Lusuno Lwakwe Lesa Ndwamuyayaya

1-2. Ino nciinshi Beneklistu baanji ncobatoonsha?

AMUYEEYE ayi muli mubwaato lyalo kwesa cipuupu cinene palweenge. Maaba atalika kutenkaanya bwaato cankusu. Bwaato inga kabuya citoolanishikwabo kumaaba, sombibo na umwi wabwesa ceela cakubwiimikisha akuciwaala mumaanshi. Ceela cakwiimikisha bwaato ico inga capa kwaamba ayi buteendi nabi kwaamba ayi palweenge pali cipuupu cinene.

² Na mutokwiinda mubukaalo buyumu buli anga ncipuupu cinene, inga mwalinyumfwabo anga muli mubwaato mbotwaambawo. Inga mwatalika kulinyumfwa munshila shipusenepusene. Mpashi sunu inga kamushoma ayi Yehova alimusuni alimwi atoomucafwa. Sombi mpashi ciilo inga mwatalika kutoonsha na alabikaako amaano kumapensho ngomutokwiindaamo. (Kulu. 10:1; 13:1) Mpashi shicibusa wanu inga wamulwiita maswi ayuminisha, lyalo mwalinyumfwako kabotu kwakaciindi. (Tus. 17:17; 25:11) Sombi ayi peendebo nshiku shiniini, mwatalika alimwi kutoonsha na Yehova alimusuni. Mpashi inga mwatalika akuyeeya ayi Yehova taamusuniiwo na ayi wakamulubaako. Ino inga mwacita buyani kwaamba ayi muwaale ceela cakwiimikisha bwaato mumaanshi munshila yacikoshanyo, na muli mubukaalo bwamushobo uyu? Munshila imwi inga twaamba ayi, ino inga mwacita buyani kwaamba ayi mushome cakutatoonsha ayi Yehova alimusuni alimwi alaakumucafwa, akutolelela kushoma boobo?

3. (a) Kweelana a Kulumbaisha 31:7 alimwi a 136:​1, ino maswi akwaamba ayi ‘lusuno lutamaani’ alasansulula nshi? (b) Ino nceebonshi nceenga twaambila ayi Yehova ngwaindaawo kutondesha lusuno lutamaani? (Amubone acikope.)

³ Comwi ceenga camucafwa kuliyumya ndyemutokwiinda mumapensho, nkuyeeya palusuno lutamaani Yehova ndwaacite. (Amubelenge Kulumbaisha 31:7; 136:1.) Ino maswi akwaamba ayi ‘lusuno lutamaani’ alasansulula nshi? Maswi aya alasansulula kusuna muntu umwi abuumbi, kutolelela kumusuna akushomeka kuli nguwe. Yehova ngwaindaawo kutondesha lusuno lutamaani. Alimwi Baibo ilaamba ayi ‘aliswite lusuno lutamaani.’ (Kulo. 34:​6, 7) Kwiilikaawo, Baibo ilaamba pali Yehova ayi: ‘Lusuno lwanu lutamaani ndunene kubantu abo bapaila kuli ndimwe.’ (Kulu. 86:5) Ino maswi aya alasansulula nshi? Alasansulula ayi Yehova taalekeleshi basebenshi bakwe bashomeka! Kunokwiibaluka ayi Yehova alashomeka kubasebenshi bakwe, inga kwamucafwa kuliyumya na kutatenkaanishikwa ndyemutokwiinda mumapensho ali anga ncipuupu.—Kulu. 23:4.

MUNOKWIIBALUKA AYI LUSUNO LWAKWE YEHOVA NI NJIISHO YAKUTAANGUNA YAMU BAIBO

4. Ino ni njiisho nshi shimwi shamu Baibo nshotushoma, alimwi ino nceebonshi teshi cuubu muntu kutupa kucileka kushishoma?

⁴ Kunoobona ayi lusuno lwakwe Yehova ni njiisho yakutaanguna yamu Baibo, inga kwamucafwa kunooshoma cakutatoonsha ayi alimusuni. Ino nshiinshi nshomuyeeya na mwanyumfwa maswi akwaamba ayi “njiisho shakutaanguna shamu Baibo”? Mpashi mulayeeya pamakani ancine ngomushoma ayo ngomwakeeya mu Maswi akwe Lesa. Kucakubonenaako, mwakeeya ayi liina lyakwe Lesa ngu Yehova, Yesu ngu Mwanaakwe Lesa wakashalwabo eenka, bafu taaku ncobeshi, alimwi ayi cishi cino cilaakuba paladaiso bantu mweshi bakekale kwamuyayaya. (Kulu. 83:18; Shiku. 9:5; Joni 3:16; Ciyu. 21:​3, 4) Ndyemwakashoma cakutatoonsha ayi njiisho ishi nshancine, taakuwo wakacikonsha kumupa kucileka kushishoma. Ino nceebonshi? Mukwiinga mwakanyumfwishisha ayi ncocancine alimwi teshi makani akuyeeyelabo. Aboobo amuleke tubandike mbweenga kubona ayi lusuno lwakwe Lesa ni njiisho yakutaanguna kwamucafwa kucileka kutoonsha ayi Yehova alimusuni, alimwi ayi alamubikilako maano ndyemutokwiinda mubukaalo buyumu.

5. Ino cilaba buyani kwaamba ayi muntu acileeke kushoma njiisho shakubeca? Amusansulule.

⁵ Ino nciinshi cakamucafwa kucileka kushoma njiisho shakubeca, ndyemwakatalika kwiiya Baibo? Cilyeelete mwakalinga kukoshanisha nshomwakeeya kubupailishi bwanu ku nshomwakalinga kwiiya mu Baibo. Kucakubonenaako, mpashi mwakalinga kushoma ayi Yesu ngu Lesa Shinkusu shoonse. Nacibi boobo, ndyemwakalinga kwiiya Baibo, mpashi mwakaliipusha ayi, ‘Sa ncakwiila Yesu ngu Lesa Shinkusu shoonse?’ Pesule lyakushiba kabotu Baibo nshoyaamba pamakani aya, mwakesa mukushiba ayi Yesu teshi Lesa. Lyalo mwakacileka kushoma njiisho yakubeca yakwaamba ayi Yesu ngu Lesa, akutalika kushoma cancine ncomwakeeya mu Baibo cakwaamba ayi Yesu ngu ‘Mwanaakwe Lesa mutaanshi kushalwa pashilengwa shoonse,’ ‘uyo wakashalwabo eenka.’ (Kolo. 1:15; Joni 3:18) Kwalo, bantu inga kabashishoma maningi injiisho shakubeca, alimwi inga tacibi cuubu kucileka kushishoma. (2 Koli. 10:​4, 5) Sombi mwebo ndyemwakeeya cancine, tamuna kutalika alimwi kushoma njiisho shakubeca.—Filip. 3:13.

6. Ino nceebonshi inga mwashoma cakutatoonsha ayi ‘lusuno lwakwe Yehova ndwamuyayaya’?

⁶ Ishi amwebo nsheenga mwaciita na mwayeeya Baibo nshoyaamba palusuno lwakwe Yehova. Na mutokwiinda mubukaalo buyumu lyalo mwatalika kutoonsha na Yehova alimusuni, inga mwaliipusha ayi, ‘Sa kuyeeya kwangu kulibo kabotu?’ Lyalo inga mwayeeya Baibo nshoyaamba pa Kulumbaisha 136:1—lilembo paswa mutwi uyu. Ino nceebonshi Yehova alaamba ayi “lusuno lwakwe ndwamuyayaya”? Ino nceebonshi maswi akwaamba ayi “lusuno lwakwe ndwamuyayaya” akaboshekwaawo mankanda ali 26 mu Kulumbaisha 136? Kweelana ambotweeya, lusuno lutamaani Yehova ndwatondesha kubasebenshi bakwe, ni njiisho yakutaanguna yamu Baibo njomweelete kushoma, bweenka mbocakamubeta cuubu kushoma njiisho shimwi shakutaanguna shamu Baibo. Tamweelete kushoma ayi Yehova taamusuniiwo alimwi ayi taamubikiliko maano, mukwiinga ico teshi cancine. Amukake kushoma boobo, bweenka mbweenga mwakaka cakushinisha njiisho yakubeca ili yoonse!

7. Ino nga malembo nshi amwi atondesha ayi Yehova alitusuni?

⁷ Kuli bumboni abumwi buunji mu Baibo butondesha ayi Yehova alitusuni. Kucakubonenaako, Yesu wakalwiita bashikwiiya bakwe ayi: “Mulayandika kwiinda tutiinga tuunji.” (Mate. 10:31) Alimwi Yehova mwiine wakalwiita bantu bakwe ayi: ‘Ndaakumuyumya, ee, ndaakumucafwa, ncakwiila ndanomucatilila alyaansa lyangu lyalulyo lya bululami.’ (Isa. 41:10) Amuyeeyebo maswi aya mbwaakambwa cakushinisha. Yesu taakwe kwaamba ayi, ‘Mpashi mulayandika kwiinda tutiinga tuunji,’ alimwi Yehova taakwe kwaamba ayi, ‘Mpashi ndaakumucafwa.’ Sombi bakaamba ayi: “Mulayandika kwiinda tutiinga tuunji” alimwi ayi “ndaakumucafwa.” Na mwatalika kutoonsha na Yehova alimusuni ndyemutokwiinda mubukaalo buyumu, malembo mbuli aaya inga amucafwa kushoma cakutatoonsha ayi alimusuni. Malembo aya nshoamba nshancine. Na mwapaila kuli Yehova akumulwiita shitoomupa kutoonsha lyalo akukutumana kuyeeyawo cakubikila maano pa malembo aya, amwebo mulaakwaamba maswi ngotucana pa 1 Joni 4:16 aamba ayi: ‘Tulishi alimwi tulashoma ayi Lesa alitusuni.’a

8. Ino nciinshi nceenga mwaciita na kamucitoonsha ayi Yehova alimusuni?

⁸ Ano ino mbuyani na mucitoonsha ayi Yehova alimusuni? Amweelanye mbomutolinyumfwa ku makani ngomucishi pali nguwe. Inga tatushomi mbotulinyumfwa, sombi lusuno Yehova ndwaacite palindiswe ncancine Baibo ncoitwiisha nceenga twashooma. Na katushoma ayi Yehova taatusuniiwo, cilibo anga tutokwaamba ayi maswi akwaamba ayi “Lesa ndusuno” ayo ngotucana mu Baibo, ngakubeca.—1 Joni 4:8.

MUNOKWIIBALUKA AYI YEHOVA ALIMUSUNI

9-10. Kweelana a Joni 16:​26, 27, ino nciinshi Yesu ncaakalinga kwaambaawo ndyaakaamba ayi: ‘Bata beene balimusuni’? (Amubone acikope.)

⁹ Na twayeeya pa maswi Yesu ngaakalwiita bashikwiiya bakwe, inga tweeya shiinji palusuno lwakwe Yehova. Yesu wakaamba ayi: ‘Bata beene balimusuni.’ (Amubelenge Joni 16:​26, 27.) Yesu taakwe kwaamba maswi aya kwaamba ayi asangalashe bashikwiiya bakwe. Mukwiinga na twabelenga mavesi ali kwisule lya vesi 26 a 27, alatondesha ayi taakalinga kwaamba pa bashikwiiya bakwe mbobakalinga kulinyumfwa. Sombi wakalinga kubalwiita pamakani akupaila.

¹⁰ Yesu kaatana kwaamba maswi ali muvesi 26 a 27, wakabalwiita ayi balyeelete kupaila kwiinda muliina lyakwe kuteshi kuli nguwe. (Joni 16:​23, 24) Bakalinga kweelete kushiba cancine ici. Ino nceebonshi? Nceebo cakwaamba ayi pesule lyakubushikwa, mpashi bashikwiiya bakwe naakwiinga bakatalika kunoopaila kuli nguwe. Inga twaamba boobo mukwiinga Yesu wakalinga shicibusa wabo. Naakwiinga bakayeeya ayi ceebo cakwaamba ayi wakalinga kubasuni maningi, naakwiinga kaakutika kumipailo yabo akubasengelaako kuli Baishi kwaamba ayi babacaafwe. Sombi Yesu wakabalwiita ayi tabeelete kunoyeeya boobo. Ino nceebonshi? Mukwiinga wakabalwiita ayi: ‘Bata beene balimusuni.’ Cancine ici ndubasu lwa njiisho yakutaanguna yamu Baibo yaamba pamakani akupaila. Ino cancine ici cilamukuma buyani? Kwiiya Baibo kwakamucafwa kushiba Yesu akumusuna. (Joni 14:21) Sombi bweenka mbuli bashikwiiya bakwe Yesu bakutaanguna, inga mwapaila cakutatoonsha kuli Lesa, kamucishi ayi ‘Ishiwesu wakwiculu mwiine alimusuni.’ Lyoonse na mutopaila kuli Yehova, mulatondesha ayi mulashoma maswi aya.—1 Joni 5:14.

AMUSHIBE SHIMUPA KUTOONSHA

11. Ino nceebonshi Satana inga wasangalala na twatalika kutoonsha ayi Yehova alitusuni?

¹¹ Ino nshiinshi sheenga shapa kwaamba ayi tunotoonsha ayi Yehova alitusuni? Mpashi inga mwakumbula ayi ngu Satana ulengesha ayi tunoyeeya boobo. Ico ncancine, sombi kuli acimwi cipa kwaamba ayi tunotoonsha. Amuleke tutaangune kubandika pali Satana. Alisuni ‘kutulya’ alimwi alisuni ayi tunotoonsha ayi Yehova alitusuni. (1 Pit. 5:8) Yehova wakatupa cilubula ceebo cakwaamba ayi alitusuni. Sombi Satana alisuni ayi tunoolinyumfwa ayi tatweeleli kupekwa cilubula ceebo cakwaamba ayi tuli bamucita shibi. (Ebu. 2:9) Ano ino ngani usangalala na katutoonsha ayi Yehova alitusuni? Ngu Satana. Alimwi ino ngani weenga wasangalala na twalefuka maningi cakwaamba ayi twacileka akusebensela Yehova? Taakuwo aumwi alimwi ngu Satana. Satana alisuni ayi tunoyeeya ayi Yehova taatusuniiwo kakuli lakwe ngobatasuni. Nacibi boobo, “bucenjeshi” bomwi mbwasebensesha maningi, nkutupa kunolinyumfwa ayi Yehova taatusuniiwo alimwi wakatukaka. (Efe. 6:11) Na twashiba mulwani wesu nshaeelesha kucita kuli ndiswe, inga twaba bashinishite ‘kupikisha Mubiibi.’—Jemu. 4:7.

12-13. Ino kushiba ayi tatumaninite inga kwapa buyani kwaamba ayi tunotoonsha ayi Yehova alitusuni?

¹² Ino nciinshi cimwi cipa kwaamba ayi tunotoonsha ayi Yehova alitusuni? Mbubi mbotwakapyana. (Kulu. 51:5; Loma. 5:12) Bubi bwakapa kwaamba ayi bantu batatoleleli kuba beshicibusa bakwe Lesa. Alimwi bwakakuma mbotuyeeya, mbotulinyumfwa abuumi bwesu.

¹³ Bubi bulapa kwaamba ayi cimwi ciindi tunolinyumfwa kuba amulandu, kulisukama maningi, kunyumfwa nsoni akulinyumfwa kutashitilishikwa. Inga twalinyumfwa boobo na twaciita cilubo. Sombi cimwi ciindi inga twalinyumfwa boobo ceebo cakushiba ayi tatumaninite, mubupusano a Yehova mbwaakalenga bantu pakutaanguna. (Loma. 8:​20, 21) Bweenka motoka mboiteendi kabotu na litaila lyomwi lyapompoloka, aswebo tatuciti shintu kweelana ambotwalinga kweelete kunoocita, ceebo cakwaamba ayi tatumaninite. Ncoceeco cimwi ciindi tulatoonsha na ncakwiila Yehova alitusuni. Na twatalika kutoonsha, tunookwiibaluka ayi Yehova ngu ‘Lesa munene, ulemekwa, ulama cipangano ca lusuno ku baabo bamusuni alimwi bakonkela milawo yakwe.’—Neye. 1:5.

14. Ino kuyeeya pacilubula inga kwatucafwa buyani kucileka kutoonsha ayi Yehova alitusuni? (Bene Loma 5:8) (Amubone akabokosi kacite mutwi utokwaamba ayi “Amucenjele Kwaamba ayi ‘Mutabecekwi Kunkusu sha Bubi.’”)

¹⁴ Cimwi ciindi, inga katulinyumfwa cibiibi ceebo cakuyeeya ayi tatweeleli kutondeshekwa lusuno kuli Yehova. Alimwi cancine ncakwaamba ayi tatweeleli kutondeshekwa lusuno kuli Yehova. Aboobo lusuno ndwaatutondesha lulilibetele. Taakuwo nceenga twaciita palweesu kwaamba ayi tweelele kunotondeshekwa lusuno kuli Yehova. Nacibi boobo, Yehova wakatupa cilubula kwaamba ayi tunolekelelwa shibiibi shesu ceebo cakwaamba ayi alitusuni. (1 Joni 4:10) Alimwi munokwiibaluka ayi Yesu wakesa mukufwita bantu bacita shibiibi kuteshi bantu bamaninite. (Amubelenge Bene Loma 5:8.) Inga tatuciti shintu anga tuli bantu bamaninite, alimwi Yehova taatulangili kucita boobo. Na twanyumfwishisha ayi kutamaninina inga kwapa kwaamba ayi tunotoonsha ayi Yehova alitusuni, inga twaba bashinishite kuleya kuyeeya kwa mushobo uyu.—Loma. 7:​24, 25.

AMUTOLELELE KUSHOMEKA KULI YEHOVA

15-16. Ino nciinshi Yehova nceshi akacite na twatolelela kushomeka kuli nguwe? (2 Samwelo 22:26)

¹⁵ Yehova alisuni ayi ‘tunoomunyumfwila.’ (Duto. 30:​19, 20) Na twacita boobo, inga twashoma cakutatoonsha ayi alaakutolelela kushomeka kuli ndiswe. (Amubelenge 2 Samwelo 22:26.) Na twatolelela kushomeka kuli Yehova, inga twashoma cakutatoonsha ayi alaakutucafwa kuliyumya mubukaalo buli boonse mbweenga twalicanaamo.

¹⁶ Kweelana ambotweeya, kuli shiinji sheenga shatucafwa kutatenkaana ndyeshi tunookwiinda mumapensho pacecino ciindi akunembo. Tulicishi ayi Yehova alitusuni alimwi ananootucafwa. Ishi Baibo nshoitulwiita. Na twatalikabo kutoonsha ayi Yehova alitusuni, tunokwiibaluka nshotucishi palusuno lwakwe, muciindi cakushoma mbweenga katulinyumfwa. Atutolelele kushoma cakutatoonsha ayi lusuno lwakwe Yehova ndwamuyayaya, kweelana a Baibo mboyaamba.