Engeri Okusaba Gye Kuyinza Okukuyambamu

Pamela bwe yafuna obulwadde obw’amaanyi yagenda mu ddwaliro. Naye era yasaba Katonda amuyambe asobole okugumira embeera gye yalimu. Okusaba kwamuyamba kutya?

Pamela agamba nti, “Bwe nnali nfuna obujjanjabi bw’ekirwadde kya kookolo, nneeraliikiriranga nnyo. Naye bwe nnasabanga Yakuwa Katonda, kyannyambanga okuguma era n’okuba omukkakkamu. Nkyalina obulumi, naye okusaba kunnyambye okuba n’endowooza ennuŋŋamu. Abantu bwe bambuuza engeri gye mpuliramu, mbaddamu nti ‘ssewulira bulungi, naye ndi musanyufu!’”

Kyokka, tetulina kulinda kufuna bulwadde bwa maanyi oba okubeera mu mbeera enzibu, ne tulyoka tusaba. Ffenna tufuna ebitusoomooza, ka bibe binene oba bitono, era tuba twetaaga obuyambi okusobola okubivvuunuka. Okusaba kuyinza okutuyamba?

Bayibuli egamba nti: “Omugugu gwo gutikke Yakuwa, era naye anaakuwaniriranga. Talireka mutuukirivu kugwa.” (Zabbuli 55:22) Ebigambo ebyo nga bizzaamu nnyo amaanyi! Kati olwo okusaba kuyinza kutya okukuyamba? Bw’osaba Katonda mu ngeri entuufu, ajja kukuyamba okuvvuunuka ekizibu ky’olina oba okukigumira.—Laba ebiri wansi w’omutwe, “Emiganyulo Egiri mu Kusaba.”

Emiganyulo Egiri mu Kusaba

Ofuna emirembe mu mutima

“Mutegeezenga Katonda bye mwetaaga, nga musabanga, nga mwegayiriranga, era nga mwebazanga; era emirembe gya Katonda egisingira ewala okutegeera kwonna gijja kukuuma emitima gyammwe n’ebirowoozo byammwe okuyitira mu Kristo Yesu.” (Abafiripi 4:6, 7) Bw’obuulira Katonda ebikweraliikiriza, ajja kukuyamba okusigala ng’oli mukkakkamu era akuwe amagezi aganaakuyamba okusalawo obulungi.

Katonda akuwa amagezi

“Bwe wabaawo omuntu yenna mu mmwe eyeetaaga amagezi, asabenga Katonda, kubanga agabira bonna nga talina gw’akambuwalira; era gajja kumuweebwa.” (Yakobo 1:5) Bwe tuba mu mbeera enzibu, tetutera kusalawo bulungi. Bw’osaba Katonda akuwe amagezi, ajja kukuyamba okujjukira amagezi amalungi agali mu Kigambo kye, Bayibuli.

Ozzibwamu amaanyi era obudaabudibwa

“Nnyinza byonna olw’oyo ampa amaanyi.” (Abafiripi 4:13) Olw’okuba Yakuwa ye Katonda Omuyinza w’Ebintu Byonna, asobola okukuwa amaanyi ge weetaaga okusobola okugumira ekizibu ky’olina oba okukivvuunuka. (Isaaya 40:29) Ate era Bayibuli egamba nti, Yakuwa ye “Katonda ow’okubudaabuda kwonna.” Asobola okutubudaabuda “mu kubonaabona kwaffe kwonna.”—2 Abakkolinso 1:3, 4.