Mwanakashi Wakalinga Kumukalo

Pesule lyakusekelela Bushiku Bwakwiibaluka Kusotokela, Yesu abashikwiiya bakwe bakeenda mu Samaliya ndyebakalinga kuboolela ku Galili. Ndyebakalinga pafwiifwi atauni ya Saika,Yesu wakeemikana pamusena wiitwa ayi mukalo wakwe Jakobo. Ndyaakalinga kookesha pamukalo uyu, bashikwiiya bakwe bakaya mu tauni mukuula shakulya.

Mwanakashi umwi wakesa mukuteka maanshi pamukalo. Yesu wakamwaambila ayi: “Mpewo maanshi akunwa.” Mwanakashi uyo wakakumbula ayi: ‘Ino nceebonshi utobandika andime? Nebo ndimwanakashi mwine Samaliya. BaJuda abene Samaliya tabaamboshanyiiwo.’ Yesu wakamulwiita ayi: ‘Newalinga kuunshi nebo, nakwiinga wansenga maanshi alimwi inga ndakupa maanshi apa buumi.’ Mwanakashi uyo wakeepusha ayi: ‘Ino mutoosansulula nshi? Tamucite a cikopo cakutekesha maanshi.’ Yesu wakamulwiita ayi: ‘Uyo woonse unwa maanshi ngoompa teshi akafweewo nyotwa alimwi.’ Mwanakashi uyo wakaamba ayi: “Nkambo, amumpe maanshi ayo.”

Lyalo Yesu wakalwiita mwanakashi uyo ayi: “Koya ukeete ibayo, usaakwe kuno.” Lakwe wakakumbula ayi: “Nsheebetweewo.” Yesu wakamulwiita ayi: ‘Waamba calushinisho. Wakeebwaawo kale mankanda 5, alimwi pacecino ciindi ulekala amusankwa uteshi mwiibayo.’ Mwanakashi uyo wakaamba ayi: ‘Ndashiiba ano ayi muli mushinshimi. Bene misheesu balashoma ayi inga twalambila Lesa pakalundu aka, sombi baJuda balaamba ayi inga twalambilabo Lesa ku Jelusalemu kweenka. Ndashoma ayi na Mesiya akese, alaakutwiisha bwakulambila.’ Lyalo Yesu wakalwiita mwanakashi uyu cintu ncatana kulwiitawo kale muntu uli woonse ayi: ‘Ndime Mesiya.’

Mwanakashi uyo wakacicila kumishaabo akulwiita bene Samaliya ayi: ‘Ntobona ayi ndamucana Mesiya. Alicishi shoonse pali ndime. Katiya mukamuboone!’ Bakamukonkela kumukalo, akukutika Yesu nshaakalinga kubaiisha.

Bene Samaliya bakasenga Yesu ayi akaleeko kumishaabo. Wakaiisha kwa nshiku shobilo, alimwi bantu baanji bakamushoma. Bakalwiita mwanakashi mwine Samaliya ayi: ‘Pesule lyakukutika kumusankwa uyu, twashiba ayi ncakwiila ngomupulushi wabantu boonse.’