Amucafwe Bamwi Kuliyumya Mumapensho

1. Ino liinji Yehova alaikumbula buyani mipailo ya basebenshi bakwe?

SA MULISHI kwaamba ayi Yehova inga wakumbula mupailo wakuswa panshi lya moyo wa muntu umwi kwiinda muli ndimwe? Uli woonse inga wacikonsha kucafwa bamwi, inga caba ayi ngumunene mulibungano, musebenshi ucafwilisha, painiya na shikushimikila. Alimwi inga caba ayi ngwacanike, bacinene, mukwesu, nabi nankashi. Na muntu usuni Yehova wapaila kuli nguwe akusenga lucafwo, Lesa wesu liinji alayumya muntu uyo kwiinda mubamanene na basebenshi bakwe bamwi bashomeka. (Kolo. 4:11) Tulikondetwe abuumbi kusebensela Yehova akucafwa bamakwesu munshila iyi! Inga twacikonsha kucita boobo paciindi ndyekwabuka bulwashi bunene, mapensho anene, na kupenshekwa.

AMUCAFWE BAMWI NDYEKWABUKA BULWASHI BUNENE

2. Ino nceebonshi inga caba ciyumu kucafwa bamwi paciindi ndyekwabuka bulwashi bunene?

² Inga caba ciyumu kucafwana na kwabuka bulwashi bunene. Kucakubonenaako, inga twasuna kufwakashila babyesu, sombi paciindi ndyekuli bulwashi bunene inga tacibi kabotu kucita boobo. Mpashi inga twasuna kwiitako baabo batokwaalilwa kucana shiyandika kwaamba ayi bese kumisheesu tulite pomwi cakulya, sombi ico acalo inga tacikonsheki. Inga katusuni kucafwa bamwi, sombi inga caba ciyumu na beshikamukowa besu aswebo bali mumapensho. Nacibi boobo, tulisuni kubacafwa bamakwesu, alimwi Yehova alasangalala na twacita nsheenga twacikonsha kwaamba ayi tubacaafwe. (Tus. 3:27; 19:17) Ino inga twacita buyani?

3. Ino nciinshi nceenga tweeya kucakubonenaako ca bamanene ba mulibungano lyaba Desi? (Jelemiya 23:4)

³ Nsheenga bamanene bacita. Na mutoosebensa mbuli munene mulibungano, amubashibe kabotu bamakwesu abenankashi. (Amubelenge Jelemiya 23:4.) Nankashi waliina lya Desi, ngotwakabandikaawo mumutwi wamana wakaamba ayi, “Mapensho kaatana kucitika ndakalinga kuya mukushimikila akucana ciindi cakuba pomwi abamanene mbotwakalingaabo pomwi mukakoto kakushimikila.”b Ici cakapa kwaamba ayi cibabete cuubu bamanene aba kucafwa ba Desi paciindi bulwashi bwa COVID-19 ndyebwakatalika alimwi beshikamukowa babo bamwi bakafwa kubulwashi ubu.

4. Ino nceebonshi bamanene bakacikonsha kucafwa ba Desi, alimwi ino nciinshi nceenga tweeyawo?

⁴ Ba Desi bakaamba ayi, “Mukwiinga ndakalinga ndabashibila bamanene mbuli beshicibusa, cakambeta cuubu kubasansulwita mbondakalinga kulinyumfwa anshendakalinga kulisukama.” Ino nciinshi bamanene nceenga beeyawo? Amubashibe kabotu bamakwesu abenankashi kakutana kucitika mapensho. Amube shicibusa wabo. Na kwabuka bulwashi ubo bwapa kwaamba ayi mwaalilwe kubafwakashila, amucane nshila shimwi mbweenga mwabandikaabo. Ba Desi bakaamba ayi, “Cimwi ciindi bamanene bapusenepusene bakalinga kuntumina mafooni na mameseji pabushiku bomwi. Nabi kwaamba ayi Malembo ngobakalinga kuntumina ndakalinga kwaashi kale, akanjuminisha abuumbi.”

5. Ino bamanene inga bacita buyani kwaamba ayi bashibe shitoyandika bamakwesu abenankashi akubacafwa?

⁵ Nshila yomwi yeenga yamucafwa kushiba shitoyandika bamakwesu abenankashi, nkubeepusha miipusho yeenga taibalenshi nsoni. (Tus. 20:5) Mpashi inga mweelesha kubeepusha na balicite shakulya shikwene, musamu, alimwi ashintu shimwi nsheenga bayandika. Sa citooboneka ayi incito inga yamana na mpashi batoboneka kubulisha maali akulipila lenti? Sa inga bayandika kubacafwa kulembela ku mfulumeende kwaamba ayi ibape lucafwo na bubaambo ubo nkobuli? Ba Desi bakatambula lucafwo kuswa kubashominyinaabo. Nacibi boobo, lusuno bamanene ndobakabatondesha akubayuminisha kwiinda mukusebensesha Baibo nsheshakabacafwa abuumbi paciindi ndyebakalinga kwiinda mumapensho. Bakaamba ayi: “Bamanene bakapaila pomwi andime. Nabi kwaamba ayi nshintokwiibaluka nshebakaamba, ntokwiibaluka mbondakalinyumfwa. Yakalinga nshila Yehova mbwakalinga kundwiita ayi, ‘Tobete weenka.’”​—Isa. 41:10, 13.

6. Ino nshiinshi baanji mulibungano nsheenga bacita kwaamba ayi bacafwe bamwi? (Amubone cikope.)

⁶ Nsheenga bamwi bacita. Tulalangila bamanene kulama bamakwesu abenankashi mulibungano. Nacibi boobo, Yehova alisuni kwaamba ayi soonse tunoocafwana akuyuminishanya. (Gala. 6:10) Muntu utoociswa inga wayuminishikwa nabi twacitabo kantu kaniini kwaamba ayi tumucaafwe. Mwaana mpashi inga watuma kakaadi na shimwi nshaakalemba kwaamba ayi ayuminishe mukwesu. Mpashi wacanike inga wacafwilisha nankashi kwiinda mukumulilako shintu kumashoopu na kumucafwako ncito shimwi. Mpashi bamwi mulibungano inga bacafwilisha kwiinda mukutelekelako balwashi shakulya akubatolela kuŋanda yabo. Nacibi boobo, na bulwashi bulibo pali poonse, uli woonse mulibungano inga wayandika kuyuminishikwa. Mpashi inga twakalako kwakaciindi pesule lyakubungana kwaamba ayi tubandike abamakwesu abenankashi ku Ŋanda ya Bwaami nabi pafooni. Bamanene abalo balayandika kuyuminishikwa. Bakamboni bamwi balatuma tumakaadi twakulumba bamanene, abo liinji beshikuba ashakucita shiinji paciindi ndyekwabuka bulwashi bunene. Cilabota abuumbi na womwi awomwi wacita lubasu lwakwe kwaamba ayi tutolelele ‘kuyuminishanya akucafwana’!​—1 Tesa. 5:11.

AMUCAFWE BAMWI NDYEKWACITIKA MAPENSHO ANENE

7. Ino ngamapensho nshi eenga esa na kwacitika mapensho anene?

⁷ Buumi bwa muntu inga bwaaluka cakuteengashila alimwi paciindi ciniinibo na kwacitika mapensho anene. Bantu bamwi inga basowekelwa shintu, kunyonyookelwa maanda, kufwitwa shikamukowa na shicibusa. Bamakwesu abenankashi abalo balacitikilwa mapensho anene mbuli aya. Ino inga twabacafwa buyani?

8. Ino bamanene amitwi ya mikwashi inga bacita buyani kakutana kucitika mapensho anene?

⁸ Nsheenga bamanene bacita. Nobamanene, amucafwe bamakwesu abenankashi kulibambilila limwi kakutana kucitika mapensho anene. Amushinishe kwaamba ayi bamakwesu boonse bashibila limwi shakucita kwaamba ayi balishitilishe alimwi a mbweenga batumina bamanene. Ba Margaret mbotwakaambaawo mumutwi wamana bakaamba ayi: “Bamanene bakaamba likani palubasu lwa shitoyandika mulibungano lya kutucenjesha kwaamba ayi mulilo uswa muluundu inga watalika alimwi kumusena nkotukala. Bakaamba ayi na mfulumeende ikaambe ayi atulonge akushiya maanda esu nabi kutulwiita ayi bukaalo bwabica, tulyeelete kukonkela cakufwambaana.” Uku kwakalinga kucenjesha kwapaciindi ceelete mukwiinga ndipakeendabo nsondo shili 5 kwakesa mulilo uloondesha abuumbi. Ndyebatoocita kulambila kwamukwashi, mitwi ya mikwashi inga beenduluka mumakani ansheenga womwi awomwi mumukwashi wacita. Na mwebo amukwashi wanu mwalibambilila limwi, mulaakucikonsha kutolelela kukalika moyo na kukacitike mapensho anene.

9. Ino bamanene inga basebensela buyani pomwi kakutana kucitika mapensho anene apesule lya mapensho?

⁹ Na muli mutanjilili wa kakoto, amushinishe kwaamba ayi mulicite mafoni namba asebensa, akushiba kukala baabo boonse bali mukakoto kanu kakushimikila kakutana kucitika mapensho anene. Amulembe mulongo wamakani ayo akushinisha ayi ciindi aciindi mbwaabete. Lyalo na kwacitika mapensho anene, cilaakuba cuubu kutumina beshikushimikila boonse bali mukakoto kanu akushiba nshebatoyandika. Amutumine shikubunganya likoto lya bamanene makani ashitoyandika beshikushimikila bali mukakoto kanu, lyalo alakwe alaakutumina mutanjilili walubasu. Na bamakwesu aba basebensela pomwi, inga bacikonsha kucafwilisha munshila ibotu yeenga yakonsheka. Mulilo ndyewakamana, mutanjilili walubasu wakalinga kufwakashila libungano mwakalinga ba Margaret taakwe koona kwa mawoola 36, ceebo cakwaamba ayi wakalinga kusebensela pomwi abamanene ndyebakalinga kweelesha kwaamba ayi babandike akulama bamakwesu abenankashi bali 450 bakanyonyookelwa maandaabo. (2 Koli. 11:27) Aboobo uli woonse wakalinga kuyandika musena kwakukala wakacafwikwa.

10. Ino nceebonshi bamanene balabona ayi kucita ncito ya bweembeshi kulayandika? (Joni 21:15)

¹⁰ Bamanene balicite mukuli wakuyuminisha bamakwesu abenankashi kwiinda mukusebensesha Malembo akucafwa baabo balisukama. (1 Pit. 5:2) Na kwacitika mapensho anene, bamanene balyeelete kutaanguna kushinisha kwaamba ayi mukwesu alimwi anankashi womwi awomwi alibo kabotu, alicite shakulya, shakufwala, alimwi akwakukala. Nacibi boobo, banene inga bayandika kutolelela kuyuminisha bamakwesu abenankashi kwiinda mukusebensesha Malembo. (Amubelenge Joni 21:15.) Ba Harold basebensa mu Komiti ya Musampi alimwi bakabandikaawo abamakwesu abenankashi baanji bakakumwa amapensho anene, bakaamba ayi, “Cilatola ciindi kushibila alimwi, nabi kwaamba ayi inga batalika kulubako shintu isho nshobakasowekelwa. Cilatola ciindi kulubako shikamukowa na shicibusa wakafwa, shintu nshobakalinga kusuni abuumbi, na bukaalo buloondesha mbobakeendaamo. Kwiibaluka shintu ishi inga kwabapa kutalika kulinyumfwa buumba alimwi. Kulinyumfwa boobo teshi kubula lushomo.”

11. Ino nducafwo nshi ndweenga mikwashi yayandika?

¹¹ Bamanene balakonkela maswi akwaamba ayi ‘amulile abaabo batoolila.’ (Loma. 12:15) Bamanene balyeelete kucafwa baabo bakeenda mumapensho anene kushiba kwaamba ayi Yehova abamakwesu abenankashi bacibasuni. Bamanene inga bayandika kucafwa mikwashi kutolelela kucita shintu shakumushimu, mbuli kupaila, kwiiya, kucanika kumabungano, alimwi akwaabanamo lubasu muncito yakushimikila. Alimwi bamanene inga bayuminisha bashali kucafwa bana babo kubikila maano kushintu shiyandika abuumbi. Nobashali, amucafwe bana banu kwiibaluka kwaamba ayi Yehova alaakutolelela kuba Shicibusa wabo alimwi akubacafwa lyoonse. Alimwi amubasansulwiite ayi balaakutolelela kuba lubasu lwa mukwashi wa bamakwesu abenankashi nsengwe yoonse abo balibambite kubacafwa.​—1 Pit. 2:17.

12. Ino bamwi inga bacita buyani kwaamba ayi bacafwilishe mukupa lucafwo ndyekwacitika mapensho anene? (Amubone cikope.)

¹² Nsheenga bamwi bacita. Na kuli kumwi kwacitika mapensho anene kufwiifwi ankomukala, amwiipushe bamanene nsheenga mwaciita kwaamba ayi mucafwilishe. Mpashi inga mwalamako baabo bakashiya maandaabo na abo batoocafwilisha muncito yakupa lucafwo. Inga mwatolako shakulya ashintu shimwi shiyandika ku beshikushimikila batoyandika lucafwo. Na kwacitika mapensho anene nkulaale, inga mwacafwilisha kwiinda mukubapaililaako abo bali mumapensho. (2 Koli. 1:8-11) Mpashi inga mwapa lucafwo kwiinda mukupa maali akucafwilisha muncito ya nsengwe yoonse. (2 Koli. 8:2-5) Na inga mwacikonsha kuya mukucafwilisha kumusena kwakacitika mapensho anene, amwiipushe bamanene nsheenga mwaciita kwaamba ayi mucafwilishe. Na bamwiita, mpashi inga mwayandika kwiishikwa mbweenga mwasebensa alimwi akumutuma kutoyandika bunene lucafwo.

AMUCAFWE BAMAKWESU KULIYUMYA NDYEBATOOPENSHEKWA

13. Ino ngamapensho nshi ngobeendaamo bamakwesu bekala mushishi incito yesu moyakakashikwa?

¹³ Mushishi incito yesu moyakakashikwa, buumi bulayuma ceebo cakupenshekwa. Bamakwesu mushishi ishi baleenda mumapensho mbuli kubula maali, kuciswa, alimwi akufwitwa beshikamukowa na beshicibusa. Ceebo cakukashikwa, mpashi bamanene inga baalilwa kufwakashila na kubandika abaabo batoyandika kuyuminishikwa. Ishi nsheshakacitika kuli ba Andrei, mbotwakaambawo mumutwi wamana. Nankashi womwi wamu kakoto kabo kakushimikila wakalinga kucite lipenshi lya kubula maali. Lyalo wakalicana mu akisidenti. Wakalinga kuyandika ma opaleshoni aanji alimwi taakalinga kucikonsha kusebensa. Nabi kwaamba ayi kwakalinga shakukasha abulwashi bwa COVID-19, bamakwesu bakacita nshobakalinga kucikonsha kwaamba ayi bamucaafwe, alimwi Yehova wakalinga kubona shakalinga kucitika.

14. Ino bamanene inga bacita buyani kwaamba ayi batondeshe cakubonenaako ca kucinka manungo muli Yehova?

¹⁴ Nsheenga bamanene bacita. Ba Andrei bakapaila akucita nsheenga bacikonsha. Ino Yehova wakaukumbula buyani mupailo wabo? Wakapa kwaamba ayi bamwi mulibungano bakalinga kucikonsha kucita shiinji bacafwe nankashi. Bamwi bakalyaaba kunoomutola kucipatela. Bamwi bakamupa maali akumucafwa. Yehova wakapa kwaamba ayi bacite nsheenga bacikonsha kumucafwa. Alimwi wakashinisha kwaamba ayi shakacita bamakwesu abenankashi mulibungano shacafwa nankashi kuba ashoonse nshaakalinga kuyandika. (Ebu. 13:16) Nobamanene, na incito yesu yakakashikwa, amusenge bamwi ayi bamucaafwe. (Jele. 36:5, 6) Alimwi ciinditeewo, amucinke manungo muli Yehova. Inga wamucafwa kulama bamakwesu abenankashi.

15. Ino inga twacita buyani kwaamba ayi tutolelele kuba bacatene paciindi ndyetutoopenshekwa?

¹⁵ Nsheenga bamwi bacita. Na incito yesu yakashikwa, mpashi inga twayandika kunobungana mutukoto. Aboobo kutolelela kunyumfwana kulayandika abuumbi. Amulwane Satana, kuteshi bashominyinaanu. Amusuule shilubo sha bamwi, na kufwambaana kubandikishanya na mwapusana. (Tus. 19:11; Efe. 4:26) Amube balibambite kucafwana. (Taitasi 3:14) Lucafwo bamwi ndobakapa nankashi wakalinga kubulishite lwakayuminisha bamwi mukakoto kakushimikila. Bakatalika kunyumfwana abuumbi, anga ngumukwashi.​—Kulu. 133:1.

16. Kweelana a Bene Kolose 4:3, 18, ino inga twacita buyani kwaamba ayi tucafwe bamakwesu abenankashi batopenshekwa?

¹⁶ Bamakwesu abenankashi baanji balasebensela Yehova nabi ndyebakashikwa ku mfulumeende. Bamwi balaangwa ceebo ca nshobashoma. Inga twabapaililaako amikwashi yabo, alimwi akupailila baabo batoobika buumi bwabo mumapensho kwaamba ayi bacafwe bamakwesu abenankashi lwakumushimu, lwakumubili, akubeemikaninaako mukooti.c (Amubelenge Bene Kolose 4:3, 18.) Mutaluubi kwaamba ayi mipailo yanu inga yacafwa bamakwesu abenankashi!​—2 Tesa. 3:1, 2; 1 Timo. 2:1, 2.

17. Ino nshiinshi nsheenga mwaciita pacecino ciindi kwaamba ayi mulibambile kupenshekwa?

¹⁷ Inga mwacikonsha amukwashi wanu kulibambila kupenshekwa pacecino ciindi. (Milimo 14:22) Muciindi cakuyeeya bunene pashintu shibiibi shoonse sheenga shacitika, amuyumye bushicibusa bwanu a Yehova akucafwa bana banu abalo kucita boobo. Na cimwi ciindi mwalisukama, amupaile kuli Lesa camoyo woonse. (Kulu. 62:7, 8) Mbuli mukwashi amubandike sheebo shoonse sheenga shamupa kucinka manungo muli nguwe.d Bweenka kulibambilila limwi mapensho anene kaatana kucitika mbweenga kwacafwa bana banu, kulibambila limwi kupenshekwa akwalo inga kwabacafwa. Teshi bakaloondewo alimwi balaakukalika moyo mukwiinga mwakabaiisha kucinka manungo muli Yehova.

18. Ino nshiinshi nshetutolangila kunembo?

¹⁸ Luumuno lwakwe Lesa lulatupa kulinyumfwa kushitilishikwa. (Filip. 4:6, 7) Kwiinda muluumuno ulu, Yehova alatucafwa kukalika moyo paciindi ndyekwabuka malwashi, mapensho anene, alimwi akupenshekwa kutukuma munshiku shino. Alatuyuminisha kwiinda mubamanene abo basebensa cankusu. Alimwi soonse alatupa coolwe ca kucafwana. Luumuno ndotucite pacecino ciindi lulatucafwa kulibambila meelesho anene atoosa kunembo, kwiilikaawo a “mapensho anene.” (Mate. 24:21) Paciindi ico tulaakuyandika kutolelela kuba muluumuno kwaamba ayi tucikoonshe kucafwa bamwi kucita boobo. Nacibi boobo, na mapensho anene akeende, teshi tukabeewo mapensho eshi akanootupa kulisukama. Tulaakusangalala aluumuno lwancinencine kwamuyayaya kweelana a Yehova mbwaakalinga kusuni kuswabo kale kale.​—Isa. 26:3, 4.