N’nga munowendela mathuulelo a Yohova vamwasa omwa vyolezeli-a?

Mo-okaikela munosimba vyotuva vyo-iyana iyana viuva-idheni Yohova thangani-avo vyotuva vya ufulu osakula vinausangalali-eni va vyotuvavi. Pyosangalali ira Bibilya linooga ira vinyu njotuva yokumela wa Nlunngu thitho linoonga ira: “Yodya inoiri-a ira atu tasangalalenga thitho vinyu unoiri-a ira ingumi ikalenga yosagalala.” (Namal. 10:19; Sal. 104:15) Venango mutoonavo mutu mwinango agumanangana nyarwa namwasa omwa vyomwa vyolezeli-a. Wenjedhela vevo atu availambo yothene tatokaana mathuulelo o-iyana i-yana vamwasa omwa vyomwa vyolezeli-a. N’nga chini inakami-e Makristau ira tasakulenga vyoira mwazelu vamwasa wen’na?

Mo-obala unokala i-yo venango ikalelwi-u, ninofuneela sakulanga phama vamwasula. Ee-no ndiphama wendelanga mathuulelo a Yohova a-kala mathuulelo aatu anirungunuwile. Naira ee-no, ninodha kala atu osangalala.

Venango munoona ira atu anjinji amuilambwila tanomwa maningi thitho vaduzi navaduzi. Atu enango tanomwa vyomwa vyolezeli-a namwasa oi vinoakami-a dhivwanga phama. Mbwenye atu enango anomwa vyomwa vyolezeli-a ira tadiwale nyarwa dhiwa. Matatamo enango mutu unomwa vyomwa vyolezeli-a maningi unooniwa ira ngumutu wakopolo.

Mbwenye i-yo Makristau nino-arela malangi-o azelu okumela wa Namapanduchi-u waudhivela Yohova. Mofwanafwani-a, liye unoniwandela nyarwa dhinodha namwasa omwa maningi vyomwa vyolezeli-a. Venango mwatoolerivo lemba la Sanganiko 23:29-35, lelo linoonga phama vyokuza mutu olezela na nyarwa dhinogumanana liye.a Ndimuwa mwinango wau Europa dhinalee Daniel, unothuulela mwemo ingumiyee mwakalele aliwa a-anakale Kristau. Liye aongile ira: “Ndanoomwa maningi thitho vyatoondiiri-a ira ndikaengana nyarwa dhinjinji voi fiyedha va-eeni vinondipa rimani ndavithuulelanga.”

N’nga Makristau tana-indi-edhe a-vi basa ufulwiwa osakula vyongo ira tarambelenga nyarwa dhinodha namwasa omwa maningi vyomwa vyolezeli-a? Yongo inanikami-e kurumeli-a ira malangi-o a Nlungu tasogolelenga mathuulelwi-u na vyoira vi-u.

Va-eeni dhoweni nitapanyeni vinoonga Bibilya vamwasa omwa vyomwa vyolezeli-a thitho vifunelo vinokaana atu enango tamwanga vyomwa vyolezeli-a.

VINOONGA BIBILYA VAMWASA WA VYOMWA VYOLEZELI-A

Madhu a Nlungu katinokondi-a umwa vyomwa vyolezeli-a mo-okwaranyi-a madile. Thitho Bibilya linoonga ira umwa vinyu kosangalali-a. Linoonga thitho ira: “Udye yodya modhiveliwa thitho umwe vinyu narimaa osangalala.” (Namal. 9:7) Hora dhinango Yesu na arumiwi enango a Yohova ororomeleya tanoomwa vinyu.—Mat. 26:27-29; Luka 7:34; 1 Timo. 5:23.

Mbwenye madhu a Nlungu anoonga movweya phama i-yana ulivo vari vomwa vyomwa vyolezeli-a vag’ono nolezela. Anoonga ira: “Kamulezelenga na vinyu.” (Aef. 5:18) Anoonga thitho ira atu “omwa maningi . . . katinodha volowa Muumwene wa Nlungu.” (1 Akor. 6:10) Pyaimbarimbari ira Yohova unoidanana atu anomwa maningi vyomwa vyolezeli-a nolezelanga. Ee-no malo mo-arelanga ikalelwi-u ninofwanela a-relanga makundo anam’sangalali-e Nlungu.

Atu enango anothuulela ira tanooda umwa vyomwa vyolezeli-a maningi mbwenye katinolezela. Vyevo pyoopi-a maningi. Malemba anoonga ira kala dhaari wavinyu unoiri-a mutu dawi-a vyongo thitho m’dawela Yohova. (Titu 2:3; Sang. 20:1) Yesu atoonga thitho ira “umwa maningi” unom’mwimwanani-a mutu ira a-avolowe muilambo ipya. (Luka 21:34-36) N’nga chini inakami-e Kristau rambela nyarwa dhinodha namwasa omwa vyomwa vyolezeli-a?

MUTHUULELENGA MODA MUNOMWA NYO VYOMWA VYOLEZELI-A THITHO MWASA UNOMWELA NYO

Wendelanga vyongo vinoira atu atatamonimwi-u vamwasa omwa vyolezeli-a, koopi-a maningi. Makristau anodhilimbi-edha m’sangalali-a Yohova vamwasa wavyodya na vyomwa. Bibilya linonithhuucha ira: “Akala munaaudya venango umwa venango ira yongo iliyothene, im’va-e Nlungu titimi-o.” (1 Akor. 10:31) Va-eeni, dhoweni nitapanyeni vyofuka namakundo a Bibilyani anofwanela i-yo athuulelanga.

N’nga ndinomwa vyomwa vyolezeli-a naifunelo yoi atu tandidhiveliwengana? Lemba la Ekisodo 23:2, linoonga ira: “Kaniirenga vyongo vo-arela mwinji waatu.” Veva Yohova awenjeli-a a-ima Aisraeli ira kati-arelenga atu taira vyongo vyo-om’sangalali-a Nlungu. Malangi-o enala mbokami-a thitho wa Makristau amalamboano. Nawendelanga mathuulelo aafwi-u vamwasa omwa vyomwa vyolezeli-a, ninooda dodomi-a uxamwali-u na Yohova thitho imwanana a-rela makundwee.—Aroma 12:2.

N’nga ndinomwa vyomwa vyolezeli-a naifunelo yoi atu tandionenga ira ndili wakopolo maningi? Vikalelo vinango atu anoona ira kavali yorucha umwa maningi vyomwa vyolezeli-a thitho vaduziduzi. (1 Pe. 4:3) Mbwenye kaonani madhu azelu anofwanyeya va lemba la 1 Akoritiyo 16:13, lembali linoonga ira: “Mukale methove, mukaena iroromelo yolimba, mukale olimba rima thitho mukale akopolo.” N’nga vyomwa vyolezeli-a vinooda m’kami-a mutu kala wakopolo? Kabe vyevyo kai vyaimbarimbari, umwa maningi vyomwa vyolezeli-a unom’muiri-a mutu ira akale ofooka, a-athuulelenga phama thitho kanasakulenga vyoira mwazelu. Ee-no umwa vyomwa vyolezeli-a maningi unothonyi-edha ira mutuo ngofooka a-kala wakopolo, lemba la Esaya 28:7, linoonga vyamutu o-olowa namwasa omwa vyomwa vyolezeli-a, linoonga ira unowenda modhedhereya thitho unogwa.

Kopolo dhaimbarimbari dhinokumela wa Yohova, mutu wakopolo unokala methove thitho unokaana iroromelo yolimba. (Sal. 18:32) Ira vyevi viodeye ninofwanela kala methove nosakulanga vyoira mwazelu ira na-anonge uxamwali-u na Yohova. Yesu angali vailambo yavathila atoothonyi-edha ira ngwakopolo thitho atu anjinji tanom’lemeza namwasa oira vyongo mwazelu na molimba rima.

N’nga ndinomwa vyomwa vyolezeli-a ira ndidiwale nyarwa dhanga? Mulimbo lemba masalimo atoovudheleliwa lemba ira: “Vyokumbanya vyanga vingainjivile [nyo Yohova] mwatoondididili-a thitho mwatoondisangalali-a.” (Sal. 94:19) Mwakala osukwala mum’nyindelenga Yohova a-kala nyindelanga vyomwa vyolezeli-a. Munooda irana vyevi volobela vaduzi navaduzi wa Yohova. Atu anjinji anoona ira vepa malangi-o waatu olimba mwauzimu unokala okami-a. Onga imbarimbari mutu amwanga vyomwa vyolezeli-a naifunelo yoi adiwale nyarwadhee, vinom’muiri-a kala ofooka mathuulelonimwee thitho vinom’muiri-a imwanana irana vyongo vyofwanelela. (Oseya 4:11) Daniel um’mongile i-yo maromelule atoonga ira: “Ndanoorucheya maningi novikumbanyedhanga thitho ndanooviomba landu. Ndanoolezela maningi ira ndidiwale nyarwadhanga mbwenye dhaira wenjedheleya thitho afwanga tatoo-iya waredha na miyo voi katandilemeza.” N’nga chini yam’kami-idhe Daniel? Liye aongile ira: “Ndatoozindiyela ira ndinofwanela m’mongana Yohova a-kala umwa vyomwa vyolezeli-a. Vasogolovee ndatooda vilela nyarwa dhanga thitho dhatoomala.” Veva likundo toi, Yohova unooda ukami-ani akala kamuna yoira iliyothene.—Afil. 4:6, 7; 1 Pe. 5:7.

Akala hora dhinango munomwa vyomwa vyolezeli-a munoira phama visakasaka vo-indi-edha basa vyofuka vi: ‘N’nga fwanga venango atu abanjani mwanga anodandaula namoda munomwa miyo?’ Akala di-eeno wenuo guumboni othonyi-edha ira mutoroma ilemeelo yodaweya mbwenye nyo kamunoidhiwa. ‘N’nga va-eeni ndinomwa maningi kwaranya ndulimu?’ Vyevi vinooda thonyi-edha ira akala mutuo kaali omwa maningi unoroma kala omwa maningi. ‘N’nga vinondirucha kala o-omwa vyomwa vyolezeli-a malambo oyeva venango malambo manjinji?’ Akala ndi-eno choi ilemeelo yomwa vyomwa vyolezeli-a itoulukula venango mutoroma umwa maningi. Pyoi munofuneela kami-iwa naatu enango adodoliso ira mu-iye umwa vyomwa vyolezeli-a.

Vothuulela nyarwa dhinodha namwasa omwa vyomwa vyolezeli-a, Makristau enango anosakula a-mwa vyomwa vyolezeli-a navag’onovene. Enango anosakula ira ta-amwenga namwasa oi katinodhiveliwana riyawee. Akala fwinyu utosakula ira a-amwe vyomwa vyolezeli-a munooda m’thonyi-edha riya rima volemeza visakunle liye a-kala m’tonga.

Atu enango anoona ira dhi-elela madile unokami-a. Makristau anooda dhi-elela madile wa injiva wavyomwa vinamwe aliwa. Venango kabe anodhi-elela lamulo vavyomwa ira tamwenga fendo imbo-i vasumana venango umwa vag’ono vahora yodya. Enango anosakula tundu wavyomwa vinofwanela aliwa umwa. Mwaifwanafwani-o, anooda sakula umwa vinyu venango vyomwa vyo-okaana kopolo maningi. Katinomwa vyomwa vyakopolo angalive ira vitothangani-iwa navyomwa vinango vyo-okaana kopolo. Mutu adhi-elela madile vamwasa omwa vyomwa vyolezeli-a, vinokala vyo-orucha ira a-akwaranyi-e madile. Akala Kristau olimba mwauzimu utodhi-elela lamulo vamwasula nou-arelanga, kanofwanela kumbanyedhanga moda usakunle atu enango.

Nasakulanga vamwasa omwa vyomwa vyolezeli-a, ninofwanela thuulelanga atu enango. Lemba la Aroma 14:21, linoonga ira: “Ndi pama a-dya nyama venango a-mwa vinyu venango a-ira yongo iliyothene inam’sukwali-e balaa.” (Aroma 14:21) N’nga nina-arelenga a-vi malangi-o enala? Ninofwanela thonyi-edhanga udhivela. Akala munoona ira umwa vyomwa vyolezeli-a unooda sukwali-a mutu mwinango, udhivela unodha ulimbi-ani ira mwa-amwe vahora yeniyo. Mwaira ee-no, munothonyi-edha ira munothuulela nolemeza atu enango. Thitho munothonyi-edha ira kamunofuna vyoganyali-a nyo baa-i mbwenye vyoganyali-a atu enango.—1 Akor. 10:24.

Guverno linovelela malamulo vamwasa omwa vyomwa vyolezeli-a Makristau anofwanela aliwa a-arela. Malamulwala anooda khala okuza vyawa vyamutu vinofwanela liye roma umwa vyomwa vyolezeli-a venango anooda kala okondi-a umwa vyomwa vyolezeli-a nowendi-anga karro venango i-ndi-edhanga basa makina enango.—Aroma 13:1-5.

Yohova utonilemeza voniva-a ufulu osakula vyoira vinosangalalana i-yo va vyotuva vyo-iyana i-yana viniva-idhe liye. Vyevi vinothangani-avo ufulu osakula vinofuna i-yo udya venango umwa. Dhoweni nithonyi-edhengani ira ninosimba ufulu univa-idhe Yohova voira vyongo vinalemeze Babi-u wadhulu.