Yohova atom’limbi-a Eliya

Yezebeli angavwide vyaireile naanamaongela abaala, atoothakaleliwa maningi. Ee-no atootumiza milanyu wa Eliya yoonga ira: ‘Ebe-i naweene thitho unokwa ninga mwemo mukwide anamaongela Abaala.’ Eliya angavwide vyevi atoova maningi thitho atootawela kokolani. Angali weo atoolobela ira: ‘Yohova nditochenyelana vinoireyavi. Ndirumeli-eni ira ndiire wukwa wene.’ Namwasa ochenyela Eliya atoogonathi chindo mwa muri.

Ee-no vatoodha ngelo nom’tekeya thitho atom’mwandela ira: ‘Venyathi udye.’ Eliya angaing’ane atoona jaro ya ma-inje napau ingali va mabweni oka-a. Angadyide pawiyo nomwa ma-ijao, atoogonathi okhoka. Vangavirile hora ngelulee atoodha okhoka nom’venyathi-a thitho atom’mwandela ira: ‘Udye okhoka namwasa oi unowenda ulendo undendai.’ Ee-no Eliya atoovenyathi nodya okhoka. Adhamale atoowenda ulendo wa malambo 40 thana nama-iyu dhowa mafiya mwangoni wa Horebe. Adhamale atoovolowa paoni nogonathi. Mbwenye Yohova atom’fuka ira: ‘Unofunan’ni uno Eliya?’ Eliya atoowakula ira: ‘Aisraeli ato-iya vwela lamulo linyu. Tatogwi-a viguwa vinyu vya sembe, thitho atopha anamaongelinyu. Ee-ni anofuna thitho tandiphe miyo.’

Mbwenye Yohova atom’mwandela ira: ‘Dhowa umaimele va mwangonivo.’ Ee-no watovira liphevo lakopolo valango wa pauo. Adhamale watooireya indharandhara. Vasogolo vaindharandhariyo watoobuwa mulo. Vidhaireye vyevyo Eliya atoovwa madhu okhurundheya avathithivathi. Angavwide madhwao, atookhunela kovee na yowarayee thitho atookhuma nodhowa maimela valango wa paule. Yohova atom’fuka ira: ‘Unofunan’ni uno?’ Eliya atoowakula ira: ‘Ndi-adhi mekhene.’ Mbwenye Yohova atoom’mwandela ira: ‘Kuli wekhene. Muisraeli mutokala thitho atu 7.000 enao anondilambelave. Dhowa umazoze Elisa ira avolowele limburolaa.’ Hora yeniyene Eliya atooirana vyam’mwandele Yohova. N’nga unothuulela ira naweene thitho Yohova unooda ukami-a wairangana vinofuna liye? Ee, unooda ukami-a. Va-eeni dhoweni nitapanyeni vyaireile vahora yailimwe.