Outubro

N’nga hora dhinango vinouruchani kala ovwela? Vyevi vyatom’muireelavo mwene Davide. Ee-no liye atoolobela wa Nlungu ira: “Ndikami-eni na zimu ofunechecha vwela.’’ (Sal. 51:12) Davide anom’dhiveliwana Yohova. Mbwenye, hora dhinango anoorucheya vwela ninga mwemo munokalela aliwa na i-yo. Mwasiwa ngwan’ni? Yoroma, nitukulele rima o-ofuna vwela. Yanambili, hora dhinango Satana unoniiri-a ira na-am’vwelenga Yohova ninga mwemo mwairele liye. (2 Ak. 11:3) Yaneraru, ninokala muilambo mwemo atwiwa ana mathuulelo enao va-eni “anolaba basa mwaa-ima o-ovwela.” (Aef. 2:2) Nikaengana thindhi ira niodenga limbanana rima ofuna irana vyodawa thitho rambela vyevyo namanami-a naatu amuilamboi vinolimbi-a aliwa irana ira nikale o-ovwela. Ninofwanela dhilimbi-edha ira nim’vwelenga Yohova thitho atu aasakunle liye ira tanisogolelenga. w23.10 6 ¶1

N’nga ninofunjadhavon’ni va yodabwi-a ya Yesu yothandhucha ma-inje kala vinyu? Ninofunjedhavo kalelo lodhiyevi-a. Yesu kaadhigweli-idhe namwasa wa yodabwi-a yairile liye thitho kanaromengavo vigweli-a vavyothene vyairile liye. Malomwee, modhiyevi-a, moweli-edha weli-edha anovelela titimi-o lothene wa Babee. (Ju. 5:19, 30; 8:28) Na-arelanga ifwanafwani-o ya Yesu vokala odhiyevi-a, kaninavigweli-e namwasa wa vyongo viodile i-yo irana. Ee-no mo-obala vyongo vinoira i-yo vomlabela Yohova, kanivingweli-enga namwasa wa vyevyo vinoira i-yo mbwenye nivingweli-enga namwasa oi nitokaana ngari yomlabela Nlungu wenuo uli odabwi-a. (Jer. 9:23, 24) Dhoweni nimva-engani titimi-o linofwanela i-yo mva-a. Thitho kavali yongo yapama iliyothene inaire i-yo mo-okami-iwa na Yohova. (1 Ak. 1:26-31) Ninokala osangalala voidhiwa ira Yohova unosangalala na vyongo vinoira i-yo. (Fwanafwani-edhani na lemba la Mateu 6:2-4; Aeb. 13:16) Thitho ninomsangalali-a maningi Yohova namsazi-edhanga Yesu vokala atu odhiyevi-a.—1 Pe. 5:6. w23.04 4 ¶9; 5 ¶11-12

Movudheleliwa, rumiwi Paulo atoolimbi-a Makristau ira tathuulelenga vyofuna vyaatu enango. N’nga nina-indi-edhe a-vi basa malangi-oala vamigumanoni? Nithuulelenga ira mofwanafwana na i-yo, enango thitho tanofuna wakula. Kathuulelani vi. Vevo vanowaredhanyo na afwinyu, n’nga munakalelengave onga baa-i aava-a afwinyu ngari yofuna onga? Kabe kamunaire evyo. Munofuna ira naaliwene thitho taongenga, namwasa oi tanodha onanga ira munaapwaza. Mofwanafwana na vyevi, vamigumanoni ninofuna ira atu anjinji tawakulenga. Thitho imbo-i mwandhila yapama maningi yolimbi-a abali naarongoli-u, kuvelela ngari yoi aliwa taonge vyokuza iroromelo yiwa. (1 Ak. 10:24) Munooda wakula vyevyo vinairi-e ira atu enango takaena ngari yowakula. Masiki ira yowakula inyu ikale yokwiva, murambelenga onga makundo manjinji. Akala ira mutoonga makundo othene ofwanyeya ndimanimo atu enango tanooda rambulela yofuna wakula. w23.04 22-23 ¶11-13

Ninofwanela thuulelanga ira, yongo yofuneya maningi kukami-a atu enango, simbwasimbwa volaba basa lolaleela. Nalabanga basa lolaleela, ninofwanela kala okozeya chinja. Ninogumanana atu o-iyana viroromelo, ukumele aliwa thitho mwemo munoonela aliwa vyongo. Rumiwi Paulo anooda chinja moda olaleela thitho ninooda funjedhavo yongo vaifwanafwani-oyee. Yesu atom’sakula Paulo kala “rumiwi orumiwa wa maziza enango.” (Aro. 11:13) Vaurumiweula, liye alaleela Ayuda, Agiriki, atu ofunja, atu o-ofunja, anamalima, atu olemezeya, atu o-olemezeya na mamwene. Ira aafiyenga varimani, Paulo anoodhilimbi-edha kala “vyongo vyothene waatu o-iyana i-yana.” (1 Ak. 9:19-22) Liye anokaana ifunelo na vikalelo, okumela thitho viroromelo vyaatwao, thitho anochinja mwemo mwalaleela liye ira vivwelane na vyevyo. Na i-yene vyongo vinodha niwendela pama muurumiwini, akala ninokaana ifunelo naatu enango no chinja mwemo munolaleela i-yo ira nivwelanenga na mwemo vyongo mukalele aliwa vaingumi yiwa. w23.07 23 ¶11-12

Mutu akala opwaseya kavinothapulela ira ngofooka. Unofuneela kala wa kopolo ira akale okurudheya agumanana nyarwa. Pwaseya ndi limbo-i mwa “makhalelo linokhumi-a zimu ochena.” (Agl. 5:22, 23) Madhu Aigiriki enao anothapulela ira “pwaseya” hora dhinango ano-indi-edhela basa voonga vya kavalo ya-angani yeniyo inofuwiwa. Kathuulelani vya kavalo yeniyo ifunji-iwile kala yokurudheya. Kavalwiyo inooda kala yokurudheya thitho inokalave ya kopolo. N’nga i-yo atu ninakale a-vi opwaseya vahora imbo-ive yeniyo i-yo kala akopolo? Ninooda irana vyevi vaokene. Yongo inanikami-e kuvepa Nlungu ira aniva-e zimwee wenuo unanikami-e ira nikaena khalelo la pamali. Vatokala umboni othonyi-edha ira vyevi pyoodeya. Abali naarongola anjinji anoawakula mopwaseya atu oruni-a thitho vyevi vinowakami-a ira takaena mathuulelo ofwanelela okuza Amboni dha Yohova.—2 Ti. 2:24, 25. w23.09 15 ¶3

Masopenya ova-a ifunelo aoni rumiwi Yohane, atoona andimuwa 24 dhulu tamlambelanga Yohova. Aliwa tanomtitimi-a Nlungu voidhiwa ira ngofwanelela wachela “kopolo, titimi-o na lemezo.” (Apk. 4:10, 11) Angelo ororomeleya naaliwene tatokaana myasa yoairi-a mtitimi-a nomlemeza Yohova. Aliwa anokala vambo-i dhulu thitho tatofiya vom’mwidhiwa pama maningi. Thitho anoona makalelwee dhela muvyoiravyee. Taonanga moda munoirela Yohova vyongo, vinoairi-a ira tamtitimi-enga. (Yob. 38:4-7) Na-iyene thitho ninofuna mtitimi-a Yohova dhela mumalobelwi-u noonga vyevyo vinodhiveliwana i-yo thitho simba vyokuza liye. Mwaleringa thitho funjedha Bibilya, mudhilimbi-edhenga ona makalelwee anousangalali-ani maningi. (Yob. 37:23; Aro. 11:33) Mwamala mum’mwandelenga Yohova mwemo munovwela nyo namwasa wa makalelwee. Nimtitimi-enga Yohova namwasa onikami-a i-yo, abali naarongoli-u.—1 Sa. 2:1, 2. w23.05 3-4 ¶6-7

Yawa ya 1919, atu a Nlungu tatookumamo mu Babulo lukulu. Vahora yen’na “dhaari ororomeleya na wazelu” ali anga-eliwile thitho yali hora yofwanelela namwasa oi liye atooroma kami-a atu tana rima wapama ira tarome wenda va “ndhila yochena” yeniyo yali ingaduliwile wene. (Mat. 24:45-47; Esa. 35:8) Namwasa oi arumiwi ororomeleya tali tangaromile basa losaka-edha ndhila ndulimu, atu enao tawenda vandhila ilukuluyi, tangaodile idhiwa vinjini vyokuza vifunelo vya Yohova. (San. 4:18) Tangaodile thitho chinja ingumiiwa ira ivwelanenga na vyevyo vinofuna Yohova. Yohova kanodedi-edhela ira atwee tachinje fendo imbo-ive. Mwalomwee, liye ukadhi aakami-anga mwavang’ono navang’ono. I-yo othene ninodha sangalala maningi vevo vanofuna i-yo msangalali-a Nlungwi-u va vyongo vilivyothene. Ndhila iliothene inofuneela saka-edhewanga vaduzi navaduzi. Romela yawa ya 1919, basa losakaedha “ndhila yochena” ikadhi idhowanganave naifunelo yofuna kami-a atu anjinji kuma mu Babulo lukulu. w23.05 17 ¶15; 19 ¶16

Thitho takadhi tafunji-anga abali anokami-a mumakomisau o-iyana i-yana a Gulu Lotonga. Va-eeni abali anokami-ala, anolaba mororomeleya mabasa manjinji mugulu la Yohova. Abalala mbokozeeli-edhiwa phama dhowanave samalela mabila a Kristu. Ozoziwa ogomi-edha tadhatukuliwa dhowa dhulu, lambela wa imbarimbari unodha dhowanave kalao vailamboi. Ee-no mosogoleliwa na Yesu Kristu, arumiwi a Nlungu anodha dhowanave m’lambela Yohova mororomeleya. Pyaimbarimbari ira vahora yeniyo ninodha dhimbinuweliwa na Gogi wa Magogi, wenuo uli vwelano wa vilambo. (Zak. 38:18-20) Mbwenye dhimbinuweliwa wa hora yoyevila, kunodha imwanani-a atu a Nlungu kalave ororomeleya. Yohova unodha avulumucha. Mumasopenya rumiwi Juwau atoona “mwinji nlukulu” wa mabila enango a Kristu. Juwau atoowandeliwa lemba ira “mwinji nlukulu” wenuo “ukumile munyarwa ilukulu.” (Apk. 7:9, 14) Ee-no kaninokaikela ira Yohova unodha abarela. w24.02 5-6 ¶13-14

N’nga ninaire a-vi ira niwachelenga zimu ochena? Niuvepenga, funjedha Madhu a Nlungu thitho kalave mugulu losogoleliwa na zimu wa Nlungu. Irana vyevi, unodha nikami-a kaana “makalelo enao zimu ochena anokumi-a aliwa.” (Agl. 5:22, 23) Nlungu unovelela zimwee waatu enao anodhowanave thuulela thitho kaana mathuulelo apama. Lliye unooda i-yachi niva-a zimwee ochena, akala ni nodhowanave thuulela vyongo vyothakala noviirangana. (1 At. 4:7, 8) Thitho ira nidhowenave wachela zimu ochena, “kaninyozenga madhu a ulosi.” (1 At. 5:20) Va versoli madhu oi “ulosi,” tanoimelela milanyu yoveleliwa na zimu wa Nlungu thangani-avo vyoonga dambo la Yohova thitho dambolo nli vaduzi. Hora dhothene ninothuulela vyadamboli thitho kaninothuulela ira Armagedo kunofiya muhori-u. Malomwee, ninothonyi-edha ira ninolithuulela thitho dedi-edha ira, vodhowanave kaana makalelo apama thitho pingeya namabasa othonyi-edha ira nili “odhivelelela wa Nlungu.”—2 Pe. 3:11, 12. w23.06 12 ¶13-14

Ninga Makristau n’nga ninofwanela iran’ni akala ira telefonini mwi-u mutovolowa iruthiruthi yaumandhave? Mombaranya ninofwanela rambela iing’ana. Vinodha kala vyo-orucha irana vyevi naonanga ira yongo yofuneya maningi nguuxamwali-u na Yohova. Thitho viruthiruthi vyevyo atu vinoona aliwa ira kavifiile vokala vyaumandhave, vinooda m’mwiri-a mutu kaana naluveluve ogonana. N’nga mwasiwa ngwan’ni ninofwanela rambela viruthiruthi vyoi e-ni? Namwasa oi kaninofuna navang’onovene ira nithuulelenga vyongo vyamararuo rimani mwi-u. (Mat. 5:28, 29) Ndimuwa unango wavapingoni wau Tailandia dhinalee David aongile ira: “Ndinodhifuka ira: ‘Masiki ira viruthiruthivi kai vyaumandhave n’nga Yohova unodha sangalala ndadhowanave viing’ana?’ Thuulela mwandhila yen’na, unondikami-a ira ndisakulenga pama vyongo mwazelu.” Ova msukwali-a Yohova unonikami-a ira nisakulenga vyongo mwazelu. Ova Nlungu ndi “roma wa zelu. w23.06 23 ¶12-13

“Makwarutu awari” anothapulela mipingwi-u. Vahora ya nyarwa ilukulu Yohova unodha nivunela ninga mwemo mwalanyedhile liye, akala ninoira vyongo movwelana na abali naarongoli-u. Moi e-no dhoweni nivilimbi-edheni ira wenjedhelavo rumela irana vyongo vyapama wa abali naarongoli-u, naadhiveliwengana. Vyevi pyofuneya maningi ira nidha vulumuwe va nyarwa ilukulu. Dambo nlukulu la Yohova” linodha kala loopi-a waatu othene. (Zef. 1:14, 15) Naarumiwene a Yohova tanodha gumanana thitho nyarwa. Akala nitokozeela va-eni ninodha kala o-otekenyeya nodhowanave kami-a atu enango. Ninodha vilela nyarwa iliyothene inagumanena i-yo. Abali naarongoli-u tadhagumanana nyarwa, ninodha irana yongo iliyothene inaode i-yo voathonyi-edha tangaranga noava-a vyongo vinofuneela aliwa. Thitho ninodha vwelananga na abali naarongoli-u enao aromile i-yo adhiveliwana walelene. Vasongolovee, Yohova unodha niraeli-a voniva-a ingumi yo-omala muilambo mwemo mwa-anofuna dha kala nyarwa iliyothene. w23.07 7 ¶16-17

Hora dhinjinji Bibilya linoonga vya alombwana ana iroromelo yolimba. Mbwenye kai hora dhothene vavivwa aliwa e-no. Mofwanafwani-a, hora dhinango Mwene Davide adhiona ira utokaana “kopolo ninga mwango” mbwenye hora dhinango, “anobalaleya mathuulelo” venango ira anoova. (Sal. 30:7) Masiki ira Samisoni atokaana kopolo dhavakundu mokami-iwa na zimu wa Nlungu, liye anoidhiwa ira a-akalanga kami-iwa na Nlungu “angafookile nokala ninga atu enango othene.” (Ana. 14:5, 6; 16:17) Alombwana ororomeleyala, tanokaana kopolo namwasa oi Yohova ngwaava-a kopolodho. Rumiwi Paulo anoidhiwa ira anofuneela va-iwa kopolo na Yohova. (2 Ak. 12:9, 10) Liye anogumanana nyarwa ninga marenda. (Agl. 4:13, 14) Thitho hora dhinango liye anokumbanya noova. (Aro 7:18, 19) Angalive ee-no hora yeniyo Paulo yafooka liye paevo thitho vafwanya liye kopolo. (2 Ak. 1:8, 9) N’nga vyevi vyaodeya a-vi? Yohova anom’va-a kopolo dhafuneela liye ira adhowenave kaana kopolo. w23.10 12 ¶1-2

Akala hora dhinango ninorucheya na mathuulelo ovionanga ninga atu o-okaana basa, nithuulelengani ira ngu Yohova uniitanile. (Ju. 6:44) Yohova unoona vyongo vyapama mwa i-yo vyoi i-yo okene kaninoviona thitho liye unoidhiwa pama mirimi-u. (Li. 6:30) Kaninofwanela kaikelanga aniwandela ira nili atu apereso yavadhulu. (1 Ju. 3:19, 20) .Anjinji a-iyo na-anafunjedhe imbarimbari, nanoira vyongo vyoi ninoviombanave landu fiyedha va-eeni. (1 Pe. 4:3) Masiki Makristau ororomeleya, anolimbanana rima ofuna irana vyongo vyothakala. N’nga nyo munoviomba thitho landu? Akala ndi ee-no, idhiwa ira arumiwi anjinji ororomeleya a Yohova takadhi taviombanga landu. Mofwanafwani-a, rumiwi Paulo anoovivwela tangaranga athuulela vyongo vyadawi-idhe liye. (Aro. 7:24) Pyaimbarimbari ira atoochinyuwa vyodawavyee nobadiziwa. Mbwenye liye atoovionga ira “ndili mwana maningi vari vaarumiwi othene” thitho “ndili odawa maningi.”—1 Ak. 15:9; 1 Ti. 1:15. w24.03 27 ¶5-6

Mwasa wa Mwene Yehoasi unonifunji-a ira ninofwanela sakula afwi-u ananikami-e ira niirenga vyongo vyaphama. Nisakulenga atu anom’dhiveliwa Yohova thitho anofuna m’sangalali-a. Kanikalelenga waredhana atu atungali-u baa-i. Muthuulelenga ira Yehoasi ali zombwe maningi mofwanafwani-edha na fwee Yehoyada. Mwasakulanga afwinyu mudhifukenga ira: ‘N’nga aliwa anondikami-a ira ndiroromelenga maningi Yohova? N’nga anondilimbi-a ira ndi-arelenga makundo a Nlungu? N’nga anodhiveliwana onga vya Yohova thitho imbarimbariyee yapereso yavadhulu? N’nga anolemeza makundo a Nlungu? N’nga anoonga vyongo ira tandisangalali-e venango anolimba rima ndiwandela vyevyo vinodawi-a miyo?’ (San. 27: 5, 6, 17) Onga imbarimbari atu ta-anodhiveliwana Yohova katinofwanela kala afwi-u. Mbwenye akala mutokaana fwinyu wenuo unom’dhiveliwana Yohova, dhowananive waredhana liye namwasa oi unongo ukami-ani!—San. 13:20. w23.09 9-10 ¶6-7

Madhu oi Alefa anofwanyeya maromelo wa abesedhario wa Igiriki thitho madhu oi Omega anofwanyeya komoni. Vo-indi-edha basa madhu oi: “Alfa na Omega,” Yohova unothonyi-edha ira aroma yongo kanoi-iya ya-anaodeye. Yohova angapanduchile Adamu na Eva noawandela ira: ‘Mubalane, muinjive, mudhali-e ilambo yavathi thitho mwiing’anele (Mar. 1:28) Vahora yen’na vyali ninga Yohova unoonga ira “Alfa.” Veva liye atoonga phama ifunelwee. Ifunelwiyo yali ira vavira hora, a-ima a Adamu na Eva enao tafuna kala olongomana thitho ovwela tadhali-e ilambo noisaka-edha kala paradaizo. Vahora yen’na vyakala ninga unoonga ira “Omega.” Angamari-idhe panducha vyongo “dhulu na ilambo yavathi na vyongo vyothene vyali mwemo,” atoonga madhu osikimizela ira ifunelwee itoodeya. Atoosikimizela ira ifunelwee yokuza ilambo thitho atu kavinodha imwananeya. Ifunelweila yatokwakwaneli-edhiwa va dambo la 7.—Mar. 2: 1-3. w23.11 5 ¶13-14

Ulendo orucha okumela wu Babulo dhowa wu Israeli, ungaatukulele Ayuda myedi vaduzi navaduzi 4. Mbwenye Yohova ali angalanyedhile ira unodha kumi-a iliyothene yeniyo yaoneya ira ingaaimwanani-idhe welela waniwa. Wa Ayuda ororomeleya, welela wu Israeli wali ofuneya maningi kwaranya yongo iliothene ya-iye aliwa. Yofuneya maningi yali yoi vyongo vingaromile thitho awendelanga pama vamwasa olambela. Kwaali kachisi wa Yohova wu Babulo. Kwaalive guwa loi Aisraeli tangavelenlengavo sembe dhedho dhafuneya movwelana na ilamulo ya Mose. Kwaali alimbo velela sembe enao taodenga velela sembedho. Wenjedhela vevo, atu a Yohova tali oyeva maningi mofwanafwani-edha alombwana naa-iyana aundhe enao ta-amlemeza Yohova venango makundwee. Ee-no Ayuda anjinji ororomeleya tanoofunechecha tangawelenle waniwa ira tamaweleli-edhe lambela waimbarimbari. w23.05 14-15 ¶3-4

Ninofuneela zimu ochena wa Nlungu ira nidhowenave iranga vyongo ninga “a-ima anjeza.” Mwasiwa ngwan’ni ninoonga ee-no? Namwasa oi kai vyokweya dhowanave kala ochena muilambo ya makalelo othakalila. (1 At. 4:3-5, 7, 8) Zimu ochena unooda nikami-a rambela mathuulelo ailaboi, thangani-avo zelu dhaatu na makundo o-ovwelana na mathuulelo a Yohova. Unooda thitho nikami-a ira niirenga “yongo ili yothene yaphama na yolongomana.” (Aef. 5:9) Ndhila imbo-i inawachelena i-yo zimu ochena, ndi lobela. Yesu atoonga ira, Yohova “unodha velela mo-oumeleliwa mandha zimwee ochena waatu enao anom’vepha.” (Luk. 11:13) Nam’titimi-anga Yohova vamigumanoni nama Kristau afwi-u, ninowachela thitho zimu ochena. (Aef. 5:19, 20) Zimu ochena unonikami-a ira niirenga vyongo vinom’sangalali-a Nlungu. w24.03 23-24 ¶13-15

N’nga nyo munofuneelakala oleva rima?Akala ndi e-no muulobelele mwasuo. Leva rima ndi limbo-i mwa makalelo enao zimu ochena anokumi-a aliwa. (Agl. 5:22, 23) Ee-no nim’vepenga Yohova ira aniva-e zimwee ira unikami-e kaana makalelo apama enao anokumi-a aliwa. Akala ira nitogumanana vyowesedha vamwasa okala oleva rima ninofwanela “dhowanave vepa” zimu ochena ira unikami-e kala oleva rima. (Luk. 11:13) Ninooda mvepa thitho Yohova ira anikami-e ona vyongo ninga mwemo munoonela liye. Vasogolo volobela niirenga vyongo vinaode i-yo ira nikalenga atu oleva rima dambo nlilothene. Nalobelanga maningi ira nikale atu oleva rima, nodhilimbi-edha thonyi-edha kaleloli paevo thitho kalelolo linokaatheya aliwa maningi rimani mwi-u thitho linoira ikundu ya ingumii-u. Thuulela modi-a vifwanafwani-o vyaatu oromoliwa Bibilyani unonikami-a. Bibilyani mutokala vifwanafwani-o vinjinji vyaatu enao tali oleva rima. Ninooda thonyi-edha leva rima vothuulela pama vifwanafwani-ovi. w23.08 22 ¶10-11.

Yesu atom’sikimizeli-a rumiwi Pedru ira Yohova unodha m’kami-a. Liye angavenyathi-iwile atom’kami-a Pedru na arumiwi afwee upha okoka somba mundhila yodabwi-a. (Ju. 21:4-6) Mo-okaikela vyevi vyatom’sikimizeli-a Pedru ira Yohova angaodile m’kami-a fwanya vyofuneya vyava ingumi. Vinooneya ira rumiula atothuulela vyaongile Yesu ira Yohova unodha kami-a mutu uliwethene wenuo unodhowanave “sakasaka Umwene voroma.” (Mat. 6:33) Vyongo vyothene vyevi vyatom’kami-a Pedru ira aonenga ira basa lolaleela tofuneya maningi kwaranya basa lopha somba. Va dambo la Petekoste mu 33 E.C., liye atoolaleela molimba rima thitho atookami-a atu anjinji ira tavwe milanyu yaphama. (May. 2:14, 37-41) Vasogolovee atookami-a Asamariya thitho atu amaziza enango ira tarome m’roromela Kristu. (May. 8:14-17; 10:44-48) Veva Yohova atom-indi-edhela basa maningi Pedru ira akami-e atu amaziza othene ira tadhe pingoni wa Ikristau. w23.09 20 ¶1; 23 ¶11

Horayoroma ndi vyevyo vyaireile vangavirile vyawa vinli khumela vevo Ababulo vanongile aliwa sidadi la Yerusalemu. Mwene Nebukadinezara wa Babulo, atoododomi-eya mathuulelo vyaro-idhe liye vyokuza ifwano ilukulu maningi. Mwenula atootucha ira unopha alombwana othene azelu thangani-avo Danieli akala katinom’mwandela vyaro-idhe liye thitho vinothapulela aliwa. (Dan. 2:3-5) Danieli anofuneela iravo yongo mombaranya namwasa oi aakale ira kaairile e-no atu anjinji tangaphiwile. Liye “atoodhowa wa mwene nodhowa mam’vepa ira am’va-e hora ira athapulele vyoro-a vyeevyo.” (Dan. 2:16) Veva atoothonyi-edha limba rima thitho iroromelo. Kavali valivothene vanothonyi-edha ira Danieli ali angathapulenlevo vyoro-a ndulimu. Liye atoovepa afwee ira, “tam’vepe Nlungu wa dhulu ira aavwele tangaranga noawandela segeredo yen’na.” (Dan. 2:18) Yohova atowakula malobelwiwao. Mokami-iwa na Nlungu Danieli atoothapulela vyoro-a vya Nebokadinezara thitho liye naafwee kataphiwile. w23.08 3 ¶4

Ira mufwanye myasa ya Bibilyani yaatu enao tathonyi-edhile leva rima mudhowe va muru oi “Paciência” mu Índice das Publicações da Torre de Vigia. Muthuulelenga upama okala mutu oleva rima. Nakalanga atu oleva rima ninokala osangalala thitho okurudheya. Kaana kaleloli unonikami-a ira nithuulelenga pama thitho nikaena manungo apama. Nairanga vyongo moleva rima naatu enango ninokala vauxamwali wapama naaliwa. Thitho ninokala ovwelana maningi pingoni. Akala ira unango utonisukwali-a kaninombaranya thakaleliwa vyevyo vinoiri-a ira vyongo vya-afiye vothakala maningi. (Sal. 37:8; San. 14:29) Kwaranya vyothene ninokala nim’sazi-edhanga Babi-u wadhulu thitho ninokala vauxamwali wapama maningi na liye. Onga imbarimbari leva rima tikalelo losangalali-a thitho lokami-a maningi. Pyaimbarimbari ira kai hora dhothene vevo leva rima unokala aliwa okweya. Mbwenye mokami-iwa na Yohova ninooda dhowanave kaana kaleloli. Vevo vanodedi-edha i-yo moleva rima ilambo ipya, ninooda kala osikimiza ira “litho la Yohova lili vaatu enao tanom’mova, enao tanodedi-edhela riya rima wee o-omala.” (Sal. 33:18) Dhoweni i-yo othene nikale osikimizela rima dhowanave kala oleva rima. w23.08 22 ¶7; 25 ¶16-17

Yakobo atoonga ira, mutuo unooda onganga ira utokhaana iroromelo mbwenye vyoiravyee khavinothonyi-edha ira utokhaana iroromelo. (Yak. 2:1-5, 9) Yakobo aongile vya mutu wenuo “unom’mona balee venango rongolee a-ana vyowara,” mbwenye liye imwanana m’khami-a. Masiki mutuo aongenga ira utokaana iroromelo, vinokala vyo-ovweya. (Yak. 2:14-16) Yakobo atom’monga Rahabi khala ifwanafwani-o ya mutu athonyi-edhe iroromelo mwa vyoiravyee. (Yak. 2:25, 26) Rahabi ali angavwide vyoonga Yohova thitho ira ngu Yohova aakami-idhe Anaisraeli. (Yos. 2:9-11) Rahabi atoothonyi-edha iroromelo mwavyoiravyee, vobarela Anaisraeli ambili enao tadhowile mazondela ilambo ya Yeriko, voi ingumiwa yali vangovini. Vyevyo vyatoiri-a ira i-yana odaula wenuo a-ali Muisaraeli aoniwe ira ali mutu olongomana ninga mwemo mwakalele Abrahamu. Ifwanafwani-oi inothonyi-edha funeya okhaana iroromelo na mabasee. w23.12 5-6 ¶12-13

Ninga Makristau, kaiira ninokwakwanana vwechecha makundo oroma a Bibilyani baa-i. Mokami-iwa na Nlungu ninofunechecha idhiwa “masiki vyongo vyodi-a vya Nlungu.” (1 Ak. 2:9, 10) N’nga munoona a-vi nyo ira masaka-edho oi musakesake vyongo vyodi-a ira mukale vauxamwali olimba na Yohova? Mofwanafwai-a, munooda sakasaka mwemo mwathonyi-edhele liye ira anoadhiveliwana arumiwee awalelene, thitho vyevyo vinothonyi-edhela aliwa ira unoudhiveliwanani. Munooda funjedha vyafuna Yohova ira Anaisraeli tairenga vom’lambela novifwanafwani-edha na vyevyo vinofuna liye ira niirenga volambela wi-u malamboano. Munooda funjedha thitho modi-a vyokuza maulosi enao Yesu aakwakwaneli-edhe liye muurumiwee vailambo yavathi vano. Munooda kaana imwerumweru vofunjedha. Buku la Mboni za Yehova Lofufuzira Nkhani, linodha ukami-ani ira musangalalenga vofunjedha myasa ninga dhedhi. Funjedha Bibilya modi-a unooda limbi-a iroromelo inyu noukami-ani ira “mum’muidhiwedi Nlungu.”—San. 2:4, 5 . w23.10 18-19 ¶3-5

Madhu enao aongile rumiwi Pedru a-indi-edhele liye basa ira, “mudhivelanenga maningi,” anothapulela “thapula.” Ikundu yanambili ya versuli, inoonga vyo-arelavo vya udhivela ninga wen’na. linoonga ira unovu-elela vyodawa vinjinji vyaabali-u. Vili ninga nino-inda udhivela na mandha menli, ninga muno-indela i-yo nguwo noithapula ira ikunele, a-kala vyodawa vyoyeva mbwenye “vyodawa vinjinji.” Madhu oonga ira kunela venango vu-elela anothapulela levelela. Molandana na nguwo inokunela limburo lothakala, udhivela unokunela vyevyo abali naarongoli-u vinodawi-a aliwa. Ninofwanela adhiveliwangana maningi abali-u voi ninooda alevelela vyodawa viwa angalive ira irana vyevyo pyorucha. (Ako. 3:13) Nalevelelanga atu enango ninooni-a ira ninoadhiveliwana maningi thitho ninom’sangalali-a Yohova. w23.11 11-12 ¶13-15

Angaulukunle, mwene Yosiya atooroma okoka saka-edha kachisi. Volaba basali “atofwanya bukhu la Ilamulo ya Yohova loveleliwa na dhandha la Mose.” Mwenula angavwide vyevyo vyaliriwile, hora imbo-ive yeniyo atochinja ira a-arele malangi-o a bukhuli. (2 Li. 34:14, 19-21) N’nga munofuna ira muleringa Bibilya dambo nlilothene? Akala mutowesedha irana vyevyo walelene n’nga vyongo vinouwendelani a-vi? N’nga munolokota maverso enangwee enao anoona nyo ira anodha ukami-ani? Yosiya angana vyawa vadu duzi 39, atodawi-a vyongo thitho vyevyi vyatoiri-a ira aphiwe. Liye atodhinyindela malo movepha malangi-o wa Yohova. (2 Li. 35:20-25) N’nga ninofunjedhavo n’ni? Akala nili ndimuwa venango mwana venango nikadhi nifunjedhanga Bibilya wa hora indendai moi a-vi, othene ninofwanela dhowanave m’funafuna Yohova. Vyevi vinothangani-avo m’vepha Yohova hora dhothene ira aniva-enga malangi-o, funjedha madhwee thitho vwela malangi-o a makristau olimba mwauzimu. Nairangana vyevi ninodha rambela dawi-a maningi vyongo thitho ninodha kala osangalala.—Yak. 1:25 w23.09 12 ¶15-16

Bibilya linoonga vifwanafwani-o vinjinji vyaa-iyana enao tam’dhiveliwana Yohova nom’labela. A-iyanao tali “oira vyongo mo-okwaranyi-a madile” thitho “ororomeleya vavyongo vyothene.” (1 Ti. 3:11) Wenjedhela vevo, Makristau aasikana anooda fwanya pingoni mwiwa arongola olimba mwauzimu enao anofwanela aliwa sazi-edha ifwanafwani-o yiwa. Akhala muli Kristau wasikana, vinokhala phama nyo fwanya arongola Aikristau olimba mwauzimu enao anasazi-edhenyo ifwanafwani-o yiwa. Muonenga makhalelwiwa aphama. Mwaira e-no muone mwemo munathonyi-edhelenyo makhalelwao. Khalelo lofuneya maningi ira Kristau wasikana aulukhule mwauzimu ndi dhiyevi-a. I-yana odhiyevi-a unokhala vauxamwali waphama na Yohova thitho atu enango. Mofwanafwani-a, i-yana unom’dhiveliwana Yohova, unokhala odhiyevi-a no-arelanga malangi-o anovelela Yohova okhuza muru wa banja na muru wa pingo. (1 Ak. 11:3) Makhundo enala ano-indi-edheliwa basa pingoni thitho vabanjani. w23.12 18-19 ¶3-5

Yohova unofuna ira lombwana am’dhiveliwengana i-yanee thitho am’fwanyelenga vyongo vyofuneya vaingumiyee, khala fwee wavarimani thitho a’mkami-e khala vauxamwali waphama na Yohova, lemeza i-yana thitho khala onyindeleya, unooda ukhami-ani khala lombwana waphama. Mwadhathela munodha khaana a-ima. N’nga chini inofuna nyo funjedha wa Yohova vamwasa okhala baba waphama? (Aef. 6:4) Yohova anom’mwandela mwanee ira unom’dhiveliwana maningi thitho unosagalala na liye. (Mat. 3:17) Nyo thitho mwadhakaana a-ima munofwanela awandelanga ira munoadhiveliwana. Hora dhothene mwaasimbenga tairanga vyongo vyapama. Ababa enao anom’sazi-edha Yohova anokhami-a a-imiwa khala olimba mwauzimu. Munooda khozeela izo yen’na vodhilimbi-edha samalela atu abanjani mwinyu naapingoni. Munooda irana vyevi vowandela atu enango ira munoadhiveliwana noasimba.—Ju. 15:9. w23.12 28-29 ¶17-18

Angalive ira nili arumiwi ororomeleya a Yohova, mofwanafwana naatu othene ninogumanana nyarwa na marenda. Hora dhinango ninoruni-iwecha venango oni-iwa nyarwa naatu anoidanana atu a Nlungu. Yohova kanonibarela ira na-agumanengana nyarwa, mbwenye unonilanyedha ira unodha nikami-a. (Esa. 41:10) Liye anikami-a ninodhowanave kala osangalala, ninosakula vyongo mwazelu thitho ninokalave ororomeleya wa liye masiki vikale vyorucha irana vyevyo. Yohova unonilanyedha ira unodha niva-a “rendele wa Nlungu” unoongiwa Bibilyani. (Afl. 4:6, 7) Mutu akaana rendele wen’na, rimee na mathuulelwee anokala pama namwasa oi uli vauxamwali wapama na Yohova. Rendele wen’na ngoi “atu katinooda uvwechecha” thitho ngodabwi-a kwaranya mwemo munathuulele i-yo. N’nga nyo mwatooroma vivwavo pama mwangalobenle wa Yohova mokhumela vathi va rima? Mwatoovivwa e-no namwasa wa “rendele wa Nlungu.” w24.01 20 ¶2; 21 ¶4

Dhiveliwana Nlungu unoiri-a atu ororomeleya ira tam’titimi-enga na rima wethene. Mwene Davide atoolemba ira: “Ingumi yanga im’titimi-enga Yohova. Yongo ili yothene mwari mwamanungwanga, ititimi-enga dhinalee.” Davide atoidhiwa ira titimi-a dhina la Yohova, unothapulela m’titimi-a Yohovuo. Ee-no navwa vya dhinali, ninothuulela makalelwee aphama na mabasee odabwi-a. Davide afuna aonenga ira dhina la Babee tochena nom’titimi-a. Liye anoofuna irana vyevyo na “yongo ili yothene ya mwari mwamanungwee” venango ira na rimee wethene. Molandana na Davide, alevi naaliwene tanoosogolela vom’titimi-a Yohova moviyevi-a. Aliwa tatoorumela ira madhwiwa kataode onga mokwakwanela titimi-o la dhina lochena la Yohova, linofwanela aliwa wachela. (Nee. 9:5) Mo-okaikela, Yohova atoosangalala nodhiyevi-a thitho m’titimi-a wiwa kumela vathi varima. w24.02 9 ¶6

Yohova kanodha uonani ira muli oimwanana namwasa o-okwakaneli-edha ifunelo yeyo ya-anaodenyo ikwakwaneli-edha. (2 Ak. 8:12) Mufunjedhengavo yongo mwangumanana vyoimwanani-a. Muthuulelenga vyevyo vyaodilenyo vikwakwaneli-edha walelene. “Nlungu kai o-olongomana oi unooda diwala mabasinyu.” (Aeb. 6:10) Ee-no nyo thitho kamudiwalenga vyevyo vyairilenyo. Muthuulelenga ifunelo yeyo yaikwakwaneli-edhe nyo walelene. Akala kulimbi-a uxamwalinyu na Yohova venango badiziwa. Ninga mwemo mukalelenyo mukwakwaneli-edhanga vifunelo vinyu ndulimu, mudhowenave kwakwaneli-edha ifunelo inyu va-eeni. (Afl. 3:16) Mokami-iwa na Yohova nyo thitho munooda kwakwaneli-edha ifunelo inyu. Mbwenye thuulelani thitho ira alimbo wendi-a baruku tanosangalala na ulendwiwa. Nyo thitho mudhilimbi-edhenga ira mukwakwaneli-edhe ifunelo inyu yauzimu. (2 Li. 4:7) Musangalalenga na mwemo Yohova muukami-idheni liye, thitho uraeli-ani. Akala kamufookile munodha fwanya maraeli-o manjinji.—Agl. 6:9. w23.05 31 ¶16-18

Yohova unofunechecha wandela atu anoadhiveliwana liye ira unosangalala naaliwa. Malemba anoonga fendo mbinli vevo Yohova vyam’mwandenle liye Yesu ira ngumwanee odhiveliwiwa thitho unosangalala na liye. (Mat. 3:17; 17:5) N’nga mungadhiveliwile uvwa Yohova ausikimizeli-angani ira unosangalala na nyo? Yohova unoonga na i-yo ira unonidhiveliwana mbwenye kai vamethoni na vametho liye unoonga na i-yo dhela M’madhwee Bibilyani. Ninovwa madhu a Yohova oonga ira unosangalala na i-yo naleringa madhu a Yesu mumabukhu amilanyu yaphama. Yesu anoo-arela pama makalelo Ababee. Voi naleringa ira Yesu anoosangalala na anama-arelee ororomeleya oi katali olongomana, ninoidhiwa thitho ira Yohova unosangalala na i-yo. (Ju. 15:9, 15) Nagumanangana nyarwa kavinothapulela ira Nlungu kanosangalala na i-yo. Malomwee vyevi vinoniva-a ngari yothonyi-edha ira ninom’dhiveliwana maningi Nlungu nom’roromela.—Yak. 1:12. w24.03 28 ¶10-11