Musankwa wacanike weeleshekwa ndyabona beebene bobilo kabatondeshanya lusuno lwakoonana, basankwa bobilo batolangilisha pa fooni, lyalo mwanakashi umwi atokwiinda pafwiifwi

MIIPUSHO BACANIKE NJOBEEPUSHA

Ino Inga Ndacita Buyani Kwaamba Ayi Ndeye Bweelesho?

Mutumwi Paulo wakalemba ayi: ‘Na ntooyanda kucita cintu cibotu, cibiibi cilaba andime.’ (Bene Loma 7:21) Sa amwebo mwakalinyumfwawo kale boobo? Na ubo mbocibete, mutwi uyu utomucafwa kukaka meelesho akutacita shintu shitabete kabotu.

Nshomweelete kushiba

Liinji kweeleshekwa kulapa kwaamba ayi muntu acite shintu shibiibi. Baibo ilaamba ayi ‘kusekana abantu babiibi kulanyonyoola mibo ibotu.’ (1 Bene Kolinto 15:33) Kuyungwa kubamwi nabi shintu nshomubona pa intaneti inga shapa kwaamba ayi mube alunkumbwa lwakucita shintu shitabete kabotu “akukonkela likoto lya bantu batoobisha.”—Kulonga 23:2.

“Kusuna kusangalasha bantu inga kwapa kwaamba ayi munoocita shintu bantu abo nshobacita, akucita shili shoonse nshobasuni.”—Jeremy.

Ncomweelete kuyeeyawo: Ino nceebonshi nciyumu kukaka meelesho na kamubikila bunene maano ku bamwi mbobamubona?—Tushimpi 29:25.

Ncomweelete kushiba: Mutasuminishi babyaanu kumukakatisha kucita shintu shitabete kabotu.

Nsheenga mwaciita

Amushinishe shintu nshomushoma. Na tamucishi kabotu nshomushoma, inga mwababo anga ncikadoli bantu ncobasekanya. Cilayandika abuumbi kukonkela kululika kwamu Baibo kwaamba ayi: ‘Amushinishe shintu shoonse; amucatishe cintu cibotu.’ (1 Bene Tesalonika 5:21) Na mwaashiba kabotu makani ngomushoma, inga camubeta cuubu kwaakonkela akukaka meelesho.

Ncomweelete kuyeeyawo: Ino nceebonshi mulashoma ayi njiisho shakwe Lesa shilacafwa?

“Ndabona ayi lyoonse na kancita shintu kweelana anshonshoma akukaka meelesho, bamwi balatalika kundemeka abuumbi.”—Kimberly.

Cakubonenaako cibotu camu Baibo: Danyelo. Danyelo ndyaakalinga cikula bwangu, cilyeelete wakaba ushinishite ‘mumoyo wakwe ayi’ ananokonkela milawo yakwe Lesa.—Danyelo 1:8.

Musankwa wacanike waangwa ntambo, aboobo alibo anga ncikadoli bantu ncobasekanya — Na tamucishi kabotu nshomushoma, inga mwababo anga ncikadoli bantu ncobasekanya

Amushibe mbasu momutaciti kabotu. Baibo ilaamba pa “lunkumbwa lwa mubili lwa bwanike,” nkokwaamba ayi shintu shibiibi muntu nshayeeyawo ndyaacili cikula bwangu. (2 Timoti 2:22) Shintu isho teshibo kuba amiyeeyo yakoonana, sombi akusuna kuba mbuli babyaanu alimwi akunoolisalila shakucita nabi kwaamba ayi tamuna kushika paciimo cakucita boobo.

Ncomweelete kuyeeyawo: Baibo ilaamba ayi “muntu woonse ulasunkwa na wayungoolwa akucenjeekwa alunkumbwa lwakwe mwiine.” (Jemusi 1:14) Ino nciinshi cimupa kweeleshekwa bunene?

“Amwaashibe kabotu meelesho eenga apa kwaamba ayi cimubete cuubu kweeleshekwa kucita cibiibi. Amulangoole makani eenga amucafwa kukoma meelesho ayo, akulemba shiteente nsheenga mwakonkela. Kucita boobo inga kwamucafwa, mukwiinga mulaakushiba shakucita na mukeeleshekwe.”—Sylvia.

Cakubonenaako cibotu camu Baibo: Defedi. Pashiindi shimwi Defedi wakalinga kuyungwa kubabye, alimwi akukonkela lunkumbwa lwakwe. Sombi wakeeya kuswa kushilubo shakwe akweelesha kutaboshaawo. Aboobo wakasenga Yehova ayi “amulenge moyo usalalite muli ndime, mubike moyo upya ushomeka muli ndime.”—Kulumbaisha 51:10.

Amulilame kabotu. Baibo ilaamba ayi: “Mutaleki bubi kwaamba ayi bumukoome.” (Bene Loma 12:21) Nkokwaamba ayi tamweelete kusuminisha bubi kumukoma. Inga mwasalawo kucita ciluleme.

Ncomweelete kuyeeyawo: Ino inga mwacita buyani kwaamba ayi mulilame kabotu na mwalicana mubweelesho, akuba bashinishite kucita ciluleme?

“Ndeelesha kuyeeyela limwi mbweenga ndalinyumfwa na ndasuminisha bweelesho kunkoma. Sa inga ndalinyumfwa kabotu? Mpashi, sombi kwakaciindi kaniinibo. Sa ndaakulinyumfwa kabotu na pakeende ciindi? Sobwe, ndaakwiindawobo kulinyumfwa cibiibi. Sa ncibotu kucita sheeshi? Sobwe!”—Sophia

Cakubonenaako cibotu camu Baibo: Paulo. Nabi kwaamba ayi Paulo wakaamba ayi cimwi ciindi wakalinga kuba amiyeeyo itabete kabotu, wakalinga kulikasha kucita shibiibi. Wakalemba ayi: “Nebo ndashibisha mubili wangu akuukoma.”—1 Bene Kolinto 9:27.

Ncomweelete kushiba: Ndimwe mucite mukuli wakulisalila shakucita na mweeleshekwa.

Munokwiibaluka ayi meelesho ngapakaciindi kaniinibo. Kucakubonenaako, nankashi wa liina lya Melissa ucite myaaka 20 wakaamba ayi, “Meelesho aanji anene ngondakeendaamo ndyendakalinga kucikolo, pacecino ciindi nganiini. Kukutumana kuyeeya pamakani aya kulancafwa kushiba ayi meelesho ngontokwiindaamo pacecino ciindi alaakumana, alimwi ayi bushiku bumwi ndaakubona ayi buumi bwangu buli kabotu ceebo cakwaamba ayi ndakakoma meelesho ayo.”

Bacanike babyaanu nshobaamba

“Kuba ushinishite alimwi akutaloonda kulancafwa kukaka meelesho. Kucakubonenaako, na ndasalawo kutacita cintu cimwi, ndashinisha kucita ncondasala, alimwi nsheeleshi kwaalula ncondasala kucita nabi kuyungwa amiyeeyo ya bamwi.”—Olivia

“Bacikula bwangu baanji balayungwa kuya kumapaati akucita shintu shili shoonse bantu nshobacita kumapaati mbuli kunwa bwalwa, kusebensesha misamu ikola, akoonana. Kubandika cakwaanguluka abashali bangu pamakani aya kulancafwa abuumbi. Alimwi kuba ashakucita shiinji kulancafwa kuleya meelesho.”—Jared.

“Bweelesho bumwi buyumu abuumbi, nkukaka kucita cintu bamwi ncobabona ayi cilibo kabotu sombi nebo ncembona ayi tacibete kabotu, mbuli kusala shakulikondelesha. Ulayandika kushinisha nshoshoma kwaamba ayi uleye kweeleshekwa, alimwi kucita boobo kulayandika ciindi alushibo.”—Mayan.

“Kulansha kumakani akweeleshekwa, tulayandika kulishiba kabotu. Tulyeelete kushiba kabotu ma webusaiti pabikwa shintu sheenga shatupa kuba amiyeeyo yakoonana, akushiba nsheenga twaciita na twaboona shintu shamushobo uyo. Tulayandika kulibambilila limwi kwaamba ayi tuleye meelesho.”—Julian.