Sheenga Shatucafwa Kushimikila Kabotu​—Kuyeyelaako Bamwi

MULANDU NCOCIYANDIKILA: Bananikitwe a bambelele shimwi batokwiita bantu bamishobo yoonse kunwa “maanshi abuumi ayo apekwabo.” (Ciyu. 22:17) Maanshi acikoshanyo aya aleemikaninaako shintu Yehova nshaakatupa kwaamba ayi alubule bantu bamunyumfwila kuswa kububi alimwi alufu. Kwaamba ayi tucikoonshe kucafwa bantu bamishobo yoonse alimwi a babupailishi bupusene pusene, tulyeelete kwaabila “makani abotu atamaani” munshila ishika muntu uli woonse pamoyo.​—Ciyu. 14:6.

MBWEENGA MWACIITA:

• Amusale lilembo amakani eenga ashika pamyoyo bantu bakumusena nkomushimikila. Inga mwasala kusebensesha lubasu lwa nsheenga mwaamba na kusebensesha makani ngomwakasebenseshawo kale. Ino ngamakani ali na lilembo lili bantu ndyebasumina kubandikishanya abo? Sa kuli makani akacitika conoono ayo bantu ngobacishi? Ino ngamakani ali eenga ashika pamoyo musankwa na mwanakashi?

• Mu mubandi wanu mulyeelete kwaansha bantu kweelana amilawo icanika kumusena uko.​—2 Koli. 6:3, 4

• Amwashibe kabotu mabuku alimwi amavidyo ngotusebensesha ndyetutokwiisha eenga akondelesha bamwi

• Amukopolole makani mumishobo ipusenepusene yaamba bantu mbomucana kumusena nkomushimikila

• Amwaalule mutwi wa makani kwaamba ayi weelele shiyandika mwine ŋanda. (1 Koli. 9:19-23) Kucakubonenaako, ino inga mwaamba nshi na mwacana ayi mwine ŋanda wakasowekelwa muyandwa wakwe mulufu conoono?

AMWEEBELE VIDYO, LYALO AKUBANDIKA MIIPUSHO ITOKONKELAAWO:

• Ino ngamakani nshi shikushimikila ngakatalika kubandikishanya amwine ŋanda?

• Ino nshiinshi shakalinga kucitika mubuumi bwa mwine ŋanda?

• Ino ngamalembo ali eenga eelela mubukaalo ubu, alimwi nceebonshi?

• Ino inga mwaalula buyani nsheenga mwaamba kwaamba ayi shishike pamyoyo bantu bakala kumusena nkomushimikila?