Zabbuli

Eri akubiriza eby’okuyimba; egenderako ebivuga eby’enkoba. Zabbuli ya Dawudi.

61 Ai Katonda, wulira okuwanjaga kwange.

Wuliriza okusaba kwange.+

2 Omutima gwange bwe gunaaba mu nnaku,*+

Nja kukukaabirira nga nnyima ensi gy’ekoma.

Ntwala ku lwazi olugulumivu ennyo.+

3 Kubanga oli kiddukiro kyange,

Oli munaala oguntaasa abalabe.+

4 Nja kubeeranga mu weema yo emirembe n’emirembe;+

Nja kuddukira wansi w’ebiwaawaatiro byo.+ (Seera)

5 Kubanga owulidde obweyamo bwange Ai Katonda.

Ompadde obusika bw’owa abo abatya erinnya lyo.+

6 Ojja kuwangaaza kabaka,+

Era anaabeerawo emyaka n’emyaka okuva ku mulembe ogumu okutuuka ku mulembe omulala.

7 Ajja kutuula ku ntebe y’obwakabaka* mu maaso ga Katonda emirembe n’emirembe;+

Mulage okwagala okutajjulukuka n’obwesigwa, bimukuume.+

8 Olwo nnaayimbanga okutendereza erinnya lyo emirembe n’emirembe+

Nga bwe nsasula obweyamo bwange buli lunaku.+