Shaamba Libuku lya Ciyubululo Pamakani Abuumi Bwanu bwa Kunembo

1. Ino nciinshi ciyandika muntu uli woonse ncaeelete kusalawo?

MUNTU uli woonse pacecino ciindi alyeelete kusalawo cintu comwi ciyandika abuumbi. Inga wasalawo kuba kulubasu lwakwe Yehova Lesa mbuli Mweendeleshi weelela wa bubumbo boonse, na kuba kulubasu lwa mulwani wakwe shilunkutwe, Satana Diabolosi. Uli woonse alyeelete kusala kulubasu lomwi nkwaasuni kuba. Kusala uko nkweshi kukape kwaamba ayi muntu akekale buumi bwamuyayaya nabi sobwe. (Mate. 25:31-33, 46) Paciindi ca “mapensho anene,” muntu uli woonse alaakubikwa keshibilo ka kupulushikwa na kunyonyoolwa.​—Ciyu. 7:14; 14:9-11; Esek. 9:4, 6.

2. (a) Ino lilembo lya Bene Ebulu 10:35-39 lilatuyuminisha kucita nshi? (b) Ino makani ngotucana mulibuku lya Ciyubululo inga atucafwa buyani?

² Amubelenge Bene Ebulu 10:35-39. Na mwasala kuba kulubasu lwa bweendeleshi bwakwe Yehova, nkokwaamba ayi mwasala ca busongo. Aboobo mulisuni kucafwa bamwi kusala kabotu. Inga mwabacafwa kwiinda mukusebensesha makani ngotucana mulibuku lya Ciyubululo. Libuku ili licite makani asangalasha, lilatulwiita sheshi shikacitike kubaabo bapikisha Yehova, alimwi ashoolwe abo bashomeka ku bweendeleshi bwakwe nsheshi bakacane. Tulyeelete kwiiya pamakani aya ayandika. Kucita boobo kulaakutucafwa kuba bashinishite kutolelela kusebensela Yehova. Kwiilikaawo, kwiinda mukusebensesha nshotweeya, inga twacafwa bamwi kusala kusebensela Yehova akutolelela kucita boobo.

3. Ino nshiinshi nsheshi tubandike mumutwi uyu?

³ Mumutwi uyu tutobandika miipusho iyi: Ino nciinshi ceshi cikacitikile baabo bali kulubasu lwa bweendeleshi bwakwe Lesa? Ino nciinshi ceshi cikacitikile baabo basala kuba kulubasu lwa munyama usalala pyu, waambwa mulibuku lya Ciyubululo?

SHESHI SHIKACITIKILE BAABO BASHOMEKA

4. Ino ndikoto nshi mutumwi Joni ndyaakabona kalili a Yesu kwiculu?

⁴ Mucili anga nciloto, mutumwi Joni wakabona makoto obilo abaabo bali kulubasu lwa bweendeleshi bwakwe Yehova, abo bakatambula coolwe ca buumi butamaani. Likoto lyakutaanguna bakalinga 144,000. (Ciyu. 7:4) Bakatolwa kwiculu kuswa pacishi, kwaamba ayi baye mukweendelesha pomwi a Yesu. Lyalo bakeendelesha cishi capanshi pomwi anguwe. (Ciyu. 5:9, 10; 14:3, 4) Mucili anga nciloto, Joni wakababona kabeemfwi pomwi a Yesu pa Kalundu ka Siyoni kwiculu.​—Ciyu. 14:1.

5. Ino nciinshi ceshi cikacitike conoono kuba 144,000 bacaaliteewo?

⁵ Kuswabo muciindi ca batumwi kusa mukushika apacecino ciindi, bantu baanji bakasalwa kuba lubasu lwaba 144,000. (Luka 12:32; Loma. 8:17) Nacibi boobo, Joni wakalwiitikwa ayi munshiku shakweelaako, kulaakunoocaalitebo baniini pa namba iyi. Mapensho anene kaatana kutalika, “bacaaliteewo” aba balaakutambula ‘keshibilo’ kakweelaako kakwaamba ayi bakasangalasha Yehova. (Ciyu. 7:2, 3; 12:17) Lyalo mweenka muciindi ca mapensho anene, bacaaliteewo aba balaakutolwa kwiculu kwaamba ayi bakabe pomwi aboonse ba 144,000, abo bakafwa kale cakushomeka. Lyalo balaakweendelesha pomwi a Yesu mu Bwaami bwakwe Lesa.​—Mate. 24:31; Ciyu. 5:9, 10.

6-7. (a) Ino ndikoto nshi alimwi Joni ndyaakabona, alimwi ino nciinshi ncotushi pa likoto ili? (b) Ino nceebonshi bananikitwe bacaaliteewo alimwi abamu “likoto linene” balyeelete kusuna kwiiya makani aambwa mu Ciyubululo capita 7?

⁶ Pesule lyakubona likoto lyakwiculu, Joni wakabona “likoto linene.” Mubupusano alikoto lyaba 144,000, Baibo tayaambiwo namba ya bantu bamulikoto ili. (Ciyu. 7:9, 10) Ino ici cilatwiisha nshi? Joni wakalwiitikwa ayi: ‘Aba mbobantu bakapula mumapensho anene, alimwi bakacapa mingaanjo yabo akwiitubya mubulowa bwa Mwanaambelele.’ (Ciyu. 7:14) Pesule lya kupuluka mumapensho anene, bantu bamu “likoto linene” balaakusangalala ashoolwe shiinji abuumbi pacishi capanshi.​—Kulu. 37:9-11, 27-29; Tus. 2:21, 22; Ciyu. 7:16, 17.

⁷ Inga caba ayi twakasalwa kuya kwiculu na kwikala pacishi capanshi, sa tulalibona kuba pakati ka baabo baambwa mulibuku lya Ciyubululo capita 7? Tulyeelete kunoolibona. Ici cilaakuba ciindi cisangalasha abuumbi kumakoto oonse obilo abasebenshi bakwe Lesa! Tulaakusangalala abuumbi kwaamba ayi twakasala kuba kulubasu lwa bweendeleshi bwakwe Yehova. Ino ngamakani nshi aamwi ngotucana mulibuku lya Ciyubululo aamba pa mapensho anene?​—Mate. 24:21.

SHESHI SHIKACITIKILE BAABO BAPIKISHA LESA

8. Ino mapensho anene alaakutalika buyani, alimwi ino bantu baanji balaakucita buyani?

⁸ Mumutwi wamana twakeeya ayi mfulumeende conoono shilaakubukila Babiloni Munene, na bupailishi boonse bwakubeca. (Ciyu. 17:16, 17) Ishi shaakucitikabo ngeshi akabe matalikilo amapensho anene. Ano sa ici cilaakupa kwaamba ayi bantu baanji batalike kusebensela Yehova? Sobwe. Muciindi cakucita boobo, Ciyubululo capita 6 ilatondesha ayi paciindi ico, bantu batasebenseli Yehova balaakulangoola kushitilishikwa kuswa kubeshimapolitiki alimwi abeshimakwebo bamucishi ici, abo bakoshanishikwa kutulundu. Mukwiinga bantu abo teshi bakacicile kulubasu lwa Bwaami bwakwe Lesa, kuli Yehova balaakuba beshikupikisha.​—Luka 11:23; Ciyu. 6:15-17.

9. Ino bantu paciindi ca mapensho anene balaakushiba buyani ayi bantu bakwe Yehova balipuseneeko kubaabo batamusebenseli, alimwi ino nciinshi ceshi cikacitike kubantu bakwe Yehova?

⁹ Ncakutatoonsha basebenshi bakwe Yehova bashomeka balaakucita shipuseneeko abuumbi paciindi ici cishupite. Balaakuba likoto lyeenkabo lyeshi likanoosebensela Yehova pacishi capanshi akukaka kuba kulubasu lwa “munyama.” (Ciyu. 13:14-17) Mukwiinga balaakutolelela kushomeka kuli Yehova, abo bapikisha Yehova balaakukalala. Aboobo likoto lya shishi shicatene pomwi lilaakulwana bantu bakwe Lesa pacishi coonse capanshi. Kulwanwa uku Baibo ilakwiita ayi Gogi wakucishi ca Magogi.​—Esek. 38:14-16.

10. Kweelana a Ciyubululo 19:19-21, ino Yehova alaakucita buyani na bantu bakwe bakalwanwe?

¹⁰ Ino Yehova alaakucita buyani na bantu bakwe bakalwanwe? Alatulwiita ayi: “Bukali bwangu buyoosha bulaakubuka.” (Esek. 38:18, 21-23) Ciyubululo capita 19 ilaamba sheshi shikakonkelewo. Yehova alaakutuma Mwanaakwe kusa mukushitilisha bantu bakwe akukoma balwani babo. Yesu alaakulwana nkondo iyi pomwi a “bashilumamba boonse ba kwiculu” na baanjelo bashomeka pomwi aba 144,000. (Ciyu. 17:14; 19:11-15) Ino nciinshi ceshi cikasweemo munkondo iyi? Bantu alimwi amakoto oonse apikisha Yehova balaakunyonyoolwa cakumaninina!​—Amubelenge Ciyubululo 19:19-21.

PESULE LYA NKONDO, KULAAKUBA BWIINGA

11. Ino ncakucitika nshi ciyandika abuumbi caambwa mulibuku lya Ciyubululo?

¹¹ Amuyeeyebo bashomeka mbweshi bakalinyumfwe pesule lyakwaamba ayi balwani bakwe Lesa boonse banyonyoolwa! Cilaakuba ciindi cisangalalasha abuumbi pacishi capanshi! Nabi kwaamba ayi kulaakuba kusangalala abuumbi kwiculu pesule lya kunyonyoolwa kwa Babiloni Munene, kulaakuba acimwi ceshi cikalete lusangalalo lwiinditeewo. (Ciyu. 19:1-3) Ncakucitika cisangalasha abuumbi caambwa mulibuku lya Ciyubululo, “bwiinga bwa Mwanaambelele.”​—Ciyu. 19:6-9.

12. Kweelana a Ciyubululo 21:1, 2 ino bwiinga bwa Mwanaambele bulaakubako lili?

¹² Ino bwiinga ubu bulaakubako lili? Ba 144,000 boonse balaakuba kwiculu inkondo ya Amagedoni kaitana kutalika. Nacibi boobo, ici teshi nceciindi bwiinga bwa Mwanaambelele ndyeshi bukabeeko. (Amubelenge Ciyubululo 21:1, 2.) Bwiinga bwa Mwanaambele bulaakubako pesule lya kunyonyoolwa kwa balwani bakwe Lesa boonse munkondo ya Amagedoni.​—Kulu. 45:3, 4, 13-17.

13. Ino nciinshi ceshi cikacitike kubaabo beshi bakaabanemo lubasu mu bwiinga bwa Mwanaambele?

¹³ Ino nciinshi ceshi cikacitike kubaabo beshi bakaabanemo lubasu mu bwiinga bwa Mwanaambele? Bweenka mbuli bwiinga mbobucatanya pomwi musankwa amwanakashi, abwalo bwiinga bwa cikoshanyo bulaakucatanya Mwaami, Yesu Klistu, a ‘nabwinga’ wakwe, likoto lyaba 144,000. Cakucitika ciyandika abuumbi ici cilaakuba ngomatalikilo akweendelesha cishi capanshi kwaba 144,000 pomwi a Yesu kwamyaaka 1,000.​—Ciyu. 20:6.

NDABALA IBOTU ABUUMBI ABUUMI BWANU BWA KUNEMBO

14-15. Ino Ciyubululo capita 21 ilakoshanisha ba 144,000 ku nshi? (Amubone cikope cili papeeji yakutaanguna.)

¹⁴ Ciyubululo capita 21 ilakoshanisha ba 144,000 ku ndabala ibotu abuumbi iitwa ayi “Jelusalemu Ipya.” (Ciyu. 21:2, 9, NWT) Ndabala iyi iliyakitwe palwiimbi lwa mabwe ali 12 apo palembetwe “meena a batumwi ba Mwanaambelele bali 12.” Ino nceebonshi aya akalinga makani asangalasha kuli Joni? Nceebo cakwaamba ayi liina lyakwe lyakalingaawo pameena ayo. Ici cakalinga ncoolwe cinene abuumbi!​—Ciyu. 21:10-14; Efe. 2:20.

¹⁵ Taakuwo ndabala ikoshenye andabala iyi. Ilicite nshila inene yakapangwa a golodi wiine wiine, milyaango ili 12 yakapangwa a ngale, lubumbu alimwi alwiimbi shakaboteshekwa amabwe abotu amakwebo. Ndabala iyi yakalinga kweelene kabotu mumbasu shoonse. (Ciyu. 21:15-21) Nacibi boobo, kuli cimwi cintu Joni ncaakabona cakalinga kubulite! Aboobo Joni wakaamba ayi: ‘Mundabala inene iyo, nshikwe kubona tempele, mukwiinga Yehova Lesa Shinkusu shoonse alimwi a Mwanaambelele nje tempele ya njiyo. Mundabala inene momunya umo tamuyandiki lisuba nabi mweenshi kwaamba ayi shimunikileemo ceebo bulemu bwakwe Lesa mbobumunikaamo alimwi Mwanaambelele ndyelilampi lya mumo.’ (Ciyu. 21:22, 23) Abo babete lubasu lwa Jelusalemu Ipya balaakuba a Yehova. (Ebu. 7:27; Ciyu. 22:3, 4) Aboobo munshila iyi Yehova a Yesu nje tempele ya ndabala iyi.

16. Ino nciinshi ceshi cikacitike kubantu boonse, Bwaami bwakwe Lesa ndyeshi bukanookweendelesha kwamyaaka 1,000?

¹⁶ Cilabasangalasha abuumbi bananikitwe kuyeeya pa ndabala iyi. Abalo batolangila kukala pacishi capanshi balyeelete kusangalala. Ndabala ya Jelusalemu Ipya ilaakuleta shoolwe shiinji pacishi, Bwaami bwakwe Lesa ndyeshi bukanookweendelesha kwamyaaka 1,000. Joni wakabona shoolwe ishi kashikunka mbuli “mulonga wa maanshi apa buumi.” Alimwi mweela lya mulonga uyu, mwakalinga ‘shisamu shipa buumi’ isho shakalinga kucite matewu ‘akushilikisha mishobo yoonse ya bantu.’ (Ciyu. 22:1, 2) Shintu shibotu ishi shilaakucafwa bantu boonse beshi bakabeeko paciindi ico. Lyalo mukuya kwaciindi bantu boonse banyumfwila Yehova balaakuba bamaninite. Teshi kukabeewo malwashi, kucisa, alimwi akulosha minsonshi ceebo ca buumba.​—Ciyu. 21:3-5.

17. Kweelana a Ciyubululo 20:11-13, ino mbaani beshi bakacane shoolwe, Bwaami bwakwe Lesa ndyeshi bukanookweendelesha kwamyaaka 1,000?

¹⁷ Ino mbaani beshi bakacane shoolwe shibotu ishi? Bakutaanguna mba mulikoto linene beshi bakapuluke Amagedoni alimwi abaana mpashi beshi bakashalwe mucishi cipya. Alimwi Ciyubululo capita 20 ilashomesha ayi bafu balaakubushikwa. (Amubelenge Ciyubululo 20:11-13.) Bantu bashomeka “baluleme” bakafwa alimwi “abataluleme” batana kuba acoolwe cakwiiya pali Yehova, balaakubushikwa boonse pacishi capanshi. (Milimo 24:15; Joni 5:28, 29) Ano sa ici cilaamba ayi muntu uli woonse wakafwa alaakubushikwa, Bwaami bwakwe Lesa ndyeshi bukanookweendelesha kwamyaaka 1,000? Sobwe. Abo bakakaka kusebensela Yehova kabatana kufwa teshi bakabushikwewo. Bakalinga kucite coolwe cakwiiya pali nguwe, sombi bakatondesha kwaamba ayi tabeeleli kukala mucishi ca Paladaiso.​—Mate. 25:46; 2 Tesa. 1:9; Ciyu. 17:8; 20:15.

KWEELESHEKWA KWA KWEELAAKO

18. Ino nciinshi ceshi cikacitike myaaka 1,000 yaakumana?

¹⁸ Myaaka 1,000 yaakumana, abo boonse beshi bakanooli pacishi capanshi balaakuba bamaninite. Taakuwo eshi akanoopenga ceebo cakubisha kwakwe Adamu. (Loma. 5:12) Mapensho oonse akesa ceebo cakubisha uko alaakumana. Aboobo ici cilaamba ayi abo beshi bakanooli pacishi capanshi “balaakuba abuumi” myaaka 1,000 yaakumana mukwiinga balaakuba bamaninite.​—Ciyu. 20:5.

19. Ino nceebonshi kweeleshekwa kwa kweelaako kulaakuyandika?

¹⁹ Tulicishi kwaamba ayi Yesu wakatolelela kushomeka kuli Lesa nabi Satana ndyaakalinga kumweelesha. Ano sa bantu bamaninite abalo balaakutolelela kushomeka na Satana akapekwe coolwe ca kubeelesha? Womwi awomwi alaakutondesha kushomeka kwakwe kuli Yehova paciindi Satana ndyeshi akaangululwe kuswa mucilindi citeeli myaaka 1,000 yaakumana. (Ciyu. 20:7) Abo beshi bakashomeke paciindi ca kweeleshekwa kwa kweelaako, balaakutambula buumi butamaani akusangalala alwaanguluko lwancinencine. (Loma. 8:21) Abo beshi bakapondokele Yehova, balaakunyonyoolwa kwamuyayaya pomwi anguwe ashibanda shakwe.​—Ciyu. 20:8-10.

20. Ino mutolinyumfwa buyani pamakani abushinshimi busangalasha mbotucana mulibuku lya Ciyubululo?

²⁰ Ino makani aniinibo kuswa mulibuku lya Ciyubululo ngotweendulukaamo amupa kulinyumfwa buyani? Sa mwanyumfwa kabotu abuumbi kulibona mubushinshimi ubu? Ncakutatoonsha kwiiya bushinshimi ubu kwamuyuminisha kwiitako bamwi mukulambila kusalalite kwakwe Lesa. (Ciyu. 22:17) Pesule lyakubandika shintu ishi sheshi shikacitike kunembo, tulisangalete abuumbi, aboobo tulisuni kwaamba maswi mutumwi Joni ngakaamba ayi: “Acibe boobo. Kosa O Mwaami Yesu.”​—Ciyu. 22:20.