Yesu Waba Mesiya

Joni wakalinga kushimikila bantu ayi: ‘Muntu umwi wiinditewo pali ndime atoosa.’ Yesu ndyaakalinga pafwiifwi akukwanisha myaaka 30, wakaswa ku Galili akuya ku Mulonga wa Joodani uko Joni nkwaakalinga kubombeka bantu. Yesu wakalinga kusuni ayi Joni amubombeke, sombi Joni wakaamba ayi: ‘Nebo nsheelete kumubombeka. Mwebo ndimwe mweelete kubombeka ndime.’ Yesu wakaambila Joni ayi: ‘Yehova alisuni ayi webo umbombeke.’ Aboobo bakaya mu Mulonga wa Joodani, lyalo Joni wakabombeka Yesu kwiinda mukumupisha mubili woonse mumaanshi.

Yesu ndyaakaswa mumaanshi, wakapaila. Peenkaapo, liculu lyakacaluka alimwi mushimu usalashi wakesa pali nguwe anga ni nkulimba. Lyalo Yehova wakaamba kuswa kwiculu ayi: “Uyu ngoMwanaangu ngoonsuni. Pali nguwe ndikondetwe abuumbi.”

Mushimu wakwe Yehova ndyewakesa pali Yesu, Yesu wakaba Klistu na Mesiya. Aboobo wakalinga kweelete kutalika kusebensa ncito Yehova njaakamutuma kusa mukusebensa pacishi.

Yesu ndyaakamanabo kubombekwa, wakaya muluyanga na muluundu alimwi wakekalaamo kwanshiku 40. Ndyaakabolela, wakaya mukubona Joni. Yesu ndyaakalinga kuya nkwaakalinga, Joni wakaamba ayi: ‘Amubone Mwanaambelele wakwe Lesa uyo weshi akakushe shibiibi sha bantu ba mucishi coonse ca panshi!’ Joni ndyaakaamba boobo, wakapa kwaamba ayi bantu bashibe ayi Yesu ngo Mesiya. Sa ulicishi shakacitikila Yesu ndyaakalinga muluyanga? Leka tubone.