Incito Shakuyaka Shakakumanishikwa Bulwashi bwa COVID-19 Kabutana Kutalika

Mukwiinga bantu baanji batobombekwa mwaaka amwaaka, tutoyandika misena iinji njetusebensesha mukulambila Lesa. Aboobo bamu Madipatimenti a Local Design/Construction nsengwe yoonse, bakabika bubaambo bwakuyaka alimwi akubamba misena iindilila 2,700 njetusebensesha mukulambila Lesa mumwaaka wancito wa 2020.a

Nacibi boobo, bubaambo ubu bwakapilinganishikwa ceebo cabulwashi bwa COVID-19. Komiti Ilanga Pamakani Akupulinta yamu Likoto Litanjilila yakeemika ncito shimwi shakuyaka nsengwe yoonse kwakaciindi, kwaamba ayi bashitilishe bamakwesu abenankashi alimwi aceebo cakukonkela milawo ya mfulumeende. Nacibi boobo, mumwaaka wancito wa 2020 kwakayakwa alimwi akubambwa misena yakulambililaamo iindilila 1,700 bulwashi bwa COVID-19 kabutana kutalika. Kwiilikaawo, misampi iindilila 100 yakayakwa na kubambwa. Amubone bamakwesu mbobakafubilaaamo mumisena yobilo yakayakwa.

Musampi waku Cameroon. Musampi wakale kale wakalinga ku Douala wakalinga uniini abuumbi alimwi kwakalinga kuyandika kuyakilaawo maanda aamwi. Bamu Komiti Ilanga Pamakani Akupulinta bakabona ayi musampi utoyandika kubambwa. Sombi naakwiinga bakasebensesha maali aanji abuumbi kubamba musena uyu. Alimwi bakayeeya kuyaka musampi pamusena umwi upya na kuula alimwi akubamba ŋanda imwi iliko kale. Sombi shoonse ishi tashikwe kucitikaawo.

Paciindi ici, bamakwesu bakesa mukushiba ayi mfulumeende ilisuni kubamba nshila kumatwa lya Douala, iyo yakalinga kusa mukwiinda pafwiifwi amusena umwi Nkotucitila Mabungano Anene. Nshila iyi yakalinga kusa mukupa kwaamba ayi cinooba cuubu kuya kumusena uyu, kutolako malaiti, maanshi ashimwi shakalinga kuyandika. Ishi nshoshakalinga kuyandika pakuyaka musampi uyu. Aboobo bamu Likoto Litanjilila bakasuminisha ayi kuyakwe musampi upya kulubasu lumwi lwa Musena Nkotucitila Mabungano Anene.

Bakamboni bakalinga kusebensela pomwi abeshikuyaka baku kampani yakapekwa ncito iyi yakuyaka alimwi ici cakapa kwaamba ayi bamanishe ncito muciindi ciniinibo akusebenseshabo maali aniini kwiinda ngobakalinga kuyeeyela. Alimwi maali akacaalawo akalinga kwiindilila madola aku America ashika ku 2 miliyoni. Bamu mukwashi wa Bethel bakalongela mu musampi uyu upya bulwashi bwa COVID-19 kabutana kutalika.

Pacecino ciindi basebensela pa Bethel balekala kabotu, balasebensa kabotu alimwi balabona musampi uyu upya mbuli cipo kuswa kuli Yehova. Beebene bamwi bakaamba ayi, “Tulisuni kunosebensa cankusu alimwi akutondesha kulumba pacipo ici.”

Ofesi Yabasansulushi (RTO) Bamushobo waci Tojolabal, yaku Mexico. Kwamyaaka iinji, basansulushi bamushobo waci Tojolabal bakalinga kusebensela pa musampi waku Central America uli pafwiifwi a tauni ya Mexico. Nacibi boobo, mushobo waci Tojolabal ulaambwa bunene ku Altamirano alimwi aku Las Margaritas misena ili pamushinso ulaampa makilomita ashika pafwiifwi a 1,000 kuswa ku musampi. Ici cakapa kwaamba ayi basansulushi batashibi maswi bantu ngobakacileka kusebensesha alimwi angobakaalula. Alimwi cakalinga ciyumu kubamakwesu baku musampi kucana bamakwesu abenankashi pafwiifwi beenga beelela kusebenseshekwa kusansulula mushobo waci Tojolabal alimwi akulekoda.

Ceebo ca sheeshi, bamu Komiti Yabeshikulemba yamu Likoto Litanjilila bakalinga kusuni ayi basansulushi bamushobo waci Tojolabal balongele kumusena mushobo uyu nkowaambwa. Kwaamba ayi bacikoonshe kucita boobo, baku musampi bakasalawo kuula ŋanda yakalingaako kale akwiibamba. Ici cakapa kwaamba ayi basebenseshe maali aniini kwiinda aayo ngobakalinga kweelete kusebensesha kuyaka na kucita lenti maofesi.

Musansulushi womwi wakaamba mbwaakafubilaamo mububaambo ubu ayi: “Kwamyaaka 10 njondasebensa mbuli musansulushi pamusampi, nshikwe kukumanyawo kale mukwashi pafwiifwi baamba mushobo ngoŋamba. Ano pacecino ciindi, ofesi yesu yakayakwa kumusena kwaambwa mushobo waci Tojolabal. Alimwi lyoonse ndabandika abantu baamba ci Tojolabal. Ici cancafwa kwiiya maswi aanji alimwi ndaya panembo muncito yabusansulushi.”

Incito Shitolangilwa Kucitwa Mumwaaka Wancito wa 2021

Mumwaaka wancito wa 2021, kwakabikwa bubaambo bwakuyaka ma RTO ali 75 alimwi amisena kwakucitila shikolo sha Bwaami, na bukaalo bukasuminishe. Tulaakutolelela kusebensela pa misampi ili 8, kuyaka maofesi anene apya ku Ramapo, New York alimwi akulonsha musampi waku Argentina awaku Italy. Kwiilikaawo, kutoyandika maanda a Bwaami apya eendilila 1,000, misena yakubunganinaamo iindilila 6,000 taibete kabotu aboobo kutoyandika kuyakwa imwi ipya, alimwi kuli a Maanda a Bwaami ashika ku 4,000 atoyandika kubambwa.

Ino maali asebenseshekwa kuyaka alimwi akubamba misena iyi alaswa kuli? Mukwesu Lázaro González womwi wamu Komiti Yamusampi waku Central America, wakakumbula mwiipusho uyu ndyaakalinga kwaamba pabubaambo bwakuyaka Ofesi Yabasansulushi bamushobo waci Tojolabal. Wakaamba ayi: “Mumusena wa musampi wesu bamakwesu baanji tabacite shintu shiinji shakumubili. Aboobo kwakubula lucafwo lwa bamakwesu abenankashi nsengwe yoonse, inga tacikonshekiiwo kuyaka maofesi abasansulushi amumishobo njobasebensesha bamakwesu kuno. Maali bamakwesu abenankashi ngobapa nsengwe yoonse apa kwaamba ayi tucikoonshe kuyaka Maofesi Abasansulushi kumisena mishobo yabo nkoyaambwa. Tutolumba abuumbi kubamakwesu abenankashi nsengwe yoonse ceebo ca mushimu wabo wabwaabi.” Incito yakuyaka iyi yakonsheka ceebo camaali ngomupa kucafwilisha ncito yansengwe yoonse, ayo liinji apekwa kwiinda mukusebensesha donate.jw.org.