Amusenge Lucafwo Kubamanene

1. Ino Yehova alatondesha buyani ayi alibasuni basebenshi bakwe?

YEHOVA alibasuni basebenshi bakwe boonse alimwi alabalama kabotu bweenka mweembeshi uli kabotu mbwaalama mbelele shakwe. Wakaaba mwanaakwe kwaamba ayi abafwiite akusala bamanene kwaamba ayi banoobalama. (Milimo 20:28) Lesa alisuni kwaamba ayi mbelele shakwe shinoolamwa kabotu. Kwiinda mukukonkela butanjilishi bwakwe Yesu, bamanene balacafwa mbelele kwaamba ayi shitolelele kuba abushicibusa buyumu a Yehova.—Isa. 32:​1, 2.

2. Kweelana a Esekelo 34:​15, 16, ino mbaani Yehova mbwaacafwa?

² Yehova alashibikilaako maano maningi mbelele shakwe alimwi alisunishi kushicafwa na shitopenga. Alasebensesha bamanene kucafwa baabo batopenga ceebo ca shilubo nshobakacita. (Amubelenge Esekelo 34:​15, 16.) Alilibambite kunootucafwa soonse na tutoyandika lucafwo lwakwe. Alisuni ayi tunopaila kuli nguwe akusenga lucafwo ‘kubeembeshi abashikwiisha’ mulibungano.—Efe. 4:​11, 12.

3. Ino mutwi uyu utootucafwa buyani nabi kwaamba ayi pacecino ciindi tulicite bushicibusa buyumu a Yehova?

³ Mumutwi uyu, tutokwiiya Yehova mbwasebensesha bamanene kwaamba ayi acafwe baabo balefukite lwakumushimu. Tutocana shikumbulo kumiipusho iyi itokonkelaawo: Ino ndilili ndyeenga twasenga lucafwo kubamanene? Ino nceebonshi ncotweelete kucitila boobo? Alimwi ino balatucafwa buyani? Mpashi pacecino ciindi tulicite bushicibusa buyumu a Yehova, aboobo tatutoyandika lucafwo kuswa kubamanene. Nacibi boobo, mutwi uyu utootucafwa kunoolumba Yehova mbwasebensesha bamanene kwaamba ayi batucaafwe akushiba nsheenga twaciita na tutoyandika lucafwo kuswa kuli mbabo.

INO NDILILI NDYEENGA TWASENGA LUCAFWO KUBAMANENE?

4. Ino nceebonshi nceenga twaambila ayi Jemusi 5:​14-16, 19, 20 ilaamba pamuntu mulwashi lwakumushimu? (Amubone ashikope.)

⁴ Jemusi wakaamba Yehova mbwasebensesha bamanene kwaamba ayi batucaafwe ndyaakaamba ayi: ‘Na umwi waciswa pakati kanu, aaite bamanene mulibungano.’ (Amubelenge Jemusi 5:​14-16, 19, 20.) Jemusi wakalinga kwaamba pa muntu mulwashi lwakumushimu. Inga twaamba boobo mukwiinga Jemusi wakalwiita mulwashi kwiita bamanene mulibungano kwaamba ayi bamucaafwe, kuteshi kuya mukubonana a dokota. Alimwi Jemusi wakaamba ayi mulwashi alaba kabotu na walekelelwa shibiibi shakwe. Kwaamba ayi muntu mulwashi abe kabotu, alyeelete kuya mukubonana a dokota akumulwiita citoocisa lyalo akukonkela nsheenga bamulwiita kuli dokota. Aswebo na twaciswa lwakumushimu, tulyeelete kubandika abamanene akubalwiita lipenshi ndyetucite lyalo akukonkela nsheenga batulwiita kuswa mu Baibo.

5. Ino nshiinshi sheenga shatucafwa kushiba na bushicibusa bwesu a Yehova butooya cinyonyooka?

⁵ Jemusi capita 5 ilatuyuminisha kubandika abamanene na tutoyandika lucafwo kwaamba ayi tuyumye bushicibusa bwesu a Yehova. Sombi inga cabota abuumbi kusenga lucafwo kuli mbabo bushicibusa bwesu a Yehova kabutana kunyonyooka! Na twabula kucenjela inga katuyeeya ayi tulicite bushicibusa buyumu a Yehova kakuli bwakanyonyooka. (Jemu. 1:22) Ici ncocakacitikila Beneklistu bamwi baku Sadisi. Sombi Yesu wakabalwiita ayi nshobakalinga kucita tashakalinga kusangalasha Yehova. (Ciyu. 3:​1, 2) Ino inga twacita buyani kwaamba ayi tushibe na tulicite bushicibusa buli kabotu a Yehova? Nshila yomwi mbweenga twacita boobo nkwiinda mukweelanya mbotwakalinga kumusuni Yehova ndyetwakabombekwabo ambotumusuni pacecino ciindi. (Ciyu. 2:​4, 5) Inga twaliipusha ayi: ‘Sa ndakacileka kusangalala kubelenga Baibo akukutumana kuyeeyawo mbuli mbondakalinga kucita kale kale? Sa cimwi ciindi ndalofwa kumabungano? Alimwi na ndacikonsha kucanikaako, sa ndaba kantalibambitewo? Sa ndakacileka kusebensa cankusu muncito yakushimikila? Sa ndabikila bunene maano kukucita shintu shimwi na kukulangoola maali mubupusano ambocakalinga kale kale?’ Na twakumbula ayi ee kumwiipusho uli woonse pamiipusho iyi, nkokwaamba ayi bushicibusa bwesu a Yehova butooya cinyonyooka alimwi na twabula kucitaawo comwi inga bwanyonyookelabo limwi. Na tutokwaalilwa kuyumya bushicibusa bwesu a Yehova sobeene palweesu, na mpashi twakacita kale cintu Yehova ncaatasuni, tulyeelete kusenga lucafwo kubamanene.

6. Ino nciinshi ncotweelete kucita na twaciita cilubo cinene?

⁶ Shilubo shimwi shilaba shinene cakwaamba ayi muntu inga wakushikwa mulibungano na taana kwaana. Na twaciita cilubo camushobo uyo, tulyeelete kubandika abamanene. (1 Koli. 5:​11-13) Na muntu wacita cilubo cinene, inga tacikonshi kuboosha bushicibusa bwakwe a Yehova palwaakwe mwiine. Kwaamba ayi Yehova atulekelele kwiinda mucilubula, tulyeelete kucita shintu shitondesha ayi twaana cancinencine. (Milimo 26:20) Alimwi nshila yomwi mbotutondesha ayi twaana cancinencine, nkulwiita bamanene na twaciita cilubo cinene.

7. Ino mbaani bamwi beenga basenga lucafwo kubamanene?

⁷ Bamanene tabacafwibo baabo beenga bacita cilubo cinene, sombi balacafwa abaabo balefukite lwakumushimu. (Milimo 20:35) Kucakubonenaako, mpashi inga mwatalika kulinyumfwa ayi inga tamucikonshi kukoma lunkumbwa lutabete kabotu. Inga camubeta ciyumu kukoma lunkumbwa lutabete kabotu bunene bunene na mwakalinga kusebensesha misamu ikola, kweebela shintu shileta miyeeyo yakoonana nabi kucita bufule kamutana kuba Mwineklistu. Tamweelete kuloonda kusenga lucafwo. Inga mwabandika amunene ngomwanguluka kubandikaakwe akushoma ayi atoomukutika, kumulwiita nsheenga mwaciita kwaamba ayi mutolelele kukoma lunkumbwa ulo akumwiibalusha ayi Yehova alaakusangalala maningi na mwatolelela kumunyumfwila. (Shiku. 4:12) Mpashi mulilefukite ceebo cakutolelela kuba alunkumbwa lutabete kabotu. Na ubo mbocibete, munene alaakumwiibalusha ayi Yehova alisangalete ceebo cakwaamba ayi mwasenga lucafwo. Kucita boobo kulaakutondesha ayi mulaliceesha alimwi ayi mulisuni kusangalasha Yehova.—1 Koli. 10:12.

8. Sa tulyeelete kulwiita bamanene cilubo cili coonse nceenga twaciita? Amusansulule.

⁸ Teshi lyoonse ndyeenga twayandika kulwiita bamanene cilubo cili coonse nceenga twaciita. Kucakubonenaako, mpashi inga mwaamba maswi atabete kabotu kumukwesu nabi nankashi, na mpashi inga wamukalasha maningi. Na camushobo uyo cacitika, muciindi cakuya mukubandika amunene umwi, inga mwakonkela Yesu nshakaamba kwiinda mukubandika amukwesu na nankashi uyo akusenga kulekelelwa. (Mate. 5:​23, 24) Inga mwabelenga mabuku esu kwaamba ayi mwiiye bwakutondesha bunene mubo wakulibombya, kukalika moyo, alimwi akulikasha. Na kamuciyandika lucafwo inga mwasalawo kusenga lucafwo kumunene umwi. Munkalata mutumwi Paulo njaakalembela bene Filipi, wakasenga mukwesu umwi utashibikitwe liina kwaamba ayi acafwe Yuwodia a Sintiki kutalika kunyumfwana. Amwebo munene umwi mulibungano lyanu inga wamucafwa.—Filip. 4:​2, 3.

INO NCEEBONSHI TULYEELETE KUSENGA LUCAFWO KUBAMANENE?

9. Ino nceebonshi tulyeelete kusenga lucafwo kubamanene nabi kwaamba ayi inga katunyumfwa nsoni kubalwiita cilubo ncotwakacita? (Tushimpi 28:13)

⁹ Tulayandika lushomo akutaloonda kwaamba ayi tusenge lucafwo na twacita cilubo cinene, nabi na tutolinyumfwa ayi inga tatucikonshi kukoma lunkumbwa lutabete kabotu. Tatweelete kunyumfwa nsoni kusenga lucafwo kubamanene. Ino nceebonshi? Nceebo cakwaamba ayi Yehova wakatupa bamanene kwaamba ayi banootucafwa kutolelele kuba abushicibusa buyumu anguwe. Aboobo na twabandika ambabo tulatondesha ayi tulashoma Yehova alimwi tulamunyumfwila. Tulebaluka ayi tulayandika lucafwo lwakwe kwaamba ayi tutolelele kucita shiluleme. (Kulu. 94:18) Alimwi na twaciita cilubo, inga twashoma cakutatonsha ayi Yehova alaakutulekelela na twalwiita bamanene cilubo ncotwakacita akutabooshawo kucicita.—Amubelenge Tushimpi 28:13.

10. Ino nciinshi ceenga cacitika na twaalilwa kulwiita bamanene cilubo ncotwakacita?

¹⁰ Na twalwiita bamanene shilubo nshotwakacita, Yehova inga watulekelela alimwi inga twaba abushicibusa bubotu anguwe. Sombi na twaalilwa kubalwiita, shintu inga shabicilaako. Mwaami Defedi ndyakeelesha kusisa shilubo nshaakacita, wakalefuka akulinyumfwa cibiibi mukwiinga wakashiba ayi Yehova taakondetwe pali nguwe. (Kulu. 32:​3-5) Na twaciswa nabi kulicisa, kucelwa kuya kucipatela nabi kushilikwa inga kwapa kwaamba ayi bulwashi bukomeneneeko na cilonda cicelwe koola. Aswebo na twaciita cilubo cinene lyalo twaceelwa kusenga lucafwo kubamanene, bushicibusa bwesu a Yehova inga kabuya cinyonyookabo kushikila bwamana. Yehova taasuniiwo camushobo uyu kucitika. Aboobo alisuni ayi tunoobandika abamanene kwaamba ayi batucaafwe kuba abushicibusa anguwe alimwi.—Isa. 1:​5, 6, 18.

11. Ino nshiinshi sheenga shacitika na twasiisa cilubo cinene ncotwakacita?

¹¹ Na twasiisa cilubo cinene ncotwakacita, bamwi inga bapengelaamo. Inga twapa kwaamba ayi Yehova acileeke kutupa mushimu usalashi mulibungano akupilinganya luumuno pakati ka bamakwesu abenankashi. (Efe. 4:30) Alimwi na twashiiba ayi umwi mulibungano wacita cilubo cinene, tulyeelete kumuyuminisha kulwiita bamanene cilubo ncaacita. Na waalilwa kubalwiita, swebo tulyeelete kubalwiita. Na twabula kucita boobo, aswebo inga twabishila Yehova. (Lefi. 5:1) Ceebo cakwaamba ayi Yehova tulimusuni, tulaakulwiita bamanene na umwi wacita cilubo cinene. Na twacita boobo, tulashitilisha bamakwesu abenankashi mulibungano akucafwa wooyo wakacita cilubo kuboosha bushicibusa bwakwe a Yehova.

BAMANENE MBOBATUCAFWA

12. Ino bamanene balacita buyani kwaamba ayi bacafwe baabo balefukite lwakumushimu?

¹² Baibo ilayuminisha bamanene kucafwa baabo balefukite lwakumushimu. (1 Tesa. 5:14) Na mwaciita cilubo, bamanene inga bamwiipusha miipusho kwaamba ayi bashibe kabotu mbomutoyeeya ambomutolinyumfwa. (Tus. 20:5) Inga tacimubeti cuubu kubandika abamanene mpashi ceebo ca kunyumfwa nsoni kubalwiita shakacitika. Sombi inga bamucafwa kabotu na mwanguluka kubalwiita lipenshi ndyemucite. Alimwi tamweelete kulisukama ayi inga mwaamba maswi atabete kabotu. (Jobo 6:3) Bamanene teshi bakafwambaane kumululika kabatana kumukutika. Sombi balaakumukutika cakubikila maano kwaamba ayi bashibe kabotu makani mbwaabete kabatana kumucafwa kusebensesha Baibo. (Tus. 18:13) Bamanene balicishi ayi paleenda ciindi kwaamba ayi muntu bamupe lucafwo ndwatoyandika. Aboobo cimwi ciindi inga basalawo kubandika andimwe kuteshibo linkanda lyomwi, kwaamba ayi bamucaafwe.

13. Ino mipailo ya bamanene ansheenga batulwiita kuswa mu Baibo inga shatucafwa buyani? (Amubone ashikope.)

¹³ Bamanene tabasuniiwo kwaamba ayi mwiindeewo kulinyumfwa cibiibi pacilubo ncomwakacita. Muciindi cakucita boobo, balaakupaila andimwe alimwi Yehova alaakukumbula mipailo yabo iyo yeshi ikabe ‘ankusu abuumbi.’ Lyalo mulaakuyuminishikwa kwiinda ambomwalinga kulangila. Balaakwiilikaawo ‘akumunanika mafuta muliina lyakwe Yehova.’ (Jemu. 5:​14-16) “Mafuta” ambwaambwa palilembo ili aleemikaninaako cancine camu Maswi akwe Lesa. Aboobo bamanene balaakubandika andimwe malembo eenga amuyuminisha akumucafwa kuboosha bushicibusa bwanu a Yehova. (Isa. 57:18) Nsheenga bamulwiita kuswa mu Baibo inga shamucafwa kutolelela kucita shiluleme. Alimwi inga bamucafwa kunyumfwa liswi lyakwe Yehova kalyaamba ayi: ‘Nshila njeeyi. Amweende muli njiyo.’—Isa. 30:21.

14. Kweelana a Bene Galatiya 6:​1, ino bamanene balacita buyani kwaamba ayi bacafwe muntu “wakacita cibiibi cimwi”? (Amubone ashikope.)

¹⁴ Amubelenge Bene Galatiya 6:1. Na Mwineklistu “wacita cibiibi cimwi,” ingayi taatocita Yehova nshaasuni. Mpashi taakwe kusala kabotu shakucita na mpashi wakacita cilubo cinene. Ceebo cakwaamba ayi bamanene balimusuni mukwesu na nankashi uyo, balyeelete kumululamika cakulibombya. Liswi lyamu ciGiliki lyakasansululwa ayi “kumululamika,” lyakalinga kusebenseshekwa kusansulula dokota mbwaboosha cifuwa mpocalinga na catyoka kwaamba ayi muntu oole. Dokota ndyaatocita boobo, alacita kabotu kabotu kwaamba ayi muntu watyoka ateendiiwo kunyumfwa kucisa. Abalo bamanene ndyebatokweelesha kucafwa muntu wakacita cibiibi cimwi, tabasuni kwaamba ayi eendewo kulinyumfwa cibiibi. Muciindi cakucita boobo, baleelesha cankusu kumululika munshila yalusuno. Alimwi Baibo ilalwiita bamanene ayi “amwebo amucenjele.” Bamanene ndyebatokweelesha kucafwa muntu kukonkela Baibo nshoyaamba, lyoonse baleebaluka ayi abalo balacita shilubo. Aboobo balacenjela abuumbi kwaamba ayi batanoyeeya ayi balo baliluleme kwiinda muntu ngobatocafwa. Muciindi cakucita boobo, balatondesha kuliceesha akumutondesha nkuumbu muntu uyo.—1 Pit. 3:8.

15. Ino nciinshi nceenga twaciita na kuli lipenshi ndyetucite?

¹⁵ Bamakwesu basebensa mbuli bamanene mulibungano inga twabashoma. Bakeeya kutalwiitako bamwi makani abushishi ngeenga twabalwiita, kutucafwa kweelana a Baibo nshoyaamba kuteshi mbobatoyeeya akutucafwa kutolelela kuliyumya mumapensho ngotwiindaamo. (Tus. 11:13; Gala. 6:2) Bamanene balicite mibo alushibo lupusenepusene. Sombi inga twabandika amunene uli woonse na kuli lipenshi ndyetucite. Cilayandika kunokwiibaluka ayi tatweelete kusenga lucafwo kubamanene bapusenepusene aluyaando lwakwaamba ayi tucane munene weshi asuminisheko nshotusuni kucita. Na twacita boobo inga twaba anga mbantu basuni kulwiitikwa “nshebasuni kunyumfwa” muciindi cakunyumfwa Yehova nshatobalwiita mu Maswi akwe. (2 Timo. 4:3) Na twaya kumunene umwi kwaamba ayi tumulwiite lipenshi ndyetucite, inga watwiipusha na kuli bamanene bamwi mbotwakabandikaabo kale palipenshi ilyo alucafwo ndobakatupa. Alimwi alaakutondesha kuliceesha kwiinda mukutaanguna kwiipushako munene umwi palucafwo ndweenga twayandika.—Tus. 13:10.

WOMWI AWOMWI ALYEELETE KULISALILA SHAKUCITA

16. Ino ngumukuli nshi soonse ngotucite?

¹⁶ Bamanene balatupandako maano akutucafwa na tutokwiinda mumapensho. Sombi teshi bakatusalileko shakucita. Womwi awomwi alicite mukuli wakusalawo kunoocita shintu Lesa nshaasuni. Soonse Lesa alaakutoombolosha pashintu nshotwaamba anshotucita. Nacibi boobo, kwiinda mulucafwo lwakwe, inga twacikoonsha kunoosala kabotu shakucita akutolelela kushomeka kuli nguwe. (Loma. 14:12) Ncoceeco bamanene teshi bakatusalileko shakucita. Sombi balaakusebensesha Baibo kutucafwa kunyumfwishisha Yehova mbwayeeya pamakani ayo akutuleka ayi tulisalile shakucita sobeene. Na twakonkela nsheenga batulwiita kuswa mu Baibo, tulaakwiiya kunoyeeya mbuli Yehova mbwayeeya akunoosala kabotu shakucita.—Ebu. 5:14.

17. Ino Yehova alisuni ayi tunoocita nshi na twaciswa lwakumushimu nabi kulefuka?

¹⁷ Tulalumba abuumbi ceebo cakwaamba ayi Yehova alatulama kabotu bweenka mweembeshi mubotu mbwaalama kabotu mbelele shakwe! Yehova wakatuma Yesu “mweembeshi mubotu” kusa pacishi mukwaaba buumi bwakwe mbuli cilubula kwaamba ayi tube acoolwe cakuba abuumi butamaani. (Joni 10:11) Alimwi Yehova wakatupa bamanene mumabungano abo batubikilako maano bweenka mbwaakashomesha ayi: ‘Ndaakumupa beembeshi bapa moyo abo beshi bakamucaafwe kuba alushibo amaano akunyumfwisha shintu.’ (Jele. 3:15) Na twaciswa lwakumushimu nabi kulefuka, tatweelete kuwayawaya kusenga lucafwo kubamanene. Lyalo tulaakubona Yehova mbwaabasebensesha kwaamba ayi batucaafwe.