akusuna Yehova abuumbi. (Kulu. 19:7-11) Ba Felipe bakaamba ayi: “Mukwiinga nshindakalinga kucite bubaambo bwakubelenga alimwi akwiiya Baibo lyoonse, ndakaboolela mwisule alimwi akukalasha Yehova. Nshindakalinga kusuniiwo kukalasha Yehova alimwi. Aboobo ndakashinisha kunooba aciiyo capalwaangu lyoonse.” Amwebo inga mwacikonsha kucita boobo. Na inga mwasuna lucafwo pamakani ngomweelete kwiiya ndyemutoocita ciiyo capalwaanu, inga mwalwiita shicibusa wanu ushimpite lwakumushimu kwaamba ayi amucaafwe.

Amuyumye bushicibusa bwanu abamakwesu abenankashi alimwi. Bamwi balalisukama ayi na babooshekwa mulibungano bamwi balaakunobabona munshila itabete kabotu. Ba Larissa bakaamba ayi: “Ndakalinga kunyumfwa nsoni abuumbi. Ndakalinyumfwa ayi ndakakalasha bamakwesu abenankashi. Ndakatolelela kulinyumfwa boobo kwaciindi cilaamfu.” Amushibe kwaamba ayi bamanene alimwi a bamwi bashimpite lwakumushimu, balisuni kumucafwa kuyumya bushicibusa bwanu a Yehova alimwi. (Amubone kabokosi kacite mutwi utokwaamba ayi “Ino Nshiinshi Bamanene Nsheenga Bacita?”) Balisangalete kwaamba ayi mwakabooshekwa, alimwi balisuni kwaamba ayi munooba alusangalalo!—Tus. 17:17.

Ino nshiinshi sheenga shamucafwa kuyumya bushicibusa bwanu abamakwesu abenankashi? Munoocanika kumabungano abamakwesu abenankashi lyoonse alimwi akuyaabo muncito yakushimikila. Ino kucita boobo kulaakumucafwa buyani? Ba Felix bakaamba ayi: “Bamulibungano bakalinga kulangila ciindi ndyeshi nkabooshekwe. Ndakalinga kulinyumfwa ayi balinsuni. Bakancafwa kulinyumfwa kuba lubasu lwa libungano, kulinyumfwa ayi ndakalekelelwa alimwi akulinyumfwa ayi inga ndatolelela kusebensela Yehova.”—Amubone kabokosi kacite mutwi utokwaamba ayi “Ino Nshiinshi Nsheenga Mwaciita?”

MUTABOOLELI PESULE!

Satana alaakutolelela kumuletela mapensho kwaamba ayi muboolele pesule ndyemutokweelesha kuyumya bushicibusa bwanu a Yehova. (Luka 4:13) Amube balibambite kuyumya bushicibusa bwanu a Yehova.

Yehova wakashomesha mbelele shakwe ayi: “Ndaakuyandoola shisowekete akuboosha shakaswa mulitanga. Ndaakwanga shilonda sha sheesho shakalicisa, akuyumya shilefukite.” (Ese. 34:16) Yehova wacafwa bantu baanji kuboosha bushicibusa bwabo anguwe. Amushome cakutatoonsha kwaamba ayi alisuni kumucafwa kutolelela kuyumya bushicibusa bwanu anguwe.

Ino Nshiinshi Bamanene Nsheenga Bacita?

Bamanene inga bacita shiinji kwaamba ayi bacafwe shikushimikila wakabooshekwa kuyumya bushicibusa bwakwe a Yehova. Amubone nsheenga bacita kwaamba ayi bacafwe baabo bakabooshekwa.

Amubayuminishe. Mutumwi Paulo wakalinga kucishi kwaamba ayi na muntu wabooshekwa mulibungano, inga ‘kaungumana abuumbi,’ ceebo ca cilubo ncaakacita. (2 Koli. 2:7) Liinji muntu inga kaalinyumfwa ayi taana kulekelelwa alimwi akulinyumfwa kulefuka. Paulo wakalwiita bamulibungano ayi: ‘Amumulekelele akumuyuminisha.’ Abo bakabooshekwa balyeelete kushiba ayi Yehova alimwi abashominyinaabo balibasuni abuumbi. Na bamanene kababalumba lyoonse alimwi akubacafwa, inga capa kwaamba ayi batalefuki.

Amupaile ambabo. “Mupailo wa muntu ululeme ulicite nkusu abuumbi.” (Jemu. 5:16) Ba Larissa mbotwalinga twaambawo bakaamba ayi: “Ndakalwiita bamanene shintu shakalinga kunsukamika anshendakalinga kubona ayi inga nshicikoonshi kucita. Bakapaila andime alimwi akumpaililaako. Lyalo ndakanyumfwisha kwaamba ayi bamanene tabakwe kukalala pashintu nshendakacita. Bakalinga kusuni kuncafwa kuboosha bushicibusa bwangu a Yehova.” Ba Theo bakaamba ayi: “Mipailo ya bamanene yakancafwa kushoma cakutatonsha kwaamba ayi Yehova alinsuni alimwi alabona shibotu muli ndime kuteshibo shibiibi.”

Amube bushicibusa ambabo. Abo bakabooshekwa balayandika kuba abeshicibusa mulibungano. Munene mulibungano waliina lya Justin wakaamba ayi: “Amucane ciindi cakuyaabo muncito yakushimikila alimwi amushinishe kunobafwakashila kumishaabo. Cilayandika abuumbi kuba shicibusa wabo!” Munene aumwi waliina lya Henry wakaamba ayi: “Na bamwi mulibungano babona bamanene baba bushicibusa abaabo bakabooshekwa, abalo balaakweelesha kucita boobo.”

Amubacaafwe kucita ciiyo capalwaabo. Shicibusa ushimpite lwakumushimu inga wacafwa muntu wakabooshekwa kuba amulongo ubotu wakwiiya. Munene waliina lya Darko wakaamba ayi: “Ndanyumfwa kabotu kubalwiitaako makani ayuminisha ngoncana ndyentoocita ciiyo capalwaangu alimwi akubatondesha mbonkusuni abuumbi kwiiya Baibo. Alimwi ndabika bubaambo bwakwiiya makani ayuminisha pomwi ambabo.” Munene aumwi waliina lya Clayton wakaamba ayi: “Ndabayuminisha kulangoola makani amu Baibo aamba pabantu bakeenda mubukaalo mbobatokwiindaamo alimwi akubona nsheenga beeyako.”

Amube mweembeshi uli kabotu. Abo bakabooshekwa bakalinga kubona bamanene mbuli boomboloshi. Ano pesule lyakubooshekwa, balyeelete kunobona bamanene bunene bunene mbuli beembeshi. (Jele. 23:4) Amube bafwambaana kubakutika alimwi akubalumba. Munobandikaabo liinji. Amunyumfwe nshaacita munene waliina lya Marcus na waya mukufwakasha kwabweembeshi: “Tulabalwiitako maswi amu Baibo, kubalumba, alimwi akubalwiita ayi Yehova andiswe tulikondetwe kubona mbobasebensa cankusu kwaamba ayi babooshekwe. Pakumana kwamubandi, tulabamba bushiku ndyetweelete kuboolelaako.”

a Meena amwi aambwa mumutwi uyu akaalulwa.