Aisraeli katairilena vyalanyedhile aliwa

Yohova atom’mwandela Mose ira: ‘Udhe mwangoni wuno. Ndinodha lemba malamulwanga vamabweni nouva-a.’ Mose atoodhowa mwangonio thitho atookala weo malambo 40. Angali weo Yohova atoolemba malamulo 10 vamabweni menli nom’va-a.

Vangavirile malambo mangasi, Aisraeli tathuulela ira Mose utowatawa. Moi ee-no tatom’mwandela Aroni ira: ‘Ninofuna namasogolela mwinango. Unisaka-edhele nlungu.’ Aroni atoawandela ira: ‘Ndiva-eni orwinyu.’ Moi e-no atounyungulucha oruo nosaka-edha fwano la mwana ng’ombe. Adhaire e-no Aisraelao tatoonga ira: ‘Wen’na ngu Nlungu anivulumuchile wu Iguputu.’ Moi ee-no tatooroma lambela fwano la mwana ng’ombuo noira pwando lothonyi-edha kala osangalala. Namwasa wa vyongo vyairile aliwavi, tatoodawa maningi. Aliwa tali tangalanyedhile ira anavwelenga Yohova baa-i mbwenye kai vyevyo vyairana aliwa.

Yohova atoona vyongo vyothene vyaireyavyo voi atom’mwandela Mose ira: ‘Dhowa umaone vinoira atu aa-iilewe ale. Ato-iya ndivwela thitho atoroma lambela nlungu onama.’ Mose atoovenyathi angatukunle mabwe menli valembiwile malamulwale.

Anga-adhi vang’ono fiya atoovwa atwale taombanga nyumbo. Adhamale atowaona tainanga nokokorela fwano la mwana ng’ombule. Mose atoothakaleliwa maningi moi atooponyedha vathi mabwe menli valembiwile mwalamulwale thitho tatoothweya. Hora yeniyene Mose atoononga fwano la mwana ng’ombule. Ee-no Mose atom’fuka Aroni ira: ‘Pyaimbarimbari ira watoovwela atwala nosaka-edha vyongo vyothakala e-ni?’ Aroni atoowakhula ira: ‘Pepani kamundinyanyuwele, nyo mutoidhiwa pama moda uli atwala. Aliwa tafuna nlungu, e-no ndatootukula oro nounyungulucha adhamale ndongosaka-edha mwana ng’ombula.’ Mbwenye Aroni kaafwanela irana vyevi. Mose atoodhowa okokha mwangoni ule nodhowa mam’vepha Yohova ira aalevelele atwao.

Yohova atoolevelela atu othene achinyuwile noroma okhoka m’vwela. Thitho Aisraeli tafuneela vwela vyongo vyothene vyaawandenle Mose.