CIIYO 6
Sa Bafu Tulaakubabonawo Alimwi?
1. Ino makani abotu nshiinshi nshoaamba pa bafu?
Yesu ndyakashika ku Betani mushi wakalinga pafwafwi a Jelusalemu, wakacana ayi peenda kale nshiku shone Lasalo mubye ndyaakafwa. Yesu wakaya ku cuumbwe pantu pomwi a Malita a Maliya benaankashi shakwe Lasalo. Muciindi, bantu bakabungana. Amuciyeeye Malita a Maliya mbobakasangalala Yesu ndyakabusha Lasalo.—Amubelenge Joni 11:21-24, 38-44.
Malita wakalinga kushi kale makani abotu nshoaamba pa bafu. Wakalinga kushi ayi Yehova ulaakubusha bafu kwaamba ayi bakakale pa cishi alimwi.—Amubelenge Jobo 14:14, 15.
2. Ino nciinshi cicitika ku muntu na wafwa?
Lesa wakaambila Adamu ayi: “Wakalengwa kuswa kubulongo alimwi ulaakuboolela kubulongo.”—MATALIKILO 3:19.
Bantu bakalengwa kuswa ku bulongo. (Matalikilo 2:7; 3:19) Taaku mishimu ikala mu mibili yesu. Twakalengwabo a mibili, aboobo taaku cipuluka na muntu wafwa. Na muntu wafwa, boongo abwalo bulafwa, miyeeyo ayalo ilaloba. Paceebo ceeco, Lasalo taakwe kwaamba ayi kwakalinga shakacitika ndyaakafwa mukwiinga bafwite taaku ncebeshi.—Amubelenge Kulumbaisha 146:4; Shikushimikila 9:5, 6, 10.
Sa Lesa ulapensha bantu mu mulilo na bafwa? Mukwiinga Baibo ileisha ayi bafwite taaku ncebeshi, ciiyo ca bubeshi cakwaamba ayi Lesa ulapensha bantu mu mulilo cilalengesha bantu kubekesha Lesa ayi mbwaacita. Ciiyo ca kupensha bantu mu mulilo tacimo mu miyeeyo yakwe Lesa, cilamulensha bunya.—Amubelenge Jelemiya 7:31.
3. Sa bafu inga baamba aboomi?
Bafu tabaambi nabi kunyumfwa. (Kulumbaisha 115:17) Bamwi bangelo mbabiibi, cimwi ciindi balaamba abantu akunyumfwika anga ndiswi lya mufu. (2 Pita 2:4) Yehova ulatukasha kwaamba abafu.—Amubelenge Dutolonomi 18:10, 11.
4. Ino mbaani beshi bakabushikwe?
Bantu baanji bafwite balaakubushikwa akukala pa cishi. Bamwi bakalinga kucita shibiibi mukwiinga tabakalinga kushi Lesa abalo balaakubushikwa.—Amubelenge Milimo ya Batumwi 24:15.
Beshi bakabushikwe balaakwiiya sha lushinisho shakwe Lesa a kushoma muli Yesu kwiinda mu kumunyumfwila. (Ciyubululo 20:11-13) Beshi bakanoocita shibotu na bakabushikwe balaakukala muyayaya pa cishi.—Amubelenge Joni 5:28, 29.
5. Ino kubushikwa kulatwiisha nshi pali Yehova?
Lesa wakatupa bulindilili ndyaakatuma Mwanaakwe kwisa mukufwa ceebo ca ndiswe. Aboobo kubushikwa kulatwiisha ayi Yehova ulicite lusuno a luse luunji. Bafu na bakabushikwe, mbaani mbomutoyandisha kubona?—Amubelenge Joni 3:16; Bene Loma 6:23.