Misena Iyakwa Itucafwa Kusebensa Ncito Yakushimikila

Bamu Likoto Litanjilila balisunishishi abuumbi kwaamba ayi kuyakwe misena yeenga yatucafwa kusebensa ncito yakushimikila sha Bwaami. Kucakubonenaako, mumwaka wancito wa 2023 makampani asebenseshekwa a maofesi amisampi a Bakamboni bakwe Yehova, bakasebensesha maali amadola eendilila 500 miliyoni, kwaamba ayi boole, bayake, babambulule alimwi akubamba kabotu Maanda a Bwaami kwiilikaawo a misena mwakucitila Kubungana Kunene kushinguluka nsengwe yoonse.a Aya maali atokwiilikaawo aayo asebenseshekwa kulama kabotu Maanda a Bwaami kushinguluka nsengwe yoonse.

Kwiilikaawo, maali apekwa mukuliyandila alasebenseshekwa kuyaka akulama kabotu maofesi amisampi, ayo acafwa kutanjilila akucafwilisha ncito yakushimikila kushinguluka nsengwe yoonse. Twakoobyako bwakusebensa ncito njetusebensa mumisampi kwaamba ayi maali asebenseshekwe mukuyaka akubambulula Maanda a Bwaami alimwi a mwakucitila Mabungano Anene. Sombi kuciyandika maali aanji kwaamba ayi kube kubambulula misampi na kwiiyakila mumisena imwi. Ino nceebonshi incito iyi ilayandika? Ino misampi ilacafwilisha buyani incito iyandika yakushimikila? Amuleke tubone.

“Kubambulula Misena Kulapa Kwaamba Ayi Ikale Kwaciindi Cilaamfu”

Misampi iinji yekala kwa myaaka iindilila 30 na 40! Ba Nicholas basebensa mu Worldwide Design/Construction Department, bakaamba ayi: “Nabi musena wakwaamba ayi ulalamwa kabotu mukuya kwa ciindi ulatalika kuya cinyonyooka. Kubambulula musena kulapa kwaamba ayi ukale kwa ciindi cilaamfu.”

Misampi ayalo inga yayandika kubambululwa kwaamba ayi incito icitwa mumisampi ikumanishe shitoyandika mulibunga. Kuswabo ciindi misampi iinji ndyeyakayakwa, namba ya beshikushimikila yakomenenaako abuumbi kushinguluka nsengwe yoonse. Aboobo ceebo cakukomena kwa namba iyi, kwalinga kuyandika basebenshi baanji bakulyaaba kusebensa ncito mumisampi iyi. Ici cakapa kwaamba ayi misena ya misampi yakalinga kuboneka ayi njinene pacecino ciindi yakaceya abuumbi!

Kulishitilisha akwalo kulayandika abuumbi. Mukwiinga tutookala munshiku shakweelaako sha bweende bwa shintu ubu, tulacitikilwa mapenshi anene aanji esa cakuteengashila eenga abika buumi bwesu mumapensho. (Luka 21:11) Ndyetutosebensesha nshila shipya mukubambulula misena iyi tulashinisha kwaamba ayi ilaakunoshitilisha baabo beshi bakanosebenselaamo. Kucita sheeshi kulapa kwaamba ayi bamakwesu cibabete cuubu kusebensesha misena iyi kupa lucafwo kubaabo bakacitikilwa mapensho alimwi akutolelela kucafwilisha ncito yakushimikila nabi pesule lyakwaamba ayi mapensho anene acitika cakutengashila eenda.

“Yehova Wapa Kwaamba Ayi Kusala Uku Kuswitilile”

Kwiinda mukutanjililwa a Likoto Litanjilila, mumwaaka wancito wa 2023 kwakaba kuyaka na kubambululako mbasu shimwi mumisampi ili 43. Ici citosansulula ayi pafwiifwi a haafu ya misampi iliko kushinguluka nsengwe yoonse yakalinga kuyakwa na kubambululwa mumbasu shimwi. Amubone shakubonenaako shiniini shitotondesha kuyandika kwa ncito iyi.

Ku Angola. Ba Matt bamu Komiti ya Musampi waku Angola bakaamba ayi: “Tulicite coolwe cakubona bushinshimi bucanika pa Agayi 2:7 kabukumanishikwa munshila ilibetele. Mu myaaka ilibo 10 namba ya beshikushimikila yaya panembo a 60 pesenti! Kwaamba ayi tucafwilishe beshikushimikila aba, basebenshi bapa Bethel balinga kuyandika kufulilaako kwa mankanda otatwe. Nacibi boobo, ceebo cakwaamba ayi musena nguniini twakaalilwa kwiita basebenshi bakalinga kuyandika kwaamba ayi bese basebensele pa Bethel. Ici cakapa kwaamba ayi basebenshi baanji pa Bethel bapekwe ncito inene abuumbi alimwi akusebensa mawoola aanji kwiinda ngobakalinga kweelete kunosebensa.”

Bamakwesu bakapekwa ncito kwaamba ayi babone nsheenga bacita kwaamba ayi musampi ukomeneneeko. Pakutaanguna bakabona ayi nshila yuubu alimwi yeenga yacafwa, nkubambulula musampi weenka wakalinga kuyakitwe kale. Sombi pesule lya kulangweetawo makani aanji, bakesa mukucana kwaamba ayi kubambulula musampi inga takubi kusebensesha kabotu maali apekwa mukuliyandila. Muciindi cakucita boobo, bakayeeya ayi boole akubambulula musena wakalinga kuyakitwe wakalinga pafwiifwi. Ba Matt bakaamba ayi: “Muyeeyo wakuula akubambulula musena wakayakwa kale ndyewakashika ku Komiti ya Musampi, twakalinga kuyeeya ayi musena inga taweeleli kweelana awooyo ngweenga twaliyakila sobeene, sombi pacecino ciindi na misena iyi yamana kubambululwa tulabona ayi itokweelela ano. Yehova wapa kwaamba ayi kusala uku kuswitilile.”

Citoboneka kwaamba ayi musampi waku Angola, ulaakuyandika musena aumwi kunembo. Nacibi boobo, musena upya wakayakwa, alimwi a maanda apa Bethel mwakukala ayo eenga abambululwa mukuya kwa ciindi, kwiilikaawo amisena imwi njetusebensesha yakusonkela, yapa kwaamba ayi musampi ube amusena wakalinga kuyandika kwaamba ayi tutolelele kucafwa ncito yakushimikila itoya panembo.

Ku Japan. Peenda myaaka pafwiifwi a 40 ano kuswa ciindi maanda asebenseshekwa bunene apa musampi waku Japan ndyaakayakwa alimwi aanji taana kubambululwa. Nabi kwaamba ayi bamakwesu bakasebensa cankusu kulama kabotu maanda aya, twakaasebensesha kwa ciindi cilaamfu kwiinda myaaka njaakalinga kweelete kusebensa. Nceceebo ceeco, pacecino ciindi maanda aanji atobambululwa.

Buumi bwapa Bethel abwalo bwaaluka kwa myaaka iinji yainda. Kautana kushika mwaaka wa 2015, bamumukwashi wapa Bethel bakalinga kutelekelwa shakulya sha macuunsa, malumwi alimwi amacolesha. Aboobo mushipinda shiinji mwakalinga kukala baabo basebensela pa Bethel ku Japan, mwakalinga kubabo musena uniini pakutelekela. Pacecino ciindi abo basebensela pa Bethel liinji balalitelekela shakulya. Misena itobambululwa yapa kwaamba ayi cibe cuubu kubabo basebensela pa Bethel kulitelekela shakulya, ceebo ca makicini ngobayaka mushipinda shabo. Nankashi waliina lya Kumiko usebensela kumusampi waku Japan wakaamba ayi, “Kicini ilaampa kuba wangulukite alimwi ilancafwa kukonkela bubambo bupya bwapa Bethel.”

Incito icitwa pa musampi waku Japan ndubasu luyandika abuumbi lwa ncito icitwa nsengwe yoonse. (Mateyo 28:19, 20) Musampi waku Japan uli pa misampi yobilo iyo ipulinta Baibo yoonse. Aboobo, incito yakuyaka itoocitwa kutooba kubika amamashini akwaamba ayi kaabwesa lusuko kwaamba ayi abo boonse basebensa ncito ya kupulinta banoshitilishikwa. Maali amadola akasebenseshekwa kuula akubika mamashini aya akusebensesha, akashika pafwiifwi a 1 miliyoni, sombi mamashini aya alapa kwaamba ayi incito ya kupulinta pa musampi itolelele alimwi akutuma mabuku atucafwa kuyumya lushomo lwesu bunene bunene Baibo.

Bamakwesu bakashinisha kwaamba ayi incito ya kupulinta Baibo yatolelela ndyebakalinga kuyaka. Ba Trey basebensa Mukomiti ya Musampi waku Japan, bakaamba ayi: “Paciindi ndyebakalinga kuyaka, libunga lyesu lyakatolelela kukusha ma Baibo mumishobo iinji alimwi bantu baanji kushinguluka nsengwe yoonse bakalinga kuyandika ma Baibo. Muma dipatimenti bantu bakalinga kuyandika kusebensela pomwi kwaamba ayi babike bubambo bwa ciindi ndyebakalinga kuyandika kubika shisebensesho shipya alimwi andyebakalinga kuyandika kupulinta mabuku.” Nabi kwaamba ayi kwakalinga buyumuyumu ubu, ma Baibo ashika pafwiifwi a 220,000 akalinga kupulintwa mwenshi a mwenshi kuswa mu March kushika mu August 2023​—ciindi incito inene yakubambulula ndyeyakalinga kucitwa kumusena nkobapulintila. Incito yoonse iyi yakamana kwakubula kwiilikawo maali aamwi akusebensesha.

Nshila aimwi iyandika pa kubambulula musena nkusebensesha malaiti. Tulaakubika masola apya, ayo eshi akacafwe kwaamba ayi tutakanosebensesha maali amadola ashika mpashi 120,000 asebenseshekwa mwaaka amwaaka. Tulaakubika a mawindo acite magilasi otatwe kwaamba ayi akatucaafwe kusebensesha maali aniini, alimwi alaakutucafwa kutanoosebensesha maali amadola mpashi ashika ku 10,000 pa mwaaka. Nabi kwaamba ayi ishi shilaakupa kwaamba ayi incito yakubambulula iyandike maali aanji, sombi shilaakutucafwa kwaamba ayi tutakanosebensesha maali amadola eendilila 3.5 miliyoni kwa myaaka njeenga masola alimwi a mawindo aya asebensa. Alimwi masola a mawindo alaakucafwa kutaalula bunene musena waashingulukite.

“Kucili Ashimwi Shiinji Shitoyandika Kucitwa”

Incito yakubambulula Misampi iyi yobilo itotondesha kukomena kwa ncito itoyandika kucitwa kwaamba ayi misampi itolelele kucafwilisha shitoyandika muncito yakushimikila. Nacibi boobo, incito taina kumana. Ba Aaron basebensa mu Worldwide Design/Construction Department, bakaamba ayi: “Nabi kwaamba ayi bamakwesu basebensa ncito inene abuumbi, kucili ashimwi shiinji shitoyandika kucitwa.” Ino incito iyi ilaakukumanishikwa buyani? Bakatolelela akwaamba ayi: “Kwilika pakusebensesha maali apekwa mukuliyandila ayo acafwa kwaamba ayi kuyakwe akubambulula misena, tulalumba abuumbi pa mushimu wakulyaaba kwabaabo boonse bakasebensa cankusu kwiilikaawo abaabo batokwaalulako shimwi mubuumi bwabo kwaamba ayi bakasebenseeko kunembo. Bamakwesu aba balatondesha ayi Yehova atootucafwa kwaamba ayi incito iyi ikumanishikwe kwiinda mukupa maali abo alimwi akwaaba nkusu shabo kusebensa ncito iyi.”​—Kulumbaisha 110:3.

Incito yakuyaka alimwi akubambulula misena ilacitwa kwiinda mukusebensesha maali apekwa mukuliyandila ayo liinji apekwa kwiinda mukusebensesha donate.jw.org. Twalumba abuumbi pakutolelela kuba amushimu wabwaabi.