Joni Wakabamba Nshila

Baishi Joni bakalinga ngu Sekaliya lyalo banyina bakalinga ngu Lisabeti. Joni ndyaakakula, wakaba mushinshimi. Yehova wakasebensesha Joni kwiisha bantu ayi Mesiya alaakusa. Nacibi boobo, muciindi cakwiishila bantu muma sunagogi nabi mu tauni, Joni wakalinga kushimikila bantu muluundu. Bantu bakalinga kusa kuswa mu Jelusalemu amu Judeya moonse, kwaamba ayi Joni abeeishe. Wakalinga kubeeisha ayi, kwaamba ayi basangalashe Lesa, bakalinga kweelete kucileka kucita shintu shibiibi. Pesule lya kunyumfwa Joni nshaakalinga kubeeisha, baanji bakalinga kwaana akusanduka kuswa kushibiibi shabo, lyalo Joni wakalinga kubabombeka mu Mulonga wa Joodani.

Joni wakalinga kukala buumi bwakutalila shintu shiinji. Joni wakalinga kufwala shakufwala shakapangwa abooya bwa ngamela alimwi wakalinga kulyabo nsoshi abuuci. Bantu bakalinga kusuni kushiba shiinji pali Joni. Nabibo bantu balisumpula mbuli Bafalisi abaSaduki bakalinga kuya mukumubona. Joni wakabalwiita ayi: ‘Mulyeelete kucileka kucita shintu shibiibi akwaana. Mutanoyeeya ayi mulayandika abuumbi ceebo cakwaamba ayi mulaamba ayi muli bana bakwe Abulaamu. Ici tacaambi ayi muli bana bakwe Lesa.’

Baanji bakalinga kusa kuli Joni akumwiipusha ayi: ‘Ino nshiinshi nsheenga twaciita kwaamba ayi tusangalashe Lesa?’ Joni wakalwiita baJuda ayi: ‘Na mulicite shakufwala shobilo amupeewo comwi utacite.’ Sa ulicishi ncakaambila boobo? Wakalinga kusuni ayi bashikwiiya bakwe bashibe ayi kwaamba ayi basangalashe Lesa, balyeelete kusuna bantu.

Joni wakalwiita beshikusonkesha maali ayi: ‘Munooshomeka alimwi mutanokwiipila bantu.’ Wakalwiita masoja ayi: ‘Mutanoolipilisha bantu kwaamba ayi mubacitileeko cintu cimwi nabi kubeca.’

Bapailishi abene Lefi abalo bakaya kuli Joni akumwiipusha ayi: ‘Ino ndiwe aani? Bantu boonse balisuni kushiba.’ Joni wakaamba ayi: ‘Ndime muntu umwi utokoolobesha muluundu, utootanjilila bantu kuli Yehova, kweelana abwakaamba mushinshimi Isaya.’

Bantu bakalinga kunyumfwa kabotu ashintu Joni nshaakalinga kubeeisha. Baanji bakalinga kusuni kushiba na Joni ngowakalinga Mesiya. Sombi wakabaambila ayi: ‘Muntu umwi atoosa, aleendaawo nkusu pali ndime. Nsheeleli akwaangulula nsapato shakwe. Nebo ndabombekabo amaanshi sombi lakwe alaakunoobembeka amushimu usalashi.’