Danieli atooponyedhiwa lindini mwa kalamu

Vahora inango, Dariyo wa Mediya atooroma tonga wu Babulo. Liye atoona ira Danieli atookaana dodoliso lavakhundu thitho atom’sakula ira akale nama-arela wavakhundu ira aing’anelenga anama-arelee. Anama-arelee enango naatu enango tatooroma m’mwirela sanje thitho tanoofuna m’nukhedhela myasa. Aliwa tatooidhiwa ira Danieli anoodhiveliwana lobela wa Yohova fendo uraru vadambo nlilothene. Ee-no atoom’mwandela Dariyo ira: ‘Mwene mukaathi-e lamulo loi mutu uliwethene alobelenga wa nyo baa-i. Mutu a-anavwele lamuloli, aponyedhiwenga lindini mwa kalamu.’ Vyevi vyatom’sangalali-a Dariyo thitho atookathi-adi lamuloli.

Danieli angavwide vya ilamulo yachineneeviyo, atoodhowa nyumbaniwee. Janela lanyumbee lingali lodhulalene, atookokora noroma lobela wa Yohova. Atu am’mwirela sanjale tangam’moni, tatoovolowa nom’fwanya alobelanga. Tadhaire ee-no tatootamangela wa Dariyo dhowa mam’mwandela ira: ‘Mwene, Danieli kanovwela lamulo linyu. Unave dhowana lobela wa Nlungwee fendo taaru vadambo nlilothene.’ Moi Dariyo anom’dhiveliwana maningi Danieli, kaafuna ira aphiwe. Ee-no vadambo lipumbula atoodhilimbi-edha ira afwanye ndhila yom’vulumuchela Danieli. Mbwenye moi kavyaodeye ira mutu uliwethene achinje lamulo likaathi-idhe mwene, Dariyo atootonga ira Danieli aponyedhiwe lindini mwa kalamu dhauwali.

Dambo lelo, Dariyo kaagonile akalela thuulela vya Danieli baa-i. Ee-no undhe ungachide, atootamangela lindiniule thitho atookuwa nom’fuka Danieli ira: ‘N’nga Nlungwaa utouvulumucha?’

Danieli atoowakhula ira: ‘Ngelo wa Yohova atoofunga milomo yakalamu moi kadhindipei-idhe.’ Dariyo angavwide vyevyo atoosagalala maningi. Ee-no atoonga ira Danieli akumi-iwe lindinimule. Danieli akumile angali wa pamene. Ee-no mwene atootonga ira: ‘Aponyedheni lindinimo atu enao am’funele vyothakala Danieli.’ Tangaaponyedhile lindinimo, kalamudho dhatowageta ta-anafiye vathi nowadya.

Moi ee-no Dariyo atoowandela atu othene ira: ‘Uliwethene atitimi-enga Nlungu wa Danieli, namwasa oi utom’vulumucha lindini mwa kalamu.’

N’nga weyo unolobelecha dambo nlilothene ninga mwemo mwairela Danieli?