Mudhowenave wenda movwelanana iroromelo

1. Mwasiwa ngwan’ni Paulo anoosangalala athuulela vyongo viirile liye vaurumiwee?

VAHORA inango rumiwi Paulo atooidhiwa ira a-adhi hora yoyeva ira aphiwe. Mbwenye atoosangalala idhiwa ira utoira yongo iliyothene yafuneela liye irana vaingumiyee. Vothuulela vyevi liye aongile ira: “Nditothamanga va pikisanula fiyedha komoni. Nditokaanave iroromelo.” (2 Ti. 4:6-8) Paulo anoosakula vyoira mwazelu va urumiwee thitho kaakaikela ira Yohova unosangalala na liye. Na-iyene thitho ninofwanela sakhulanga vyongo mwazelu ira Yohova asangalalenga na i-yo. N’nga ninaire a-vi vyevi?

2. N’nga wenda mosogoleliwa nairoromelo unothapulelan’ni?

² Voonga vya liye thitho navya Makristau enango ororomeleya, Paulo aongile ira: “Ninowenda mosogolelowa na iroromelo, a-kala mosogoleliwa na vyooneya na metho.” (2 Ak. 5:7) N’nga Paulo athapulelan’ni veva? Bibilya, hora dhinango madhu oi “wenda” vinothapulela vyongo vinosakhula mutu irana vaingumiyee. Mutu awendanga mosogoleliwa na vyongo vinoona liye, unosakhula vyongo vinoona liye na metwee, vinovwa liye na mabarwee thitho namwemo munodhivwela liye rimanimwee. Voi mutu unowenda mosogoleliwa nairoromelo, unom’nyindela Yohova thitho unosakhula vyongo votukulela na mwemo munofuna Yohova. Vyongo vinoira liye vinothonyi-edha ira Nlungu unodha m’raeli-a thitho ira vyongo vinodha m’mwendela pama a-arelanga malangi-o a Yohova ofwanyeya m’madhwee.—Sal. 119:66; Aeb. 11:6.

3. N’nga ninofwanya maraeli-o oi a-vi nawendanga mosogoleliwa nairoromelo? (2 Akoritiyo 4:18)

³ Pyooneelatu ira i-yo othene ninosakula vyongo votukulela vyongo vinoona i-yo venango vinovwa i-yo. Mbwenye nasakhulanga vyoira va myasa ilukhulu votukulela vyongo vinoona i-yo venango uvwa, ninooda gumanana nyarwa dhilukhulu. Ninoonga ee-no namwasa oi metho na rimi-u vinooda nipusi-a. Ninooda roma vwalavwali-anga vyongo vinofuna Nlungu venango malangi-oyee. (Nam. 11:9; Mat. 24: 37-39) Mbwenye nawendanga mosogoleliwa nairoromelo, ninodha sakhula vyongo vyevyo ndi “vyorumeleya wa Mbwiye. (Aef. 5:10) Na-arelanga malangi-o a Nlungu ninodha kaana rendele warimani thitho ninodha kaana ingumi yosangalala. (Sal. 16:8, 9; Esa. 48:17, 18) Nadhowanganave wenda mosogoleliwa nairoromelo, ninodha fwanya ingumi yo-oma.—Muleri 2 Akoritiyo 4:18.

4. N’nga ninaidhiwe a-vi akala ninosakula vyongo mosogoleliwa nairoromelo venango vyooneya na metho?

⁴ N’nga ninaidhiwe a-vi ira ninowenda mosogoleliwa na iroromelo venango vyooneya na metho? Ninofwanela dhifukanga vyofuka vi: N’nga ndinosakhula vyongo votukhulelan’ni? N’nga ninosakhula vyongo votukhulela vyongo vinoona miyo na metho? N’nga ndinom’nyindela Yohova no-arelanga malangi-oee vosakhula vyoira? Muyofunjedha yei ninoona vyongo vinanikami-e ira nidhowenave wenda mosogoleliwa nairoromelo vikhundo viraruvi: Vosakhula basa, vosakhula mutu unam’thelanane i-yo thitho gulu la Nlungu laniva-a malangi-o. Votapanya ikhundu iliyothene, ninoona vyongo vinanikami-e ira nisakhulenga vyoira mwazelu.

NASAKULANGA BASA

5. N’nga hora dhinjinji ninothuulelan’ni nasakulanga basa?

⁵ I-yo nothene ninofuna ira nifwanye vyongo vyofuneeleya vyavaingumii-u thitho fwanyela atu abanja li-u vyongo vyofuneeleya vyavaingumini. (Nam. 7:12; 1 Ti. 5:8) Mabasa enango anokala akobiri dhinjinji. Mutu unooda fwanya vyofuneeleya vya vaingumini nolokota thitho kobiri dhinango moi adha-indi-edhe basa sogolou. Moi mabasa enango anokala akobiri dhoyeva voi mutu unooda fwanya vyowara vyodya na vogona baa-i. nasakanga basa ninothuulela kobiri dhinawachele i-yo. Mbwenye akala mutu unothuulelave vyongo vyevi baa-i unooda kala mutu wenuo unowenda mosogoleliwa na vyongo vinoona liye baa-i.

6. N’nga ninathonyi-edhe a-vi ira nitokaana iroromelo nasakulanga basa? (Aebere 13:5)

⁶ Akala nitokaana iroromelo, ninooda thuulelanga vya basa yeniyo inasakule i-yo munakhuzele aliwa uxamwali-u na Yohova. Ninooda dhifuka ira: “N’nga basila inodha ndiiri-a ira ndiirenga vyongo vinoidanana Yohova?” (San. 6:16-19) “N’nga ndinodha dodomi-a lambela wanga thitho inodha iri-a ira ndi-iyane na banja langa wahora yolaphela?” (Afl. 1:10) Akala ndi-eeno, kavinodha kala pama rumela basiyo angalive ira mabasa anosoweya. Namwasa oi nitokaana iroromelo, vyongo vinasakhule i-yo vinofwanela thonyi-edhenga ira ninororomela ira Yohova unodha nisamalela.—Mat. 6:33; muleri Aebere 13:5.

7-8. N’nga bali mwinango wau Amerca do Sul athonyi-edhe a-vi ira awenda mosogoleliwa nairoromelo?

⁷ Bali mwinango wau Amerca do Sul dhinalee Javier,a atoona upama owenda mosogoleliwa nairoromelo. Liye aongile ira: “Ndanoofuneela basa linango lapama. Pagaliwee wali othangani-a fendo winli weo wawachela miyo thitho ndanoosangalala.” Mbwenye Javier ali afunechecha angairile upainiya, ee-no atoonga ira: “Ndatooitaniwa ira ndimagumane na patarau wavaiperezanivo. Nda-anagumane na patarauo ndatoolobela namwasa oi ndanooidhiwa ira Yohova ngwenuo aidhiwa vyongo vyapama wa miyo. Ndanoofuna basa yapama thitho kandafuna ira basiyo indiimwanani-e kwakwaneli-edha ifunelo yanga yauzimu.”

⁸ Javier aongile ira: “votapanya na patarauo, atoondiwandela ira hora dhinjinji ndilabenga mahora owenjedheleya. Ndatoom’mwandela mwalemezo ira kandinaode namwasa oi hora dhinango ndinofuneela laleela thitho fwanyeya vamigumanoni.” Ee-no Javier atookonda basiyo. Vangavirile masumana menli liye atooroma upainiya. Vasogolovee yawa yeyo atoofwanya basa yalaba liye wa masumana oyeva. Liye aongile ira: “Yohova utowakhula lobelolanga thitho utondiva-a basa inolaba miyo wu ndiiranga upainiya. Ndinosangalala ira nditofwanya basa yeniyo inondiva-a hora maningi yom’labela Yohova thitho abalanga.”

9. N’nga ninofunjedhavon’ni vamwasa wa Trésor?

⁹ N’nga ninaire a-vi akala ira basa inolaba i-yo inoniimwanani-a thonyi-edha ira nitokaana iroromelo? Vyongo ninga vyevi vyatoom’muireelavo bali mwinango dhinalee Trésor. Liye aongile ira: “Basanga yali yapama maningi. Ndanoowachela kobiri dhinjinji thangani-a fendo uraru na kobiri dawachela miyo voroma. Atu anjinji tanoondilemeza.” Mbwenye hora dhinjinji Trésor anoolaba mahora owenjedheleya moi kaafwanyeya vamigumanoni. Hora dhinango anookanyi-edhiwa ira alokote vyongo vyainyengo. Trésor anoofuneela ira a-iye basiyo mbwenye anoova a-fwanya basa inango. N’nga chini yam’kami-idhe ira a-iye basiyo? Liye aongile ira: “Lemba la Abakuku 3:17-19 yatoondikami-a idhiwa ira Yohova unodha ndisamalela angalive ira basanga itomala. Ee-no ndatoo-iya laba basiyo.” Liye aongile ira: “Mapatarau anjinji tanoothuulela ira mutu unooda lolela ira a-akaengana hora yowaredha maningi na banjalee thitho lambela Nlungu naifunelo yoi alabenga basa yokaana kobiri dhinjinji ndinosangalala ira nditobarela uxamwalanga na Yohova thitho na banja langa. Vangavirile mwedi mbo-i liye atoondikami-e fwanya basa. Ndawachelecha kobiri yoyeva mbwenye njeniyo yandiva-a hora yolambela Nlungu. Na-elanga vyongo vinofuna Nlungu valimburo loroma, ninooda rucheya wa hora mbwenye liye unodha nisamalela.” Nadhowanganave nyindela malangi-o thitho vyolanyedha vya Yohova, ninodha dhowanave wenda mosogoleliwa nairoromelo thitho liye unodha niraeli-a.

NASAKULANGA MUTU UNOFUNA I-YO M’THELANANEE

10. N’nga mutu unathonyi-edhe a-vi ira unowenda mosogoleliwa na vyooneya na metho vosakula unam’thelanane liye?

¹⁰ Banja chotuva yokhumela wa Yohova thitho kavali yodaweya akala ira mutu unofuna ira akaena banja. Rongola unooda ona bali wenuo unoona liye ira unooda m’theliwanee thitho unooda thuulelanga vyongo ninga makalelwee, maonelwee na limbililee thitho na mwemo munofwanyela liye kobiri, akala unosamalela abalee venango akala unowasangalali-a.b Vyongo vyevi ndi vyofuneya. Mbwenye akala unongo thuulelanga vyongo vyevi baa-i, unooda wendanga mosogoleliwa na vyongo vinoona liye baa-i.

11. N’nga ninathonyi-edhe a-vi iroromelo vosakula mutu unam’thelanane i-yo? (1 Akoritiyo 7:39)

¹¹ Yohova unosangalala aona abali naarongola ta-arelanga malangi-oee vosakula mutu ofuna m’theliwanee. Mwaifwanafwani-o, aliwa tano-arela malangi-oee oi anofwanela akwaranye “vatungalee lauzombwe” a-anarome ira imweendi. (1 Ak. 7:36) Asakhulanga mutu om’thelananee, athuulelenga mathuulelo enao anofuna Yohova ira lombwana venango i-yana wapama anofwanela liye akaana. (San. 31:10-13, 26-28; Aef. 5:33; 1 Ti. 5:8) Akala mutu oi kai Mboni unom’funa ano-arela malangi-o ali valemba la 1 Akoritiyo 7:39, anoonga ira anofwanela thela venango theliwa “mwa mbwiye.” (Muleri.) Aliwa tanodhowanave wenda taroromelanga thitho a-kaikelanga ira Yohova baa-i ngwenuo unaakami-e ira takalenga osangalala.—Sal. 55:22.

12. N’nga ninofunjedhavon’ni vaifwanafwani-o ya Rosa?

¹² Kathuulelani ifwanafwani-o ya Rosa wenuo ndi painiya wau Colombiya. Basaniwee anoogumanana lombwana mwinango oi kai wa Mboni. Lombwanuo atoothonyi-edha ira anoom’funa thitho Rosa atooroma kopeya na liye. Rosa aongile ira: “Liye anooneya ira ndi mutu wapama. Anoolaba basa yokami-a atu atatamo lawaniwa thitho makalelwee ali apama. Anooira vyongo moriya rima na miyo. Liye atokaana makalelo othene enao afuna miyo ira lombwana afuna ndithela aakaena, mbwenye liye kaali wamboni” atoowenjedhela onga ira: “Vyali vyorucha maningi ira ndim’kodhe namwasa oi ndali ndingakopeile na liye. Vahora yeniyo ndatoosowa mutu oi ndim’mwaredhenganee thitho ndanoofuna ndingatheliwile, mbwenye ndali da-anam’fwanye bali. Rosa kaathuulela vyongo vyooneya na metho. Liye atoothuulela mwemo vyosakhulavyee munakhuzele aliwa uxamwalee na Yohova. Ee-no atoo-iya waredha na lombwanuo thitho atoodhowanave m’labela Yohova mwathindhi. Va-anavire hora indendai, Rosa atooithaniwa wu xikola ya Makristau olaleela vya Umwene. Thitho ndi painiya wavakhundu Rosa aongile ira: “Yohova utondikami-a ira ndikale osangalala maningi.” Angalive ira kai vyokweya wenda mosogoleliwa na vyongo vinororomela i-yo va-eeni va myasa ninga dhedhi, vyo-arelavyovyee vinokala vyapama.

GULU LA NLUNGU LANIVA-A MALANGI-O

13. N’nga chini inaniimwanani-e thonyi-edha iroromelo gulu la Nlungu laniva-anga malangi-o?

¹³ Hora dhinjinji ninowachelecha malangi-o okhuza lambela wi-u okhumela waandimuwa, anamaing’anela isa, ofesi yatambi venango okhumela wu Gulu Lotonga. Mbwenye hora dhinango kaninavwecheche mwasee uva-iwile i-yo malangi-o naandimuwa avapingoni. Naira ee-no ninooda ona nyarwa dhedho dhinodha namwasa wa malangi-oao. Ninooda thitho thuulelanga vinodawi-a abali anoniva-a malangi-oao.

14. N’nga chini inanikami-e wenda mosogoleliwa nairoromelo gulu la Nlungu laniva-a malangi-o? (Aebere 13:17)

¹⁴ Nakaana iroromelo, kaninokaikela ira Yohova unosogolela gululee thitho unoidhiwa vyongo moda muli aliwa. Ee-no ninokala okozeya vwela mo-okaikela. (Muleri Aebere 13:17.) Ninozindiyela ira vwela wi-u unokami-a ira pingo ukalenga ovwelana. (Aef. 4:2, 3) Angalive abali anonisigolela kai olongomana, ninororomela ira Yohova unoniraeli-a nakalanga ovwela. (1 Sam. 15:22) Akala vatokala yorucha ninoidhiwa ira anodha isaka-endha vahoree.—Mik 7:7.

15-16. Chini yam’kami-idhe bali mwinango ira awendenga mosogoleliwa nairoromelo angalive ira anookaikela malangi-o ava-iwile aliwa? (Muone thitho iruthiruthi.)

¹⁵ Vyongo vyaireile wu Peru vinothonyi-edha upama owenda na iroromelo. Angalive ira Spanyoli yali yovweya maningi ilamboyo, atu anjinji tanoonga iongelo inango yaweo ninga Ikechuwa. Wavyawa vinjinji, abali naarongo aonga Ikechuwa tanoofuneela gao laatu oonga iongelwila. Gulu la Nlungu latoovelela malangi-o mapya olaleelela, mbwenye atu enango tanookaikela akala inakale ndhila yokami-a. Mbwenye abali tanga-areele malangi-o mapyala, Yohova atowaraeli-a thitho tatooroma fwanya atu anjinji oonga Ikechuwa.

¹⁶ Keven wenuo ndi ndimuwa wa iongelo ya Ikechuwa, naliyene thitho anoovikumbanyedha. Liye aongile ira: “Ndanoodhifuka ira, ‘n’nga ninafwanye a-vi atu oonga Ikechuwa’”? N’nga Keven airilen’ni? Liye aongile ira: “Ndatoothuulela lemba la Sanganiko 3:5 thitho mwasa wa Mose. Yohova atoom’va-a Mose malangi-o enao aoneya ninga o-ovweya. Atoom’mwandela ira asogolele Aisraeli mavirana va bara yofiila. Thitho Aiguputu vyaa-ara aliwa vyaoneya ninga katinaoya. Mbwenye Mose atoovwela thitho Yohova atoom’raeli-a voira vyongo vyodambwi-a maningi.” (Eki. 14:1, 2, 9-11, 21, 22) Keven ali okozeya vwela. N’nga vyo-arelavovyee vyali vyoi a-vi? Liye aongile ira: “Ndatoodambwa na mwemo Yohova mwaniraeli-ile liye. Ndulimo nanoowenda ulendo olapa mbwenye nafwanya atu ambili oonga Ikechuwa. Va-eeni ninodhowa utatamo uli atu anjinji oonga Ikechuwa. Vyevi vitoiri-a ira nitapanyenga naatu anjinji thitho nikaena maulendo owelela na anamafunjedha Bibilya anjinji. Vamigumanwi-u vanodha thitho atu anjinji.” Onga vyaimbarimbari Yohova unoniraeli-a maningi nawendanga mosogoleliwa nairoromelo.

17. N’nga mufunjedhilen’ni muyofunjedha yei?

¹⁷ Nitoona mwemo munathonyi-edhelena i-yo iroromelo mundhila dhiraru. Mbwenye ninofwanela dhowanave wenda mosogoleliwa nairoromelo muvikhundu vyotheene vyaingumii-u ninga sakula vyosangalali-a, mafunji-edho thitho mwemo munasamalele i-yo a-ima. Nafunanga sakula vyoira kani-arelenga vyongo vinoona i-yo mbwenye nithuulelenga vyokhuza uxamwali-u na Yohova, malangi-oee thitho vyolanyedhavyee vyoi unodha nisamalela. Naira ee-no ninodha dhowanave “wenda mudhina la Yohova Nlungu modhowa nodhowa.”—Mik. 4:5.