BAYIBULI EDDAMU EBIBUUZO BINO

Kisoboka okutegeera Bayibuli?

Bayibuli Kigambo kya Katonda. Eringa ebbaluwa taata gy’awandiikidde abaana be b’ayagala ennyo. (2 Timoseewo 3:16) Mu Bayibuli, Katonda atunnyonnyola engeri gye tusobola okumusanyusaamu, ensonga lwaki aleseewo okubonaabona, n’ebyo by’ajja okukolera abantu mu biseera eby’omu maaso. Naye abakulembeze b’amadiini banyoddenyodde enjigiriza za Bayibuli; ekiviiriddeko abantu bangi okulowooza nti tebayinza kugitegeera.​—Ebikolwa 20:29, 30.

Yakuwa Katonda ayagala tumanye amazima agamukwatako. Eyo y’ensonga lwaki atuwadde ekitabo kye tusobola okusoma ne tukitegeera.​—Soma 1 Timoseewo 2:3, 4.

Osobola Otya Okutegeera Bayibuli?

Ng’oggyeko okutuwa Bayibuli, Yakuwa atuwa obuyambi tusobole okugitegeera. Ng’ekyokulabirako, yatuma Yesu ku nsi atuyigirize. (Lukka 4:16-21) Yesu yajulizanga Ebyawandiikibwa okusobola okuyamba abo be yabanga ayigiriza okubitegeera.​—Soma Lukka 24:27, 32, 45.

Yesu yatandikawo ekibiina Ekikristaayo kisobole okweyongera okuyigiriza abantu ebikwata ku Katonda. (Matayo 28:19, 20) Leero, abagoberezi ba Yesu ab’amazima bayamba abantu okutegeera ebyo Bayibuli by’eyigiriza ku Katonda. Bw’oba nga wandyagadde okutegeera Bayibuli, Abajulirwa ba Yakuwa beetegefu okukuyamba.​—Soma Ebikolwa 8:30, 31.