N’nga nyo Makristau aazombwe, munaire a-vi ira mukhale olimba mwauzimu?

1. N’nga Kristau wa zombwe unofwanela iran’ni ira vyongo vim’mwendelenga phama?

MWENE Davide atom’mwandela Solomu ira: “Wiire vyongo mwakopholo thitho ukhale olimba rima.” (1 Mam. 2:1-3) Abali othene amalamboano anooda ira phama a-rela malangi-o enala. Ira taode irana vyevi, anofwanela funjedha vwela malamulo a Yohova thitho a-rela makhundo a Bibilyani va vyoira viwa vyothene. (Luka 2:52) Mwasiwa ngwan’ni Makristau aazombwe anofwanela dhilimbi-edha ira takhale olimba mwauzimu?

2-3. Mwasiwa ngwan’ni azombwe anofwanela dhilimbi-edha ira takhale olimba mwauzimu?

² Lombwana wa Ikristau unokhaana vizo vyofuneya maningi banjani thitho pingoni. Mo-okhaikela nyo Makristau aazombwe mutoromavo thuulela vizo vinofuna nyo khaana sogolou. Venango mutokhaana ifunelo yoira urumiwi wahora dhothene, khala rumiwi okhami-a thitho khala ndimuwa wavapingoni. Venango munofuna dhathela nokhaana a-ima. (Aef. 6:4; 1 Timo. 3:1) Ira vyevi viodeye thitho vyongo viuwendeleni phama, munofwanela khala olimba mwauzimu.b

³ N’nga chini inaukhami-eni ira muulukhule mwazimu? Vatokhala vyongo vinango vinofwanela nyo irana. N’nga chini inaire nyo va-eeni ira mukhozeele vizo vinofunanyo dhakhaana sogolou?

VYONGO VINAIRENYO IRA MUKHALE OLIMBA MWAUZIMU

4. N’nga munafwanye wani vifwanafwani-edho vyapahama vinaode nyo visazi-edha? (Muone thitho iruthiruthi.)

⁴ Musakhulenga atu avifwanafwani-o vyaphama ira mwaasazi-edhenga. Bibilyani mutokhala vifwanafwani-o vinjinji vyaphama vyevyo azombwe vinasazi-edhe aliwa. Makristau awalala tanom’dhiveliwana maningi Nlungu thitho tatokhaana vizo vyo-iyana-iyana vosamalela atu a Nlungu. Munooda fwanya vifwanafwani-o vya Makristau olimba mwauzimu banjani mwinyu thitho pingoni. (Aeb. 13:7) Ifwanafwani-o yaphama nja Yesu Kristu. (1 Pe. 2:21) Mwafunjedhanga mwapholephole vyaatu enala, muthuulelenga thitho makhalelo aphama enao ana aliwa. (Aeb. 12:1, 2) Mwamala muonenga vinaire nyo ira mwaasazi-edhenga.

5. N’nga chini inaukhami-eni ira mukhale othuulela phama? N’nga mwasiwa ngwan’ni irana vyevi khofuneya? (Salimo 119:9)

⁵ Mukhalenga “atu othuulela phama.” (Sang. 3:21) Mutu othuulela phama unoroma thuulela a-anasakhule vyoira. Mudhilimbi-edhenga ira mukhaena dodoliso leli. Mwasiwa ngwan’ni ninoonga e-no? Namwasa oi muilambwila mutokhala azombwe anjinji enao anowendela zelu dhiwa baa-i thitho anotukulela makhalelo ailambwila. (Sang. 7:7; 29:11) Vyongo ninga televizau, mafilime na interneti, vinooda dodomi-a mathuulelo na vyoira vinyu. N’nga munaire a-vi ira mukhale othuulela phama? Yoroma, munofwanela funjedhanga makhundo a Bibilyani nothuulelanga uphamee. Mwaira e-no mu-indi-edhenga basa makhundo afunjedhile nyo voirana vyongo vinam’sangalali-e Yohova. (Muleri Salimo 119:9.) Mwakhaana dodoliso leli, linodha ukhami-ani khala olimba mwauzimu. (Sang. 2:11, 12; Aeb. 5:14) Dhoweni nitapanyeni mwemo thuulela phama munaode aliwa ukhami-ani vamyasa minli: (1) Mwairanga vyongo naarongola (2) Mwasakhulanga vyowara na moda owara.

6. N’nga thuulela phama unaode a-vi m’kami-a Kristau wa zombwe ira alemezenga arongola?

⁶ Thuulela phama unooda ukhami-ani ira mulemezenga a-iyana. Kai vyodaweya akhala bali wazombwe unofuna idhiwana phama na rongola mwinango. Zombwe othuulela phama kanoonga, lemba, venango irana yongo iliyothene inakope sikana akala kanofuna m’thela. (1 Timo. 5:1, 2) Akhala zombwe wa Ikristau uli vaimwendi na rongola, unooda barela limbili la rongoluo vorambela wenda atu ambilive venango khala atu ambili baa-i.—1 Akor. 6:18.

7. N’nga thuulela phama unakhami-e a-vi Kristau wa zombwe vamwasa osakhula vyowara?

⁷ Ndhila inango inathonyi-edhe zombwe wa Ikristau ira unothuulela phama, ndi moda unosakhulela liye vyowara na moda odhibalei-a. Hora dhinjinji atu anosona vyowara anokhala atu o-om’lemeza Yohova thitho amakalelo othakhala. Vyowara vinosona aliwa vinokhala vyotimba vyoi alombwana anooneya ninga a-iyana. Mbwenye Kristau olimba mwauzimu unosakhula vyowara mo-arela makundo a Bibilyani na vifwanafwani-o vyaatu aphama apingoni. Baluo unooda vifuka ira: ‘N’nga vyowara vyanga vinothonyi-edha ira ndili mutu othuulela phama thitho ndinothuulela atu enango? N’nga moda unowara miyo unokhami-a atu zindiyela mo-orucha ira ndatoodhivelela ira ndim’labelenga Nlungu?’ (1 Akor. 10:31-33; Titu 2:6) Zombwe wa Ikristau othuulela phama unokhala olemezeya vamethoni va abali naarongola thitho vamethoni va Nlungu.

8. N’nga chini inaire zombwe ira akhale onyindeleya?

⁸ Mukhalenga onyindeleya. Zombwe onyindeleya unokwakwaneli-edha vizovyee mororomeleya. (Luka 16:10) Yesu atoovelela ifwanafwani-o yaphama maningi vamwasula. Liye khaaira vyongo mo-osamala venango a-elavo rima. Mbwenye atoirana vyongo vyothene vyam’rumile Yohova angalive ira irana vyevyo wali orucha. Yesu anoodhiveliwana maningi atu simbwa simbwa anamafunjedhee. Thitho mofunechecha atoovelela ingumiyee namwasa waaliwa. (Ju. 13:1) Vofuna sazi-edha ifwanafwani-o ya Yesu, munofwanela labanga mwathindhi basa nlilothene linofuna nyo va-iwa. Akhala kamunoidhiwa mwemo munairele nyo vyongo vinango, munofwanela khala odhiyevi-a novephanga abali olimba mwauzimu ira taukami-eni. Munofwanela dhilimbi-edha ira mulabenga mabasa manjinji. (Aroma 12:11) Mwaira e-no mwava-iwa basa mulabenga mwathindhi ninga munolabela “Yohova a-kala atu.” (Akol. 3:23) Mbwenye hora dhothene muthuulelenga ira kamuli olongomana, e-no muidhiwenga madilinyu norumelanga mwadawi-a vyongo.—Sang. 11:2.

MUFUNJEDHENGA MADODOLISO ENANGO ANAUKHAMI-ENI VAINGUMI INYU

9. Mwasiwa ngwan’ni Makristau aazombwe anofwanela funjedha dodoliso loi lidhaakhami-e?

⁹ Ira mukhale Kristau olimba mwauzimu, munofwanela funjedha madodoliso enango anaukhami-eni vaingumi inyu. Dodoliso lelo linooda ukhami-ani ira mukwakwaneli-edhe phama vizo vinyu mwari mwapingo, mulembiwe basa lelo linaukhami-eni fwanya vyofuneela vyavaingumini thitho muvwelanenga naatu enango. Dhoweni nitapanyeni madodoliso enala.

10-11. N’nga zombwe ufunjedhile leri nolemba phama unoganyali a-vi? N’nga unakami-e a-vi pingo? (Salimo 1:1-3) (Muone thitho iruthiruthi.)

¹⁰ Mufunjedhenga leri nolemba phama. Bibilya linoonga ira mutu wenuo unoleri madhu a Nlungu dambo na dambo noathuulelanga modi-a unokhala osangalala thitho vyongo vinom’mwendela phama. (Muleri Salimo 1:1-3.) Mutu aleringa Bibilya dambo nlilothene, unoidhiwa mathuulelo a Yohova thitho vyevyo vinodha m’kami-a ira athuulelenga phama no-arelanga makhundo a Bibilyani. (Sang. 1:3, 4) Mwari mwapingo munofuneela atu ninga enala. Mwasiwa ngwan’ni ninoonga e-no?

¹¹ Abali naarongoli-u anofuna khami-iwa naatu oidhiwa funji-a thitho velela malangi-o okhumela Bibilyani. (Titu 1:9) Akhala munoidhiwa leri nolemba phama, munooda khozeela mwasinyu na vyowakula vinyu ira viode limbi-a iroromelo ya abali naarongola pingoni. Munooda lemba makhundo okhami-a vahora inofunjedha nyo Bibilya wavamwekene, vuruwana myasa yapingo, ya gumano waisa na ya gawo. Makhundwala anodha limbi-a iroromelwinyu thitho limbi-a iroromelo yaatu enango.

12. N’nga chini inaukami-eni ira muongenga phama naatu enango?

¹² Mufunjedhenga onga phama naatu. Zombwe wa Ikristau unofwanela funjedha onga phama naatu. Mutu unoonga phama naatu unovuruwana ira azindiyele vinothuulela atu noidhiwa mwemo munowvela aliwa. (Sang. 20:5) Liye unooda zindiyela vyongo vinango namwasa wa mwemo munovwela liye madhu amutuo, moda unooneya khove na mwemo munoirela liye vyongo. Mbwenye ira muidhiwe vyongo vyothene vyevi, munofwanela waredhanga naatu. Akala hora dhothene munoongecha naatu vo-indi-edha basa telefoni, lemba mamesage, dodoliso linyu loonga phama naatu vamethoni na vamethoni linooda fooka. Ee-no munofwanela dhilimbi-edha tapanyanga naatu vamethoni na vamethoni.—2 Ju. 12.

13. N’nga Kristau wazombwe unofwanela funjedhan’ni? (1 Timoteo 5:8) (Muone thitho iruthiruthi.)

¹³ Mudhilimbi-edhenga fwanya kobiri dhovisamalelana vaingumi inyu thitho muodenga visamalela mwekene. Lombwana olimba mwauzimu unofwanela fwanyanga vyofuneela vaingumiyee thitho vya banjalee. (Muleri 1 Timoteo 5:8.) Muvilambo vinango azombwe anofunjedha mabasa khumela wa babiwa venango wa bali mwinango. Mbwenye muvilambo vinango azombwe anofunjedha mabasa na madodoliso enango takhala xikolani. Mo-obala mukhalele vyongo waninyuo, munofwanela funjedha dodoliso n’nango lelo linaukhami-eni fwanya basa. (Mayir. 18:2, 3; 20:34; Aef. 4:28) Munofwanela idhiweyana ira muli mutu wathindhi thitho mwava-iwa basa munolimari-echa. Mwaira e-no munooda fwanya basa thitho kamunodha khumi-iwa basa. Makhalelo na madodoliso atapanyileni i-yo ala, mbofuneya maningi wa Kristau wa zombwe ira adhakwakwaneli-edhe phama vizovyee sogolo. Dhoweni nitaphanyeni vizo vinango vinofwanela i-yo vikozeela.

MUKHOZEELENGA VIZO VINYU VYA SOGOLO

14. N’nga Kristau wazombwe unakhozeele a-vi ira adhaire urumiwi wahora dhothene?

¹⁴ Urumiwi wahora dhothene. Abali olimba mwauzimu anoroma urumiwi wahora dhothene tangali azombwe. Upainiya unokhami-a zombwe ira aode laba phama basa naatu o-iyana-iyana. Vinokhami-a thitho zombwe ira aire masaka-edho athandhee olokhotela kobiri nou-arelanga. (Afil. 4:11-13) Upainiya okhami-a ndi maromelo aphama ira azombwe tarome urumiwi wahora dhothene. Azombwe anjinji anoira upainiya okhami-a wahora ira takozeele dhaira upainiya okhaatheya. Upainiya unom’va-a mutu ngari yoi aode laba maurumiwi o-iyana-iyana ninga laba vambo-i naabali va basa lomangamanga venango urumiwi wava Beteli.

15-16. N’nga Kristau wazombwe unaire a-vi ira akhaena izo mwari mwapingo?

¹⁵ Khala rumiwi okhami-a venango ndimuwa wavapingoni. Makristau aazombwe anofwanela dhilimbi-edha ira takale arumiwi okhami-a venango andimuwa avapingoni na ifunelo yoi tasamalelenga abali naarongola. Bibilya linoonga makhundo anaode ukhami-ani thitho makhalelo ira mukhale ofwanelela izo yen’na. Bibilya linoonga ira alombwana enao anovilimbi-edha ira takaena izo yen’na, “tanofuna basa laphama.” (1 Timo. 3:1) Andimuwa avapingoni na arumiwi okhami-a, anosamalela abali naarongola moviyevi-a thitho anolaba basa yolaleela naaliwa. Azombwe anofwanelela khala arumiwi okhami-a takwaranyi-a vyawa 16. Thitho rumiwi okhami-a wenuo unosamalela phama vizovyee, unooda khala ndimuwa wavapingoni afii-a vyawa 20.

¹⁶ N’nga munaire a-vi ira mufwanelele vizo ninga vyevi? Bibilya linoonga makhundo anaode ukhami-a thitho makhalelo anofwanela nyo akhaana. Makhundo enala ndi ninga m’dhiveliwana Yohova, dhiveliwana banja linyu thitho pingo. (1 Timo. 3:1-13; Titu 1:6-9; 1 Pe. 5:2, 3) Ee-no muvilimbi-edhe ira muvwechechenga phama likhundo nlilothene. Mum’vephenga Yohova ira aukami-e khala ofwanelela.c

17. N’nga Kristau wazombwe unakhozeele a-vi ira adhakale muru waphama wa banja? (Muone thitho iruthiruthi.)

¹⁷ Lombwana ngu muru wa banja. Movwelana na madhu a Yesu, alombwana enango anosakhula a-thela. (Mat. 19:12) Mbwenye mwasakhula thela munodha khaana izo inango yowenjedheleya. Munodha khala muru wabanja. (1 Akor. 11:3) Yohova unofuna ira lombwana am’dhiveliwengana i-yanee thitho am’fwanyelenga vyongo vyofuneya vaingumiyee, khala fwee wavarimani thitho a’mkami-e khala vauxamwali waphama na Yohova. (Aef. 5:28, 29) Makhalelo na madodoliso atapanyileni i-yo muyofunjedha yei, ninga thuulela phama, lemeza i-yana thitho khala onyindeleya, anooda ukhami-ani khala lombwana waphama. Mwaira e-no munodha khala okozeya kwakwaneli-edha vizo vinyu.

18. N’nga Kristau wazombwe unakhozeele a-vi ira adhakhale baba waphama?

¹⁸ Baba. Mwadhathela munodha khaana a-ima. N’nga chini inofuna nyo funjedha wa Yohova vamwasa okhala baba waphama? Vatokhala vyongo vinjinji vinofuna nyo funjedha. (Aef. 6:4) Yohova anom’mwandela mwanee ira unom’dhiveliwana maningi thitho unosagalala na liye. (Mat. 3:17) Nyo thitho mwadhakaana a-ima munofwanela awandelanga ira munoadhiveliwana. Hora dhothene mwaasimbenga tairanga vyongo vyaphama. Ababa enao anom’sazi-edha Yohova anokhami-a a-imiwa khala olimba mwauzimu. Munooda khozeela izo yen’na vodhilimbi-edha samalela atu abanjani mwinyu na apingoni. Munooda irana vyevi vowandela atu enango ira munoadhiveliwana noasimba. (Ju. 15:9) Irana vyevi unodha ukami-ani khozeela phama izo inyu ya sogolo yodhakala baba. Mbwenye va-eeni munooda khala wa pereso yavadhulu vamethoni va Yohova, banjani mwinyu thitho pingoni.

N’NGA CHINI INOFWANELA NYO IRANA VA-EENI?

19-20. N’nga chini inakham-e Makristau aazombwe ira takhale olimba mwauzimu? (Muone iruthiruthi yavakapani.)

¹⁹ Abali aazombwe, munofwanela dhilimbi-edhanga ira mukhale olimba mwauzimu. Munofwanela sakhula abali aphama oi musazi-edhenga ifwanafwani-o yiwa, khala othuulela phama, khala onyindeleya, funjedha madodoliso anaukhami-eni sogolo thitho khozeela vizo vinyu vya sogolo.

²⁰ Venango hora dhinango munoona ira pyorucha a-rela vyongo vyothene vinofwanela nyo irana. Mbwenye muthuulelenga ira pyoodeya vikwakwaneli-edha. Muthuulelenga ira Yohova ngokozeya ukami-ani. (Esaya 41:10, 13) Abali naarongola apingoni mwinyu anodha ukhami-ani. Mwadha ulukhula nokhala Kristau olimba mwauzimu, ingumi inyu inodha khala yaphama na yosangalala. Nyo azombwe, ninoudhiveliwanani maningi! Yohova auraeli-eni vevo vanodhilimbi-edha nyo ira mukhale olimba mwauzimu.—Sang. 22:4.