MURU OFUNJEDHA 10
NYUMBO 31 Muziyenda Ndi Mulungu
Nisazi-edhenga moda munothuulela Yohova na Yesu
“Voi Kristu atoona nyarwa vahora yali liye mutu, nanyeene thitho mukozeele vokaana mathuulelo ofwanafwana na ana Kristu”—1 PE. 4:1.
VINOFUNA I-YO FUNJEDHA
Muyofunjedha yei ninoona mwemo Pedru mwafunjedhele liye kaana mathuulelo ninga a Yesu thitho mwemo munofwanela i-yo irana.
1-2. N’nga m’dhiveliwana Yohova unothangani-avon’ni, n’nga Yesu athonyi-edha a-vi ira anom’dhiveliwana Yohova na rimee othene?
“MUM’DHIVELIWENA Yohova Nlungu na riminyu othene, ingumiinyu yothene, kopolo dhinyu dhothene namathuulelwinyu othene.” (Luk. 10:27) Veva Yesu athonyi-edha ira yen’na tilamulo loroma lofuneya maningi muilamulo yava-wile Mose na Nlungu. Muone ira m’dhiveliwana Yohova unothangani-avo rimi-u, wenuo unoimelela vyongo vinodhiveliwana i-yo, mwemo munovivwela i-yo thitho mwemo munothuulela i-yo. Unothangani-avo thitho dhivelela wa Yohova na rimi-u othene na kopolodhi-u dhothene. M’dhiveliwana Yohova unothangani-avo mathuulelwi-u enao anoimelela moda munoonela i-yo myasa yo-iyanana i-yana. Pyaimbarimbari ira kaninavwecheche mokwakwanela mwemo Yohova munothuulela liye. Mbwenye ninooda vwechecha mwemo Nlungu munothuulela liye vofunjedha “mathuulelo a Kristu,” namwasa oi Yesu unosazi-edha ninga mwemo munothuulela Babee.—1 Ak. 2:16
2 Yesu anoodhiveliwana Yohova na rimee othene. Liye anoidhiwa vyongo vyafuna Nlungu ira liye aire thitho ali okozeya irana vyongo movwelana na vyevyo angalive ira vingairi-idhe ira agumanena nyarwa. Voira liye anothuulela maningi vyom’sangalali-a Babee, Yesu kaarumeli-idhe ira iliyothene yim’mwimwanani-e kwakwaneli-edha ifunelwee.
3. N’nga rumiwi Pedru afunjedhile n’ni wa Yesu, n’nga alimbi-idhe Makristau afwee tairena n’ni? (1 Pedru 4:1)
3 Pedru naarumiwi afwee tatookaana ngari yokhaati vambo-i na Yesu thitho tatoofunjedha mwemo Yesu mwathuulela liye. Vevo Pedru valemba liye kartalee lovudheleliwa atolimbi-a makristau ira tavikozeeli-edhanga kaana mathuulelo ninga ana Kristu.a (Muleri 1 Pedru 4:1.) Vahora yaongile Pedru ira nanyeene thitho “mukhozeele,” atoo-indi-edha basa madhu enao ilamulo yoroma aonga vya nyakhondo wenuo utukhunle fwarametwee yakhondo vokhozeela khondo. Ee-no makristau tasazi-edha mwemo mwathuulela Yesu takhala ira tatotukhula mafwaramento akopolo enao taakhami-e limbanana madao thitho ilambo yotongiwa na Satanila.—2 Ak. 10:3-5; Aef. 6:12.
4. N’nga yofunjedha yei inonikami-a a-vi ira ni-arelenga malangi-o enao avelenle Pedru?
4 Muyofunjedha yei ninotapanyani mwemo mwathuulela Yesu thitho ninoona mwemo munasazi-edhele i-yo. Ninoona vyongo vinaire i-yo ira (1) nisazi-edhenga mathuulelo a Yohova, vyongo vinanikami-e ira i-yo othene nikaena mathuulelo mambo-ive, (2) nikhale odhiyevi-a, thitho (3) nithuulelenga pama m’nyindela Yohova volobela wa liye.
NISAZI-EDHENGA MODA MUNOTHUULELA YOHOVA
5. N’nga vahora inango Pedru aimwam’nena a-vi kaana mathuulelo ninga ana Yohova?
5 Kathuulelani moda vyaireile vahora inango vevo Pedru vakhondile liye akhaana mathuulelo a Yohova. Yesu atoowandela arumiwee ira unofwanela dhowa wu Yerusalemu thitho unodha veleliwa mandhani mwaanamasogolela amareligiau, unodha oni-iwa nyarwa thitho vasogolovee unodha phiwa. (Mat. 16:21) Vinooneya ira vyatoorucha maningi Pedru roromela ira Yohova unodha rumela ira Yesu, wenuo ali idedi-edho Yaisraeli thitho Mesiya olanyedhiwa, aphiwe. (Mat. 16:16) Moi e-no Pedru atom’tukhula Yesu nom’dhowana vakhundu m’sumulula ira: Mbwiyeni mudhivwele tangaranga mwekhene kamurumeli-e navang’onovene ira vyevi viuireeleni.” (Mat. 16:22) Voi Pedru kaathuulela ninga Yohova, khaana mathuulelo ofwanafwana na a Yesu.
6. Ndi ndhila iivi yeniyo Yesu athonyi-edhe liye ira uthuulela ninga mwemo munothuulela Yohova?
6 Mathuulelo a Yesu tali ovwelana na a Babee wadhulu. Yesu atom’mwandela Pedru ira: “Dhowa nduli wanga Satana wee uli yogwegweducha wa miyo namwasa oi mathuulelwaa kai mathuulelo a Nlungu mbwenye mathuulelo aatu.” (Mat. 16:23) Vinooneya ira Pedru atookaana vifunelo vyapama, mbwenye Yesu atookhonda a-rela malangi-oee yen’na chofunjedha wa i-yo. Kayali ifunelo ya Yohova ira Yesu adhakaena ingumi vo-ogumanana nyarwa iliothene. Vahoriyo Pedru atoofunjedha likhundo lofuneya maningi loi afwanela khaana mathuulelo a Yohova.
7. N’nga Yesu athonyi-edhe a-vi ira afwanela chinja ira mathuulelwee tavwelanenga na a Yohova? (Muone iruthiruthi yavakapani.)
7 Vangavirile hora, Pedru atoothonyi-edha ira afwanela funjedha ira atu tathuulelenga moda Yohova muthuulela liye. Hora ya Yohova yali ingakwakwanile yoi atu amaziza enango enao tali o-oineliwa wuikhundu yaatu a Nlungu. Pedru atoorumiwa ira amalaleele wa Kornelio, wenuo ali mutu oroma mwaatu amaziza enango khala Kristau. Ayuda katawendelana naatu amaziza enango, ee-no pyo-odabwi-a ira Pedru afwanela khozeeli-edhiwa pama ira amaire urumiwi uva-iwile iye. Pedru angazindiyele vyongo vyafuna Nlungu vahoriyo atoochinja mathuulelwee. Vyo-arelavovyee pyoi, Kornelio angam’vephile ira adhowe nyumbaniwee, Pedru atoodhowa ‘mo-okaikela.’ (May. 10:28, 29) Liye atoolaleela wa Kornelio naatu abanjalee thitho aliwa tatoobadiziwa.—May. 10:21-23, 34, 35, 44-48.
Pedru avolowanga m’mba mwa Kornelio (Muone ndima 7)
8. N’nga Yesu athonyi-edhe a-vi ira mathuulelwi-u anovwelana na mathuulelo a Yohova? (1 Pedru 3:8 na madhu achindo.)
8 Vangavirile vyawa, Pedru atoolimbi-a makristau afwee ira takaena “mathuulelo mambo-ive.” (Muleri 1 Pedru 3:8 na madhu achindo.) Ninga atu a Yohova, ninooda kaana mathuulelo mambo-ive vo-arela mathuulelo a Yohova, enao anoongiwa mumadhwee Bibilyani. Mwaifwanafwani-o, Yesu atoolimbi-a anama-arelee ira ta-elenga Umwene valimburo loroma. (Mat. 6:33) Vothuulela vyevi, namalaleeya unango pingoni mwinyu unodha thuulelanga vyoi arome urumiwi unangwee wahora dhothene. Malo molimbi-a ira adhivwele tangaranga, ninofwanela onga madhu apama okhuza vyongo visakhunle liye thitho m’kami-a ira akwakwaneli-edhe ifunelwee.
MUKALE ODHIYEVI-A
9-10. N’nga Yesu athonyi-edhe a-vi dhiyevi-a mundhila yavakhundu?
9 Va dambolee lomari-a, Yesu atom’funji-a Pedru naarumiwi afwee likhundo lofuneya maningi lokhuza dhiyevi-a. Va dambolo Yesu ali angarumile Pedru na Juwau ira tamakozeele vyongo vinango, vokozeela yodya yomari-a yeniyo yafuna aliwa udya vambo-i a-anaphiwe. Vokozeelavo, tafwanela onechecha akala ira vatokala basiya lama-inje thitho yopuputana naifunelo yoi alendo tadha, tadha-uwiwe manyalo a-anadye yodya. N’nga mbaani afuna laba basa yeniyo yaooneya ninga njonyozeya?
10 Mo-ovira khundu, Yesu atoothonyi-edha dhiyevi-a mundhila yavakhundu maningi. Vinooneya ira arumiwao tatoodabwa maningi voona Yesu alabanga basa inolabiwa naanamalaba venango mwinya vandhe. Yesu atoungula nguwee yaundhe, notukula tuwaliya inomangechana liye yununimwee, no-ela ma-inje basiyani noroma a-uwa mendo. (Ju. 13:4, 5) Vinooneya ira vyatom’tukhulela hora indendai ira amale u-wa manyalo aarumiwee 12, thangani-avo Yudasi, wenuo ali anga-adhi vang’ono ira am’velele. Mbwenye modhiyevi-a, Yesu atoomala laba basiyo. Ee-no moleva rima Yesu atoonga ira: “N’nga munoidhiwa mwasee u-uweleni miyo manyalwinyu? Nyo munondiitana ira ‘Namafunji-a’ thitho ‘Mbwiye,’munoongadi vyaimbarimbari, namwasa oi ndili Namafunji-a thitho Mbwiye. Ee-no akala nyo munondiitana Mbwiye thitho Namafunji-a, nditou-uwani manyalwinyu nyo thitho munofwanela u-wana manyalo.”—Ju. 13:12-14.
Dhiyevi-a waimbarimbari unothangani-avo mwemo munovithuulela i-yo thitho atu enango
11. N’nga Pedru athonyi-edhe a-vi ira ali angafunjedhile khala odhiyevi-a? (1 Pedru 5:5) (Muone thitho iruthiruthi.)
11 Pedru atoofunjedha dhiyevi-a khumela wa Yesu. Yesu angawelenle dhulu, Pedru atooira yodabwi-a voili-a mutu oi abaliwile angali orangala. (May. 1:8, 9; 3:2, 6-8) Vyongo vyairile liyevi vyatooiri-a ira atu anjinji tagumaneye valimburoniva. (May. 3:11) N’nga Pedru kai angasakhunle ira titimi-o lidhowe wa liye vothuulela ira aulukhulile muikhalelo yoi inoona ira vweya na izo pyofuneya maningi? Khabe, modhiyevi-a Pedru kaarumenle ira atitimi-iwe, malomwee atoovelela titimi-o wa Yohova na wa Yesu voonga ira: “Dhina la [Yesu] thitho namwasa oi ninororomela dhina leelo, mutu unom’mona nyoula thitho mutu um’mwidhi nyoula utoila.” (May. 3:12-16) Madhu a-indi-edhe basa Pedru karta volembela makristau vamwasa ofuneya okhala odhiyevi-a, unonithuucha vyongo vyairile Yesu vomanga tuwaliya yununimwee, no-uwa manyalo aarumiwee.—Muleri 1 Pedru 5:5.
Angairile yodabwi-a, modhiyevi-a Pedru atoovelela titimi-o wa Yohova na Yesu. I-yo thitho ninooda thonyi-edha ira nili odhiyevi-a, nairanga vyongo vyapama vo-odedi-edhela ira atu tanione venango taniva-e titimi-o (Muone ndima 11-12)
12. Moladana na Pedru, n’nga ninathonyi-edhe a-vi ira nili odhiyevi-a?
12 Ninooda tukhulela ifwanafwani-o ya Pedru vokala odhiyevi-a. Kathuulelani ira dhiyevi-a unothangani-avo vyongo vinjinji a-kala onga madhu apama baa-i. Madhu a-indi-edhe basa Pedru voonga vodhiyevi-a, anothonyi-edha ira dhiyevi-a unothangani-avo “moda munovithuulela i-yo thitho atu enango.” Ninoirela atu enango vyongo vyapama namwasa oi ninom’dhiveliwana Yohova naatu, a-kala namwasa oi atu enango tanione. Ninothonyi-edha ira nili odhiyevi-a akala ninosangalala vom’labela Yohova naabali-u, masiki atu enango ta-aonenga vyongo vinoira i-yo.—Mat. 6:1-4.
MUKHALENGA “OTHUULELA PAMA”
13. N’nga khala “othuulela pama” unothangani-avon’ni?
13 N’nga kala “othuulela pama” unothangani-avon’ni? (1 Pe. 4:7) Kristau othuulela pama unodhilimbi-edha irana vyongo votukhulela mathuulelo a Yohova. Kristau wen’na unoidhiwa ira kala vauxamwali na Yohova kofuneya maningi kwaranya yongo iliyothene. Liye kanofwanela vithuulelenga kwaranya mwemo munofwanela liye vithuulela, namwasa oi unoidhiwa ira kanoidhiwa vyongo vyothene. Thitho unothonyi-edha ira unom’nyindela Nlungu volobela wa liye hora dhothene.b
14. N’nga vahora inango Pedru aimwam’nena a-vi m’nyindela Yohova?
14 Vama-iyu wee omari-a Yesu a-anaphiwe, atoowandela anamafunjedhee ira: “Ma-iyano nyo mwethene munotawa nondi-iya ndekhene.” Pedru atoowakhula mosikimizela ira: “Masiki othene tatawe nou-iyani, mbwenye miyo kandinou-iyani!” ma-iyu enala Yesu atoowandela anamafunjedhee ira: “Mukale methove thitho mudhowengave lobela.” (Mat. 26:31, 33, 41) Aakale ira Pedru atoo-arela malangi-o enala voroma vene, angaodile kala olimba rima norumela ira ali namafunjedha wa Yesu. Mbwenye malomwee, atookhonda mbwiyee thitho vasogolovee atoodhivwela tangaranga maningi.—Mat. 26:69-75.
15. N’nga Yesu athonyi-edhe a-vi ira ali othuulela pama va nama-iwee omari-a?
15 Yesu anoonyindela maningi Yohova. Masiki ira ali olongomana, Yesu anoolobela moweli-edha weli-edha wa Babee vyevi vyatom’kami-a ira alimbe rima noirana vyongo vyafuna Yohova. (Mat. 26:39, 42, 44; Ju. 18:4, 5) Pyooneelatu ira ona Yesu alobelanga moweli-edha weli-edha watom’kami-a Pedru waingumiyee yothene.
16. N’nga Pedru athonyi-edhe a-vi ira ali othuulela pama? (1 Pedru 4:7)
16 Vangavirile hora, Pedru atooroma m’nyindela maningi Yohova volobela wa liye. Yesu wenuo ali angavenyati-iwile, atoosikimizela Pedru naarumiwi enango ira ndinodha utumizelani zimu ochena ira muode laba basa yolaleela. Mbwenye liye atoawandela ira mumadedi-e wu Yerudalemu fiyedha vyongovyo vingaireile. (Luk. 24:49; May. 1:4, 5) N’nga Pedru airan’ni vahora yadedi-edha liye? Pedru na Makristau afwee “tanoodhilimbi-edha lobela.” (May. 1:13, 14) Vasogolovee, kartalee loroma Pedru atoolimbi-a Makristau afwee ira tanofwanela kala othuulela pama thitho m’nyindela Yohova volobela wa liye. (Muleri 1 Pedru 4:7.) Pedru atoofunjedha m’nyindela Yohova thitho thuulela pama, khuodile kami-a abali naarongola.—Agl. 2:9.
17. Masiki nikaena madodoliso enangwee avakhundu, n’nga ninofwanela dhowanave irangana n’ni? (Muone thitho iruthiruthi.)
17 Ira nikhale othuulela pama, hora dhothene ninofwanela lobela wa Yohova. Ninozindiyela ira ninofwanela lobela wa Yohova ira anikami-e, masiki nikaena madodoliso enangwee avakhundu. Ninolobela wa Yohova ira anisogolele nom’roromelanga ira liye unoidhiwa vyongo vyapama maningi wa i-yo.
Pedru atoofunjedha m’nyindela Yohova volobela wa liye. I-yo thitho ninooda khala othuulela pama nalobelanga wa Yohova ira anikami-e, simbwasimbwa nasakhulanga vyoira va myasa yofuneya maningi (Muone ndima 17)c
18. N’nga ninaire a-vi ira nichinje mwemo munothuulela i-yo nokaana mathuulelo ninga ana Yohova?
18 Ninosimba maningi Yohova namwasa onipanducha mundhila yoi niodenga a-relanga makhalelwee. (Mar. 1:26) Pyaimbarimbari ira kaninaode m’sazi-edha mu vyongo vyothene. (Esa. 55:9) Mbwenye moladana na Pedru, ninooda chinja nokaana mathuulelo ninga a Yohova. Niirengana vyevi vo-arela malangi-o a Nlungu, nokhala odhiyevi-a thitho kala othuulela pama.
NYUMBO 30 Atate Wanga, Mulungu Wanga Ndiponso Bwenzi Langa
a Thuulela pama, unofwanyeya va lemba la 1 Pedru 4:1, thitho unooda thapulela ira “thuulela pama.”
b Ira muidhiwe vyongo vinothapulela “thuulela pama” unothapulela, ira muone va jw.org na JW Library® mwasa wa valemba la, “2 Timoteo 1:7 ‘namwasa oi Nlungu kaniva-idhe zimu oova’” vaikhundu yoi “onga maverso a Bibilyani,” chindo mwa iximuru yoi “thuulela pama.”
c MADHU AIRUTHIRUTHI: Rongolanga alobela rimani vahora yadedi-edha liye fukiwa vyofuka a-analembiwe basa.