Inga Mwaba Aluumuno Paciindi Ndyekuli Mapensho

1. Ino “luumuno lwakwe Lesa” nciinshi alimwi ino lulatucafwa buyani? (Bene Filipi 4:6, 7)

KULI luumuno bantu bamucishi ndobateshiiwo. ‘Nduumuno lwakwe Lesa,’ kukalikana mumoyo nkotulinyumfwa ceebo cakuba abushicibusa bulibetele a Ishiwesu wakwiculu. Kuba aluumuno lwakwe Lesa kulatupa kulinyumfwa kushitilishikwa. (Amubelenge Bene Filipi 4:6, 7.) Tulicite bushicibusa bubotu abaabo basuni Lesa. Alimwi tulicite bushicibusa bubotu a ‘Lesa wa luumuno.’ (1 Tesa. 5:23) Na twamushiba, kumushoma, akumunyumfwila Ishiwesu, luumuno lwakwe Lesa inga lwatupa kukalika moyo ndyetutokwiinda mubukaalo buyumu.

2. Ino nceebonshi inga twashoma ayi cilakonsheka kuba aluumuno lwakwe Lesa?

² Ano sa inga cakonsheka kuba muluumuno lwakwe Lesa ndyetutokwiinda mumapensho anene na kupenshekwa? Kwiinda mumapensho anene inga kwatupa kuloonda. Nacibi boobo, Yesu wakalwiita bashikwiiya bakwe ayi: “Myoyo yanu itapengi nabi kuloonda.” (Joni 14:27) Alimwi cisangalasha ncakwaamba ayi bamakwesu abenankashi balakonkela kuyuminisha kwakwe Yesu. Kwiinda mulucafwo lwakwe Yehova balacikonsha kuba muluumuno nabi ndyebatokwiinda mumapensho anene.

MBWEENGA TWABA ALUUMUNO PACIINDI NDYEKWABUKA BULWASHI BUNENE

3. Ino luumuno lwesu inga lwapilinganishikwa buyani na kwabuka bulwashi bunene?

³ Shintu mubuumi bwesu inga shaaluka paciindi ciniinibo na kwabuka bulwashi bunene. Amuyeeye bantu baanji mbobakakumwa a bulwashi bwa COVID-19. Kweelana alipooti limwi mbolyakaamba, bantu baanji bakalinga kwaalilwa koona kabotu paciindi ca bulwashi ubu. Kubuka kwa bulwashi ubu kwakapa bantu baanji kulisukama abuumbi, kulinyumfwa kulefuka, kutalika kunwa bwalwa abuumbi, kusebensesha misamu ikola, kulwana mumikwashi, alimwi bamwi kusuna kulicaya. Ino inga mwacita buyani kwaamba ayi mutalisukami abuumbi sombi mube aluumuno lwakwe Lesa na kumusena nkomukala kwabuka bulwashi?

4. Ino nceebonshi kushiba bushinshimi Yesu mbwakaamba pamakani anshiku shakweelaako inga kwatupa kuba aluumuno?

⁴ Yesu wakaambila limwi ayi munshiku shakweelaako, kulaakuba malwashi “mumisena ipusenepusene.” (Luka 21:11) Ino kushiba cancine ici kulatucafwa buyani kuba aluumuno? Tatukankamani na kwabuka bulwashi. Tuleshiba kwaamba ayi ishi shintu shitoocitika kweelana a Yesu mbwakaamba. Aboobo inga twakonkela Yesu nshaakalwiita baabo batokala munshiku shamamanino ayi: “Sombi mwebo mutakalisukami.”​—Mate. 24:6.

5. (a) Kweelana a Bene Filipi 4:8, 9, ino nciinshi ncotweelete kupaililaawo paciindi ndyekuli bulwashi bunene? (b) Ino kukutika ku maswi amu Baibo akalekodwa kwakamucafwa buyani nankashi umwi alimwi ino nshiinshi nsheenga tweeyawo?

⁵ Ncuubu kutalika kulisukama abuumbi akuloonda na kwabuka bulwashi. Ishi nsheshi shakacitikila nankashi waliina lya Desi.b Bashimishaabo, mupyala wakwe, alimwi a dokota wakwe ndyebakafwa kubulwashi bwa COVID-19, wakaloonda kwaamba ayi mpashi alakwe atoocatwa abulwashi lyalo akuyambukishako banyina bacinene. Alimwi ceebo ca bulwashi ubu, wakalisukama ayi mpashi incito inga yamana. Aboobo wakatalika kulisukama pamakani akucana shakulya akulipila lenti. Wakatalika kulisukama abuumbi pashintu ishi cakwaamba ayi wakalinga kwaalilwa koona mashiku. Nacibi boobo, nankashi Desi wakaba aluumuno alimwi. Munshila nshi? Wakapaila akusenga Yehova kwaamba ayi amucaafwe kukalika moyo akuyeeya pashintu shibotu. (Amubelenge Bene Filipi 4:8, 9.) Wakakutika kuli Yehova kwiinda mukukutika maswi amu Baibo akalekodwa. Wakaamba ayi, “Kukalika moyo kwa baabo bakabelenga kwakancafwa kutalisukama abuumbi akwiibaluka kwaamba ayi Yehova alambikilako maano.”​—Kulu. 94:19.

6. Ino kucita ciiyo capalwaanu akucanika kumabungano shilaakumucafwa buyani?

⁶ Na kwabuka bulwashi, inga caba ciyumu kutolelela kucita shintu shoonse nshetwakalinga kucita kale kale, sombi tatweelete kucileka kucita ciiyo capalweesu na kucanika kumabungano. Makani ashakeendaamo bamwi ngotucana mumabuku esu a mumavidyo alaakumucafwa kwiibaluka kwaamba ayi kuli bamakwesu abenankashi batolelela kusebensela Yehova cakushomeka nabi ndyebatokwiinda mumapensho mbuli ayo ngomutokwiindaamo. (1 Pit. 5:9) Mabungano inga amucafwa kuyeeya pashintu shiyuminisha kuswa mu Baibo. Alimwi inga amupa coolwe cakuyuminisha bamwi akuyuminishikwa. (Loma. 1:11, 12) Kuyeeya Yehova mbwakacafwa basebenshi bakwe paciindi ndyebakaciswa, kuloonda, na kulinyumfwa kuumuninwa, kulaakupa lushomo lwanu kuyuminaako alimwi mulaakushoma cakutatoonsha kwaamba ayi amwebo alaakumucafwa.

7. Ino nshiinshi nsheenga mweeya kucakubonenaako ca mutumwi Joni?

⁷ Mutalitalamushi kubamakwesu abenankashi. Na kwaba bulwashi bunene inga twayandika kutalamukana nabi paciindi ndyetuli abamakwesu abenankashi. Paciindi mbuli ceeco, inga mwalinyumfwa bwakalinyumfwa mutumwi Joni. Wakalinga kusuni kubona Gayasi shicibusa wakwe. (3 Joni 13, 14) Nacibi boobo, Joni wakalinga kucishi kwaamba ayi teshi akamubonewo Gayasi kwakaciindi. Aboobo Joni wakacita nshaakalinga kucikonsha; wakalembela Gayasi nkalata. Na inga tacikonsheki lyoonse kufwakashila bashominyinaanu, amweeleshe kubatumina fooni na mesegi. Kubandika abamakwesu abenankashi kulaakumucafwa kutalinyumfwa kuba nweenka akutalisukama abuumbi. Amutumine bamanene na mwalisukama abuumbi, akusumina kuyuminisha kwabo kwalusuno.​—Isa. 32:1, 2.

KUBA ALUUMUNO PACIINDI NDYEKWACITIKA MAPENSHO ANENE

8. Ino mapensho anene inga apilinganya buyani luumuno lwanu?

⁸ Na mweenda mumapensho mbuli kulobelwa, citentanshi, na kupitwa shintu, inga mwalisukama kwaciindi cilaamfu. Na mwafwitwa shikamukowa na shicibusa nabi kunyonyookelwa shintu, inga mwalinyumfwa buumba, kubula cakulangila, nabi kukalala. Ici tacaambi ayi mulisuni bunene shintu shakumubili na mpashi ayi tamucite lushomo luyumu. Mweenda mubukaalo buyumu, alimwi bamwi inga bamulangila kulinyumfwa cibiibi. (Jobo 1:11) Sombi inga mwacikonsha kuba aluumuno nabi ndyemutokwiinda mubukaalo buyumu. Munshila nshi?

9. Ino nshiinshi Yesu nshakaamba kwaamba ayi atucaafwe kulibambila mapensho?

⁹ Mutaluubi bushinshimi Yesu mbwakaamba. Bamwi balayeeya teshi bakapolelwewo mapensho anene. Sombi tulishi kwaamba ayi mapensho anene ananooya bufulilakobo pacecino ciindi, alimwi mpashi amwi aswebo inga atucitikila. Yesu wakalwiita bashikwiiya bakwe ayi kulaakuba “shitentanshi shiyoosha” alimwi amapensho amwi mamanino kaatana kushika. (Luka 21:11) Alimwi wakaambila limwi ayi “bubi bulaakufula,” isho nshetutobona munshiku shino. Kucakubonenaako, tulabona kuya panembo kwa kucayana, alimwi abukapondo. (Mate. 24:12) Yesu taakwe kwaamba ayi mapensho aya alaakunoocitikilabo baabo batanyumfwili Yehova. Alimwi basebenshi bakwe Yehova bashomeka baanji baleenda mumapensho anene. (Isa. 57:1; 2 Koli. 11:25) Yehova inga taatushitilishi kumapensho oonse munshila ya caankamiko, sombi alaakutupa shili shoonse nshetuyandika kwaamba ayi tutolelele kukalika moyo.

10. Ino nceebonshi kulibambilila limwi pacecino ciindi nsheenga twaciita na kwacitika mapensho nkutondesha lushomo? (Tushimpi 22:3)

¹⁰ Cilaakutubeta cuubu kukalika moyo ndyetwapolelwa mapensho akuteengashila na twalibambilila limwi shakucita. Ano sa kulibambilila limwi kulatondesha ayi tatucite lushomo luyumu muli Yehova? Sobwe napaceyi. Kulibambilila limwi nsheenga twacita na twapolelwa mapensho kulatondesha ayi tulashoma ayi Yehova alaakutulama. Munshila nshi? Maswi akwe Lesa alatuyuminisha kulibambilila limwi na twabona ayi inga twapolelwa mapensho kunembo. (Amubelenge Tushimpi 22:3.) Alimwi libunga lyakwe Lesa kwiinda mumakani ngotwiiya mumagazini, kumabungano, alimwi ashakoolobesha sha paciindi ceelete, lilatuyuminisha kulibambilila limwi nsheenga twaciita na kwacitika mapensho akuteengashila.c Sa tulamushoma Yehova? Na tulamushoma, tulaakukonkela butanjilishi mbwaatupa pacecino ciindi, mapensho anene kaatana kucitika.

11. Ino nshiinshi nshomweeya kucakubonenaako caba Margaret?

¹¹ Amuyeeye shakacitikila nankashi waliina lya Margaret. Mfulumeende yakaamba ayi wakalinga kweelete kuswa muŋanda yakwe akuya kumusena kumwi mukwiinga kwakalinga kusa mulilo unene kumusena nkobakalinga kukala. Mukwiinga kwakalinga bantu baanji bakalinga kweelesha kucica kuswa kumusena uko paciindi comwi, kwakalinga myotoka iinji muloodi, aboobo taakuwo motoka yakalinga kukonsha kwiinda. Muuwo wakasulabo bwiishi bushiya, alimwi ba Margaret bakaalilwa kuswa mu motoka kwakaciindi. Nacibi boobo, bakapuluka mukwiinga bakalinga kulibambite. Bakalinga kucite maapu mukacoola kabo yakalinga kutondesha nshila imwi njeenga beenda kwaamba ayi baswe kumusena uko. Alimwi bakalinga beendaamo kale munshila iyo kwaamba ayi bashibe kabotu nkweenga baya na kwacitika mapensho akuteengashila. Mukwiinga bakalinga balibambilila limwi, ba Margaret bakapuluka.

12. Ino nceebonshi tulakonkela butanjilishi mbotupekwa pamakani akulishitilisha?

¹² Kwaamba ayi batushitilishe akushitilisha bamwi, beendeleshi inga babika mulawo wakukasha kweenda paciindi cimwi, kutulwiita ayi tuswe kumusena kumwi, na kutulwiita shakucita shimwi. Bantu bamwi balawayawaya na kukaka kukonkela butanjilishi ubu ceebo cakwaamba ayi tabasuniiwo kushiya shintu nshebacite. Ino Beneklistu balacita buyani? Baibo ilaamba ayi: ‘Ceebo ca Mwaami amulibombye kubeendeleshi boonse bamucishi capanshi nabi ku mwaami mbwaabete munene na kubeendeleshi mbaakatuma.’ (1 Pit. 2:13, 14) Libunga lyakwe Lesa alyalo lilatupa butanjilishi bweenga bwatushitilisha. Lyoonse balatwiibalusha ayi tulyeelete kupa bamanene namba ya fooni njetutoosebensesha kwaamba ayi cibe cuubu kututumina paciindi ndyekwacitika mapensho akuteengashila. Sa mwakacita kale boobo? Alimwi cimwi ciindi inga twatambula butanjilishi bwa kumusena nkotweelete kuya kwaamba ayi tushitilishikwe, kwa kuya mukutambula shakulya na mbweenga twacafwilisha bamwi. Na twaalilwa kukonkela butanjilishi ubo inga twabika buumi bwesu alimwi abuumi bwa bamanene mumapensho. Mutaluubi kwaamba ayi basankwa bashomeka aba balalama buumi bwesu. (Ebu. 13:17) Ba Margaret bakaamba ayi, “Ndishomete cakutatoonsha kwaamba ayi kukonkela butanjilishi buswa kubamanene alimwi alibunga lyakwe Lesa kwakapulusha buumi bwangu.”

13. Ino nciinshi cacafwa Beneklistu baanji bakashiya maanda abo kuba alusangalalo aluumuno?

¹³ Bamakwesu abenankashi baanji bakashiya maanda abo ceebo ca mapensho anene na nkoondo bacikonsha kwiiya kucita shintu kweelana abukaalo bwabo bupya alimwi akucita shiinji muncito yakwe Yehova kwakubula kusowa ciindi. Mbuli Beneklistu bamuciindi ca batumwi abo bakalinga bapalangana ceebo cakupenshekwa, bamakwesu aba balatolelela ‘kwaambilisha makani abotu.’ (Milimo 8:4) Kushimikila kulabacafwa kubikila maano ku Bwaami muciindi cakuyeeya pamapensho ngobatokwiindaamo. Kucita boobo kulabacafwa kutolelela kuba alusangalalo aluumuno.

MBWEENGA TWABA ALUUMUNO NABI NDYETUTOOPENSHEKWA

14. Ino kupenshekwa inga kwapilinganya buyani luumuno lwesu?

¹⁴ Kupenshekwa inga kwatupa kusowekelwa shintu shiinji shitupa kuba aluumuno. Tulakondwa akulinyumfwa kabotu na katubungana pomwi, kushimikila, alimwi akucita shintu nshetucita lyoonse kwakubula kuloonda ayi batootucata. Ano na batukasha kucita shintu ishi inga twalisukama akuloonda sheenga shatucitikila. Cilibo kabotu kulinyumfwa boobo. Nacibi boobo, tulyeelete kucenjela. Yesu wakaamba ayi kupenshekwa inga kwapa kwaamba ayi bashikwiiya bakwe baboolele mwisule. (Joni 16:1, 2) Aboobo ino inga twacita buyani kwaamba ayi tutolelele kuba aluumuno nabi ndyetutoopenshekwa?

15. Ino nceebonshi tatweelete kuloonda kupenshekwa? (Joni 15:20; 16:33)

¹⁵ Maswi akwe Lesa alaamba ayi: ‘Uyo woonse usuni kwikala mubuumi bwabu Lesa muli Klistu Yesu ulaakupenshekwa.’ (2 Timo. 3:12) Mukwesu waliina lya Andrei cakamuyumina kushoma kwaamba ayi basebenshi bakwe Yehova boonse balaakupenshekwa paciindi ncito yesu ndyeyakakashikwa mucishi cinemishaabo. Wakayeeya ayi: ‘Kuli Bakamboni baanji abuumbi kuno. Ino beendeleshi inga batucata buyani soonse?’ Kuyeeya uku takukwe kumupa kuba aluumuno, sombi kwakamupa kutolelela kulisukama. Muciindi cakuyeeya ayi teshi bakacatwe, bamakwesu bamwi bakashiya shoonse mumaansa akwe Yehova. Bakalinga kucishi kwaamba ayi inga bacatwa, nacibi boobo, tabakwe kulisukama abuumbi mbuli mukwesu Andrei. Aboobo alakwe mukwesu Andrei wakakonkela cakubonenaako cabo akucinka manungo muli Yehova. Lyalo wakalinyumfwa kuba aluumuno, alimwi alicite lusangalalo nabi kwaamba ayi kucili mapensho aanji. Ubu mbweenga caba akulindiswe. Nabi kwaamba ayi Yesu wakatulwiita ayi tulyeelete kulangila kupenshekwa, wakatushomesha ayi inga twacikonsha kutolelela kushomeka.​—Amubelenge Joni 15:20; 16:33.

16. Ino mbutanjilishi nshi mbotweelete kukonkela paciindi ndyetutoopenshekwa?

¹⁶ Na incito yesu yakashikwa, inga twatambula butanjilishi kuswa ku ofesi ya musampi alimwi akubamanene. Butanjilishi ubu bwakabambilwa kutushitilisha akutucafwa kwaamba ayi tutolelele kutambula shakulya shakumushimu, alimwi akutucafwa kwaamba ayi tutolelele kushimikila kweelana ambweenga twacikonsha. Amweeleshe kukonkela butanjilishi mbomwapekwa, nabi kwaamba ayi tamuna kunyumfwishisha ncobamupeta butanjilishi. (Jemu. 3:17) Alimwi mutayubululi makani pa bamakwesu abenankashi, na shicita libungano kubaabo bateelete kushiba makani ayo.​—Shiku. 3:7.

17. Ino nciinshi ncotushinishite kucita bweenka mbuli Beneklistu bamuciindi ca batumwi?

¹⁷ Ceebo comwi cinene cipa kwaamba ayi Satana anoolwana bantu bakwe Lesa ncakwaamba ayi ‘balicite ncito yakushimikila pali Yesu.’ (Ciyu. 12:17) Mutaloondi Satana alimwi abantu bamucishi cakwe. Kushimikila akwiisha nabi ndyetutopikishikwa kulatupa kuba alusangalalo aluumuno. Muciindi ca Beneklistu bakutaanguna beendeleshi ba baJuda ndyebakalwiita batumwi ayi bacileeke kushimikila, basankwa bashomeka balya bakasalawo kunyumfwila Lesa. Bakatolelela kushimikila, alimwi incito yakushimikila yakabapa kuba alusangalalo. (Milimo 5:27-29, 41, 42) Nacibi boobo, na incito yesu yakashikwa tulyeelete kucenjela ndyetutooshimikila. (Mate. 10:16) Ano na twacita nsheenga twacikonsha, tulaakuba aluumuno lusa ceebo cakucita shisangalasha Yehova alimwi akwaabanamo lubasu mukwaambilisha makani apulusha bantu.

‘LESA WA LUUMUNO ALAAKUBA ANDIMWE’

18. Ino luumuno lwancinencine lulaswa kuli?

¹⁸ Amushome cakutatoonsha kwaamba ayi inga twaba aluumuno nabi ndyetutokwiinda mumapensho. Tulyeelete kwiibaluka kwaamba ayi cintu ncetuyandika ndyetutokwiinda mumapensho nduumuno lwakwe Lesa, nkokwaamba ayi, luumuno luswabo kuli Yehova. Amucinke manungo muli nguwe paciindi ndyekwabuka bulwashi bunene, mapensho anene, na kupenshekwa. Amutolelele kuba pafwiifwi alibunga lyakwe Lesa. Amulangile buumi bubotu mbweshi mukacane kunembo. Lyalo, ‘Lesa wa luumuno alaakuba andimwe.’ (Filip. 4:9) Mumutwi utokonkelaawo tulaakubandika mbweenga twacafwa bashominyineesu kuba aluumuno lwakwe Lesa ndyebatokwiinda mumapensho.