Mbweenga Bamanene Bacafwa Baabo Bakushikwa Mulibungano

1-2. (a) Ino Yehova alalinyumfwa buyani pabaabo batolelela kucita cilubo cinene alimwi batasuni kwaana? (b) Ino nciinshi Yehova ncaasuni ayi bamucita shibiibi bacite?

YEHOVA taasuminishi bantu kunocitabo shintu shili shoonse nshobasuni; alipatite shibiibi. (Kulu. 5:​4-6) Yehova alisuni ayi tunokonkela njiisho shakwe shamu Baibo. Nacibi boobo, Yehova alicishi ayi tatumaninite alimwi cimwi ciindi inga twabiisha. (Kulu. 130:​3, 4) Sombi taabi bushicibusa a ‘bantu bataciti kuyanda kwakwe abo baalula nkuumbu shakwe kuba nshila yakunoocitilamo shintu shilensha nsoni.’ (Judi 4) Alimwi Baibo ilaamba ayi bantu bataciti ‘kuyanda kwakwe Lesa’ balaakunyonyoolwa pa nkoondo ya Amagedoni.—2 Pit. 3:7; Ciyu. 16:16.

² Nacibi boobo, Yehova taasuni muntu nabi womwi kunyonyoolwa. Kweelana ambotwakeeya mu mitwi yamana mu magazini iyi, Baibo ilatondesha patuba ayi Yehova ‘alisuni kwaamba ayi boonse baane kushibiibi shabo.’ (2 Pit. 3:9) Bweenka mbuli Yehova, bamanene balakalika moyo ndyebatokweelesha kucafwa muntu wakacita cilubo kwaamba ayi aane akuba abushicibusa buyumu a Yehova alimwi. Nacibi boobo, cimwi ciindi uyo wakacita cilubo inga wakaka kwaana. (Isa. 6:9) Bamwi balatolelela kucita shibiibi, nabi kwaamba ayi bamanene beelesha kubacafwa mankanda aanji. Ino nshiinshi bamanene nshobeelete kucita na caba boobo?

“AMUKUSHE MUNTU MUBIIBI PAKATI KANU”

3. (a) Ino nshiinshi bamanene nshobeelete kucita na muntu wakacita cilubo cinene sombi taasuni kwaana? (b) Ino nceebonshi nceenga twaambila ayi na muntu wakushikwa mulibungano ingayi walisalila mwiine?

³ Na muntu wakacita cilubo cinene sombi taasuni kwaana, bamanene balyeelete kukonkela butanjilishi mbotucana pa 1 Bene Kolinto 5:13 bwakwaamba ayi: “Amukushe muntu mubiibi pakati kanu.” Muntu uyo wakacita cilubo alicishi ayi na wabula kwaana, alaakukushikwa mulibungano. Aboobo cilababo anga mwiine wasalawo kukushikwa mulibungano. Alatebula sheesho nshaakashanga. (Gala. 6:7) Ino nceebonshi nceenga twaambila boobo? Nceebo cakwaamba ayi wakakaka kwaaluka nabi kwaamba ayi bamanene bakeelesha kumucafwa mankanda aanji. (2 Baam. 17:​12-15) Nshaacita shilatondesha ayi taasuniiwo kukonkela milawo yakwe Yehova.—Duto. 30:​19, 20.

4. Ino nceebonshi bamanene baloolobesha kulibungano na muntu utasuni kwaana wakushikwa mulibungano?

⁴ Muntu utasuniiwo kwaana alakushikwa mulibungano, alimwi bamanene baloolobesha kulibungano ayi teshi womwi wa Bakamboni Bakwe Yehova. Luyaando lwakoolobesha boobo teshi kusuna kumulensha nsoni uyo wakacita cilubo. Sombi nkushibisha bamakwesu abenankashi kwaamba ayi bakonkele mulawo wamu Baibo waamba ayi balyeelete ‘kucileka kupanga bushicibusa’ anguwe alimwi ‘kuteelesha nabibo kulya amuntu wa mushobo uyo.’ (1 Koli. 5:​9-11) Kuli sheebo shibotu Yehova ncaakatupeta mulawo uyu. Mutumwi Paulo wakalemba ayi: “Tumena tuniini tulafufumusha mulwi wa fulaulo woonse.” (1 Koli. 5:6) Na bamanene basuminisha muntu utasuni kwaana kutolelela kuba mulibungano, bamwi inga batalika kubona ayi tabayandiki kukonkela milawo yakwe Yehova.—Tus. 13:20; 1 Koli. 15:33.

5. Na mukwesu nabi nankashi wakushikwa mulibungano, ino tulyeelete kunoomubona buyani, alimwi ino nceebonshi?

⁵ Na mukwesu nabi nankashi wakushikwa mulibungano, ino tulyeelete kunoomubona buyani? Nabi kwaamba ayi tulacileka kuba bushicibusa anguwe, tulyeelete kunokwiibaluka ayi inga waaluka. Ali anga ni mbelele yasoweka. Na mbelele yaswa mulitanga, inga yaboolela alimwi kushibye. Munokwiibaluka ayi muntu uyo wakaaba buumi bwakwe kuli Yehova. Sombi cibicaako ncakwaamba ayi alacileka kutolelela kushomeka kuli Yehova kweelana ambwaakamushomesha. Alimwi kucita boobo inga kwamunjisha mumapensho. (Esek. 18:31) Nacibi boobo, inga twalangila ayi muntu uyo alakwaaluka, kulilabo ciindi kaciciliiko alimwi Yehova kaalibambite kutondesha nkuumbu. Aboobo ino nshiinshi nsheenga bamanene bacita kwaamba ayi bacafwe muntu wakacita cilubo uyo wakakushikwa mulibungano?

BAMANENE NSHOBACITA KWAAMBA AYI BACAFWE BAABO BAKAKUSHIKWA MULIBUNGANO

6. Ino nshiinshi bamanene nshobacita kwaamba ayi bacafwe muntu na wakushikwa mulibungano?

⁶ Sa bamanene balacileka kweelesha kucafwa muntu kwaamba ayi aboolele kuli Yehova na wakushikwa mulibungano? Sobwe napaceyi! Na bamanene balwiita muntu ayi atokushikwa mulibungano, balamulwiita ansheenga wacita kwaamba ayi akabooshekwe. Sombi kuli ashimwi bamanene nshobacita. Liinji balalwiita wooyo wakacita cilubo ayi balaakusuna kubandikaakwe alimwi na pakeende myeenshi iniini kwaamba ayi babone na wakaalula mbwayeeya. Na uyo wakacita cilubo wasumina kubandika abamanene pesule lya myeenshi iniini, balaakumuyuminisha kwaana akuboolela kuli Yehova. Na cacanika ayi paciindi ici taacina kwaalula mbwayeeya, bamanene balaakweelesha kubandikaakwe alimwi kunembo akumuyuminisha kwaana.

7. Ino nshiinshi nsheenga bamanene bacita kwaamba ayi bakonkele cakubonenaako cakwe Yehova na muntu umwi wakushikwa mulibungano? (Jelemiya 3:12)

⁷ Bamanene baleelesha kukonkela cakubonenaako cakwe Yehova cakutondesha nkuumbu, kubaabo bakakushikwa mulibungano. Kucakubonenaako, Yehova wakalinga kutalika kweelesha kucafwa bene Isilaeli nabi kabatana kwaana. Wakalinga kutuma bashinshimi bakwe nabi bene Isilaeli kabatana kwaana. Kweelana ambotwakeeya mumutwi wabili mu magazini iyi, Yehova wakatondesha mbwaacite nkuumbu ndyaakalwiita Osiya kwaamba ayi alekelele mukaakwe akumuboosha kuŋanda nabi kwaamba ayi wakalinga kunoocicita cilubo cinene. (Osi. 3:1; Mala. 3:7) Bamanene balakonkela cakubonenaako cakwe Yehova cakusunishisha kwaamba ayi muntu wakacita cilubo aboolele kuli Yehova, alimwi tabaciti sheenga shapa kwaamba ayi cimubete ciyumu kuboolela.—Amubelenge Jelemiya 3:12.

8. Ino cikoshanyo ca mwaana wakaashuka cilatucafwa buyani kunyumfwishisha Yehova mbwaalinyumfwa pa baabo bakacileka kumusebensela? (Luka 15:7)

⁸ Amuyeeye pa cikoshanyo ca mwaana wakaashuka Yesu ncaakaamba, ncotwakeeya mumutwi wabili mu magazini iyi. Baishi ndyebakamubona mwanaabo keesa kuŋanda, ‘bakamucicilila, bamukumbata akumufyonta.’ (Luka 15:20) Baishi tabakwe kulindila ayi mwanaabo ataangune kusenga kulekelelwa. Muciindi cakucita boobo, bakamucicilila mwanaabo mukwiinga bakalinga kumusuni. Ubu bweenka Yehova mbwaalinyumfwa pa baabo bakacileka kumusebensela alimwi bamanene baleelesha cankusu kukonkela cakubonenaako cakwe. Balisuni kwaamba ayi abo bakacileka kusebensela Yehova baboolele kuli nguwe. (Luka 15:​22-24, 32) Na uyo wakakushikwa mulibungano wabooshekwa, Yehova, Yesu, baanjelo abamakwesu abenankashi boonse mulibungano, balasangalala abuumbi!—Amubelenge Luka 15:7.

9. Ino Yehova alisuni ayi abo bacita shibiibi bacite nshi?

⁹ Kweelana anshotweeya kusa mukushika waano, twanyumfwishisha kabotu ayi Yehova taasuminishi baabo batasuni kwaana kutolelela kuba mulibungano. Nacibi boobo, alatolelela kweelesha kubacafwa. Alisuni ayi baboolele kuli nguwe. Ino alalinyumfwa buyani na muntu waana? Palilembo lya Osiya 14:4 palaamba ayi: ‘Ndaakubashilika ku bulwashi bwabo bwa kutashomeka. Ndaakubasuna mukuliyandila, mukwiinga bukali bwangu pali mbabo bwamana.’ Ceebo cakushiba Yehova mbwalinyumfwa pa baabo baana, bamanene baleelesha kubona shili shoonse muntu nshaatoocita shitotondesha ayi watalika kwaana. Kwiilikaawo, maswi aya alyeelete kuyuminisha baabo bakacileka kusebensela Yehova kushiba ayi alibasuni alimwi alisuni ayi baboolele kuli nguwe.

10-11. Ino nshiinshi bamanene nshobacita kwaamba ayi beeleshe kucafwa baabo bakakushikwa kale kale mulibungano?

¹⁰ Ino nshiinshi bamanene nshobacita kwaamba ayi beeleshe kucafwa baabo bakakushikwa kale kale mulibungano, mpashi myaaka iinji yainda? Mpashi bantu abo bakacileka kucita cilubo cakapa kwaamba ayi bakushikwe mulibungano. Lyalo bamwi mpashi inga tabeebalukiiwo acilubo ncobakabakushila mulibungano. Muli moonse mweenga cabeta, bamanene balaakweelesha kushiba bantu abo nkobakala lyalo akubafwakashila. Na babafwakashila, balapaila ambabo akubayuminisha kuboolela mulibungano. Kwalo, na peenda myaaka iinji kuswa ciindi muntu ndyaakakushikwa mulibungano, inga kaali wakaboolela paanshi abuumbi lwakumushimu. Aboobo na muntu uyo waamba ayi alisuni kubooshekwa mulibungano, bamanene inga basala mukwesu nabi nankashi kwaamba ayi atalike kumwiisha Baibo, nabi kaatana kubooshekwa. Alimwi bamanene lyoonse mbobeelete kubika bubaambo bwa kumwiisha Baibo.

¹¹ Bamanene balatondesha nkuumbu kubantu bweenka Yehova mbwaacita. Aboobo baleelesha kulangoola baabo boonse bakacileka kumusebensela akubayuminisha kuboolela kuli nguwe. Na muntu wakacita cilubo watondeshabo ayi waana akucileka kucita shibiibi, inga wabooshekwa mulibungano.—2 Koli. 2:​6-8.

12. (a) Ino mbukaalo nshi bamanene ndyebeelete kucenjela abuumbi kabatana kuboosha muntu mulibungano? (b) Ino nceebonshi tatweelete kunoyeeya ayi bantu bacita shilubo shimwi Yehova inga tabatondeshi nkuumbu? (Amubone amakani amweela.)

¹² Mubukaalo bumwi bamanene balyeelete kucenjela abuumbi kabatana kuboosha muntu mulibungano. Kucakubonenaako, bamanene balyeelete kushinisha ayi muntu waana, na muntu uyo wakacita cilubo cinene mbuli kucita shintu shitabete kabotu ku mwaana muniini, kupondoka kuswa mucancine, na kusuna kumana cikwati mpashi kwiinda mukucita bulale kashanga. (Mala. 2:14; 2 Timo. 3:6) Balyeelete kushitilisha bamakwesu abenankashi mulibungano. Sombi tulyeelete kunokwiibaluka ayi Yehova alaakutambula muntu uli woonse wakalinga kucita shibiibi uyo waana cancinencine akucileka kucita shintu isho. Aboobo nabi kwaamba ayi bamanene balasuna kushinisha ayi uyo wakacenjeeka bamwi waana cancinencine, tabeelete kunoyeeya ayi Yehova inga taamutondeshi nkuumbu.a—1 Pit. 2:10.

NSHEENGA BAMU LIBUNGANO BACITA

13. Ino nshotucita ku muntu wakalulikwa alimwi a wakakushikwa mulibungano shilipusene buyani?

¹³ Kweelana ambotwakeeya mumutwi wamana, cimwi ciindi bamanene baloolobesha ayi muntu umwi wakalulikwa. Na caba boobo, inga twatolelela kuba abushicibusa amuntu uyo ceebo cakwaamba ayi wakaana alimwi wakacileka kucita shintu shibiibi. (1 Timo. 5:20) Acili lubasu lwa libungano alimwi alayandika kuyuminishikwa ku bamakwesu abenankashi kwaamba ayi atolelele kucita shintu shiluleme. (Ebu. 10:​24, 25) Nacibi boobo, ubo teshi mbociba na muntu wakushikwa mulibungano. ‘Tulacileka kupanga bushicibusa anguwe’ nabibo ‘kulya amuntu wa mushobo uyo.’—1 Koli. 5:11.

14. Ino Mwineklistu inga wasebensesha buyani njeelacaamba yakwe yakaiishikwa a Baibo ndyatosalaawo shakucita ku muntu wakakushikwa mulibungano? (Amubone acikope.)

¹⁴ Sa butanjilishi mbotucana pa 1 Bene Kolinto 5:11 bulasansulula ayi inga tatwiiti muntu wakakushikwa mulibungano kusa mukucanika kumabungano nabibo kumwaansha na wacanikaako? Sobwe. Ncakwiila kwaamba ayi inga tatucitili pomwi anguwe shintu. Sombi Beneklistu inga basebensesha njeelacaamba yabo yakaiishikwa a Baibo kwiitako muntu wakakushikwa mulibungano kusa mukucanika kumabungano. Mpashi inga waba shikamukowa na muntu ngobakalinga kunyumfwanaakwe abuumbi kaatana kukushikwa mulibungano. Ino nshiinshi nshotweelete kucita na muntu wakakushikwa wacanikaako kumabungano? Kale kale, tatwakalinga kumwanshaawo na wacanikaako. Nacibi boobo, Mwineklistu uli woonse alyeelete kusebensesha njeelacaamba yakwe yakaiishikwa a Baibo kusalawo shakucita pamakani aya. Bamwi inga baanguluka kumwaanshabo muntu uyo na kumutambula kumabungano. Sombi inga tatutoli ciindi cilaamfu kunobandika anguwe nabi kucitila pomwi anguwe shintu shimwi.

15. Ino mbantu ba buyani Joni mbaakalinga kwaambawo pa 2 Joni 9-11? (Amubone akabokosi kacite mutwi utokwaamba ayi “Sa Joni a Paulo Bakalinga Kwaamba Pashilubo Shikoshenye?”)

¹⁵ Bamwi mpashi inga baliipusha ayi, ‘Te Baibo ilaamba ayi na Mwineklistu waansha muntu wa mushobo uyo nkokwaamba ayi wasuminisha micito yakwe ibiibi?’ (Amubelenge 2 Joni 9-11.) Na twabona Joni nshaakalinga kwaambawo mumavesi amwi mulilembo ili, wakalinga kwaamba pa bantu bakapondoka kuswa mucancine alimwi abo batolelela kuyuminisha bamwi kucita shintu shibiibi. (Ciyu. 2:20) Aboobo bamanene inga tababiki bubaambo bwa kufwakashila muntu utolelela kuyuminisha njiisho sha baabo bakapondoka kuswa mucancine na kuyuminisha bamwi kucita shintu shibiibi. Nacibi boobo, muntu uyo inga waana. Sombi inga tatumwanshiiwo nabi kumwiita kusa mukucanika kumabungano, kushikila na akaane.

KUTONDESHA NKUUMBU BWEENKA MBULI YEHOVA MBWAACITA

16-17. (a) Ino Yehova alisuni ayi bamucita shibiibi bacite nshi? (Esekelo 18:32) (b) Ino nshiinshi bamanene nshobacita shitondesha ayi balasebensela pomwi a Yehova?

¹⁶ Ino nshiinshi nshotweeya mumagazini iyi? Yehova taasuniiwo kwaamba ayi muntu nabi womwi akanyonyoolwe! (Amubelenge Esekelo 18:32.) Alisuni kwaamba ayi bamucita shibiibi baane akuba abushicibusa anguwe. (2 Koli. 5:20) Ncoceeco lyoonse Yehova alayuminisha basebenshi bakwe abo bakacileka kumusebensela kwaamba ayi baane akuboolela kuli nguwe. Bamanene balasebensela pomwi a Yehova kwaamba ayi bacafwe bantu bakacita shilubo shinene kwaana.—Loma. 2:4; 1 Koli. 3:9.

¹⁷ Kwiculu kulaba kusangalala abuumbi na bamucita shibiibi baana! Yehova Ishiwesu wakwiculu, alasangalala abuumbi na mbelele yakalinga yasoweka yaboolela mulibungano. Kukutumana kuyeeya pa nkuumbu Yehova nshaacite, kulapa kwaamba ayi tumusuune abuumbi.—Luka 1:78.