Aisraeli tatoolanyedha ira anongom’vwela Yohova

Vangavirile myedi minli kumela vadambo lakumile aliwa wu Iguputu, Aisraeli tatoofiya vamwangoni wa Sinai nomanga misasiwa vevo. Moi e-no Yohova atom’mwandela Mose ira agwele mwangonimo. Angali mwangonimo Yohova atom’mwandela ira: ‘Nditovulumucha Aisraeli, akala anongo ndivwela no-arelanga malamulwanga, anodha kala atwanga avakundu.’ Ee-no Mose atoothitha mwangonimo nodhowa mawandela Aisraeli vyam’mwandenle Yohova. N’nga chini yairile Aisraeli tangavwide vyaongile Yohova? Aisraeli tatoorumela ira: ‘Ninongo irana yongo iliyothene iongile Yohova.’

Moi e-no Mose atoodhowa okokha mwangonimo. Adhamale Yohova atom’mwandela ira: ‘Ndinodha onga nanyo vavira malambo mararu. Uwenjeli-e atu ira katigwele mwangonimu.’ Mose atoothitha nodhowa mawandela Aisraeli ira takozeele uvwa vinofuna dhaawandela Yohova.

Vangavirile malambo mararu, watooroma vweya ula wa ndhari nouumela thitho mwango wethene wenuo watookuneleya na rambo odimba. Watoovweya thitho ula wa kopolo wa lipenga. Ee-no vamwangonivo vatookala mulo othonyi-edha ira Yohova utothithela mwangonimo. Aisraeli tatoova maningi moi tatooroma ngurumela. Mwango wethene wanootuwela wichi thitho tekenyeya maningi. Ula wa lipenga ule, watoowenjedheleya. Moi e-no Nlungu atoonga ira: ‘Miyo ndili Yohova, kamulambelenga milungu inango.’

Mose atoogwela okokha mwangoni mule, thitho Yohova atoom’va-a malamulo oi Aisraeli taa-arelenga vom’lambela, na voira vyongo vya dambo na dambo. Mose atoolemba malamulwao nowalerela Aisraeli. Aliwa tatoolanyedha ira: ‘Ninongo irana vyongo vyothene viongile Yohova.’ Aisraelao tatoolanyedha ira anongom’vwela Nlungu. N’nga tatooiranadi vyalanyedhile aliwa?