Anamazondela 12 tatoodhowa maona ilambo ya Kanani

Aisraeli tangakumile va mwangoni wa Sinai, tavirilena kokolani ya Parana dhowa mafiya valimburo n’nango linoitaniwa Kadesi. Tangali valimburoniva, Yohova atom’mwandela Mose ira: ‘Sakula alombwana 12 kumela mu ziza nlilothene ira tadhowe tamaone ilambo ya Kanani inofuna miyo uva-ani.’ Ee-no Mose atoosakula anamazondela 12 noawandela ira: ‘Dhowani wu Kanani ira mumaone akala ilambwiyo njapama limamo mbeu. Mumaone thitho akala atwee mbakopolo venango ofooka, akala anokala misasani venango masidadi.’ Adhaire e-no atwao tatooroma wenda ulendo odhowa wu Kanani thitho vamwinjini waatula vatookala Yoswa na Kalebe.

Vangavirile malambo 40 tatoowelao thitho tatoodhana vyova-a vya savu, mauva na vyova-a vinango. Aliwa tatoonga ira: ‘Ilambwiyo njapama maningi mbwenye atwee mbakopolo maningi thitho anokala masidadi amipanda yolapa.’ Kalebe aongile ira: ‘Mbwenye ninooda agonji-a, dhoweni.’ N’nga utoidhiwa mwasee Kalebe atoonga vyevi? Namwasa oi liye na Yoswa, tanoom’roromela maningi Yohova. Mbwenye atu enango 10 ale taongile ira: ‘khabe kanidhoweni. Atwee mbaalukulu thitho akopolo moi i-yo naoneya ninga madhombe.’

Aisraeli tangavwide vyevi tatoosukwala maningi. Tatooroma dungunya noonganga ira: ‘Dhoweni nisakuleni namasogolela mwinango thitho niweleleni wu Iguputu. Pyaimbarimbari ira nidhoweni maphiwa?’ Mbwenye Yoswa na Kalebe taongile ira: ‘Atunyo dhoweni nim’vweleni Yohova thitho kaniove, Yohova unonibarela.’ Mbwenye Aisraelao katavwele moi tatoofiya vofunanga m’pha Yoswa na Kalebe.

N’nga Yohova airilen’ni? Liye atom’mwandela Mose ira: ‘Aisraeli nditowairela vyongo vinjinji maningi, mbwenye katinondivwelave. Namwasa wa vyevyo anokala kokolanimu wa vyawa 40 thitho othene anokwela kokolanimu. Anofuna dhowa mavolowa muilambo ilanyedhile miyo, ndi a-imiwa baa-i vambo-i na Yoswa na Kalebe.’