N’nga nyo Makristau aasikana, munaire a-vi ira mukhale olimba mwauzimu?

1. N’nga ninofwanela iranan’ni ira niulukhule mwauzimu?

NINODABWECHA maningi naonanga mwemo mwana munoulukhulela liye mombaranya nokhala ndimuwa. Vinooneya ira ulukhula weu unoireya okhene. Mbwenye ulukhula mwauzimu khunaireya okhene.b (1 Akor. 13:11; Aeb. 6:1) Ira mutu aulukhule mwauzimu unofuneela khala vauxamwali waphama thitho olimba na Yohova. Mbwenye ninofuneela zimu ochena ira unikhami-e khaana makhalelo aphama, dodoliso loirela vyongo mwaphama thitho kozeela vizo vi-u vyasogolo.—Sang. 1:5.

2. N’nga ninofunjedhavon’ni va lemba la Maromelo 1:27? N’nga muyofunjedha yei ninotaphanyanin’ni?

² Vophanducha atu, Yohova atoophanducha lombwana na i-yana. (Muleri Maromelo 1:27.) Lombwana na i-yana tanooneya mo-iya thitho ano-iyana mundhila dhinango. Mofwanafwani-a, Yohova atoophanducha lombwana na i-yana ira takwakwaneli-edhenga vizo vyo-iyana-iyana. Ee-no aliwa anofuneela khaana makhalelo na madodoliso enao anaakhami-e kwakwaneli-edha vizo viwa. (Maro. 2:18) Muyofunjedha yei, ninotaphanyani vinaire Makristau aasikana ira takhale olimba mwauzimu. Muyofunjedha yo-arela, ninodha taphanyani vinaire Makristau aazombwe ira takhale olimba mwauzimu.

MUKHAENGANA MAKHALELO ANAM’SANGALALI-E YOHOVA

3-4. N’nga arongola aasikana anafwanye wani vifwanafwani-o vinasazi-edhe aliwa? (Muone thitho iruthiruthi.)

³ Bibilya linoonga vifwanafwani-o vinjinji vyaa-iyana enao tam’dhiveliwana Yohova nom’labela. (Muone va jw.org mwasa wa muru oi “Kodi Tingaphunzire Chiyani kwa Akazi Otchulidwa M’Baibulo?”) Movwelana na lemba li-indiwile muyofunjedha yei, a-iyanao tali “oira vyongo mo-okwaranyi-a madile” thitho “ororomeleya vavyongo vyothene.” Wenjedhela vevo, Makristau aasikana anooda fwanya pingoni mwiwa arongola olimba mwauzimu enao anofwanela aliwa sazi-edha ifwanafwani-o yiwa.

⁴ Akhala muli Kristau wasikana, vinokhala phama nyo fwanya arongola Aikristau olimba mwauzimu enao anasazi-edhenyo ifwanafwani-o yiwa. Muonenga makhalelwiwa aphama. Mwaira e-no muone mwemo munathonyi-edhelenyo makhalelwao. Muyofunjedha yei, ninotaphanyani makhalelo mararu ofuneya maningi wa Makristau aasikana ira takhale olimba mwauzimu.

5. Mwasiwa ngwan’ni dhiyevi-a khofuneya maningi wa Makristau aa-iyana olimba mwauzimu?

⁵ Dhiyevi-a, ndi khalelo lofuneya maningi ira Kristau wasikana aulukhule mwauzimu. I-yana odhiyevi-a unokhala vauxamwali waphama na Yohova thitho atu enango. (Yak. 4:6) Mofwanafwani-a, i-yana unom’dhiveliwana Yohova, unokhala odhiyevi-a no-arelanga malangi-o anovelela Yohova okhuza muru wa banja na muru wa pingo. (1 Akor. 11:3) Makhundo enala ano-indi-edheliwa basa pingoni thitho vabanjani.c

6. N’nga arongola aasikana anofunjedhavon’ni wa Rabeka vamwasa odhiyevi-a?

⁶ Kathuulelani ifwanafwani-o ya Rabeka. Liye ali i-yana wa zelu thitho o-ovira khundu voira vyongo vaingumyee yothene. (Maro. 24:58; 27:5-17) Mbwenye liye ali walemezo thitho ogonjela. (Maro. 24:17, 18, 65) Nyo thitho mwakhala odhiyevi-a no-arelanga malangi-o ninga Rabeka, munodha khala ifwanafwani-o yaphama banjani mwinyu na pingoni.

7. N’nga arongola aasikana anofunjedhavon’ni wa Estere vamwasa oidhiwa madiliwa?

⁷ Idhiwa madili-u, ndi khalelo n’nango lofuneya maningi ira Kristau wasikana akhale olimba mwauzimu. Bibilya linoonga ira, “atu odhiyevi-a mbaatu azelu.” (Sang. 11:2) Estere ali rumiwi wa Nlungu ororomeleya oi anoidhiwa madilee. Khalelo leli latom’kami-a ira a-aire vyongo modhigweli-a. Liye atoovuruwana no-arela malangi-o okhumela wa Mordekai wenuo ali balee wa ndimuwa. (Est. 2:10, 20, 22) Nyo thitho munooda thonyi-edha ira munoidhiwa madilinyu, mwavephanga malangi-o noa-arelanga.—Titu 2:3-5.

8. Movwelana na lemba la 1 Timoteo 2:9, 10, n’nga dhiyevi-a noidhiwa madile unakami-e a-vi arongola sakula mwazelu vamwasa owara nodhibalei-a?

⁸ Estere atoothonyi-edha zindiyela madile mundhila inango. Liye ali “ooneya phama thitho obaleya maningi” mbwenye khaaira vyongo modhioneli-edha. (Est. 2:7, 15) N’nga ifwanafwani-o ya Estere inakhami-e a-vi Makristau aa-iyana malamboano? Ndhila imbo-i iwongiwile va lemba la 1 Timoteo 2:9, 10. (Muleri.) Rumiwi Paulo atoolangi-a Makristau aa-iyana ira tawarenga mwalemezo thitho mwazelu. Madhu Aigiriki a-indi-edheliwe basa valembali, anothonyi-edha ira vyowara vya Makristau aa-iyana vinofwanela khala vya lemezo thitho vyothonyi-edha ira anothuulela atu enango. Ninosimba maningi arongoli-u Aikrisatau namwasa oi anodhilimbi-edha wara mwalemezo.

9. N’nga arongola aasikana anofunjedhavon’ni va ifwanafwani-o ya Abigayeli?

⁹ Zindiyela ndi khalelo n’nango arongola olimba mwauzimu linothonyi-edha aliwa. N’nga zindiyela chini? Zindiyela unothapulela odanga i-yani-a vari va vyongo vyofwanelela na vyo-ofwanelela amala sakhula irangana vyongo vyofwanelelavyo. Ifwanafwani-o vamwasula nja Abigayeli. Man’nee atoosakhula vyongo modaweya vyevyo vyairi-e ira banja liwa lothene ligumanena nyarwa. Abigayeli atoiravo yongo mombaranya voi zindiyelawee watoovulumucha atu anjinji. (1 Sam. 25:14-23, 32-35) Zindiyela unonikami-a idhiwa hora yofwanelela onga na hora yo-ofwanelela onga. Zindiyela thitho unonikhami-a ira nithonyi-edhenga ifunelo waatu enango a-khala ava-anga maonelo odaweya.—1 Atez. 4:11.

MUFUNJEDHENGA MADODOLISO ANAUKAMI-ENI VAINGUMI INYU

10-11. N’nga leri nolemba phama unakami-eni a-vi nyo thitho atu enango? (Muone thitho iruthiruthi.)

¹⁰ I-yana wa Ikristau unofuneela funjedha madodoliso o-iyana-iyana. Madodoliso enao Kristau wasikana anofunjedha liye angali mwana, anom’kami-a vaingumiyee yothene. Dhoweni nitapanyeni vifwanafwani-o vingasi.

¹¹ Mufunjedhenga leri nolemba phama. Muvikhalelo vinango atu anoonga ira i-yana kanofwanela funjedha leri nolemba phama. Mbwenye dodoliso leli tofuneya maningi wa Kristau uliwethene.d (1 Timo. 4:13) Ee-no kamurumeli-e ira yongo iliyothene iuwimwanani-eni idhiwa leri nolemba phama. N’nga dodoliso leli linaukami-eni a-vi? Dodolisoli linooda ukhami-ani ira mulembiwe basa nofwanyanga kobiri. Linodha ukami-ani thitho ira mufunjedhenga madhu a Nlungu noafunji-anga atu enango. Kwaranya vyongo vyothene vyevi, dodolisoli linodha ukami-ani khala vauxamwali olimba maningi na Yohova namwasa oi munongo leri madhwee noathuulelanga modi-a.—Yoswa 1:8; 1 Timo. 4:15.

12. N’nga lemba la Sanganiko 31:26, linakami-e a-vi arongola aasikana ira taongenga phama naatu enango?

¹² Mufunjedhenga onga phama naatu. Makristau anofuneela onganga phama naatu. Vamwasa wen’na, Yakobo wenuo ali namafunjedha wa Yesu, atoovelela malangi-o oonga ira: “Mutu uliwethene akhalenga okozeya vuruwana, a-anawakule aromenga thuulela.” (Yak. 1:19) Mwavuruwananga mwapolepole atu enango taonganga, munothonyi-edha ira munothuulela atu enango thitho munoavwela tangaranga. (1 Pe. 3:8) Akala munokaikela ira kamuvwechechile phama viongile atu venango mwemo munovwela liwa, vinokhala phama fuka vyofukha vyofwanelela. Mwaira e-no nyo roma thuulela mwa-anawakhule. (Sang. 15:28, madhu achindo.) Mudhifukenga ira: ‘N’nga vinofuna miyo ongavi pyaimbarimbari? N’nga pyolimbi-a? N’nga vinothonyi-edha lemezo venango riya rima?’ Mufunjedhenga wa arongola olimba mwauzimu enao anoidhiwa phama onga naatu. (Muleri Sanganiko 31:26.) Muonenga moda unoonga arongolao. Mwafunjedha onga phama naatu, paevo vanovwelana nyo maningi naatu enango.

13. N’nga arongola aasikana anaire a-vi ira tafunjedhe mabasa avandhe? (Muone thitho iruthiruthi.)

¹³ Mufunjedhenga mabasa avandhe. Mumatatamu manjinji a-iyana mbanolaba mabasa manjinji avandhe. M’minyu venango rongola mwinango oidhiwa mabasa avandhe, unooda ufunji-ani. Rongola mwinango dhinalee Cindy aongile ira: “Yongo imbo-i yofuneya maningi yafunjedhile miyo wa m’manga yali yoi laba basa mwathindhi unokami-a ira usangalalenga. Funjedha mabasa ninga phiya, cheni-a vandhe, sona, nogula vyongo, watoondikami-a ira ndisangalalenga thitho ndiirenga vyongo vinjinji vom’labela Yohova. M’manga atoondifunji-a ira ndiwachelenga phama alendo. Vyevi vyatoiri-a ira ndigumanena abali naarongola aphama maningi enao asazi-edhe miyo ifwanafwani-o yiwa.” (Sang. 31:15, 21, 22) I-yana akhala wathindhi, owachela phama alendo noidhiwa mabasa avandhe, unokhami-a maningi banjalee thitho pingoni.—Sang. 31:13, 17, 27; Mayir. 16:15.

14. N’nga arongola aasikana anofunedhavon’ni va vyam’mureele Crystal? N’nga munofwanela thuulelangan’ni?

¹⁴ Mufunjedhenga khala okwakwanana vyongo vinanyo. Khala okwakwanana vyongo vinanyo, ndikhalelo n’nango lofuneya maningi wa Kristau olimba mwauzimu. (Afil. 4:11) Rongola mwinango dhinalee Crystal aongile ira: “Anamabalanga tatoondikami-a sakhula mafunji-edho anandikami-e fwanya dodoliso linandikami-e sogolou. Babanga atoondilimbi-a mafunjedha mafunji-edho oidhiwa lengesa kobiri thitho anondikami-a maningi.” Wenjedhela vofunjedha madodoliso anaukami-eni ira mufwanye basa, munofwanela dhilimbi-edha funjedha lokhota kobiri. (Sang. 31:16, 18) Mu-elenga mathuulelwinyu vavyongo vyauzimu, murambelenga mangawa thitho mukhalenga okwakwanana ingumi yo-ofuna vyongo vinjnji.—1 Timo. 6:8.

MUKHOZEELENGA VIZO VINYU VYA SOGOLO

15-16. N’nga arongola o-otheliwa anokami-a a-vi atu enango? (Marku 10:29, 30)

¹⁵ Funjedha madodoliso o-iyana-iyana nokhaana makhalelo aphama, vinodha ukhami-ani ira mudhakwakaneli-edhe vizo vinyu vya sogolo. Dhoweni nitaphanyeni vifwanafani-o vya vyongo vinango vinaire nyo.

¹⁶ Munooda sakhula khala o-otheliwa wahora. Movwelana na madhu a Yesu, arongola enango anosakhula ira ta-atheliwe angalive ira tatamuni mwiwa atu anolimbi-a theliwa. (Mat. 19:10-12) Arongola enango anokhala o-otheliwa vamyasa yo-iyana-iyana. Muidhiwenga ira Yohova na Yesu katinoona ira Makristau ta-ali vabanjani mbo-ofuneya kabe. Arongola anjinji o-otheliwa anoira vyongo vinjinji mipingoni vailambo yothene yavathi. Udhivela na rimiwa othuulela atu enango, unoalimbi-a ira takhale arongola venango am’ma auzimu aatu anjinji.—Muleri Marku 10:29, 30; 1 Timo. 5:2.

17. N’nga rongola wasikana unakhozeele a-vi ira arome urumiwi wahora dhothene?

¹⁷ Munooda roma urumiwi wahora dhothene. Makristau aa-iyana anoira vyongo vinjinji vabasa yolaleela vailambo yothene yavathi. (Sal. 68:11) N’nga nyo, munooda ira masaka-edho ira murome urumiwi wahora dhothene? Munooda ira upainiya, laba mabasa avyomangamanga venango urumiwi wava Beteli. Mulobelelenga vifunelo vinanyo. Mutapanyenga naatu takwakwaneli-edhe vifunelo ninga vyevyo noona vinaire nyo ira nyo thitho mukwakwaneli-edhe. Mwaira e-no, munodha ira vyongo vinaukami-eni kwakwaneli-edha vifunelo vinyuvyo. Mwaroma urumiwi wahora dhothene, vinodha ukami-ani ira muire vyongo vinjinji vom’labela Yohova.

18. Mwasiwa ngwan’ni arongola aasikana anofwanela ira pholephole tasakhulanga lombwana unofuna m’thela? (Muone thitho iruthiruthi.)

¹⁸ Munooda sakhula theliwa. Makhalelo na madodoliso atapanyileni i-yoala, anooda ukhami-ani ira mukhale i-yana venango m’ma waphama. Mbwenye munofwanela ira pholephole maningi mwasakhulanga mutu unofuna uthelani. Namwasa oi sakhula mutu unofuna uthelani ngumwasa nlukulu maningi vaingumi inyu. Muthuulelenga ira lombwana unofuna dhauthelani ngwenuo unofuna khala muru wabanja. (Aroma 7:2; Aef. 5:23, 33) Ee-no munofwanela dhifuka ira: ‘N’nga lombwanula ngu Kristau olimba mwauzimu? N’nga uno-ela vyongo vyauzimu valimburo loroma? N’nga unosakhula vyoira mwazelu? N’nga adawi-a vyongo unorumela? N’nga lombwanula unolemeza a-iyana? N’nga unodha ndikami-a limbi-a uxamwalanga na Nlungu? N’nga unodha ndisakhelanga vyongo vyofuneela vaingumini thitho khala fwanga wavarimani? N’nga unosamalela phama vizovyee? Mofwanafwani-a, N’nga pingoni una izo yoi a-vi? N’nga unosamalela a-vi izwiyo?’ (Luka 16:10; 1 Timo. 5:8) Mbwenye muidhiwenga ira akhala munofuna fwanya lombwana waphama, nyo thitho munofwanela khala i-yana waphama.

19. Mwasiwa ngwan’ni ninooda onga ira izo yokhala “okhami-a” kai yonyozeya?

¹⁹ Bibilya linoonga ira i-yana waphama “ngokhami-a” man’nee thitho “ngufwee ofwanelela.” (Maro. 2:18) N’nga vyevi vinothapulela ira i-yana ngo-ofuneya? Kabe. I-yana utokhaana izo yofuneya maningi. Bibilya linoonga ira Yohova “ngokhami-a.” (Sal. 54:4; Aeb. 13:6) I-yana unokhami-a man’ne akhala unovwelana na man’ne vavyongo vyokhuza banja na visakhunle liye. Voi unom’dhiveliwana Yohova, unodhilimbi-edha ira limbili la man’nee likhale laphama. (Sang. 31:11, 12; 1 Timo. 3:11) Ira mukhozeele izo inyu yasogolo, munofwanela m’dhiveliwangana maningi Yohova, khami-anga atu enango thitho atu abanjani mwinyu na apingoni.

20. N’nga ndi vyongo viivi vyaphama m’ma vinairele liye banjalee?

²⁰ Munooda khaana a-ima. Mwadhakhala vabanjani nyo na man’ninyu munooda sakhula khaana a-ima. (Sal. 127:3) Ee-no ndi phama thuulela vyevyo vinafuneele nyo ira mukhale m’ma wapahama. Makhalelo namadodoliso atapanyileni i-yo muyofunjedha yei, anooda ukhami-a ira mukhale i-yana waphama thitho m’ma waphama. Mwakhala waudhivela, oriya rima na oleva rima, munodha khami-a banja linyu khala losangalala thitho a-iminyu anodha dhivwanga ira mbobareleya na odhiveliwiwa.—Sang. 24:3.

21. N’nga ninovivwa a-vi nathuulelanga vya arongoli-u? Muonge mwasee. (Muone iruthiruthi yavakapani.)

²¹ Idhiwani ira ninoudhiveliwanani maningi nyo arongoli-u, namwasa wa vyevyo vinom’muirela nyo Yohova thitho atwee. (Aeb. 6:10) Munokhaechana thindhi maningi ira mukhaena makhalelo aphama na madodoliso enao anaukhami-eni vaingumi inyu thitho atu enango. Makhalelo namadodoliso enala anoukhami-ani ira mukozeele phama vizo vinyu vya sogolo. Muli Apereso yavadhulu maningi mugulu na Yohova.