ESSOMO 4

Okwanjula Ebyawandiikibwa

Matayo 22:41-45

MU BUFUNZE: Leetera abawuliriza okwesunga ekyawandiikibwa ky’ogenda okusoma.

Manya ensonga lwaki ogenda kusoma ekyawandiikibwa. Yanjula buli kyawandiikibwa mu ngeri eneeyamba abakuwuliriza okulaba ensonga gy’oyagala okuggyayo mu kyawandiikibwa ekyo.

Weetegereze ennyiriri eziriraanyeewo. Yogera erinnya ettuufu ery’omuntu eyayogera ebigambo by’ogenda okusoma, oba ery’omuntu eyawandiika ekitabo kya Bayibuli ky’ogenda okusomamu.
Laga nti by’ogenda okusoma biva mu Bayibuli. Bw’oba oyogera eri abantu abakkiririza mu Katonda, yogera ku Bayibuli “ng’Ekigambo kya Katonda,” basobole okukiraba nti amagezi agagirimu ge gasingayo obulungi.
Baleetere okwesunga ekyawandiikibwa. Buuza ekibuuzo ekiddibwamu mu kyawandiikibwa ky’ogenda okusoma, nokolayo ekizibu ekyawandiikibwa ekyo kye kisobola okugonjoola, oba laga omusingi oguli mu kyawandiikibwa ekyo.

Lowooza ku bintu abakuwuliriza bye bamanyi ku ekyo ky’ogenda okwogerako ne ku kyawandiikibwa ky’ogenda okusoma. Ekyawandiikibwa ne bwe kiba nga kimanyiddwa, kyanjule mu ngeri esikiriza era yamba abakuwuliriza okubaako ekipya kye bakiyigamu.