Setembro

Nlungu utom’va-a Yesu kopolo dhooda mali-a nyarwa dhothene dhaatu. Voira vyodabwi-a, Yesu atoothonyi-edha ira utokaana kopolo dhooda mali-a nyarwa dha-anaoda i-yo mali-a vaokene. Mofwanafwani-a, liye utokaana kopolo dhonivulumucha wu vyongo vyaromi-edhe nyarwa dhaatu vyevyo vili madao atukulele i-yo wa Adamu thitho vyo-arelavovyee ninga marenda na wukwa. (Mat. 9:1-6; Aro 5:12, 18, 19) Vyodabwi-a vyairile Yesu vinothonyi-edha ira unooda ili-a “marenda a tundu uliothene” thangani-avo venyathi-a atu okwa. (Mat. 4:23; Ju. 11:43, 44) Thitho utokaana kopolo dhooda miyali-a lipevo nlukulu thitho ngonji-a minemba yothakala. (Mrk. 4:37-39; Luk. 8:2) Pyolimbi-a idhiwa ira Yohova utomva-a Mwanee kopolo dhoirela vyevi! Kaninokaikela ira vyolanyedha vinodedi-edha i-yo mu Umwene wa Nlungu, vinodha kwakwaneli-edhiwa. Vyodabwi-a vyairile Yesu angali vailamboi, vinonifunji-a ira liye ngu Mwene wa Umwene wa Nlungu thitho unodha ira vyongo vinjinji sogolou. w23.04 3 ¶5-7

Akala pingwinyu ndiulukulu mwavenyathi-a wono ira muwakule, kamunathonyiwa wiliwili. Akala ti-eeno, venango mwanoothuulela ira ndi pama i-yachi wakula. Mbwenye kamunofwanela i-yachi dhilimbi-edha wakula vamigumanoni. Mukozeelenga vyowakula vingasi vasumana nlilothene. Ee-no akala kamuthonyiwile ira muwakule maromelo wa funjedha munooda kaana ngari yowakula, wari mwa migumanwiyo. Mwakozeelanga funjedha wa Nsanja ya Namaing’anela, muthuulelenga mwemo ndima iliyothene munovwelanela aliwa na muru wa mwasuo. Mwairanga vyevyo munooda kaana makundo oi mumawakule, muyofunjedhiyo. Munooda kozeela thitho ira mumawakule vandima dhedho dhiongiwile m’makundo odi-a aimbarimbari dhedho dhili dhorucha dhionga. Mwasiwa ngwan’ni? Mwasiwa ngoi venango vanooda kala atu oyeva oimecha miwono ira tawakule vaikundu yeyo. N’nga munoona a-vi akala ira vamigumano mingasi, munoonave ira kamuva-iwile ngari yowakula? Mum’mwandela bali unairi-a, yofuka inofunanyo wakula. w23.04 21-22 ¶9-10

Yosefe akalecha okozeya a-rela malangi-o a Yohova thitho vyevi vyatom’mwiri-a ira akale lombwana wa pama. Mo-oyeveela fendo uraru atoowachela malangi-o okuza banjalee. Vahora yothene yenna avwela na rima othene angalive ira vyali vyorucha iranana vyevyo. (Mat. 1:20; 2:13-15, 19-21) Namwasa o-arela malangi-o a Yohova, Yosefe atomvunela, mkami-a thitho msamalela Mariya. Kathuulelani mwemo vyoira vya Yosefe mwamkami-edhe aliwa Mariya ira amdhiveliwengana thitho mlemezanga maningi! Nyo muli alombwana, munooda a-rela ifwanafwani-o ya Yosefe yosakasaka no-arela malangi-o a Bibilyani okuza mwemo munasamalele nyo banja linyu. Mwa-arelanga malangi-oala, masiki mufuneelenga chinja vyongo vinango, munothonyi-edha ira munomdhiveliwana i-yaninyu thitho munolimbi-a banja linyu. Rongola unango wau Vanuatu ukadhi angali vabanjani wa vyawa 20, aongile ira: “Man’nanga asakasakanga thitho a-rela malangi-o a Yohova, ndinomlemeza maningi. Ndinovivwa kala ovuneleya thitho kandinokaikela visakunle liye.” w23.05 21 ¶5

Ayuda enao takumele wu Babulo tafwanela kala “atu ochena” wa Nlungwiwa. (Dot. 7:6) Mbwenye vyevi kavyathapulela ira Ayuda katafuneela chinja vyongo vinango ira tamsangalali-enga Yohova. Anjinji mwa Ayudala tabaliwile wu Babulo thitho ta-arela mathuulelo na makundo aatu aweo. Vangavirile vyawa vinjinji kumela vevo Ayuda oroma vyawelele aliwa wu Israeli, namasogolela Neemiya atoodabwa angafwaidhe ira a-ima enango enao tabaliwile wu Israeli, kataidhiwa onga iongelo ya Ayuda. (Dot. 6:6, 7; Nee. 13:23, 24) N’nga a-ima enala tafunjedhe a-vi mdhiveliwana thitho mlambela Yohova akala kataoda onga Iyeberi, iongelo yeniyo ya-indi-edhiwa basa volemba Madhu a Nlungu? (Eza. 10:3, 44) Ee-no vatookala vyongo vinjinji vyevyo Ayuda vyafuneela aliwa chinja, mbwenye vingakadhi vyo-orucha chinja aakale ira takalecha wu Israeli weo lambela waimbarimbari waweli-edhiwa aliwa vang’ono navang’ono.—Nee. 8:8, 9. w23.05 15 ¶6-7

Mbwenye masiki nidhilimbi-edhe kala odhikondi-a venango kaana rima ofunechecha ninooda gumanana vyoimwanani-a. Mwaifwanafwani-o “vyongo vyo-odedi-edhela” vinooda ninongela hora yeniyo yafuneela i-yo kwakwaneli-edha ifunelo yi-u. (Nam. 9:11) Ninooda gumanana nyarwa inaniiri-e ira nifooke thitho na-akaena kopolo. (San. 24:10) Voi nili atu odawa ninooda irana vyongo vyevyo vya-ananikami-e kwakwaneli-edha ifunelo yi-u. (Aro. 7:23) Venango ninooda dhivwanga ira nitochenyela. (Mat. 26:43) N’nga chini inanikami-e nagumanangana vyoimwanani-a? Nithuulelengani ira nagumanangana vyoimwanani-a kavinothapulela ira nili oimwanana. Bibilya linoonga ira ninooda gumanana nyarwa moweli-edha weli-edha. Mbwenye linoonga movweya pama ira ninooda kwakwaneli-edha vyofuna vi-u. Mwadhilimbi-edhanga ira mukwakwaneli-edhe vifunelo vinyu masiki vakale vyoimwanani-a munomthonyi-edha Yohova ira munofuna msangalali-a. Liye unosangalala aona ira munadhowanave dhilimbi-edha kwakwaneli-edha vifunelo vinyu. w23.05 30 ¶14-15

Urumiwi wahora dhothene. Abali olimba mwauzimu anoroma urumiwi wahora dhothene tangali azombwe. Upainiya unokhami-a zombwe ira aode laba phama basa naatu o-iyana-iyana. Vinokhami-a thitho zombwe ira aire masaka-edho athandhee olokhotela kobiri nou-arelanga. (Afl. 4:11-13) Upainiya okhami-a ndi maromelo aphama ira azombwe tarome urumiwi wahora dhothene. Unoakhami-a ira takozeele dhaira upainiya okhaatheya. Upainiya unom’va-a mutu ngari yoi aode laba maurumiwi o-iyana-iyana ninga laba vambo-i naabali va basa lomangamanga venango urumiwi wava Beteli. Makristau aazombwe anofwanela dhilimbi-edha ira takale arumiwi okhami-a venango andimuwa avapingoni na ifunelo yoi tasamalelenga abali naarongola. Bibilya linoonga makhundo anaode ukhami-ani thitho makhalelo ira mukhale ofwanelela izo yen’na. Bibilya linoonga ira alombwana enao anovilimbi-edha ira takaena izo yen’na, “tanofuna basa lapama.” (1 Ti. 3: 1) Voroma, anosamalela abali naarongola moviyevi-a thitho anolaba basa yolaleela naaliwa. w23.12 28 ¶14-16

Mwene Yosiya aromile m’funafuna Yohova angali zombwe. Anofuna funjedha vya Yohova noirangana ifunelwee. Mbwenye vyongo kavyali vyokweya wa mwene wa zombula. Liye anofuneela sakula kala uikundu ya lambela waimbarimbari vahora yeniyo atu anjinji vyalambela aliwa milungu yonama. Thitho liye atoiranadi vyevyo. A-anafi-e vyawa 20, Yosiya atooroma mali-a lambela onama. (2 Li. 34:1, 2) Angalive ira muli mwana munooda sakula ira musazi-edhenga Yosiya vofunafuna Yohova thitho funjedha makalelwee. Irana vyevyo unodha ulimbi-ani ira mudhivelele wa liye. N’nga dhivelela weu unodha kuza a-vi ingumi inyu? Luka wenuo abadiziwile angana vyawa 14 aongile ira, “Romela va e-ni, ndinongo e-la lambela Yohova va limburo loroma thitho ndinodhilimbi-edha ira ndim’sangalali-enga.” (Mrk. 12:30) Akala nyo thitho munoirana vyevi Yohova unodha uraeli-ani. w23.09 11 ¶12-13

Rumiwi Paulo vyalemba liye kartali vali va-anavire vyawa romela vevo pingo wau Tezalonika vyakathei-iwile aliwa. Vinooneya ira Abali enao tasogolela tali ta-anaidhiwe vyongo vinjinji Venango tanoodawi-a vyongo vinango. Mbwenye aliwa tanoofuneya lemeziwa. Kwaranya wale nlilothene, nyarwa ilukulu yadharoma ninodha funeya manigni nyindela malangi-o enao andimuwa apingoni mwi-u anofuna aliwa dhaniva-a. Venango vahoriyo kavinodha kala vyoodeya wachela malangi-o okumela sede li-u venango ofesi ya tambi. Ee-no pyofuneya dhiveliwana thitho funjedha lemeza andimuwa avapingoni va-eeni. Mo-obala moda unofuna dakalela vyongo vahoriyo, ninofwanela dhowanave kala othuulela pama a-thuulelanga vyevyo vinodawi-a aliwavyo thitho nituulelenga ira Yohova dhela mwa Kristu unosogolela alombwana ororomeleyala. Ninga mwemo ichapowa munobarela aliwa muru wa nyakondo, idedi-edho yi-u yaivulumucho inobarela mathuulelwi-u. Namwasa okaana idedi-edho yolimba, ninoidhiwa ira vyongo vinaniva-e ilamboi pyapezi. (Afl. 3:8) Idedi-edho yi-u inonikami-a kala okurudheya thitho o-otekenyeya. w23.06 11-12 ¶11-12

Atu enao tanovwa itana wa “i-yana opupwa” tanofuneela sakula rumela dhowa venango konda. Vatokala myasa yovweya yoniiri-a rambela makalelo amararuo. “I-yana opupwa” unoongiwa ira liye unoonga ira: “Ma-inje oba anotapila.” (San. 9:17) N’nga “ma-inje oba” tanoongiwa veva mbavi? Bibilya linofwanafwani-edha gonana vari vaalimbo thelana na ma-inje odidili-a rima. (San. 5:15-18) Lombwana na i-yana othelana mwalamulo, mbenao anorumeli-iwa ira tagonanenga. N’nga vyevi vino-iyana a-vi na “ma-inje oba”? Ma-injala ndi vyongo vyamararuo vyevyo vili vyokondi-iwa. Hora dhinango vyongo vyevi vinoireya mwasengeredho ninga mwemo munoirela mutu oba. “Ma-inje oba” tanooda oneya ninga mbotapila simbwasimbwa akala ira atu anoirana vyongo vyamararuwao, tanoona ira katinogumanana nyarwa iliyothene mwavyongo vyothakala vinoira aliwavyo. Weo kuvinami-a neri-a Yohova unoona vyongo vyothene! Kavali yongo yopa maningi kwaranya i-yachi dhiveliwiwa na Yohova. Ee-no kavali yongo iliyothene “yotapila” venango yosangalali-a inafwanafwane notatila ngari yapereso yavadhulwila.—1 Ak. 6:9, 10. w23.06 22 ¶7-9

N’nga munaire a-vi akala mutoroma ona ira malobelwinyu kai okumela vathi varima venango kamunosangalala na basa yolaleela ninga walelene? Kamuthuulelenga ira Yohova uto-iya ukami-ani na zimwee. Ninga mutu o-olongomana, hora dhinango munooda chinja moda munodhivwela nyo. Akala mutoroma ona ira kamuna thindhi, muthuulelenga ifwanafwani-o ya rumuwi Paulo. Angalive ira anoodhilimbi-edha m’a-rela Yesu, anooidhiwa ira kai hora dhothene vevo vanairenga liye vyongo vinolavela manungwee. Paulo ali osikimiza kwakwaneli-edha urumiwee mo-otukulela mwemo mwadhivwela liye. Molandana na vyevi, nyo thitho kamurumeli-enga ira musakulenga vyoira votukulela mwemo munovwela nyo. Muvisikimizeli-enga irana vyongo vyofwanelela angalive ira kai vyevyo vinodhiveliwana nyo irana. Mwairangana vyongo vyofwanelela hora dhothene, munooda chinja mwemo munovivwela nyo.—1 Ak. 9:16. w24.03 11-12 ¶12-13

Ninooda thonyi-edha udhivela waabali-u naarogoli-u voathonyi-edha ira ninoadhiveliwana. (2 Ak. 6:11-13) Anjinji a i-yo nili mumipingoni mwemo abali naarongola mbo-iyana vavyongo vinjinji thitho makalelo. Thuulela makalelwiwa apama unooda nikami-a ira naadhiveliwengana maningi. Nafunjedhanga aona atu ninga mwemo Yohova munoanela liye, ninothonyi-edha ira ninowadhiveliwana maning. Udhivela unodha kala ofuneya maningi vanyarwa ilukulu. N’nga kuvi unafwanye i-yo vuneliwa nyarwa ilukulu idharoma? Kathuulelani malangi-o avelele Yohova waatwee vevo Ababulo vyaadimbinuele aliwa. Yohova aongile ira: “Nyo atwanga dhowani mumavolowe makwartuni mwinyu awari thitho mufunge misuwo. Mumavitale wa hora indendai fiyedha nyanyuwa ungamadhi.” (Esa. 26:20) Malangi-oala tanolaba thitho basa wa i-yo vanodedi-edha i-yo nyarwa ilukulu. w23.07 6-7 ¶14-16

Muidhiweyengana limbilli loi muli ololela. Mudhifukenga ira: ‘N’nga atu anoona ira ndili ololela venango anondiona ira ndili oruchi-a vyongo, orucha venango ovwa vya miyo mekene? Venango ndinovuruwana mathuulelo aatu enango thitho irana vyevyo vinofuna aliwa akala pyofwanelela irana e-no?’ Vinoira i-yo vamwasa ololela, vinodha thonyi-edha akala nino-arela maningi Yohova na Yesu venango kabe. Lolela unothangani-avo kala okozeya chinja vyongo vyachinja vaingumi yi-u. Hora dhinango chinja unooda niiri-a ira nigumanena nyarwa dho-odedi-edhela. Morurumucha, ninooda gumanana nyarwa dhokuza manungwi-u. Chinja wa vyongo vamwasa wa fuma venango vyongo vyauwalanga, vinooda chinja maningi ingumi yi-u. (Nam. 9:11) Iroromelo yi-u inooda wesedhiwa urumiwi-u wachinja. i-yo ninooda lemeela chinja uireile akala ninoirana vyongo 4 vyo-arelavi: (1) rumela mwemo mukalele vyongo, (2) thuulela vya sogolo, (3) thuulela vyongo vya pama vyevyo vinoireya thitho (4) kami-a atu enango. w23.07 21-22 ¶7-8

Namaongela Danieli ali zombwe vevo Ababulo vyam’tukunle aliwa ninga dhaari nom’dhowana uilambo yaundendai na waniwa. Mbwenye moidhiweya liye atoiri-a chidwi atwao. Aliwa tatoona “vyooneya na metho” ninga vyoi Danieli “kaana damba nlilothene” thitho akumele mu banja lolemezeya. (1 Sa. 16: 7) Va myasa dhedhi Ababulo tatom’funji-a ira amalabenga nyumbani wa mwene. (Dan. 1:3, 4, 6) Yohova anom’dhiveliwana maningi Danieli namwasa wa vyongo vyasakunle liye ira airenga vaingumiyee. Thitho pyooneelatu ira ana vyawa vaduzi duzi 20 baa-i vevo Yohova voonga vya atu olongomana, atom’monga vambo-i na Nowa na Yobo alombwana enao tam’labele Nlungu mororomeleya wa vyawa vinjinji. (Mar. 5:32; 6:9, 10; Yob. 42:16, 17; Zak. 14:14.) Danieli atokaana ingumi wa hora indendai thitho Yohova atoodhowanave m’dhiveliwana wa ingumiyee yothene mutu ororomeleula.—Dan. 10:11, 19. w23.08 2 ¶1-2

Akala ira munofuna gula nyumba. nyo munooda ona iruthiruthi iliyothene yokuza nyumba inofunanyo guliyo. Ninooda irana vyongo vimbo-ive ninga nafunanga gula nyumba na leringa Bibilya. Akala munolileri mombaranya, munoidhiwa makundo oroma “opambuleya a M’madhu a Nlungu baa-i.” (Aeb. 5:12) Mbwenye mofwanafwana na vinaire nyo mwafunanga gula nyumba, munofwanela volowa “wari” venango lifunjedha mopwasedha ira mulivwecheche. Ndhila yaphama yofunjedhela Bibilya kuona mwemo vikundu vyo-iyana i-yana vya milanyu ya Bibilyani mukalele aliwa yovwelana. Mudhilimbi-edhenga ira muvwecheche a-kala likundo laimbarimbari linororomela nyo baa-i mbwenye mwasee unororomelela nyo. Ira nilivwecheche phama Bibilya, ninofwanela funjedha mopwasedha makundo odi-a aimbarimbari. Rumiwi Paulo atoalimbi-a abali naarongolee ira tafunjedhenga Madhu a Nlungu mwathindhi na ifunelo yoi “taidhiwe phama mokwivela na molapela thitho mogwela na modi-a” wa imbarimbari. Aliwa ta-airena vyevi tangakanle ninga “michichi yodhowa vathi maningi nokaatheya” muiroromelwiwa. (Aef. 3:14-19) I-yo thitho ninofwanela irana vimbo-ive. w23.10 18 ¶1-3

Bibilyani mutokala vifwanafwani-o vinango vinjinji vyaatu enao tali oleva rima. N’nga munoona a-vi ira masaka-edho vofuna sakasaka vifwanafwani-ovi vahora inofunjedhanyo Bibilya vamweka? Mofwanafwani-a, angalive ira Davide azoziwile angali mwana ira adhakale mwene wa Israeli anofuneela dedi-edha wa vyawa vinjinji a-anava-iwe umwenuo. Simione na Ana tatomlabela Yohova mororomeleya hora yadedi-edha aliwa udha wa Mesiya. (Luk. 2:25, 36-38) Mwafunjedhanga myasadhi musakesakenga vyowakula va vyofuka ningavi: N’nga vinooneya ira chini yamkami-idhe mutuo ira akale oleva rima? N’nga kala oleva rima wamkami-idhe a-vi? N’nga ndinaasazi-edhe a-vi? Munooda ganyali mwafunjedhanga vyaatu enao taimwam’nena thonyi-edha kalelo lokala oleva rima. (1 Sa. 13:8-14) Munooda dhifuka ira: ‘N’nga chini yairi-idhe ira ta-aode kala oleva rima? N’nga vyo-arelavovyee vyali vyoi a-vi?’ w23.08 25 ¶15

Rumiwi Pedru ali ororomeleya thitho kaarumeli-idhe ira iliyothene im’muimwanani-e m’a-rela Yesu. Liye atoothonyi-edha roromeleya weeu vahora inango vevo Yesu vaongile liye vyongo vyevyo anamafunjedhee vyakondile aliwa a-vwechecha. (Ju. 6:68) Atu anjinji tatoo-iyachi m’a-rela Yesu vo-odedi-edha ira aawandelemo vyongo vyathapulela liye. Mbwenye Pedru anoidhiwa ira Yesu baa-i ngwenuo ali “madhu aingumi yo-omala.” Mbwenye Yesu kaakaikela ira Pedru unodha wela nokalave ororomeleya. (Luk. 22:31, 32) Yesu anoidhiwa ira “zimu . . . ngofunechecha, mbwenye tutu tofooka.” (Mrk. 14:38) Ee-no angalive ira Pedru atom’konda ira kanom’muidhiwa liye kaa-iile m’dhiveliwana rumiweula Angavenyathi-iwile Yesu atoogumana na Pedru thitho vinooneya ira vahora yeniyo Pedru ali ekene. (Mrk. 16:7; Luk. 24:34; 1 Ak. 15:5) Vyevi vyatom’limbi-a rumiweuo wenuo adhivwela tangaranga maningi. w23.09 22 ¶9-10.

Nlungu unolevelela venango vu-elela vyodawa vyaatu anom’roromela. Nlungu unoalevelela nomali-elatu voi khanothuuchave vyodawa viwa. Unoaona ira mbo-odawa thitho mbolongomana namwasa wa iroromelwiwa.Angalive ira Abrahamu, Davide na arumiwi enango ororomeleya taoniwa ira mbaatu olongomana, aliwa tali atu odawa. Mbwenye namwasa wa iroromelwiwa Nlungu aaona ira mbaatu o-okhaana vyodawa vofwanafwani-edha naatu enao ta-am’lambela. (Aef. 2:12) Ninga mwaongele rumiwi Paulo mukartalee, iroromelo chofuneya maningi ira mutu akhale vauxamwali na Nlungu. Ndi mwemo thitho mwakalele aliwa na Abrahamu na Davide. Iroromelo inooda nikhami-a thitho i-yo vano, khala vauxamwali waphama na Nlungu. w23.12 3 ¶6-7

Malamboano Makristau othene atookaana ngari yovelela sembe wa Yohova vo-indi-edha basa horiwa, kopolo dhiwa thitho vyongo viwa vom’labela Yohova. Ninooda thonyi-edha ira ninosimba ngari ina i-yo yom’lambela Yohova, vodhilimbi-edha irana yongo iliyothene inaode i-yo vom’labela Paulo atoonga vyongo vyo-iyana i-yana vyokuza lambela wi-u vyoi kaninofwanela vipwaza. (Aeb. 10:22-25) Vyongovyee vinothangani-avo lobela wa Yohova, mwadha vochena idedi-edho yi-u, gumaneya vambo-i ninga pingo thitho limbi-ana, “simbwasimbwa vanoona i-yo ira dambo la [Yohova] nli duzi.” Komoni wa bukhu la Apokalipse, ngelo wa Yohova atoonga fendo wili vofuna sikimizela, ira: “Lambelani Nlungu.” (Apk. 19:10; 22:9) Dhoweni nithuuleleni makundo othene odi-a aimbarimbari okuza kachisi nlukulu wauzimu na vyevyo vinofunjedhavo i-yo thitho simba ngari yolambela Nlungwi-u nlukulu, Yohova! w23.10 29 ¶17-18

Ninofwanela “dhowanave dhivelangana unango nafwee.” Mbwenye ninofwanela thuulelanga ira Yohova atooniwenjeli-a ira “udhivela waatu anjinji unodha towa.” (Mat. 24:12) Mbwenye Yesu kaathapulela ira udhivela wa anamafunjedhee anjinji unodha towa. Angalive ee-no, ninofwanela ira polepole ira na-atukulele rima o-okaana udhivela, udhanle maningi muilamboi. Vothuulela likundo leli, dhoweni nitapanyeni yofuka yofuneya maningila. N’nga vatokala ndhila yoidhiwela akala ninodhiveliwana maningi abali-u? Ndhila imbo-i yoidhiwela ira ninodhiveliwana maningi abali-u, kuona vinoira i-yo vaingumi yi-u. (2 Ak. 8:8) Rumiwi Pedru atoonga imbo-i mwa vyongo vyevyo. Liye aongile ira: “Kwaraya vyothene, mudhivelanenga namwasa oi udhivela unokunela vyodawa vinjinji.” (1 Pe. 4:8) Ee-no, vinoira i-yo nadawi-a vyongo, vinooni-a ira ninoadhiveliwana abali-u venango kabe. w23.11 10-11 ¶12-13

Kaninaode vwela lamulo la Yesu loi nidhivelanenga akala ninodhiveliwana atu enango apingoni mwi-u noimwanananga dhiveliwana atu enango. Pyaimbarimbari ira ninooda vwelananga maningi na atu enango kwaranya enango, ninga mwemo Yesu mwairela liye. (Ju. 13:23; 20:2) Mbwenye Pedru atonithuucha ira “nidhiveliwengana abali”—othene ninga atu abanjani— mwi-u. (1 Pe. 2:17) Pedru atoonilimbi-a ira “nidhivelanenga maningi kumela vathi va rima.” (1 Pe. 1:22) Veva madhu oi “dhivelana maningi” anothapulela m’dhiveliwana mutu mwinango angalive ira pyorucha irana vyevyo. Mofwanafwani-a, n’nga a-vi akala bali mwinango utonisukwali-a mundhila inango? Mwaibaliwelo ninofunecha m’mweli-edha a-kala m’thonyi-edha udhivela. Mbwenye Pedru atoofunjedha wa Yesu ira weli-edha kunom’sangalali-a Nlungu. (Ju. 18:10, 11) Liye atoolemba ira: “Kamuweli-edhenga yothakala va yothakala venango iburutu va iburutu. Mbwenye malomwee mum’raeli-enga.” (1 Pe. 3:9) Murumeli-enga ira dhiveliwana atu enango uulimbi-engani ira mwariyelenga rima. w23.09 28-29 ¶9-11

Ninodabwecha maningi naonanga mwemo mwana munoulukhulela liye mombaranya nokhala ndimuwa. Vinooneya ira ulukhula weu unoireya okhene. Mbwenye ulukhula mwauzimu khunaireya okhene. (1 Ak. 13:11; Aeb. 6:1) Ira mutu aulukhule mwauzimu unofuneela khala vauxamwali wapama thitho olimba na Yohova. Mbwenye ninofuneela zimu ochena ira unikhami-e khaana makhalelo aphama, dodoliso loirela vyongo mwapama thitho kozeela vizo vi-u vyasogolo. (San. 1:5) Vopanducha atu, Yohova atoopanducha lombwana na i-yana. (Mar. 1:27) Lombwana na i-yana tanooneya mo-iya thitho ano-iyana mundhila dhinango. Mofwanafwani-a, Yohova atoopanducha lombwana na i-yana ira takwakwaneli-edhenga vizo vyo-iyana-iyana.—Mar. 2:18. w23.12 18 ¶1-2

N’nga Yesu unofuna ira atu enango ta-indi-edhanga basa dhina laimbarimbari la Babee? Ee. Anamasogolela enango amareligiau a hora yeniyo, tanoororomela ira dhina la Nlungu topambuleya maningi thitho kai lemezo lionganga wiliwili. Mbwenye Yesu karumeli-idhe ira sangani o-ovwelana na malembula im’muimwanani-e lemeza dhina la Babee. Kathuulelani vyaireile angam’mwili-idhe mutu wenuo ana viwanda, mutatamu la Agerasa. Atu atatamo lelo tatoova thitho tatom’vepa Yesu ira akumemo tatamonimo, thitho atookumamodi. (Mrk. 5:16, 17) Mbwenye, Yesu afuna ira atu aweo taidhiwe dhina la Yohova. Moi e-no atom’mwandela mutu am’mwili-idhe liyuo ira awandelenga atu enango, a-kala vyongo vyam’muirele Yesu, mbwenye vyongo vyam’muirele Yohova. (Mrk. 5:19) Malamboano thitho liye unofuna ira niidhiwi-enga atu vailambo yothene yavathi dhina la Babee (Mat. 24:14; 28:20) Nairangani vyevi, ninom’sangalali-a Yesu wenuo uli Mweni-u. w24.02 10 ¶10

Ndingari ilukulu kala mugulu la Yohova malambo oruchala. Vyongo vanodhowanave aliwa thakala muilamboi, Yohova utoniva-a banja lauzimu lovwelana, la abali naarongola. (Sal. 133:1) Yohova unonikami-a thitho ira nikaengana banja lapama. (Aef. 5:33–6:1) Thitho unoniva-a zelu ira nikaengana rendele wa rimani. Mbwenye ninofwanela kaana thindhi ira nidhowenave m’labela Yohova mwathindhi. Mwasiwa ngwan’ni ninoonga ee-no? Namwasa oi hora dhinango ninooda sukwala na vyongo vinodawi-a atu enango. Ninooda thitho sukwala akala ninodawi-a vyongo vinangovyee moweli-edha weli-edha. Ninofwanela dhowanave m’labela Yohova angalive ira (1) kristau fwi-u utonisukwali-a, (2) man’ni-u venango i-yani-u anisukwali-a thitho ya (3) nasukwalanga na vyongo vinodawi-a i-yo. w24.03 14 ¶1-2

Hora dhinjinji muvwenga vyongo vyevyo viireele abali naarongoli-u enao tadhilimbi-edha ira tairenga vyongo vinjinji vom’lambela Yohova. Venango aliwa tatoodhowa xikola ya Makristau olaleela vya Umwene venango tatoothamela weo wafuneela anamalaleela anjinji a Umwene. Nyo thitho munooda dhi-elela vifunelo ninga vyevi. Atu a Yohova anofunechecha ira tairega vyongo vinjinji vom’labela. (May. 16:9) N’nga a-vi akala kamunaode irana vyongo ninga vyevi va-eeni? Kamuthuulelenga ira muli oimwanana vofwanafwani-edha naatu enango enao taodile irana vyevyo. Yofuneya maningi choi mudhowenave m’lambela. (Mat. 10:22) kamudiwale ira Yohova unosangalala na vyongo vinoira nyo vom’labela, movwelana na dodoliso linyu thitho mwemo vyongo mukalele aliwa vaingumi inyu. Yen’na ndi ndhila yofuneya maningi ya mwemo munadhowenavenyo m’a-rela Yesu mwamala badiziwa.—Sal. 26:1. w24.03 10 ¶11

Babi-u wa dhulu Yohova unonilanyedha ira nachinyuwa unonilevelela. (Sal. 86:5) Nadhivwelanga tangaranga namwasa wa vyodawa vyairile i-yo, kanikaikelenga Yohova aniwandela ira utonilevelela. N’nga ninaire a-vi ira nimali-e mathuulelo aliothene? Nithuulelengani ira Yohova unonivwechecha thitho ngololela. Yohova kanodedi-edhela ira niirenga vyongo vya-anaode i-yo irana. Yohova unosimba vyongo vyothene vinoirana i-yo vodhilimbi-edha. Muthuulelenga thitho vifwanafwani-o vya Bibilyani vyaatu enao tam’labenle Yohova na rimiwa othene. Mofwanafwani-a, kathuulelani vya rumiwi Paulo. Liye atoolaba basa mwathindhi maningi, wenda maulendo olapa maningi thitho romi-a mipingo minjinji. N’nga vyongo vyachinjile aliwa vaingumiyee noimwanananga irana vyongo vinjinji va basa yolaleela, Nlungu kaasangalala na liye? Imbarimbari choi Nlungu anoosangalala na liye. Paulo atoodhowanave irangana vyongo vyaoda liye thitho Nlungu atom’raeli-a. (May. 28:30, 31) Molandana na rumiwi Paulo, vyongo vinoira i-yo vom’labela Yohova vinooda chinja. Mbwenye wa Yohova yongo yofuneya maningi chiifunelo yeyo ina i-yo va vyongovyo. w24.03 27 ¶7, 9

Dhela mumalobelwee wa Yohova, Yesu atoovelela ifwanafwani-o yoi anama-arelee tai-arelenga. Vahora yothene ya urumiwee, Yesu anoolobela vaduzi na vaduzi. Liye anoofwanela ira masaka-edho oi alobelenga namwasa oi hora dhinjinji akalecha opingeya thitho rungunuiwa naatu anjinji. Liye anoovenyathi namaebe-i maningi ira akale valimburo lavaekene no lobela. (Mrk. 1:35) Vahora inango atoolobela ma-iyu othene a-anasakule vyoira vamwasa ofuneya maningi. (Luk. 6:12, 13) Thitho va dambolee lomari-a atoolobela moweli-edha weli-edha vothuulela ikundu yomari-a ya urumiwee wava ilamboi wenuo wali orucha maningi. (Mat. 26:39, 42, 44) Ifwanafwani-o ya Yesu inonifunji-a ira masiki nikale opingeya moi a-vi, ninofwanela kaangana hora yolobela. Molandana na Yesu, venango i-yo thitho ninooda funeela venyathi namaebe-i maningi venango gona modembuwa naifunelo yoi nikaengana hora yolobela. Nairangana vyevi, ninothonyi-edha ira ninomsimba Yohova voniva-a yotuva yavakundui. w23.05 3 ¶4-5

Yohova unothonyi-edha ira unodhiveliwana atu ozoziwa. Madhu athapuleliwile ira “unothonyi-edha ira unonidhiveliwana” anooda thapuleliwa thitho ira “unoniva-a udhivelee modhala mandha.” Bukhu n’nango loonga madhu a Bibilyani linoonga ira, udhivela wen’na unodha ninga i-nje. Madhu enala mbakopolo thitho anothonyi-edha ira Yohova unodhiveliwana maningi atu ozoziwa. Atu ozoziwa anoidhiwa ira Nlungu “unoadhiveliwana.” (Yud. 1) Rumiwi Juwau atoonga mwemo mwavivwela aliwa volemba ira: “Kathuulelani vya udhivela ulukhulu wenuo unonithonyi-edha liye voniromola ira nili a-imee. Thitho nilidi a-imee.” (1 Ju. 3:1) N’nga Yohova unodhiveliwana atu ozoziwa baa-i? Khabe, liye unonidhiveliwana i-yo othene. N’nga ndhila ilukhulu maningi ithonyi-edhena Yohova ira unonidhiveliwana njivi? Kuto ndi ndhila ilukhulu maningi inithonyi-edhena liye udhivela kwaranya mutu mwinango uliwethene.—Ju. 3:16; Aro. 5:8. w24.01 28 ¶9-10.

Lemba lavadhululi linoonga thitho yongo yam’kami-idhe Davide ira a-aovenga. Angalive ira liye anoidhiwa ira ingumiyee yali vangovini, liye athuulela vyongo vyafuna dham’mwirela Yohova sogolou. Davide anoidhiwa ira Yohava unodha m’vulumucha vahora yofwanelela. Thitho Yohova ali angaongile ira Davide unodha kala mwene wa Israeli. (1 Sa. 16:1, 13) Wa Davide vyali ninga vyongo vyothene vyalanyedhile Yohova vyali vingamadhi kwakwanela. N’nga Yohova ulanyedhile ira unodha uirelanin’ni? Kaninodedi-edhela ira Yohova anibarelenga va nyarwa dhi-u dhothene. Mbwenye akala ninogumanana vyowesedha vyoi a-vi muilambo yothakalila, nithuulelengani ira Yohova unodha vimali-elatu muilambo ipya. (Esa. 25:7-9) Namapanduchi-u ngwakopolo maningi voi unodha venyathi-a atu okwa, niili-a thitho unodha nonga atu othene oruni-a.—1 Ju. 4:4. w24.01 6 ¶12-13

Muthuulelenga mwasa uiri-idheni ira muode dhivelela nobadiziwa. Mwatoira vyevi namwasa ofuna kala wu ikundu ya Yohova. Muthuulelenga yongo imbo-i yausikimizeli-eni ira mutofwanya imbarimbari. Mwatofunjedha makundo aimbarimbari oonga vya Yohova thitho mwatoroma mdhiveliwana nomlemeza maningi ninga Babinyu wadhulu. Mwatokaana iroromelo thitho vyevi vyatouiri-ani ira muchinyuwe. Riminyu watoulimbi-ani ira mu-iye makalelo othakala thitho muirenga vyongo movwelana na ifunelo ya Nlungu. Mwatovivwa pama mungaidhi ira Nlungu atoulevelelani vyodawa vinyu. (Sal. 32:2) Mwatoroma fwanyeya vamigumanoni, thitho wandela atu enango vyongo vyova-a ifunelo vyafunjedhanyo. Ninga Kristau odhivelela thitho obadiziwa, vachineneeva munowenda vandhila yodhowa wu ingumi thitho muli osikimiza ira munodhowanave wenda vandhilila. (Mat. 7:13, 14) Mukale olimba thitho o-otekenyeya vom’lambela Yohova thitho vwela malamulwee. w23.07 17 ¶14; 19 ¶19

Thuulela vyalanyidhile nyo wa Yohova vahora yadhivelela nyo, unooda uva-ani kopolo ira muode konda vyowesedha vyothene vinogumanana nyo. Mofwanafwani-a, N’nga munoroma kopeya na lombwana venango i-yana wa mwinyaa? Pyooneelatu ira kamunoirana vyevyo, namwasa oi mwatoolanyedha wa Yohova ira kamunodha irana vyongo ninga vyevyo. Akala kamunorumela ira mathuulelo othakala takaatheye mathuuleloni mwinyu, kamunodha rucheya amali-a. “Munodha kumavo” ira “mwa-atukulele vyoira vyaatu amakalelo othakala.” (San. 4:14, 15) Thuulela mwemo Yesu mwakalele liye osikimizela ira asangalali-enga Babee, unodha ukami-ani ira mombaranya thitho molimba rima mukonde vyongo vyothene vyevyo vinoidhiwa nyo ira kavinom’sangalali-a Nlungu wenuo wadhivelele nyo wa liye. (Mat. 4:10; Ju. 8:29) Imbarimbari choi vyowesedha vinogumanana nyo, vinooda uva-ani ngari yoi muthonyi-edhe ira muli ofunechecha “dhowanave a-rela” Yesu. Mwairanga vyevi, munodha kaana iroromelo yoi liye unodha ukami-ani. w24.03 9-10 ¶8-10