Vyairile Yesu angali zombwe

Yosefi na Mariya takala wu Nazareti. Takala vambo-i na Yesu thitho naa-imiwa enango aalombwana naa-iyana. Yosefi anoolaba basa yosema matabwa ira afwanye kobiri dhokami-ana banjalee. Liye anoofunji-a thitho banjalee vya Yohova na ilamulwee. Yosefi na banjalee tanoodhowecha sinagoga malambela Yohova hora dhothene. Thitho yawa iliyothene banjalee lanoowenda ulendo olapha dhowa wu Yerusalemu maira pwando la paskwa.

Yesu angana vyawa 12, banja liwa lanoodhowa thitho wu Yerusalemu ninga mwemo mwairela aliwa vyawa vyothene. Wu Yerusalemu watookala atu anjinji enao adhidhe dhaira pwando la paskwa. Pwandoli lingamadhi, Yosefi na Mariya thitho atu enango tatooroma ulendo owelela waniwa. Aliwa tathuulela ira tali vambo-i na Yesu. Mbwenye tatoozindiyela ira Yesu kaali naaliwa vahoriyo. Mbwenye tatoom’sakasaka waabaliwa othene mbwenye katam’fwaidhe.

Yosefi na Mariya tatoowelela okoka wu Yerusalemu voi tatoom’sakasaka wa malambo mararu mbwenye katam’fwaidhe. Aliwa tatoosukwala maningi na vyevi. Ee-no tatoodhowa mam’saka kachisini. Tatoom’fwanya angali naanamafunji-a angasi, anoovuruwana vyaonga aliwa thitho anowafuka vyofuka. Anamafunji-ao tatoodabwa maningi na Yesu moi naliyene thitho anowafuka vyofuka. Mbwenye tatoodabwa na moda mwawakulela liye. Tatoozindiyela ira Yesu anooidhiwa pama ilamulo ya Yohova.

Yosefi na Mariya tangam’moni Yesu, Mariya atoom’fuka ira: ‘Nikadhi niusakanga wa hora yolapela. Wali wani?’ Mbwenye Yesu atoawakhula ira: ‘N’nga nyo kamunoidhiwa ira ndinofwanela fwanyeyanga nyumbani mwa Babanga?’

Yesu atoovenyathi naanamabaleao nodhowanga wu Nazareti. Yosefi atoom’funji-a Yesu basa losema matabwa. N’nga unothuulela ira Yesu angali mwana ali mutu oi a-vi? Hora yaulukula liye zeludhee dhanoowenjedheleya thitho anoodhiveliwiwa na Nlungu thitho atu.