Mbweenga Twakoma Lunkumbwa Lutabete Kabotu

1. Ino nciinshi soonse ncotweelesha kukoma?

SA KULIWO bushiku ndyekwakalinga kwacaalabo paniini kwaamba ayi mucite cintu Yehova ncaatasuni? Na ubo mbocibete, tamweelete kulefuka. Baibo ilaamba ayi: ‘Meelesho amushikila taapusene ameelesho ashikila bantu bamwi boonse.’ (1 Koli. 10:13) Maswi aya alasansulula ayi na kuli lunkumbwa ndomutokweelesha kukoma, kuli abamwi batokweelesha kucita boobo. Tamubete nweenka alimwi Yehova inga wamucafwa kukoma lunkumbwa ulo.

2. Ino ndunkumbwa lwa buyani Beneklistu abashikwiiya Baibo bamwi ndobeelesha kukoma? (Amubone ashikope.)

² Baibo alimwi ilaamba ayi: ‘Muntu woonse aleeleshekwa na wayungoolwa akucenjeekwa alunkumbwa lwakwe mwiine.’ (Jemu. 1:14) Lilembo ili lilatucafwa kushiba ayi muntu womwi awomwi inga weeleshekwa kushintu shipusenepusene. Kucakubonenaako, Mwineklistu umwi inga weeleshekwa koonana amusankwa na amwanakashi, lyalo umwi inga weeleshekwa koonana amusankwanyina na amwanakashinyina. Abo bakacileka kweebela shintu shileta miyeeyo yakoonana, inga batalika alimwi kusunishisha kusheebela. Alimwi abo bakacileka kusebensesha misamu ikola abaabo bakacileka kunwa bwalwa cakwiindilisha, mpashi inga batalika alimwi kusunishisha kucita boobo. Ishi nshoshintu Beneklistu abashikwiiya Baibo bamwi nshobeelesha kukoma. Mpashi soonse twakalinyumfwawo kale mbuli mutumwi Paulo, ndyaakaamba ayi: ‘Na ndisuni kucita cintu cibotu, ndacana ayi ntoocita cibiibi.’—Loma. 7:21.

3. Ino muntu inga watalika kulinyumfwa buyani na liinji kaeelesha kukoma lunkumbwa lutabete kabotu?

³ Na liinji kamweelesha kukoma lunkumbwa lumwi lutabete kabotu, mpashi inga mwatalika kulinyumfwa ayi inga tamucikoonshi kulukoma. Alimwi inga mwatalika kuyeeya ayi Yehova teshi akamusuminisheewo kukala kwamuyayaya ceebo cakuba alunkumbwa ulo. Sombi amushibe ayi kuyeeya nabi kulinyumfwa boobo teshi kwancine! Kwaamba ayi munyumfwishishe ncotwaambila boobo, mumutwi uyu tutocana shikumbulo kumiipusho iyi yobilo: (1) Ino ngani usuni ayi munolinyumfwa boobo? (2) Ino nshiinshi nsheenga mwaciita kwaamba ayi mukome lunkumbwa lutabete kabotu?

SATANA MBWAASUNI AYI TUNOLINYUMFWA

4. (a) Ino nceebonshi Satana alisuni ayi tunolinyumfwa ayi inga tatucikoonshiiwo kukoma lunkumbwa lutabete kabotu? (b) Ino nceebonshi inga twacikonsha kukoma lunkumbwa lutabete kabotu?

⁴ Satana alisuni ayi tunolinyumfwa ayi inga tatucikoonshiiwo kukoma lunkumbwa lutabete kabotu. Yesu wakaamba cakuteenda mweela ayi Satana ananotweelesha ndyaakeesha bashikwiiya bakwe bwakupaila ayi: ‘Mutatwinjishi mumeelesho, sombi amutufuune kuswa ku Mubiibi.’ (Mate. 6:13) Satana wakaamba ayi bantu inga tabanyumfwili Yehova na beeleshekwa kucita shintu shibiibi. (Jobo 2:​4, 5) Ino nceebonshi Satana ncayeeyela boobo? Satana wakayungoolwa akucenjeekwa alunkumbwa lwakwe mwiine, alimwi taakalinga kusuniiwo kutolelela kushomeka kuli Yehova. Paceebo ceeco, alashoma ayi aswebo ubo mbotubete, alimwi ayi inga twacileka kushomeka kuli Yehova na tweeleshekwa. Alimwi Satana wakalinga kuyeeya ayi inga wacikonsha kweelesha Mwanaakwe Lesa umaninite kucita cintu cibiibi! (Mate. 4:​8, 9) Sombi sa ncakwiila inga tatucikoonshi kukoma lunkumbwa lutabete kabotu? Sobwe napaceyi! Soonse inga twaamba maswi mutumwi Paulo ngakaamba ndyakalemba ayi: ‘Ndakonsha kucita shintu shoonse kwiinda muli wooyo umpa nkusu.’—Filip. 4:13.

5. Ino tulishi buyani ayi Yehova taatonshiiwo nabi paniini ayi inga twacikonsha kukoma lunkumbwa lutabete kabotu?

⁵ Mubupusano a Satana, Yehova alashoma cakutatoonsha ayi inga twacikonsha kukoma lunkumbwa lutabete kabotu. Ino nceebonshi nceenga twaambila boobo? Mukwiinga Yehova wakaambila limwi ayi likoto linene lya bantu balaakutolelela kushomeka kuli nguwe alimwi balaakupuluka mapensho anene. Ino ici cilaamba nshi? Yehova Lesa utabeci wakaamba ayi likoto lya bantu baanji kuteshi baniini, balaakunjila mu Paladaiso “kabafwete shisani shituba,” nkokwaamba ayi Yehova alababona ayi balisalalite. (Ciyu. 7:​9, 13, 14) Aboobo Yehova taatonshiiwo nabi paniini ayi inga twacikonsha kukoma lunkumbwa lutabete kabotu.

6-7. Ino nceebonshi Satana alisuni ayi tunooshoma ayi Yehova teshi akatusuminisheewo kukala kwamuyayaya ceebo cakuba alunkumbwa lutabete kabotu?

⁶ Satana alimwi alisuni ayi tunooshoma ayi Yehova teshi akatusuminisheewo kukala kwamuyayaya ceebo cakuba alunkumbwa lutabete kabotu. Ano ino nceebonshi Satana ncayeeyela boobo? Lakwe ngweshi akabule kukala kwamuyayaya alimwi alaakunyonyoolwa cakumaninina. (Mata. 3:15; Ciyu. 20:10) Alatunyumfwila munyono ceebo cakwaamba ayi tulicite kulangila kwakukala kwamuyayaya. Aboobo aleelesha cankusu kwaamba ayi aswebo tunolinyumfwa anga teshi tukekale kwamuyayaya. Nacibi boobo, swebo tulipusene abuumbi anguwe! Alimwi Baibo ilatulwiita ayi Yehova alisuni kutucafwa kwaamba ayi tukekale kwamuyayaya. ‘Taasuni muntu nabi womwi kunyonyoolwa, sombi alisuni kwaamba ayi boonse baane kuswa kushibiibi shabo.’—2 Pit. 3:9.

⁷ Aboobo na katuyeeya ayi inga tatucikoonshi kukoma lunkumbwa lutabete kabotu alimwi ayi Yehova inga taatusuminishiiwo kukala kwamuyayaya ceebo cakuba alunkumbwa ulo, ingayi tutoyeeya mbuli Satana mbwaasuni ayi tunoyeeya. Na twanyumfwishisha kabotu Satana mbwaasuni ayi tunoyeeya, inga catucafwa kuba bashinishite kukaka kuyeeya kwa mushobo uyo.—1 Pit. 5:​8, 9.

MBWEENGA KATULINYUMFWA CEEBO CAKUBA BATAMANINITE

8. Ino nciinshi cimwi ceenga catupa kunolinyumfwa ayi inga tatucikoonshi kukoma lunkumbwa lutabete kabotu alimwi ayi teshi tukekale kwamuyayaya? (Kulumbaisha 51:5) (Amubone alubasu lwa “Kusansulula Liswi.”)

⁸ Kwiilikaawo, kuli acimwi ceenga catupa kunolinyumfwa ayi inga tatucikoonshi kukoma lunkumbwa lutabete kabotu alimwi ayi teshi tukekale kwamuyayaya. Ino nciinshi? Mbubi na kutamaninina soonse nkotwakapyana kuswa kubashali besu bakutaanguna.a—Jobo 14:4; amubelenge Kulumbaisha 51:5.

9-10. (a) Ino Adamu a Efa bakalinyumfwa buyani ndyebakaba bantu batamaninite? (Amubone acikope.) (b) Ino bubi mbotwakapyana bulatupa kulinyumfwa buyani?

⁹ Amuyeeye Adamu a Efa mbobakalinyumfwa ndyebakaba bantu batamaninite. Pesule lya kutanyumfwila Yehova, bakayuba akufwala mateu kwaamba ayi basise mibili yabo. Libuku lya Insight on the Scriptures lilaamba pasheeshi nshobakacita ayi: “Bubi bwakabapa kulinyumfwa kuba amulandu, kulisukama abuumbi, kunyumfwa nsoni akulinyumfwa kutashitilishikwa.” Kuswawaawo, Adamu a Efa tabakalinga kuciteewo coolwe cakuba abushicibusa buyumu a Yehova alimwi. Alimwi nabi beelesha kucita shibotu, lyoonse bakalinga kulinyumfwa kuba amulandu akulisukama ceebo cakuba bantu batamaninite.

¹⁰ Nabi kwaamba ayi aswebo tatumaninite, bukaalo mbotubeteemo bulipusene abwakalingamo Adamu a Efa. Ino nceebonshi nceenga twaambila boobo? Nceebo cakwaamba ayi balo tabakalinga kuciteewo coolwe cakusa mukufubilaamo mucilubula. Sombi swebo Lesa alatulekelela shibiibi shesu akuba abushicibusa buyumu anguwe ceebo ca cilubula. (1 Koli. 6:11) Nacibi boobo, twakapyana bubi akutamaninina. Aboobo cimwi ciindi tulalinyumfwa kuba amulandu, kulisukama abuumbi, kunyumfwa nsoni akulinyumfwa kutashitilishikwa. Alimwi Baibo ilaamba ayi bubi bulakuma bantu boonse. Bulacita boobo akubantu “boonse batakwe kubisha bweenka bwakabisha Adamu.” (Loma. 5:14) Ano nabi kwaamba ayi tulashalwa katuli bantu batamaninite, tatweelete kunolinyumfwa ayi teshi tukacikoonsheewo kucita shiluleme nabi kunootonsha ayi tulaakukala kwamuyayaya. Ino nshiinshi sheenga shatucafwa kutanoolinyumfwa boobo?

11. Ino tulyeelete kucita buyani na katulinyumfwa ayi inga tatucikoonshi kukoma lunkumbwa lutabete kabotu, alimwi ino nceebonshi? (Bene Loma 6:12)

¹¹ Ceebo cakuba bantu batamaninite, cimwi ciindi inga twalinyumfwa ayi teshi tukacikoonsheewo kukoma lunkumbwa lutabete kabotu. Cilababo anga kuli liswi limwi mumoyo wesu litootulwita ayi teshi tukacikoonsheewo kukoma lunkumbwa lutabete kabotu. Sombi tatweelete kukutika kuliswi ilyo. Ino nceebonshi? Mukwiinga Baibo ilatulwiita ayi tatweelete kusuminisha bubi “kweendelesha mibili [yesu].” (Amubelenge Bene Loma 6:12.) Ici cilaamba ayi inga twasalawo kutacita sheesho nsheenga twakuumbwa. (Gala. 5:16) Yehova alicishi ayi inga twacikonsha kukoma meelesho mukwiinga inga taatulwiiti kucita cintu nceenga tatucikoonshi. (Duto. 30:​11-14; Loma. 6:6; 1 Tesa. 4:3) Ncakutatoonsha kwaamba ayi inga twacikoonsha kukoma lunkumbwa lutabete kabotu.

12. Ino tulyeelete kucita buyani na katulinyumfwa ayi Yehova teshi akatusuminisheewo kukala kwamuyayaya ceebo cakuba alunkumbwa lutabete kabotu, alimwi ino nceebonshi?

¹² Na katulinyumfwa ayi Yehova teshi akatusuminisheewo kukala kwamuyayaya ceebo cakuba alunkumbwa lutabete kabotu, cilababo anga alimwi kuli liswi limwi mumoyo wesu litootulwita boobo. Sombi tatweelete kukutika kuliswi ilyo. Ino nceebonshi? Mukwiinga Baibo ilatulwiita ayi Yehova alanyumfwishisha ayi tuli bantu batamaninite. (Kulu. 103:​13, 14) ‘Alishi shintu shoonse’ pali ndiswe, kwiilikaawo abubi mbotwakapyana mbobutukuma. (1 Joni 3:​19, 20) Yehova alaakunotubona ayi tulisalalite, kulilabo na twatolelela kukoma lunkumbwa lutabete kabotu kwiinda mukutacita sheesho nshotukuumbwa. Ino nciinshi ceenga catupa kushoma boobo?

13-14. Sa kuba alunkumbwa lutabete kabotu cilaamba ayi inga tatucikoonshi kusangalasha Yehova? Amusansulule.

¹³ Baibo ilatondesha ayi pali bupusano bunene pakuba alunkumbwa lutabete kabotu alimwi akucita sheesho nsheenga twakuumbwa. Teshi lyoonse ndyeenga twacikonsha kuleya kuba alunkumbwa lutabete kabotu, sombi inga twacikoonsha kuleya kucita nsheenga twakuumbwa. Kucakubonenaako, bamwi mulibungano lyaku Kolinto bakalinga koonana abasankwanyinaabo na abanakashinyinaabo kabatana kuba Beneklistu. Paulo wakalemba ayi: ‘Ubo mbobakalinga bamwi pakati kanu.’ Sa ici cilaamba ayi tabakalinga kubaawo alunkumbwa lwa koonana abasankwanyinaabo na abanakashinyinaabo? Sobwe inga tatwaambi boobo, mukwiinga teshi liinji ndyeciba cuubu kuleya kuba alunkumbwa ulo. Sombi Beneklistu bakalinga kulikasha akuleya kucita sheesho nshobakalinga kukumbwa, Yehova wakalinga kubatambula. Alimwi wakalinga kubabona ayi ‘bakasanshikwa.’ (1 Koli. 6:​9-11) Ubu bweenka mbweenga caba akulindimwe.

¹⁴ Na kuli lunkumbwa ndomutokweelesha kukoma, amushibe ayi inga mwacikonsha kucita boobo. Nabi kwaamba ayi inga tamucikoonshi kuleya kuba alunkumbwa lutabete kabotu, inga mwacikonsha kulikasha kwaamba ayi ‘mutaciti shintu shiyanda mubili amiyeeyo yanu.’ (Efe. 2:3) Aboobo ino nshiinshi nsheenga mwaciita kwaamba ayi mukome lunkumbwa lutabete kabotu?

NSHEENGA MWACIITA KWAAMBA AYI MUKOME LUNKUMBWA LUTABETE KABOTU

15. Ino nceebonshi tulyeelete kushiba mbasu motutaciti kabotu kwaamba ayi tucikoonshe kukoma lunkumbwa lutabete kabotu?

¹⁵ Kwaamba ayi mucikoonshe kukoma lunkumbwa lutabete kabotu, mulyeelete kushiba mbasu momutaciti kabotu. Alimwi mulyeelete kulilanga langa cakubikila maano akuleya kulibeca. (Jemu. 1:22) Kucakubonenaako, muntu ucite lipenshi pamakani akunwa bwalwa inga watalika kuyeeya ayi, ‘Lipenshi ndyeencite teshi linene mukwiinga bamwi balanwa abuumbi kwiinda ndime. Na mpashi muntu ucite lipenshi lyakweebela shintu shileta miyeeyo yakoonana inga watalika kupa bamwi mulandu kwiinda mukwaamba ayi, ‘Naakwiinga mukaangu kantondesha lusuno abuumbi naakwiinga kanteebeli shintu shileta miyeeyo yakoonana.’ Na kamuyeeya boobo, inga caba cuubu kucita sheesho nshomukuumbwa. Aboobo mutanolangoola mwakuleyela kwaamba ayi munoocita shintu shitabete kabotu. Mulyeelete kushiba ayi mulaakulyambilila kuli Yehova pasheesho nshomucita.—Gala. 6:7.

16. Ino nshiinshi nsheenga mwaciita kwaamba ayi mube bashinishite kutacita nshomukuumbwa?

¹⁶ Kwiilika pakushiba kabotu mbasu momutaciti kabotu, mulyeelete kuba bashinishite kutacita nshomukuumbwa. (1 Koli. 9:​26, 27; 1 Tesa. 4:4; 1 Pit. 1:​15, 16) Amushibe kabotu shintu shimupa kweeleshekwa bunene aciindi ndyemweeleshekwa. Kucakubonenaako, sa cilamuyumina kukaka meelesho na mwalema nabi na kwashiya abuumbi? Amuyeeye pa bweelesho mbweenga mwalicanaamo akushibila limwi nsheenga mwaciita na mweeleshekwa. Alimwi ncibotu kucita boobo kamutana kweeleshekwa.—Tus. 22:3.

17. Ino nshiinshi nsheenga tweeya kuswa kucakubonenaako cakwe Josefu? (Matalikilo 39:​7-9) (Amubone ashikope.)

¹⁷ Amuyeeye Josefu nshaakacita muka Potifa ndyaakamweelesha. Ndyakeeleshekwa, wakakaka peenkaapo alimwi cakushinisha. (Amubelenge Matalikilo 39:​7-9.) Ino nshiinshi nsheenga tweeyaako? Josefu wakalinga kushinishite kucita ciluleme muka Potifa kaatana kumweelesha. Amwebo inga mwasalawo kuba bashinishite kucita ciluleme, kamutana kweeleshekwa. Na mwacita boobo, cilaakumubeta cuubu kucita ciluleme na mweelesha mukwiinga mwakasalila limwi shakucita.

AMUTOLELELE ‘KULYEELESHA’

18. Ino nciinshi cimwi ncomweelete kucita kwaamba ayi mukome lunkumbwa lutabete kabotu? (2 Bene Kolinto 13:5)

¹⁸ Cimwi ncomweelete kucita kwaamba ayi mukome lunkumbwa lutabete kabotu, nkutolelela ‘kulyeelesha nobeene,’ nkokwaamba ayi kunolilanga langa lyoonse kwaamba ayi mubone na kuli mbasu momutoyandika kusebensela. (Amubelenge 2 Bene Kolinto 13:5.) Ciindi aciindi, munooyeeya pa nshomucita anshomuyeeya lyalo akwaalulako mutoyandika. Kucakubonenaako, nabi pesule lyakwaamba ayi mwacikonsha kukoma bweelesho, inga mwaliipusha ayi: ‘Ino pakeenda ciindi cilaamfu buyani kwaamba ayi nkake bweelesho?’ Na tamuna kukaka peenkaapo, mutalinyumfwi cibiibi. Muciindi cakucita boobo, amuyeeye pa nsheenga mwaciita kwaamba ayi lweendo lutoosa mukafwambaane kukaka. Inga mwaliipusha ayi: ‘Na ndatalika kuyeeya pashintu shitabete kabotu, sa inga ndeelesha kunoofwambaana kucileka kuyeeyawo? Sa shakulikondelesha nshonsala shilapa kwaamba ayi cinombeta ciyumu kukaka meelesho? Sa na ndabona shikope shitabete kabotu, ndalanga kumwi peenkaapo? Sa ndanyumfwishisha kwaamba ayi lyoonse mulaswa shibotu na ndanyumfwila Yehova, nabi kwaamba ayi ndyeelete kusebensa cankusu kwaamba ayi mbe amubo wa kulikasha?’—Kulu. 101:3.

19. Ino kucita shilubo shiniini niini inga kwapa buyani muntu kwaalilwa kukoma lunkumbwa lutabete kabotu?

¹⁹ Alimwi mulyeelete kuleya kucana mwakuleyela. Baibo ilaamba ayi: ‘Moyo wa muntu ngubeshi abuumbi kwiinda pashintu shimwi shoonse alimwi ulapensha abuumbi.’ (Jele. 17:9) Yesu wakaamba ayi “mumoyo momuswa miyeeyo ibiibi.” (Mate. 15:19) Kucakubonenaako, muntu wakacileka kweebela shintu shileta miyeeyo yakoonana, mpashi na peenda ciindi inga watalika kuyeeya ayi kweebela shikope sheenga shapa muntu kuyeeya pamakani akoonana kulibo kabotu, kulilabo na bantu bali pashikope isho kabafwete. Na mpashi inga kayeeya ayi, ‘Kuyeeyabo ayi ntoocita shintu shitabete kabotu teshi kubisha, kulilabo na nshintooshicita.’ Na muntu kayeeya boobo, ingayi atolibambila kucita ‘sheesho shiyanda mubili.’ (Loma. 13:14) Ino nshiinshi sheenga shamucafwa kuleya kucita boobo? Amuleye kucita shilubo shiniini niini, mukwiinga mukuya kwaciindi inga shamupa kucita shilubo shinene.b Alimwi munookaka “miyeeyo ibiibi” mukwiinga inga yamupa kunoocana mwakuleyela kwaamba ayi munoocita shintu shibiibi.

20. Ino tutolangila nshi mucishi cipya, alimwi ino Yehova alatucafwa buyani pacecino ciindi?

²⁰ Kweelana ambotweeya, inga twacikonsha kukoma meelesho kwiinda mulucafwo lwakwe Yehova. Alimwi ceebo ca cilubula, inga watulekelela shibiibi shesu akulangila kukala kwamuyayaya mucishi cipya. Tulaakusangalala abuumbi ndyeshi tukanosebensela Yehova kwakubula kuba alunkumbwa lutabete kabotu! Kushikila ciindi ico cikashiike, inga twashoma cakutatoonsha ayi inga twacikoonsha kukoma lunkumbwa lutabete kabotu akulangila kukala kwamuyayaya. Ncakwiila, inga twacikoonsha kukoma lunkumbwa lutabete kabotu kwiinda mulucafwo lwakwe Yehova!