Ino Nshiinshi Sheenga Shatucafwa Kuba Amukwashi Usangalete?

BAIBO ILAAMBA AYI

“Bacite coolwe cinene mbaabo banyumfwa maswi akwe Lesa akucita mbwaamba!”​—Luka 11:28, The Bible in Lenje.

MBWEENGA KWIIYA MAKANI AYA KWAMUCAFWA

Inga mwaba alusuno lwancinencine.​—Bene Efeso 5:28, 29.

Inga mwaba abulemu.​—Bene Efeso 5:33.

Inga mwaba aluumuno lwancinencine.​—Maako 10:6-9.

SA INGA TWASHOMA BAIBO NSHOYAAMBA?

Ee, ceebo ca sheebo ishi shobilo:

• Lesa ngowakatalika mukwashi. Baibo ilaamba ayi kuli Yehova Lesa, ‘mukwashi woonse . . . nkookusha liina.’ (Bene Efeso 3:14, 15) Inga twaamba ayi Yehova ngowakatalika mukwashi. Ino nceebonshi kushiba ayi Lesa ngowakatalika mukwashi inga kwamucafwa?

  Amuyeeye paceeci: Na mwalya shakulya nshobateleka kabotu ano mulisuni kushiba mbobashiteleka, ino inga mweepusha baani? Ncakutatoonsha inga mweepusha wateleka.

  Ubu mbocibete akumukwashi, na mulisuni kushiba mbweenga mwaba amukwashi usangalete mulyeelete kucita Yehova nshaamba, uyo wakatalika mukwashi.​—Matalikilo 2:18-24.

• Lesa alamubikila maano. Bamu mukwashi balyeelete kukonkela Yehova nshaamba mu Maswi akwe Baibo. Ino nceebonshi? “Ceebo ngoomulama.” (1 Pita 5:6, 7) Yehova alisuni ayi shintu shinomweendela kabotu alimwi lyoonse milawo yakwe ilacafwa!​—Tushimpi 3:5, 6; Isaya 48:17, 18.