Sau wa 10

Mose atom’mwandela Farau ira kanodha dhowa mam’monananee okhoka. Mbwenye a-anavenyathi atom’mwandela ira: ‘Vari vama-iyu apenene, a-ima othene aalombwana oroma baliwa Aiguputu anokwa. Romela mwana wa Farau fiyedha a-ima adhaari.’

Yohova atoowandela Aisraeli ira tadye yodya yavakundu. Atoawandela ira: ‘Mutukule mwana libila venango mwana mbudi. Ikale ya lombwana thitho ya yawa imbo-i. muphe thitho sangiree mudholi-e makaxili amisuwinyu. Nyamee muioche thitho muidye vambo-i na mapau o-okaana yotupi-a. Mudye mungamadhi wara vyowara vinyu na sapato dhokozeela ulendo. Ma-iyu apenene munokuma mu Iguputu muno.’ N’nga unothuulela ira Aisraeli tadhivwide a-vi tangawandeliwile vyevi?

Vari vama-iyu ngelo atoodhowa mavandhe mwethene mwa Aiguputu. Nyumba iliyothene ya-akaana sangiri va kaxilini, vanookwa mwana oroma baliwa. Mbwenye ngeluo kaapha a-ima anyumba dhedho makaxilwee adholi-iwile sangiri. Mabanja othene Aiguputu akala tali ofuma venango osauwa mwanookwa mwana oroma baliwa. Mbwenye kavali mwana na m’mbo-ene wa Aisraeli akwide.

Mwana oroma wa Farawene wenuo atookwa thitho. Mwaneuo angakwide Farau kaaodileve vilela. Hora yeniyene atom’mwandela Mose na Aroni ira: ‘Kumanimo muno, dhowangani. Mudhowenga mumalambele Nlungwinyu. Mutukule thitho vifuo vinyu.’

Ma-iyu anawene, Aisraeli tatooroma wenda ulendo thitho undhe watookala njeza maningi namwasa oi mwedi watookuma wethene. Mabanja na maziza tatoowendela vambo-i. Vatookala alombwana 600.000, a-iyana na a-imene. Vatookala thitho atu amaziza enango enao tadhowile vambo-i naaliwa ira tamalambele Yohova. Veva pamalele udhaari wa Aisraeli.

Vofuna thuulela vyaairele Yohova vowavulumucha, Aisraeli tanoodya yodya yavakundwile yawa iliyothene. Mwambula tauitana ira Paskwa.