Miipusho Kuswa Kubeshikubelenga

Sa maswi ngotucana pa Kulumbaisha 61:8, apo Defedi mpakaamba ayi alaakulumbaisha liina lyakwe Lesa kwamuyayaya, alasansulula ayi wakalinga kuyeeya ayi teshi akafweewo?

Sobwe. Maswi Defedi ngaakalemba ngancine.

Amuyeeye nshaakalemba muvesi iyi alimwi amumavesi aamba makani mbuli aya: “Aboobo lyoonse ndaakunoolumbaisha liina lyanu, akunoocita kweelana anshendakashomesha cakulumbila nshiiku shoonse.” ‘Ndakulumbaisha amoyo wangu woonse, O Yehova Lesa wangu, ndaakwaambilisha bulemu bwako kwamuyayaya.’ ‘Ndanoolumbaisha liina lyako kwa lyoonse alyoonse.’​—Kulu. 61:8; 86:12; 145:1, 2.

Defedi ndyaakalemba maswi aya taakalinga kuyeeya ayi teshi akafwewo. Wakalinga kucishi ayi Yehova wakaamba ayi bantu balaakunoofwa ceebo ca kubisha. Alimwi Defedi wakalinga kucishi ayi alakwe wakalinga mucita shibiibi. (Mata. 3:3, 17-19; Kulu. 51:4, 5) Wakalinga kucishi ayi nabibo basankwa bashomeka mbuli Abulaamu, Isaki, alimwi Jakobo, bakafwa. Alimwi Defedi wakalinga kucishi ayi alakwe alaakufwa mukuya kwaciindi. (Kulu. 37:25; 39:4) Nacibi boobo, maswi ngaakalemba pa Kulumbaisha 61:8 alatondesha ayi wakalinga kusunishishi alimwi akushinishite kulumbaisha Lesa kwamuyayaya, nkokwaamba ayi kulilabo kaali muumi.​—2 Samwe. 7:12.

Cimwi ciindi Defedi wakalinga kulemba nshaakeendaamo, kweelana amaswi ali peculu lya Kulumbaisha 18, 51, alimwi a 52. Kulumbaisha 23, ilatondesha Defedi mbwakasansulula Yehova mbuli mweembeshi utanjilila, uyuminisha, alimwi akushitilisha. Ubu Defedi alakwe mbwaakalinga. Alimwi wakalinga kusuni kusebensela Lesa kwa ‘lyoonse alyoonse’​—Kulu. 23:6.

Mutaluubi kwaamba ayi Yehova ngowakatanjilila Defedi kwaamba ayi alembe makani oonse ngaakalemba. Nshaakalemba shakalinga kwiilikaawo bushinshimi bwakalinga kusa mukukumanishikwa kunembo. Kucakubonenaako, Kulumbaisha 110, Defedi wakalemba sha ciindi Mwaami wakwe ndyaakalinga kusa ‘mukukala kulyaansa [lyakwe Lesa] lyalulyo’ kwiculu akutambula nkusu. Ino kutambula nkusu sha nshi? Sha kukoma balwani bakwe Lesa ‘akoombolosha mishobo yoonse’ ya pacishi capanshi. Defedi wakalinga mushali mukulukulu wakwe Yesu, uyo wakalinga Mesiya. Mesiya wakalinga kusa mukweendelesha kaali kwiculu alimwi akuba ‘mupailishi wamuyayaya.’ (Kulu. 110:1-6) Yesu wakaamba ayi bushinshimi mbotucana pa Kulumbaisha 110 bwakalinga kwaamba pali nguwe alimwi bwakalinga kusa mukukumanishikwa kunembo.​—Mate. 22:41-45.

Yehova wakatanjilila Defedi kulemba makani akacitika paciindi cilya alimwi aayo eshi akacitike kunembo ndyeshi akabushikwe akusangalala kulumbaisha Yehova kwamuyayaya. Ici cilatucafwa kushiba kwaamba ayi maswi ngotucana pa Kulumbaisha 37:10, 11, 29 inga asansulula shakacitika paciindi maswi aya ndyaakalembwa alimwi asheshi shikacitike kunembo. Shaambwa pamavesi aya shakacitika muciindi cakale kale mucishi ca bene Isilaeli alimwi shilaakukumanishikwa nsengwe yoonse kunembo na Lesa akakumanishe nshaakashomesha.​—Amubone mutwi utokwaamba ayi “Ulaakuba Andime mu Paladaiso” mu palagilafu 8 mumagazini yeenka iyi.

Aboobo maswi ngotucana pa Kulumbaisha 61:8 alimwi amavesi amwi aamba pamakani mbuli aya, alatondesha ayi Defedi wakalinga kusuni kulemeka Yehova muciindi ca bene Isilaeli bakale kale kwa buumi bwakwe boonse. Alimwi maswi aya alatondesha Defedi nsheshi akacite kunembo na Yehova akamubuushe.