MURU 22

Vyaireile vabara yofiila

Farau angavwide ira Aisraeli atodhowa, atoochinja mathuulelwee moi atoowandela anyakhondwee ira: ‘Tukulani magaleta akhondo naa-areleni. Kanaarumeli-e ira tadhowe.’ Ee-no Farau na anyakhondwee tatooroma atamangela Aisraeli.

Yohova anoosogolela atwee. Nathana a-indi-edha basa rambo nama-iyu a-indi-edha basa mulo. Aisraeli tangafiile vabara yofiila, Yohova atoawandela ira tamange misasa.

Ee-no Aisraeli tatoona Farau na anyakhondwee taa-aranga. Aliwa katana otawela namwasa oi sogolowiwa wali bara ndulimwiwa mwali anyakhondho Afarau. Aliwa tatoova maningi voi tatom’mwandela Mose ira: ‘Ninokwa! Mbwenye waani-iye nikalangave wu Iguputu.’ Mose atoawandela ira: ‘Kamuove Yohova unonivulumucha.’ Veva Mose atoothonyi-edha ira anom’roromela maningi Yohova.

Ee-no Yohova atoawandela Aisraeli ira tavenyathi. Ma-iyu enawene, Yohova atooiri-a ira rambule ukhale vari va Aisraeli na Aiguputu. Vyevi vyatooiri-a ira uikhundu ya Aisraeli ukhale njeza, mbwenye uikhundu ya Aiguputu ukale isi.

Yohova atom’mwandela Mose ira athaphule dhandhalee nothonya vabaranivo. Ee-no Yohova atooiri-a liphevo lakopolo vabaravo ma-iyu wethene. Adhamale bariyo yatoogawaneya noimela ninga machi-i uvikhundu vinli. Aisraelao tatoovandela vangali vouma nodhowa kombela n’nangolo.

Aisraeli taviranga vabara yofiila valimburo louma ma-inje tangaimenle ninga machi-i muvikundu vinli

Anyakhondo a Farawao tatooa-arela fiya vari vabaravo. Ee-no Yohova atooiri-a ira anyakhondwao tadodomeye mathuulelo. Maroda amagaletiwa tatooroma nongeya. Tangaoni vyevi, anyakhondwao tatookuwa ira: ‘Dhoweni nitaweni! Yohova unaakhomela khondo.’

Ee-no Yohova atom’mwandela Mose ira: ‘Thaphula dhandhalaa nothonya vabaranivo.’ Hora yeniyene ma-inje tatoowelela ninga mwali aliwa nononga anyakhondo othene Aiguputu. Farau na anyakhondwee takwele vevo, kavali mutu nam’mbo-ene avulumuwile.

Aisraeli tangaoni ira atovulumuwa, tatoom’titimi-a Nlungu noomba nyumbo ira: “Ninom’mombela Yohova voi liye ngwavadhulu okwaranya, utoponyedha vabarani makavalo, naatu ogwela vamakavalonivo.” Voomba nyumbwila, a-iyana tanooina thitho enango tanoomba mikocho. Mutu uliwethene anoosangalala maningi.

“Nikale olimba rima thitho nionge ira: ‘Yohova ngunondikami-a. Kandinodha ova. N’nga mutu unondiira n’ni?’”—Aebere 13:6