Sa Mulicishi?
Ino nceebonshi Baibo ilabooshawo maswi amwi?
ABO bakalemba Baibo cimwi ciindi bakalinga kubooshawo kulemba maswi womwi womwi. Amuleke tubandike pashintu shotatwe mpashi shakapa kwaamba ayi bakalemba Baibo banoocita boobo:
Ciindi libuku lyamu Baibo ndyelyakalembwa. Muciindi ca bene Isilaeli, bantu baanji tabakalinga kuciteewo mabuku mwakalinga kulembetwe milawo yakwe Lesa. Liinji bakalinga kukutika ku milawo ndyeyakalinga kubelengwa na babungana pomwi ku tente yakulambililaako apa tempele. (Duto. 31:10-12) Cilyeelete kwaamba ayi kuli shintu shimwi shakalinga kubapilinganya ndyebakalinga kukutika kabeemfwi kwaciindi cilaamfu mubantu baanji. (Neye. 8:2, 3, 7) Pashiindi isho, kubooshawo maswi amwi ayandika kwakalinga kupa kwaamba ayi cibe cuubu bantu kwiibaluka malembo akwaakonkela. Kubooshawo maswi amwi kwakalinga kubacafwa bunene bunene kwiibaluka shoonse shakalinga kwiilikitwe mumilawo Yehova njaakabapa.—Lefi. 18:4-22; Duto. 5:1.
Mbolyakalembwa. Mu Baibo muli nyimbo shiinji mbuli libuku lya Kulumbaisha, Lwiimbo lwakwe Solomoni alimwi a Malilo. Cimwi ciindi maswi akalinga kuboshekwawo munyimbo. Kucita boobo kwakalinga kuyuminisha citeente cinene ca lwiimbo akucafwa beshikukutika kwiibaluka maswi aliimo. Kucakubonenaako, amubone maswi acanika pa Kulumbaisha 115:9-11: ‘Amucinke manungo muli Yehova mwebo nobene Isilaeli—Ngoomucafwa alimwi ndyeliyawo lyanu. Amucinke manungo muli Yehova mwebo nobamulunyungu lwakwe Aloni—Ngoomucafwa alimwi ndyeliyawo lyanu. Amucinke manungo muli Yehova mwebo nomumulambila—Ngoomucafwa alimwi ndyeliyawo lyanu.’ Kubooshawo maswi aya kwakalinga kucafwa beshikwiimba kutolelela kwiibaluka cancine ciyandika.
Ncolyakalembelwa. Cimwi ciindi bakalemba Baibo bakalinga kubooshawo maswi amwi ayandika. Kucakubonenaako, Yehova ndyaakalwiita bene Isilaeli ayi tabeelete kulya bulowa, wakalwiita Mose kunoobebalusha mankanda aanji ncobatakalinga kweelete kucitila boobo. Lesa wakalinga kusuni kubacafwa kunyumfwishisha ayi buumi bwa cintu cili coonse cuumi buli mubulowa. (Lefi. 17:11, 14) Lyalo batumwi abamanene ndyebakalemba shintu Beneklistu nshobakalinga kweelete kuleya kwaamba ayi basangalashe Lesa, bakabooshawo kwaamba pakuyandika kwa kutalya bulowa.—Milimo 15:20, 29.
Nabi kwaamba ayi Baibo ilabooshawo kwaamba maswi amwi, tacisansululi ayi Yehova alisuni ayi aswebo cibe cilabo cakubooshawo maswi amwi amu Baibo. Kucakubonenaako, Yesu wakaamba ayi: ‘Ndyemutopaila, mutanoobooshawo kwaamba maswi womwi awomwi.’ (Mate. 6:7) Lyalo wakaamba makani ayandika ngeenga twapaililaawo eendelana akuyanda kwakwe Lesa. (Mate. 6:9-13) Aboobo nabi kwaamba ayi tulaleya kubooshawo maswi womwi awomwi ndyetutopaila, inga twabooshawo kupailila pacintu comwi.—Mate. 7:7-11.
Aboobo kuli sheebo shibotu shipa kwaamba ayi Baibo inobooshawo maswi amwi. Ninshila yomwi panshila shiinji Mufundishi wesu Wiinditewo njasebensesha kutwiisha kwaamba ayi tucafwikwe.—Isa. 48:17, 18.