Nshotuyandika Kucita na Umwi Mulibungano Wacita Cilubo Cinene

1. Ino Yehova alisuni ayi bantu boonse bacite nshi?

YEHOVA ndyaakalenga bantu wakabapa lwaanguluko lwakulisalila shakucita. Bushiku abushiku tulasala shakucita. Cintu ciyandika abuumbi muntu uli woonse nceenga wasalawo kucita, nkwaaba buumi bwakwe kuli Yehova akunoomulambila pomwi abamakwesu abenankashi. Ici Yehova ncaasuni ayi bantu boonse bacite. Ino nceebonshi? Nceebo cakwaamba ayi alisuni bantu alimwi alisuni ayi banooba alusangalalo. Alisuni ayi babe abushicibusa bubotu anguwe akulangila kukala kwamuyayaya.—Duto. 30:​19, 20; Gala. 6:​7, 8.

2. Ino Yehova alisuni ayi abo bakushikwa mulibungano bacite nshi? (1 Joni 2:1)

² Nacibi boobo, Yehova taakakatishiwo bantu ayi batalike kumusebensela. Alasuminisha muntu uli woonse kulisalila nshaasuni kucita. Ano ino bamanene balyeelete kucita buyani na Mwineklistu wakabombekwa wacita cilubo cinene? Na taana kwaana, alyeelete kukushikwa mulibungano. (1 Koli. 5:13) Ano nabi kwaamba ayi muntu wakushikwa mulibungano, Yehova alisunishishi ayi muntu uyo aane akuba abushicibusa buyumu anguwe alimwi. Cinene cakapa kwaamba ayi Yehova atupe cilubula, nkusuna kunolekelela baabo baana na bacita cilubo. (Amubelenge 1 Joni 2:1.) Yehova ngu Lesa ucite lusuno abuumbi uyo uyuminisha baabo bacita shilubo shinene kwaamba ayi baane.—Seka. 1:3; Loma. 2:4; Jemu. 4:8.

3. Ino tutokwiiya nshi mumutwi uyu?

³ Yehova alatulwiita mbwaalinyumfwa pashilubo apabaabo bacita shilubo shinene. Alimwi alisuni ayi andiswe tunolinyumfwa mbuli nguwe pamakani aya. Mutwi uyu utootucafwa kushiba mbweenga twacita boobo. Ndyemutobelenga mutwi uyu, amubone (1) bamu libungano lyaku Kolinto nshobakacita mukwesu umwi ndyakacita cilubo cinene, (2) Paulo nshaakabalwiita kucita bamu libungano musankwa uyo ndyaakaana, alimwi (3) Yehova mbwalinyumfwa pabaabo bacita shilubo shinene.

BAMU LIBUNGANO NSHOBAKACITA MUKWESU UMWI NDYAAKACITA CILUBO CINENE

4. Ino nshiinshi shakacitika mulibungano lyaku Kolinto? (1 Bene Kolinto 5:​1, 2)

⁴ Amubelenge 1 Bene Kolinto 5:​1, 2. Paulo ndyakalinga palweendo lwa bumishonali lwatatu, wakanyumfwa makani atabete kabotu pa shakalinga kucitika mulibungano lipya lyaku Kolinto. Mukwesu umwi mulibungano ili wakalinga kucita bulale abanyina bakamucanaamo. Ici cakalinga ncintu cikankamika cakwaamba ayi nabibo bantu batakalinga kulambila Lesa bakalinga kucishi ayi tacibete kabotu! Sombi bamu libungano bakalinga kuyeeya ayi palibo kabotu kusuminisha mukwesu uyo kutolelela kuba mulibungano. Mpashi bamwi mulibungano bakalinga kuyeeya ayi batomutondesha nkuumbu bweenka Yehova mbwaacita kubantu batamaninite. Sombi Yehova taasuminishi bantu batolelela kucita shibiibi kuba pakati kabantu bakwe. Ncakutatoonsha kwaamba ayi shintu shibiibi mukwesu uyo nshaakalinga kucita, shakalinga kupa kwaamba ayi libungano litabi ampuuwo ibotu. Alimwi naakwiinga wakatolelela kuba mulibungano, naakwiinga Beneklistu bamwi bakatalika kucita shibiibi. Aboobo ino nshiinshi Paulo nshaakalwiita bamu libungano ayi bacite kumukwesu uyo?

5. Ino nshiinshi Paulo nshaakalwiita bamu libungano ayi bacite, alimwi ino wakalinga kusansulula nshi? (1 Bene Kolinto 5:13) (Amubone acikope.)

⁵ Amubelenge 1 Bene Kolinto 5:13. Yehova wakatanjilila Paulo kulembela nkalata bamu libungano akubalwiita ayi muntu uyo utasuni kwaana alyeelete kukushikwa mulibungano. Ino nshiinshi bamu libungano nshobakalinga kweelete kucita kumuntu uyo? Paulo wakabalwiita ayi ‘bacileke kupanga bushicibusa’ anguwe. Ino Paulo wakalinga kusansulula nshi ndyaakabalwiita kucita boobo? Wakalinga kusansulula ayi kucita boobo kwakalinga kwiilikaawo a ‘kuteelesha nabibo kulya amuntu wamushobo uyu.’ (1 Koli. 5:11) Na tutoolita pomwi amuntu umwi, liinji tulaba amibandi isangalasha. Aboobo Paulo wakalinga kusansulula ayi tabakalinga kweelete kunoocitila pomwi amusankwa uyo shintu shimwi mbuli ndyebatoocita shakulikondelesha. Kucita boobo kwakalinga kushitilisha libungano kwaamba ayi litolelele kuba lisalalite. (1 Koli. 5:​5-7) Kwiilikaawo, kuleya kunoocanika bunene amusankwa uyo kwakalinga kusa mukumucafwa kushiba ayi wakacita cilubo cinene abuumbi, alimwi mpashi naakwiinga wakalinyumfwa cibiibi akwaana.

6. Ino nshiinshi bamu libungano nshobakacita ndyebakatambula nkalata Paulo njaakabalembela, alimwi ino nshibotu nshi shakaswaamo?

⁶ Paulo ndyaakabatumina nkalata Beneklistu baku Kolinto, wakatalika kuyeeya nshobakalinga kusa mukucita pesule lya kwiitambula. Ndipakeenda ciindi, Taitasi wakaya kuli Paulo akumulwiita makani asangalasha abuumbi. Bamu libungano bakakonkela Paulo nshaakabalwiita akumukusha mulibungano musankwa watakalinga kusuni kwaana. (2 Koli. 7:​6, 7) Alimwi cisangalasha ncakwaamba ayi, bamu libungano ndyebakakonkela Paulo nshaakabalwiita, musankwa uyo wakaana! Wakaalula buumi bwakwe ambwakalinga kubona shintu akutalika kukonkela njiisho shakwe Yehova shiluleme. (2 Koli. 7:​8-11) Aboobo ino nshiinshi Paulo nshaakalwiita bamu libungano ayi bacite musankwa uyo ndyaakaana?

BAMU LIBUNGANO NSHOBAKACITA MUSANKWA UYO NDYAAKAANA

7. Ino nshiinshi musankwa waku Kolinto nshaakacita pesule lyakwaamba ayi wakushikwa mulibungano? (2 Bene Kolinto 2:​5-8)

⁷ Amubelenge 2 Bene Kolinto 2:​5-8. Paulo wakaamba ayi ‘kululikwa [musankwa uyo] nkwaakapekwa kuli ndimwe nobaanji kulikwene.’ Ici cakalinga kusansulula ayi musankwa uyo ndyaakakushikwa mulibungano, wakashiba ayi wakalinga kuyandika kwaana. Alimwi ceebo cakwaamba ayi wakaana, bamanene bakalinga kweelete kumuboosha mulibungano.—Ebu. 12:11.

8. Ino nshiinshi Paulo nshaakalwiita bamu libungano ayi bacite musankwa wakabisha ndyaakaana?

⁸ Musankwa uyo ndyaakaana, Paulo wakalwiita bamanene ayi bamubooshe mulibungano. Alimwi wakabalwiita ayi ‘mulyeelete kumulekelela akumuyuminisha . . . mutondeshe ayi ncakwiila mulimusuni.’ Paulo wakalwiita Beneklistu baku Kolinto kutondesha musankwa uyo ayi ncakwiila bakamulekelela alimwi balimusuni, kwiinda mushintu nshobakalinga kwaamba akucita. Kucita boobo kwakalinga kusa mukucafwa mukwesu uyo kushiba ayi balisangalete ayi waboolela mulibungano.

9. Ino nshiinshi mpashi shakapa kwaamba ayi bamwi cibabete ciyumu kulekelela mukwesu wakaana?

⁹ Mpashi pakutaanguna bamwi tabakwe kusangalala ndyebakanyumfwa ayi musankwa uyo wabooshekwa mulibungano. Ino nceebonshi ncetwaambila boobo? Mpashi bamwi bakalinga kunookalalitebo ceebo cakwaamba ayi musankwa uyo wakaleta mapensho mulibungano. Alimwi mpashi bamwi bakalinga kunocilinyumfwite cibiibi ceebo cakwaamba ayi wakabakalasha. Bamu libungano bakasebensa cankusu kwaamba ayi banokonkela milawo yakwe Yehova. Aboobo mpashi bamwi bakalinga kulinyumfwa ayi tacakalinga kabotu kusuminisha muntu wakacita shilubo shibiibi abuumbi kuboolela mulibungano. (Amweelanye a Luka 15:​28-30.) Ano ino nceebonshi bamu libungano bakalinga kuyandika kutondesha mukwesu uyo ayi ncakwiila balimusuni?

10-11. Ino naakwiinga nshiinshi shakacitika bamanene nibakakaka kumulekelela musankwa wakabisha pesule lyakwaamba ayi waana?

¹⁰ Ino naakwiinga musankwa uyo wakalinyumfwa buyani bamanene nibatakwe kumuboosha mulibungano pesule lyakwaamba ayi waana? Alimwi ino naakwiinga wakalinyumfwa buyani bamakwesu abenankashi nibatakwe kumutondesha lusuno pesule lyakwaamba ayi wabooshekwa mulibungano? Naakwiinga wakalinyumfwa cibiibi abuumbi akulefuka. Alimwi naakwiinga wakalinyumfwa ayi inga tacikonsheki kutalika alimwi kusebensela Yehova. Kwiilikaawo, mpashi naakwiinga wakatalika kuyeeya ayi Yehova inga taamulekeleliwo alimwi tayandiki kwaalula buumi bwakwe.

¹¹ Alimwi naakwiinga bamakwesu abenankashi bakakaka kumulekelela, naakwiinga bakanyonyoola bushicibusa bwabo a Yehova. Ino nceebonshi nceenga twaambila boobo? Kucita boobo naakwiinga kwakatondesha ayi tabatokonkela cakubonenaako cakwe Yehova uyo ulekelela bamucita shibiibi na baana. Sombi naakwiinga kwakatondesha ayi batokonkela cakubonenaako cakwe Satana ucite lunkutwe alimwi utacitewo nkuumbu. Naakwiinga bakasuminisha Satana kubasebensesha kwaamba ayi balefule musankwa uyo akupa kwaamba ayi atatoleleli kusebensela Yehova.—2 Koli. 2:​10, 11; Efe. 4:27.

12. Ino nshiinshi bamu libungano lyaku Kolinto nshobakalinga kweelete kucita kwaamba ayi bakonkele cakubonenaako cakwe Yehova?

¹² Aboobo ino nshiinshi bamu libungano lyaku Kolinto nshobakalinga kweelete kucita kwaamba ayi bakonkele cakubonenaako cakwe Yehova kuteshi cakwe Satana? Nkwiinda mukulekelela baabo baana bweenka Yehova mbwaacita. Bakalemba Baibo bamwi bakaamba Yehova mbwalekelela. Defedi wakaamba ayi ‘muli babotu alimwi mulilibambite kulekelela.’ (Kulu. 86:5) Mika wakalemba ayi: ‘Ino ngani Lesa weelene amwebo, nomushiminganya shibiibi akulekelela milandu ya bantu?’ (Mika 7:18) Alimwi Isaya wakaamba ayi: ‘Mucita shibiibi ashiye nshila shakwe, ee, shikubisha aleke miyeeyo yakwe ibiibi. Aapilulukile kuli Yehova, alakwe utoomunyumfwila nkuumbu. Aapilulukile kuli Lesa wesu mukwiinga ulaakumulekelela camoyo woonse.’—Isa. 55:7.

13. Ino nceebonshi musankwa wakabisha bakamuboosha mulibungano? (Amubone kabokosi kacite mutwi utokwaamba ayi “Ino Ndilili Musankwa Waku Kolinto Ndyakabooshekwa Mulibungano?”)

¹³ Kwaamba ayi bamu libungano lyaku Kolinto bakonkele cakubonenaako cakwe Yehova, bakalinga kweelete kumulekelela musankwa uyo, akutondesha ayi balimusuni alimwi balisangalete ceebo cakwaamba ayi wabooshekwa mulibungano. Paulo wakaamba ayi naakwiinga bakamulekelela musankwa uyo wakaana, naakwiinga bakatondesha ayi ‘balanyumfwila mushintu shoonse.’ (2 Koli. 2:9) Musankwa uyo wakaana, nabi kwaamba ayi pakeendabo myeenshi iniini kuswa ciindi ndyakakushikwa mulibungano. Aboobo bamanene tabakalinga kweelete kuwayawaya kumuboosha mulibungano.

MBWEENGA TWATONDESHA BULULAMI ANKUUMBU BWEENKA MBULI YEHOVA

14-15. Ino nshiinshi nshotweeya kuswa kushakacitika mulibungano lyaku Kolinto musankwa umwi ndyakabisha? (2 Pita 3:9) (Amubone acikope.)

¹⁴ Yehova wakapa kwaamba ayi makani aamba pashintu bamu libungano lyaku Kolinto nshobakacita musankwa umwi ndyakabisha, alembwe mu Baibo kwaamba ayi twiiyeeko. (Loma. 15:4) Makani aya alatwiisha ayi Yehova taasuminishi bantu bacita shilubo shinene alimwi batasuni kwaana, kutolelela kuba mulibungano. Bamwi inga bayeeya ayi ceebo cakwaamba ayi Yehova alicite nkuumbu, inga wasuminisha muntu utasuni kwaana kutolelela kuba mulibungano. Sombi ubo Yehova teshi mbwatondesha nkuumbu. Nabi kwaamba ayi Yehova alicite nkuumbu, taasuminishi bantu kunocitabo shintu shili shoonse nshobasuni. Njiisho shakwe shaamba pa shiluleme ashitaluleme tashaalukiiwo. (Judi 4) Na Yehova wasuminisha bantu batasuni kwaana kutolelela kuba mulibungano, ingayi taatotondesha nkuumbu mukwiinga bamu libungano inga batalika kucita shintu shitabete kabotu sheenga shanyonyoola bushicibusa bwabo anguwe.—Tus. 13:20; 1 Koli. 15:33.

¹⁵ Nacibi boobo, makani aya alatwiisha ayi Yehova taasuniiwo kwaamba ayi muntu nabi womwi akanyonyoolwe. Alisuni kupulusha bantu na kacikonsheka. Alatondesha nkuumbu kubantu abo baalula mbobayeeya anshobacita alimwi basuni kutalika kumusebensela. (Esek. 33:11; amubelenge 2 Pita 3:9.) Aboobo musankwa waku Kolinto ndyaakaana akwaalula buumi bwakwe, Yehova wakalwiita bamu libungano ayi bamulekelele akumutambula.

16. Ino mutolinyumfwa buyani pali Yehova pesule lyakwiiya shakacitika mulibungano lyaku Kolinto?

¹⁶ Shakacitika mulibungano lyaku Kolinto shilatondesha ayi Yehova alicite lusuno abuumbi, bululami alimwi alacita shintu cakutanyengelela. (Kulu. 33:5) Tulalumbaisha Yehova ceebo ca mibo ibotu njaacite. Tulalumba ceebo cakwaamba ayi alicite nkuumbu mukwiinga soonse tulabisha alimwi tulayandika kwaamba ayi anotulekelela. Alimwi soonse tulalumba Yehova pakutupa cilubula kwaamba ayi tunolekelelwa shibiibi shesu. Cilayuminisha abuumbi kushiba ayi Yehova alibasuni bantu alimwi alisuni ayi bakabe abuumi bubotu kwamuyayaya!

17. Ino tulaakwiiya nshi mumitwi itokonkelaawo?

¹⁷ Na muntu umwi wacita cilubo cinene, ino nshiinshi bamanene nshobeelete kucita kwaamba ayi bakonkele cakubonenaako cakwe Yehova cakutondesha lusuno akumucafwa kwaamba ayi aane? Ino nshiinshi bamu libungano nshobeelete kucita na bamanene basalawo kukusha muntu na kumuboosha mulibungano? Tulaakucana shikumbulo kumiipusho iyi mumitwi itokonkelaawo.