Mbweenga Twasebensesha—Mabuku Amaswi Akalekodwa
1. Kubikawo pamabuku akalembwa, ino tulicite nshi cimwi ceenga catucafwa?
1 Bantu baanji balasangalala kubelenga maswi eelete alimwi alushinisho kwiinda mukusebensesha jw.org. (Shikushi. 12:10) Nacibi boobo, sa mwakeleshawo kubelenga kusebensesha maswi akalekodwa? Mabuku akalekodwa alacafwa kukutika makani aanji ali pa webusaiti yesu. Ino mabuku amaswi akalekodwa inga atucafwa buyani?
2. Ino inga twasebensesha buyani mabuku akalekodwa palwesu alimwi amumukwashi?
2 Ngakusebensesha pa Ciiyo Capalwesu alimwi Amukwashi: Kukutika maswi amu Baibo, magazini, na mabuku akalekodwa ndyetuli palweendo na ndyetutocita ncito shesu sha bushiku abushiku inga catucafwa kusebensesha kabotu ciindi cesu. (Efe. 5:15, 16) Inga twaba ashiinji shakucita shikondelesha na twabikawo kukutika kumakani akalekodwa ndyetutobelenga mumabuku esu pakulambila kwamumukwashi. Kusebensesha maswi akalekodwa ndyetutocita ciiyo ca palwesu kulacafwa abuumbi na katusuni kuya panembo mukubelenga kwesu nabi na ndyetutokwiiya mushobo.
3. Ino mbaani mumisena motushimikila beenga bacafwikwa amabuku akalekodwa?
3 Muncito Yakushimikila: Bantu mbotucana mumusena motushimikila babona ayi tabacitewo ciindi cakubelenga inga basumina kukutika mabuku akalekodwa. Cimwi ciindi inga twacana baabo baamba mushobo umwi alimwi beenga basumina kukutika na makani aBwaami ali mumushobo ‘wabo’ (Milimo. 2:6-8) Mumisena imwi, kukutika ndubasu lucindeme abuumbi lwa mushobo wabo. Mucikoshanyo, mumushobo wa ci Hmong, bamashali bakulukulu balayiisha mashalane abacanike sha makani abo akale kale kwiinda mukwaamba abo pamulomo alimwi ici cilabacafwa kutaluba nshebanyumfwa. Mishobo iinji mu Afulika balasangala kwiiya kwiinda mukusebensesha tulabi.
4. Ino njimiipusho nshi njotweelete kuliipusha sobene ku makani akucafwa bantu mumisena motushimikila?
4 Mumisena motushimikila, sa inga cacafwa kulisha makani akalekodwa mumushobo wa bantu mbotwacana? Sa bamwi inga bacafwikwa na twabatumina libuku lyakalekodwa kusebensesha e-mail? Sa inga twakopolola libuku lyakalekodwa kulibika pa CD akupa muntu usuni kwiiya, pantu pomwi alilembetwe? Libuku, buloshuwa, magazini, na tilakiti ya maswi akalekodwa njetwapa muntu ndyetutoshimikila, ilyeelete kulembwa pa lipooti mbuli cakwaabila. Mabuku akalekodwa akapangwa kwaamba ayi tunosebensesha ndyetucita ciiyo ca palwesu alimwi andyetutoshanga mbuto sha lushinisho lwa Bwaami.—1 Koli. 3:6.