Sasa olambelelamo

Mose angali mwangoni wa Sinai, Yohova atom’mwandela ira asaka-edhe tenda lavakundu lolambelelamo thitho laitaniwecha ira sasa.

Yohova atom’mwandela Mose ira: ‘Uwandele atwao ira tauva-e vyongo vyofuneeleya ira usaka-edhena sasuo. Aisraeli tatoovelela oro, siliva, khuwa mabwe apereso yavadhulu na vyongo vinango vyobalei-ana sasuo. Tatoovelela thitho uzoya wa mabila, nguwo, matembe avinyama na vyongo vinango. Atwao tatoodhana vyongo vinjinji fiyedha Mose awandela ira: ‘Vitokwakwana vyevi kamudhenave vyongo vinango.’

Mose atoo-indi-edha basa vyongovi vosaka-edha sasa. Aisraeli tanom’lambela Nlungu musasanimu thitho tausaka-edhile mundhila yoi taodenga utukula tawendanga ulendo.

Alombwana naa-iyana anjinji enao ana dodoliso, tatoolaba basa yomanga sasula. Yohova atowava-a zelu dhowakami-a volaba basali. Enango tanoosona nguwo nodhibalei-a. Vatookala thitho atu enango enao tasaka-edha vyongo vo-indi-edha basa mabwe, oro venango vimuri.

Atwao tatoomanga sasa vo-arela malangi-o ava-iwile aliwa na Yohova. Tatoosona nguwo yobaleya yeniyo ya-iyani-a limburo lochena na limburo lochena maningi. Mulimburo lochena maningilo, mwatookala bokosi lelo laitaniwa ira likasa la vwelano. Bokosili lasaka-edhiwe na oro thitho matabwa amuri wa kexa. Mulimburo lochena mwali yo-elavo nyale ya oro, meza na limburo nlukulu lovelelavo sembe. Vaindharoni la sasuo vatookala basiya na mamburo enango ovelelavo sembe dhoka-a. Aisraeli tatoomari-a manga sasula, vangavirile yawa imbo-i kumela vahora yakumile aliwa wu Iguputu. Moi e-no tatokaana limburo lolambelelamo. Likasa lavwelano lanowathuucha Aisraeli ira tatoolanyedha ira anam’vwelenga Yohova baa-i. N’nga utoidhiwa ira vwelano chini? Ndi yolanyedha yavakundu yeniyo atu inowandelana aliwa.

Yohova atom’sakula Aroni na a-imee aalombwana ira talabenga basa vasasani ninga alimbo velela sembe. Aroni baa-i wenuo ali ndimuwa waalimbo velela sembe, ngwenuo arumeli-iwa volowa mulimburo lochena maningi. Liye anoirana vyevi fendo imbo-i va yawa iliyothene vovelela sembe ya vyodawavyee, vyodawa vya banjalee na vyodawa vya Aisraeli othene.

Titimi-o la Yohova latoodhala sasanimo thitho rambo wakala vadhulu va sasuo. Rambuo wakalave vadhulu wa sasuo, Aisraeli tanookalave valimburonivo. Mbwenye wakumavo, tanooidhiwa ira anofwanela roma wenda ulendo. Ee-no tanoogudyula sasuo no-arelanga rambo thitho tanoodhowa mamanga sasuo valimburo n’nango.