MURU OFUNJEDHA 7
NYUMBO 15 Tamandani Mwana Woyamba Kubadwa wa Yehova
Ninoganyali maningi nolevelela wa Nlungu
“Nyo munolevelela na rima othene.”—SAL. 130:4.
VINOFUNA I-YO FUNJEDHA
Muyofunjedha yei ninoona madhu mangasi a Bibilyani oonga vifwanafwani-o vyevyo Yohova vinoira liye volevelela na rima othene thitho mwemo munathonyi-edhele i-yo simba.
1. Mwasiwa ngwan’ni vinokala vyorucha idhiwa vyongo vinothapulela mutu aonga ira utonilevelela?
MADHU OI, “nditoulevelela” mbodidili-a rima simbwasimbwa akala nitoonga venango irana vyongo vim’sukwali-idhe mutu mwinango. N’nga madhu oi “nditoulevelela” anothapulela n’ni? N’nga mutu um’sukwali-idhe i-yo unoodha kala xamwali ninga voroma? Venango unokala athapulelanga ira kanofuna mutapanye viireilevyo? Atu enango taonga ira tatolevelela anokala tathapulelanga vyongo vyo-iyana iyana.
2. N’nga Bibilya linoonga a-vi levelela wa Yohova? (Muone thitho madhu achindo.)
2 Mwemo Yohova munonilevelela liye i-yo atu odawa, pyo-iyana na mwemo munolevelelana i-yo okhene. Kavali mutu unaode levelela ninga mwemo munoirela Yohova. Voonga vya Yohova olemba masalimo aongile ira: “Nyo munolevelela na rima othene, ira atu kauovengani.”a (Sal. 130:4) Ee-no Yohova ‘unolevelela na rima othene.’ Liye ngwaifwanafwani-o yapama yothonyi-edha inothapulela levelela. Mumaversu enango, alimbo lemba Bibilya tatoo-indi-edha basa madhu Aieberi voonga vyolevelela enao ano-indi-edheliwa basa voonga vya Yohova ekhene baa-i, a-kala atu.
3. N’nga levelela wa Yohova uno-iyana a-vi na waatu? (Esaya 55:6, 7)
3 Yohova alevelela mutu unofudha madawo othene amutuo thitho unokala okoka vauxamwali na liye ninga voroma. Ninosimba ira Yohova unolevelela na rima othene thitho moweli-edhaweli-edha.—Muleri Esaya 55:6, 7.
4. N’nga Yohova unonikami-a a-vi vwechecha thapulela wa madhu oi levelela?
4 Voi levelela wa Yohova ko-iyana na wi-u, n’nga ninaire a-vi ira nivwecheche vinothapulela levelela waimbarimbari? Yohova uno-indi-edha basa vifwanafwani-o vofuna nikami-a vwechecha levelelawee. Muyofunjedha yei ninotapanya vinango mwa vifwanafwani-o vyevi. Vifwanafwani-edho vinonikami-a ona mwemo Yohova munofudhela liye madawi-u nosaka-edha okoka uxamwali-u wanongeile. Tapanya vifwanafwani-ovi unonikami-a ira nisimbenga maningi Babi-u wa tangaranga wenuo unonilevelela fendo dhinjinji.
YOHOVA UNOFUDHA MADAWO
5. N’nga inoireya chini Yohova anilevelela madawi-u?
5 Bibilya linofwanafwani-edhela madawo na tolo onyemela. Voonga madawee Mwene Davide aongile ira: “Vyodawa vyanga vitolapa maningi kwaranya i-moyanga. Kandinaode vipwathela namwasa oi vinonyemela maningi ninga tolo ulukhulu.” (Sal. 38:4) Mbwenye Yohova unolevelela madawo aatu enao tachinyuwile. (Sal. 25:18; 32:5) Madhu Aieberi enao athapuleliwe ira “levelela” anothapulela “fudha” venango “tukula.” Yohova uli ninga mutu wakopolo wenuo mopipirisa unofudha madawo anonyemela mafudini mwi-u.
“Mwatoondilevelela” (Sal. 32:5)
6. N’nga Yohova uno-iya vyodawa vi-u undendai moi a-vi?
6 Ifwanafwani-o inango inothonyi-edha mwemo Yohova munotukulela liye madawi-u nowatatila olapela na i-yo. Lemba la Salimo 103:12 linoniwandela ira: “Mofwanafwana na mwemo unokumela dhuwa munolapela aliwa na mavirelo adhuwa, Nlungu uto-ela thitho vyodawa vi-u olapela na i-yo.” Makumelo adhuwa kolapelana maningi na mavirelo adhuwa. Mamburo melala katinogumana. Vyevi vinothapulela ira Yohova uto-ela madawi-u olapela maningi na i-yo. Thitho vinosikimizela ira Yohova unonilevelela na rima othene.
“Mofwanafwana na mwemo dhuwa mulapelane aliwa na mavirelo adhuwa” (Sal. 103:12)
7. N’nga Bibilya linoonga a-vi vyevyo vinoira Yohova na vyodawa vi-u? (Mika 7:18, 19)
7 Angalive ira mopipirisa Yohova unofudha madawi-u no-ela olapela maningi na i-yo, n’nga vyevi vinothapulela ira unovithuulelave? Khabe. Voonga vya Yohova Mwene Ezekiya atoolemba ira: “Madawanga othene mutowaponyedha nduli mwinyu.” Venango ninga mwemo madhu achindo munoongela aliwa ira, “mutofudha madawanga othene ira mwa-aaoneve okoka.” (Esa. 38:9, 17; madhu achindo.) Madhwala anothonyi-edha ira Yohova unofudha madawo amutu wenuo uchinyuwile noa-ela ulimburo loi kanaode aona okoka. Madhwala anoonga thitho ira: “Mutoiri-a ira [madawanga] akale ninga katiireileve.” Bibilya linosikimizela likhundo leli na madhu enango aifwanafwani-o yofwanyeya va lemba la Mika 7:18, 19. (Muleri.) Maverswala anoonga ninga Yohova unaaponya madawi-u barani wu limburo lodi-a. Walelene vyongo vyaponyedhiwa va barani valimburo lodi-a kavyaodeya ira mutu amavikumi-emo.
“Vyodawa vyanga vyothene mutovi-ela nduli mwinyu.” (Esa. 38:17)
“Vyodawa vyanga vyothene munodha viponya barani valimburo lodi-a” (Mik. 7:19)
8. N’nga fiyedha va-eeni nifunjedhilevon’ni?
8 Vifwanafwani-ovi vinonikami-a ona ira Yohova anilevelela, ninoluluveliwa madawi-u. Ninga mwemo mwaongele Davide ira, “osangalala mbaatu oi atoleveleliwa vyoira viwa vyo-ovwela malamulo thitho madawiwa atoleveleliwa. Osangalala ngu mutu oi Yohova utom’levelela madawee.” (Aro. 4:7, 8) Weu kulevelela na rima othene!
YOHOVA UNOFUDHA MADAWO
9. N’nga Yohova uno-indi-edha basa vifwanafwani-o viivi, vofuna nikami-a vwechecha levelela wee?
9 Yohova uno-indi-edha basa vifwanafwani-o vinango vofuna nikami-a vwechecha mwemo munofudhela liye madawo aatu enao tachinyuwile vo-indi-edha basa sembe ya khuto. Bibilya linoonga ira Yohova uno-uwa venango cheni-a madawo. Vyevi vinokami-a ira odauo akale ochena. (Sal. 51:7; Esa. 4:4; Jer. 33:8) Yohova aongile ekhene vyo-arelavovyee thitho aongile ira: “Masiki ira madawinyu takale ofiila maningi, anodha chena maningi. Masiki ira takale ofiila ninga sangiri, tanodha chena ninga thonje.” (Esa. 1:18) Vinokala vyorucha maningi kumi-avo vyongo vyofiila venango sangiri va yowara. Mbwenye vo-indi-edha basa ifwanafwani-oi Yohova atoonisikimizela ira madawi-u anodha chena maningi voi kaninodha aonave.
“Angalive ira vyodawa vinyu ndi vyofiila maningi, vinodha chena maningi” (Esa. 1:18)
10. N’nga Yohova uno-indi-edha basa ifwanafwani-o iivi vofuna nithonyi-edha mwemo munolevelela liye?
10 Ninga muoni i-yo muyofunjedha yoromile, madawi-u anofwanafwani-edheliwa na mangawa. (Mat. 6:12; Luk. 11:4) Ee-no vahora iliyothene inodawa i-yo, ninokala ninga ninaawenjedhela madawi-u wa Yohova. Thitho madawi-ao anokala manjinji maningi. Mbwenye anilevelela vinokala ninga utofudha mangawa enao afuna i-yo weli-a. Liye kanodedi-edhela ira nipagali mangawa amadawi-u enao anilevelele liye. Ifwanafwani-oi inoonga movweya pama ira Yohova anilevelela ninokala osangalala maningi.
“Munilevelele vyodawa vi-u” (Mat. 6:12)
11. N’nga Bibilya linothapulelan’ni laonganga ira vyodawa vi-u vitofudhiwa? (Mayirelo 3:19)
11 Yohova anilevelela madawi-u, kaiira unaakwacha baa-i mbwenye unaafudha. (Muleri Mayirelo 3:19.) Mangawa takwachiwa, atu anokwacha valembiwilevo mbwenye vilembiwilevyo vinooda oneyangave. Fudha ko-iyana maningi na vyevi. Ira nivwecheche vyevi ninofwanela thuulela ira matita awale tasaka-edhiwa na vyongo vyo-orucha fudheya. Mutu anooda tukula nguwo inyeti-a nofudha vyongo vilembile liyevyo. Ee-no mangawao afudhiwa, kataoneyave. Mutu kaaoda ona vyongo vyalembiwile. Vakala thitho ninga kavali mangawa. Pyolimbi-a maningi idhiwa ira Yohova kanaakwacha baa-i madawi-u, mbwenye unaafudha.—Sal. 51:9.
“Ira vyodawa vi-u vileveleliwe” (May. 3:19)
12. N’nga ninofunjedhavon’ni va ifwanafwani-o ya rambo ulukhulu?
12 Yohova uno-indi-edha basa ifwanafwani-o inango voonga mwemo munofudhela liye madawo. Liye aongile ira: “Ndinodha fudha madawiwa thitho ndinodha kala ninga nditovikunela na rambo vyodawa viwavyo vinodha kala ninga nditovikunela na rambo nlukulu.” (Esa. 44:22) Yohova anilevelela vinokala ninga utokunela madawi-u na rambo nlukulu moi kaninaode aonave.
“Ndinodha fudha vyodawavyaa thitho vinodha kala ninga nditovikunela na rambo” (Esa. 44:22)
13. N’nga ninovivwa a-vi Yohova anilevelela vyodawa vi-u?
13 N’nga ninofunjedhavo n’ni va vifwanafwanivi? Yohova anilevelela madawi-u kaninofwanela viombanga landu vaingumii-u yothene. Sangiri ya Yesu Kristu, itoiri-a ira mangawi-u othene afudhiwe. Vali ninga valembiwile mangawao kavanaoneyave yongo iliyothene. Mu ndi mwemo Yohova munolevelela liye na rima othene nachinyuwa madawi-u.
YOHOVA UNORUMELA IRA NIKALE OKOKA VAUXAMWALI WAPAMA NA LIYE
Babi-u wadhulu anilevelela ninokala okoka vauxamwali wapama na liye (Muone ndima 14)
14. Mwasiwa ngwan’ni kaninofwanela kaikela Yohova aonga ira utonilevelela? (Muone thitho viruthiruthi.)
14 Yohova anilevelela na rima othene ninokala okoka vauxamwali wapama na liye. Vyevi vinonikami-a ira na-adhowenave viomba landu namwasa wa madawi-u. Ee-no kanithuulelenga ira Yohova unonilokothedha myasa thitho unosakasaka ndhila yoi anilangi-e. Liye kanaire vyevyo. Mwasiwa ngwan’ni kaninofwanela kaikela Yohova aonga ira utonilevelela? Yohova atom’mwandela namaongela Jeremiya ira: “Miyo ndinodha alevelela vyodawa viwa thitho madawiwa kandinodha athuulelave.” (Jer. 31:34) Rumiwi Paulo atoonga thitho vyoladana na vyevi vevo valembile liye ira: “Kandinodha athuulelave madawiwa.” (Aeb. 8:12) N’nga madhu enala anothapulelan’ni?
“Vyodawa viwa kandinodha vithuulelave okoka” (Jer. 31:34)
15. N’nga madhu oonga ira Yohova kanothuulelave okoka vyodawa vi-u anothapulelan’ni?
15 Bibilyani madhu oi “thuulela” kavinothapulela thuulela vyongo vyaireile baa-i. Mbwenye vinothapulela irana vyongo vinango. Mofwanafwani-a, lipanga lathomeyiwile vaduzi na Yesu latom’vepa ira: “Yesu, mumandithuulele mwadhavolowa mu Umweninyu.” (Luk. 23:42, 43) Liye kam’vepile Yesu ira am’thuulele vahora yeniyo. Mbwenye yowakula ya Yesu inothonyi-edha ira liye unodha iravo yongo vom’venyathi-a mutuo. Ee-no Yohova aniwandela ira kanothuulela madawi-u, vinothapulela ira kanodha niomba landu namwasa wa madawao. Thitho sogolou kanodha nilanga namwasa wa madawo anilevelele liye.
16. N’nga Bibilya linoonga a-vi ufulu unokaana i-yo vyodawa vi-u vyaleveleliwa?
16 Bibilya lino-indi-edha basa ifwanafwani-o inango vofuna nikami-a vwechecha ufulu unokaana i-yo Yohova anilevelela na rima othene. Namwasa oi nili odawa thitho ninothuulela vyothakala, nili ninga ‘adhaari amadawo.’’ Mbwenye Yohova anilevelela ninokala ninga adhaari ‘athathuliwile wu madawo.’ (Aro. 6:17, 18; Apk. 1:5) Naidhiwa ira Yohova utonilevelela ninokala osangalala ninga adhaari enao athathuliwile.
“Mutothathuliwa wu vyodawa” (Aroma 6:18)
17. N’nga levelela unoniiri-a a-vi ira niili-iwe? (Esaya 53:5)
17 Muleri Esaya 53:5. Ifwanafwani-o yomari-a inofuna i-yo tapanya inofwanafwani-edhela atu anombulela mareda oopi-a. Vo-indi-edha basa sembe ya Mwanee mopipirisa Yohova unoniili-a. (1 Pe. 2:24) Khuto linonikami-a ira nikale okoka vauxamwali na Yohova wenuo wanongeile namwasa wa marenda oopi-ale. Molandana na mutu unosangalala aili-iwa marenda malukhulu, na i-yene thitho ninosangalala naili-iwa mwauzimu nokala okoka vauxamwali wapama na Yohova namwasa oi utonilevelela.
“Namwasa wa vilodavyee i-yo nitoili-iwa” (Esa. 53:5)
N’NGA LEVELELA WA YOHOVA UNONIKAMI-A A-VI?
18. N’nga ninofunjedhavon’ni va vifwanafwani-o vya Bibilyani vyokuza levelela wa Yohova? (Muone thitho kwadru loi “Mwemo Yohova munolevelela liye.”)
18 N’nga nifunjedhilevon’ni va vifwanafwani-o vya Bibilyani voonga vyolevelela wa Yohova? Liye unonilevelela na rima othene thitho mwasuo unomalela vevo. Vyevi vinonikami-a kala va uxamwali wapama na Babi-u wadhulu. Ninothuulela ira levelela wa Yohova chotuva. Liye unoniva-a yotuvai namwasa waudhivelee thitho riya wee rima ulukhulu. Kanonilevelela namwasa oi ngu ufulwi-u ira anilevelele.—Aro. 3:24.
19. (a) N’nga mwasiwa ngwan’ni ninofwanela simbanga? (Aroma 4:8) (b) N’nga ninodha tapanyan’ni muyofunjedha yo-arela?
19 Muleri Aroma 4:8. Ninosimba maningi Yohova namwasa oi liye ngu Nlungu ‘unolevelela na rima othene.’ (Sal. 130:4) Mbwenye Yohova anilevelele ninofuneya ira yongo inango yofuneya maningi. Yesu atoonga ira: “Mbwenye akala kamunolevelela atu vyodawa viwa, Babinyu wadhulu thitho kanodha ulevelelani.” (Mat. 6:14, 15) Ee-no ninofwanela m’sazi-edhanga Yohova volevelela atu enango. N’nga ninaire a-vi vyevi? Yofunjedha yo-arela inonikami-a ona mwemo munairele i-yo vyevi.
NYUMBO 46 Tikukuthokozani Yehova
a Madhu a Ieberi enao ano-indi-edhiwa basa valembali mbamadhu enala baa-i anoonga vya ‘levelela na rima othene’ angalive ira vatokala ndhila ndhinango dholevelela. Mabibilya manjinji katinothonyi-edha i-yana weu mbwenye Baibulo la Dziko Latsopano la Malemba Opatulika linothonyi-edha i-yana weu va lemba la Salimo 130:4.