Misau inango 6

Mose na Aroni tatoodhowa wa Farau mam’mwandela milanyu yokumela wa Nlungu yoonga ira: ‘Akala kunorumeli-a ira atwanga tadhowe, ndinodhi-a muilamboi ngwilisi dhopyondha sangiri.’ Ee-no ngwilisidho dhatoodhala m’mba mwa Aiguputu othene, ofuma na osauwene moi dhali valimburo nlilothene. Mbwenye wu Goseni weo wakala Aisraeli kwaali ngwilisi. Romela va sau wana 4, misauwila yakala weo wakala Aiguputu baa-i. Ee-no Farau atom’sembezela Mose ira: ‘Umandivephele wa Yohova ira amali-e ngwilisidhi. Mwaira e-no ndinourumeli-ani ira mudhowenga.’ Mbwenye Yohova angamali-idhe ngwilisidho, Farau atoochinja mathuulelwee. Liye kaafunjedhilevo yongo.

Yohova atoonga ira: ‘Farau a-arumeli-e ira atwanga tadhowenga, vifuo vyothene vya Aiguputu dhinoroma bulela thitho wukwa.’ Vadambo lo-arela vifuo dha Aiguputu dhatooroma wukwa. Mbwenye vifuo vya Aisreli kavyakwide. Angalive ira vyali e-no, Farau kaarumeli-idhe ira Aisraeli tadhowenga.

Ee-no Yohova atom’mwandela Mose ira adhowe okhoka wa Farau thitho amaponyedhe dora dhulu. Doralo linodha sanduwa tumbulu thitho linodha dhala muilambo yothene ya Aiguputu. Tumbululo lafwana mutu venango ifuo, lanooromi-a ilonda yopha maningi. Mbwenye angalive ira vyali e-no, Farau kaarumeli-idhe ira Aisraeli tadhowenga.

Yohova atom’ruma okhoka Mose ira adhowe wa Farau maonga ira: ‘N’nga kunofunave ira atwanga tadhowenga? Bebe-i ndinodhi-a dhongwe wa mararaza.’ Dambo lo-arela Yohova atoodhi-a dhongwe nlukulu, wakopolo, ogudha thitho ovyerima. Wu Iguputu wali wa-anarumbwe dhongwe ninga wenuo. Dhongula watoononga miri na mbeu dhothene kumi-avo wu Goseni. Farau atoonga ira: ‘Dhowani mumandivephele wa Yohova ira amali-e dhongula thitho ndinourumeli-ani ira mudhowenga.’ Mbwenye mararaza na dhonguo ungachi-idhe, Farau atoochinja okhoka mathuulelo.

Ee-no Mose atoonga ira: ‘Va-eeni unodha madhombe thitho anodha dya vyomela vyothene vya-anongeile na dhongwe wa mararaza.’ Vasogolovee watoodha madhombe manjinji nodya mbeu dhothene na mathakuru othene avimuri. Farau atoosembezela okhoka ira: ‘Mumandivephele wa Yohova ira amali-e madhombala.’ Mbwenye Yohova angamali-idhe madhombao, Farau atookonda rumeli-a Aisraeli ira tadhowenga.

Yohova atom’mwandela Mose ira: ‘Thathula dhandhalaa uthonye dhulu.’ Hora yeniyene watookala isi maningi. Wa malambo mararu Aiguputu kataoda ona mutu uliothene venango yongo iliyothene. Mbwenye wakala Aisraeli watookala njeza.

Moi e-no Farau atom’mwandela Mose ira: ‘Dhowangani, mbwenye vifuo vinyu muvi-iye.’ Mbwenye Mose aongile ira: ‘Ninodhitukula namwasa oi ninofuna nimadhivelele sembe wa Nlungwi-u.’ Farau atoothakaleliwa maningi noonga ira: ‘Dhowanga! Kanduuoneve okhoka wuno, wawela ndinoupha.’